1. Engtin nge Paula’n chanchin ṭha hrila thawkrimte chu a ngaih?

TIRHKOH Paula chuan chanchin ṭha hrila thawkrim a unaute chu a ngaihlu hle a. ‘Kan Pathian leh Pa hmaah chuan rin avânga in thiltihzia te, hmangaih avânga in thawh rimzia te, kan Lalpa Isua Krista beisei avânga in chhelzia te kha theihnghilh lovin kan hre reng,’ tiin a ziak a ni. (1 Thes. 1:2, 3) Jehova pawhin a mite’n a rawngbâwl nâna an tih apiang chu a tlêm emaw, a tam emaw pawh ni se, a hre rengin, a ngaihlu hle bawk.—Heb. 6:10.

2. He thuziakah hian eng nge kan sawiho ang?

² Kristian—hmân lai leh tûn laia mite—chu tam lehzuala Jehova rawngbâwl tûrin nasa takin an inpe a ni. He thuziakah hian kum zabi khatnaa mi ṭhenkhatte’n rawng an bâwl dân kan en ho ang a. Tûn laia hunbi kima rawngbâwltute hna thawh leh anmahni kan ṭanpui theih dânte kan zir bawk ang.

3, 4. (a) Engtin nge kum zabi khatnaa mi ṭhenkhatte’n rawng an bâwl? (b) Engtin nge an tisa lam mamawhte chu ṭanpui an nih?

³ Isua chuan baptisma a chan hnu lawkah khawvêl pum dêng chhuak tûr hna a tichhuak a. (Lk. 3:21-23; 4:14, 15, 43) A thih  hnuah a tirhkohte chuan chanchin ṭha thehdarh hnaah hma an hruai a ni. (Tirh. 5:42; 6:7) Entîr nân, Philipa chuan Palestina ram hmun hrang hrangah rawng a bâwl a. (Tirh. 8:5, 40; 21:8) Paula leh mi dangte chuan hla lehzualah rawng an bâwl bawk. (Tirh. 13:2-4; 14:26; 2 Kor. 1:19) Mi ṭhenkhat—entîr nân, Silvana (Sila), Marka, leh Luka—chu thil ziak chhâwngtu, a nih loh leh chhinchhiahtu an ni a. (1 Pet. 5:12) Chûng unaupa rinawm takte rual chuan Kristian unaunute pawhin hna an thawk bawk. (Tirh. 18:26; Rom 16:1, 2) An thiltawn phûrawm takte chuan Kristian Grik Pathian Lehkha Thu chu chhiar a tinuam a, Jehova’n a chhiahhlawhte a hre reng tih a târ lang bawk.

⁴ Engtin nge kum zabi khatnaa hunbi kima rawngbâwltute chu an inchâwm theih? Unaute ṭanpuina an phût lo, chuvângin an inchâwm nân hna dang an thawh châng a awm ṭhîn. (1 Kor. 9:11-15) Ṭanpuina dawn châng erawh an nei a. Chaw eiah te sâwm an ni a, awmna tûr hmun te pêk an nih bâkah, kawng danga ṭanpuina an dawng bawk. Anni chu mi mal leh kohhran pumin ṭanpui an duh a ni.—Tirhkohte 16:14, 15; Philippi 4:15-18 chhiar rawh.

5. Engtin nge nupa tuak khatin hunbi kima an rawngbâwlna chungchâng an sawi chhuah?

⁵ Tûn laiah pawh hian mi tam takte chu hunbi kima rawngbâwlna hrang hrangah nasa takin an inhmang a ni. (“ Hunbi Kima Rawngbâwlnate” tih bâwm chu en rawh.”) Engtin nge an rawngbâwlna chu an ngaih? Chu chu anmahni i zâwt thei a, chutianga i zawh avâng chuan hlawhtling i inti hle ang. Entîrna pakhat han ngaihtuah teh: Unaupa pakhat, regular pioneer, special pioneer, missionary, leh bethel-a ram danga rawngbâwl tawh chuan heti hian a sawi a ni: “Hunbi kima rawngbâwl hi duhthlanna ka siam tawh azâwnga ṭha ber a ni. Kum 18 mi ka nih chuan university-a training neih nge pioneer thawh ka thlan dâwn tih chungchângah thutlûkna harsa tak ka siam a ngai a. Thiltawn chuan Jehova’n hunbi kima a rawngbâwl tûra kan inpêkna a theihnghilh lo tih min hmuhtîr a ni. Khawvêl lamah tlân ila chuan Jehova min pêk ka theihna leh thiamnate chu hetiang hian ka hmang thei ngai hauh lo vang,” tiin. A nupui chuan heti hian a sawi bawk: “Kan hna thawh apiang chuan ṭhang chho tûrin min ṭanpui vek a. Nuam kan tih ang chauhva kan awma kan neih ngai loh tûr Jehova vênhimna leh kaihhruaina chu ka dawng nawn reng a ni. Nî tin hian hunbi kima rawng kan bâwl avângin Jehova hnênah lâwmthu ka sawi ṭhîn,” tiin. Chutianga i nun thlîr chu i duh em?

6. Engtin nge Jehova’n a rawng kan bâwlna chu a ngaih?

⁶ Mi ṭhenkhatte chu an dinhmunin a zir loh avângin hunbi kima rawngbâwlnaah an tel thei hrih lo va. Jehova chuan thinlung zawng zawnga a rawng an bâwlna chu a hlut tih kan ring tlat thei a ni. Entîr nân, Philemona châng 1-3-ah Paula chuan Kolossa kohhrana unau zawng zawngte chibai bûkna a thawn a, ṭhenkhat chu an hming a sawi lang a ni. (Chhiar rawh.) Paula chuan an thawh rimna chu a ngaihlu a, Jehova pawhin a ngaihlu bawk. Chutiang bawk chuan vâna kan Pa chuan kan rawngbâwlnate a ngaihlu a ni. Mahse, engtin nge hunbi kima thawk mêkte chu kan ṭanpui theih ang?

7, 8. Eng nge pioneer rawngbâwlnaah chuan tel a, engtin nge kohhrana mi dangte’n an ṭanpui theih?

⁷ Kum zabi khatnaa chanchin ṭha hriltute angin, pioneer taima takte chu kohhrante tichaktu an ni tak zet a. Mi tam takte chuan  rawngbâwl nân thla tin dârkâr 70 an pe a ni. Anni chu engtin nge i ṭanpui theih ang?

⁸ Pioneer pakhat Shari-i chuan: “Pioneer-te chu nî tina rawngbâwla an chhuah ṭhin avângin chak tak angin an lang a. Mahse, fuihna an mamawh reng tho a ni,” tiin a sawi. (Rom 1:11, 12) Unaunu dang pakhat, hun engemaw chhûng pioneer thawk tawh chuan an kohhrana pioneer-te chungchâng chu heti hian a sawi a ni: “An thawk rim hle a, duhtâwk chin pawh an nei lo. Mi dangte’n an rawngbâwlna hmuna an thlah a, chaw ei tûra an sâwm a, kal vêlna man tûr leh thil dang atân sum tlêm azâwng an han pêk hian an lâwm thei hle a ni. Chûngte chuan ngaihsak an ni tak zet tih a lantîr a ni,” tiin.

9, 10. Engtin nge mi ṭhenkhatte’n an kohhrana pioneer-te an ṭanpui?

⁹ Pioneer-te chu an rawngbâwlnaah ṭanpui i duh em? Pioneer pakhat Bobbi-i chuan: “Kâr tluanin ṭanpuina kan mamawh thei hle a ni,” tiin ngenna thu a sawi a. Chu mi kohhrana mi tho pioneer dang chuan heti hian a sawi belh bawk a ni: “Chawhnu lama thawhpui tûr kan nei lo hi kan harsatna ber a ni,” tiin. Brooklyn Bethel-a rawngbâwl mêk unaunu pakhat chuan a lo thawh tawh ṭhin pioneer rawngbâwlna chungchâng chu ngai takin heti hian a sawi: “Unaunu pakhat chuan car a nei a, ‘Kawppui tûr i neih loh apiangin min rawn be ṭhîn la, rawngbâwlnaah ka chhuah pui dâwn che a nia,’ tiin min hrilh a. Ka pioneer thawhnaah min ṭanpui tak zet a ni,” tiin. Shari chuan heti hian a sawi bawk: “Rawngbâwlna neih zawh chuan pioneer nupui pasal nei lote chu mal takin an awm ṭhîn. Chhûngkuaa Pathian biakna neih hunah a châng chângin in sâwm tel thei a. Thil dang tihnaa teltîr ve ṭhinna pawhin anni chu a tichak a ni,” tiin.

¹⁰ Unaunu pakhat, kum 50 dâwn lai hunbi kima rawngbâwl tawh chuan pasal la nei lo unaunu dangte nêna pioneer an thawh lai chu ngaihtuah lêtin heti hian a sawi a ni: “Kan kohhrana upate chuan thla hnih danah pioneer-te chu an tlawh ziah a. Anni chuan kan hrisêl ṭhat leh ṭhat loh te, hna dang kan thawh chungchâng te, leh rilru hahna kan neih leh neih loh te min zâwt ṭhîn. Min ngaihtuah tak zet a. Ṭanpuina kan mamawh leh  mawh loh hre tûrin kan awmna hmunah min tlawh ṭhîn a ni,” tiin. Hei hian Ephesi khuaa chhûngkaw pa ber pakhat ṭanpuinate Paula’n a hlut tûrzia min hriat chhuahtîr thei a ni.—2 Tim. 1:18.

11. Special pioneer anga rawngbâwlnaah chuan eng thilte nge tel?

¹¹ Kohhran ṭhenkhatte chuan special pioneer-te an neih avângin an nihlawh hle a. Chûng unaute chuan thu hrilh rawngbâwl nân thla tin dârkâr 130 an hmang ṭhîn. Thu hrilh nân leh kohhran thiltih dangahte hun an hman tam avângin pâwn lam hna thawh nân hun tlêmtê an hmang, a nih loh leh chutiang atân chuan hun an nei lova. An rawngbâwlnaa rilru an pêk theih nân branch office chuan thla tin a âwm tâwk lâwmman a pe a ni.

12. Engtin nge upate leh midangte’n special pioneer-te chu an ṭanpui theih ang?

¹² Engtin nge special pioneer-te chu kan ṭanpui theih ang? Branch office-a awm upa pakhat chuan heti hian a hrilhfiah a ni: “Anni chu upate’n an biak ṭhin a, an dinhmunte an hriat a, an ṭanpui theih dân an ngaihtuah a ngai a ni. Mi ṭhenkhatte chuan special pioneer-te’n ṭanpuina an dawn avângin ṭanpui ngai tawh lo angin an ngai a, mahse tualchhûnga unaute chuan kawng tam takin an ṭanpui thei a ni,” tiin. Regular pioneer-te ang bawkin Special pioneer-te pawhin thu hrilh rawngbâwlnaa ṭhian neih chu an ngaihlu hle a ni. Chutiang kawngah chuan i ṭanpui thei ang em?

13, 14. (a) Eng nge bial kantute chungchângah kan hriat reng ang? (b) Eng kawngin nge bial kantute chu i ṭanpui theih i rin?

¹³ Bial kantute leh an nupuite chu thlarau lama chak tak leh hlim reng anga ngaih an ni ṭhîn a. Mahse, anni pawhin fuihna te, rawngbâwlnaa thawhpui tûr ṭha te, leh a inbuk tâwk intihhlimna te chu an mamawh a ni. An dam lohva, damdawi ina an awm a ngaih chuan, inzai emaw, physical therapy lâk emaw hial pawh ngai ta se, ṭanpui an mamawh ang em? An mamawhnaa ṭanpui an nih a, an chunga ngaihsakna lantîr a nih hian an hahdam phah ṭhîn. “Dâktawr duh tak” Luka’n Paula leh a zinpuite ngaihtuahna a lantîr dân tûr chu kan mitthla thei âwm e.—Kol. 4:14; Tirh. 20:5–21:18.

¹⁴ Bial kantute leh an nupuite chuan ṭhian ṭhate an mamawhin, an ngaihlu hle a. Bial kantu pakhat chuan heti hian a ziak a ni: “Ka ṭhiante chuan fuih ka ngaih hun chu an hria niin a lang. Hrethiam takin zawhna min zâwt a, chu chuan ka thil ngaihtuahte sawi chhuak tûrin min pui a ni. Ṭha taka ngaithlain, ṭanpuitu ṭha tak an ni,” tiin. Bial kantute leh an nupuite chuan unaute’n a mi mal taka anmahni ngaihsakna an lantîr chu an ngaihlu hle a ni.

15, 16. Engvângin nge Bethel-a rawngbâwltute hna thawh chu a pawimawh a, engtin nge kan ṭanpui theih?

¹⁵ Bethel-a rawngbâwltute chuan chanchin ṭha hrilhna ṭanpuitu hna pawimawh tak an thawk a ni. In kohhran, a nih loh leh in bial chhûngah Bethel-a rawngbâwltute an awm a nih chuan engtin nge i hriat reng theih ang?

¹⁶ Bethel-a an awm ṭantirh chuan an chhûngte leh ṭhian duh takte an kalsan avângin an lung a lêng hle pawh a ni thei a. Bethel-a an awmpuite leh an awmna kohhrana mite’n ṭha taka an lo dawnsawn hian anni chu an va lâwm ṭhîn êm! (Mk. 10:29, 30) Bethel-a awmte chu nitina an hna thawh chuan kohhran inkhâwmah leh kâr tina thu hrilh rawngbâwlnaah a teltîr thei a. Mahse, an thawh ṭhîn dân pângngai aia an thawh rei a ngaih châng pawh a awm ṭhîn. Chu chu kohhrante’n  an hriat thiam a, an mahni leh an hna thawh ngaihhlutna an lantîr hian an vaiin an hlâwkpui a ni.—1 Thessalonika 2:9 chhiar rawh.

17, 18. Eng hnate nge ram danga rawngbâwlnaah tel?

¹⁷ Ram danga rawngbâwl thlangtute chuan an hriat ṭhan nêna inang lo tak chaw, ṭawng, hnam chîn dân, leh dinhmunte an hmachhawn mai thei a ni. Engvângin nge chutiang inthlâk danglamna chu an thlan?

¹⁸ Ṭhenkhat chu missionary, a bîk taka zirtîrna an dawnte mi tam takin an hlâwkpui theihna hmuna rawngbâwltute an ni a. Branch office chuan an awmna tûr leh an mamawh phuhrûk nân lâwmman a pe a ni. Ram danga hna thawk tûra tirh mi dangte chu branch office-ah rawngbâwl tûra tirh an nih loh leh branch office, remote translation office, Assembly Hall, a nih loh leh Kingdom Hall saknaahte ṭanpui tûra tirh an ni. Ei tûr, awmna tûr hmun inâwm tâwk tak, leh ṭanpuina dangte pawh pêk an ni bawk. Bethel-a awm mi dangte ang bawkin inkhâwmnaahte leh tual chhûnga thu hrilh rawngbâwlnaahte an tel ziah a, kawng tam taka malsâwm an ni.

19. Ram danga rawngbâwltute chungchângah eng nge kan hriat ngai?

¹⁹ Engtin nge hunbi kima rawngbâwltute chu i ṭanpui theih ang? A hmasa berin tual chhûnga ei tûr ṭhenkhat chu an la ei ṭhang lo mai thei tih hre reng ang che. Chuvângin, chaw ei tûra i sâwm hunah, an ei duhzâwng emaw, ei chhin an duh tûr emaw chu i zâwt hmasa thei ang. Tualchhûnga ṭawng hman leh hnam chîn dânte an zir lai chuan an chungah dawh thei ang che. I thusawi hre kim tûr chuan hun engemaw chen a mamawh dâwn a, mahse an lam rîk dânah chuan ngilnei takin i ṭanpui thei a ni. Zir thiam ngei an duh si a!

20. Engtin nge hunbi kima rawngbâwltute leh an nu leh pate kan ṭanpui ang?

²⁰ Hunbi kima rawngbâwltute ang bawkin an nu leh pate pawhin tar hun an nei a. An nu leh pate Thuhretu an nih chuan, an thil duh ber chu an fate’n rawng an bâwl zawm zêl a ni. (3 Joh. 4) Hunbi kima rawngbâwltute chuan an nu leh pate’n enkawl an ngaih hunah chuan an theih tâwpa enkawlin, a rang thei ang berin an ṭanpui ngei ang. Mahse, in lama awmte chuan hunbi kima rawngbâwltute chu ṭanpuiin, an nu leh pa tar tawhte’n ṭanpuina an mamawh hunah ṭanpui an inpeih reng a ni. Hunbi kima rawngbâwltu chuan khawvêlin a hriat ngai loh hna ṭha berah mawhphurhna pawimawh tak an nei tih hre reng ang che. (Mt. 28:19, 20) An mamawh angin i ṭanpui thei ang em? An mamawh angin i awmna kohhran chuan a ṭanpui thei ang em?

21. Hunbi kima rawngbâwltute chuan mi dangin an ṭanpuina leh fuihnate chu engtin nge an ngaih?

²¹ Hunbi kima rawngbâwltute chuan sum leh pai lama hlâwkna atân ni lovin, Jehova leh mi dangte tân rawng an bâwl a. I ṭanpuinate chu an ngaihlu hle a ni. Ram danga rawngbâwltu unaunu pakhat chuan mi tam takte ngaihtuahna chu heti hian a sawi chhuahsak a ni: “Min ngaih hlutna thu mite’n min hrilh chu tlêmte pawh ni se, chu chuan mi dangin an ngaihtuah che tih leh i thiltihah chuan an hlim tih a târ lang,” tiin.

22. Engtin nge hunbi kima rawngbâwlna chu i ngaih?

²² Hunbi kima Jehova rawngbâwl chu nun kawng ṭha ber a ni tak zet a. Thil harsa, inzirna ṭha tak, leh lungâwithlâk tak a ni. Chu bâkah, Pathian Ram hnuaia Jehova chhiahhlawh rinawm zawng zawngte’n an thawh tûr, hlim taka rawngbâwl zawm zêl tûra inbuatsaihna ṭha tak a ni bawk. Kan vâi hian ‘rin avânga’ hunbi kima rawngbâwltute ‘thiltihzia te, hmangaih avânga an thawh rimzia te chu i hre reng’ ang u.—1 Thes. 1:2, 3. (w14-E 09/15)