MI ṬHENKHATTE’N AN RINHLELH CHHAN: Mi tam tak chuan Pathianin mihringte hi misual—thianghlim lo leh a ngaihsak phû lo ang lekin a hmu niin an ngai a. Rilru beidawnna nasa tak (depression) nei Kendra-i chuan Pathian thil phût chu ṭha famkim taka a tlin theih loh avângin thil tisual hle niin a inhria a. Chuvâng chuan, “Ka ṭawngṭai tawh lo,” tiin a sawi a ni.

BIBLE ZIRTIRNA CHU: Pathian Jehova chuan i ṭhat famkim lohnate chu a en a, i nihna dik tak chu a hrethiam a ni. Bible chuan: “Kan taksa siam dân hi a hriat a, vaivut mai kan ni tih a hriat reng avângin,” tiin a sawi. Chu bâkah, ani chuan “kan sualnate angin” min cheibâwl lo va, kan inlamlêt hunah zahngai takin min ngaidam zâwk a ni.—Sâm 103:10, 14.

He thuziak inzawm, a hmasa bera târ lan tâk Israel lal Davida kha han ngaihtuah teh. Pathian hnêna a ṭawngṭainaah: “Ka rîruang la famkim lo chu i mitin a hmu a, i lehkhabuah chuan ka pêngte zawng zawng hi ziak vek a ni. . . . Aw Pathian, ngun takin min en chhuak la, ka thinlung hi hria ang che,” tiin a sawi. (Sâm 139:16, 23) Ni e, a sualna chu—a châng chuan nasa hle ṭhîn mah se, Jehova’n a inlamlêtna thinlung chu a hmu thei tih Davida chuan a ring tlat a ni.

Jehova chuan mi dang zawng zawng aiin a hrethiam che a. “Mihring chuan pawn lama lan dân an en ṭhîn a, LALPA erawh chuan thinlung lam a en zâwk ṭhîn,” tiin Bible chuan a sawi. (1 Samuela 16:7) Pathian chuan i thiltih chhan—i pian hmang leh zia te, i sei len dân te, i chheh vêl dinhmun te, leh i mizia zawng zawng chu a hre kim vek a. Thil tisual ṭhîn mah la, mize ṭha neih i tumna chu a hmuin a hlut bawk a ni.

Mahse, Pathian chuan thlamuan tûr chein, ‘i nihna dik tak’ a hriatthiamna nasa tak chu engtin nge a hman? (w14-E 08/01)