1. Kristian nia inchhâl sakhaw hruaitute’n indo hun laiin eng nge an tih?

KRISTIAN dikte indonaa an kal leh hnam dangte an thah chu Pathian duhzâwng a ni em? Chutiang thil chu kum 100 kalta chhûng khân Kristian nia inchhâl tam takte’n an lo ti tawh a ni. Catholic sakhaw hruaitute chuan hmêlma hnamte an hneh theih nân sipaite leh indonaa an râlthuamte chu mal an sâwm ṭhîn a. Protestant sakhaw hruaitute pawhin chutiang tho chuan an ti bawk. Khawvêl Indopui II-na chu inthahna chungchânga entîrna ṭha ber a ni.

2, 3. Khawvêl Indopui II-na hun lai leh a hnuah khân Jehova Thuhretute’n eng nge an tih a, engvângin nge?

² Indo hun lai chuan Jehova Thuhretute’n eng nge an tih? Chhinchhiahna chuan Kristian an nih angin an tualdâwih tih a târ lang. Engvângin nge? Isua entawn tûr siam leh zirtîrna zawm an duh vâng a ni. Ani chuan: “In inhmangaih chuan mi zawng zawngin ka zirtîrte in ni tih chu miah chuan an hria ang,” tiin a sawi. (Joh. 13:35) Thuhretute chuan Korinth khuaa Kristiante hnêna tirhkoh Paula lehkha thawna thu bulte chu an rilruah vawngin an nunpui a ni.—2 Korinth 10:3, 4 chhiar rawh.

 ³ Bible mila an chhia leh ṭha hriatna sawizawi tawh Kristian dikte chuan indo an zir lo va, indonaah an tel hek lo. Chu Kristian dinhmun chu an chelh tlat avângin Thuhretu a pui a pang, mipa leh hmeichhia sâng têlte chu nghaisak an ni. Tam takte chu hna thawk tûra chhawr luih leh tân ina khung an ni a. German rama Nazi hun lai khân, ṭhenkhat phei chu tihhlum hial an ni bawk. Thuhretute chuan Europe khawmual puiah tihduhdahna nasa tak an tâwk chung pawhin, Jehova Ram chanchin ṭha mite hrilh chu an theihnghilh ngai lo. Tân inah te, concentration camp-ah te, leh râl tlânna hmunahte pawh rinawm takin an hril zawm zêl a. A hnu kum 1994-a Rwanda rama inthahna nasa tak a thlen khân, Thuhretute chu an tel ve lo a ni. Yugoslavakia tia koh ṭhin a keh darh laia buaina a chhuah khân, Balkan hmuna thisen chhuahnaah Thuhretute chu an tel ve lo a ni.

4. Engtin nge Jehova Thuhretute tualdâwihnain anmahni lo hmutute a nghawng?

⁴ Jehova Thuhretute an tualdâwih tlatna chuan Pathian leh an ṭhenawmte hmangaihna an lantîr tih khawvêl puma anmahni lo hmutute chu an rintîr a. Kristian nihna dik tak an lantîr, tiin a sawi theih bawk. Chu bâkah, Jehova Thuhretute an hmuh huna Kristian dik takte hmu anga mi tam takte rintîrtu kan biakna pêng dang pawh a la awm a ni.

5. Isua zuitu hmasate chungah eng inthlâkthlengna nge thleng?

⁵ Isua chuan rawng a bâwl ṭan aṭang khân Pathian Ram chanchin ṭha puan chhuah a pawimawhzia a sawi uar hle. Khawvêl pum huapa rawngbâwlna dinpui tûrin zirtîr 12-te a thlang a; a hnuah, a hnungzuitu 70-te chu zirtîrna a pe a ni. (Lk. 6:13; 10:1) Chu chu mi dangte hnêna chanchin ṭha hrilh tûra buatsaih nân a ni, Judate aṭangin a ṭan a. Thil mak tak a lo thleng ta! Isua zirtîrte chuan serhtan loh hnamte hnênah thu an hrilh dâwn a ni. Isua zirtîr Juda ṭhahnem ngai takte tân chuan inthlâkna nasa tak a va ni dâwn êm!—Tirh. 1:8.

6. Engtin nge Jehova’n duhsak bîk a nei lo tih Petera’n a hriatthiam?

⁶ Tirhkoh Petera chu serhtan loh Jentail, Kornelia ina kal tûra tirh a ni a. Petera chuan Pathianin duhsak bîk a nei lo tih a hrethiam ta a ni. Kornelia leh a chhûngkua chuan baptisma an chang a. Kristianna chu a lo darh chho zêl a, hnam tina mite chuan thutak hriain, an lo pawm ta a. (Tirh. 10:9-48) Tûnah chuan khawvêl pum chu chanchin ṭha hrilhna hmun a lo ni ta a ni.

7, 8. Mite’n chanchin ṭha an hriat theih nân Jehova Thuhretute’n eng nge an tih? (A thupui chunga milem en rawh.)

⁷ Jehova Thuhretute zînga hmahruaitute chuan khawvêl puma chanchin ṭha hrilhna leh zirtîrnaah taima takin ṭan an la mêk a. Tûn laiah hian, maktaduai riat deuhthaw Thuhretu taima takte chuan ṭawng 600 aia tama Krista thuchah thehdarh tûrin theihtâwp an chhuah a, chu aia tam pawhin thehdarh a la ni zêl ang! Jehova Thuhretute chuan in tinah leh kawtthlêrah thu an hril a, a châng phei chuan electronic tablet leh awlsam taka nawr sawn theih thu leh hla chhuah pho chhuahna hmangin thu an hril bawk, chuvâng chuan awlsam taka hriat an ni.

⁸ Ṭawnglettu 2,900 aia tamte chuan Bible leh Bible thu leh hla chhuahte letling tûrin a bîk taka zirtîrna an dawng a. Hnam pui ṭawng nia ngaihte mai ni lovin ṭawng dangte pawh an letling bawk a ni. Chûng zîngah chuan mite hriat lâr lutuk loh, mahse mi  maktaduai têlin an hman pawh a tel a. Entîr nân, Spain rama Catalon mi maktaduai tam takte chuan an pianpui ṭawng, Catalan chu nî tin an hmang ṭhîn a. A bîk takin tûn hnai mai khân Catalan ṭawng chu Andorra, Alicante, Balearic Thliarkâr, leh Valencia-ahte an uar thar zual a ni. Tûnah chuan Jehova Thuhretute’n Catalan ṭawngin Bible thu leh hla an tichhuak tawh a, an ṭawng ngeia Kristian inkhâwmte an neih avângin an hlim hle a ni.

9, 10. Pathian inawpna pâwl chuan mi tinte thlarau lam mamawh a ngaihsak tih engin nge târ lang?

⁹ Hetianga Bible ṭanchhan thu leh hla chhuah leh mite hnêna an ṭawng hman ngeia zirtîrna hi khawvêl pumah neih mêk a ni. Mexico hi Spanish ṭawng hmanna ram a ni a, mahse tualchhûng ṭawng tuallêng dang tam tak a awm bawk. Chûng zînga pakhat chu Maya ṭawng hi a ni a. Mexico branch chuan Maya ṭawng lettute chu nî tina an ṭawng hmanna leh hriat theihna hmunah a dah a ni. Entîrna dang leh chu Nepali hi a ni a, mi maktaduai 29 aia tam an awmna hmun Nepal rama an ṭawng hman zînga pakhat a ni. Chu ramah chuan ṭawng chi hrang 120 vêl lai an hmang a, Nepali chu maktaduai sâwm aia tamin an pianpui ṭawng anga an hman laiin mi dang tam takte chuan ṭawng dang angin an hmang thung. Nepali ṭawngin Bible ṭanchhan kan thu leh hlate chu tihchhuah a ni.

¹⁰ Jehova inawpna pâwl chuan Lalram chanchin ṭha hril tûra thupêk chu a ngai pawimawh hle a, chu chu khawvêl puma ṭawng letlingtute ṭanpui an nihnain a târ lang a ni. Beihpui thlâkin tract, brochure, leh magazine maktaduai tam tak chu a man awm lovin khawvêl pumah sem a ni a. Chuta sênsote chu: “Athlâwnin in hmu a, athlâwnin pe ang che u,” tia Isua zirtîrna zâwmtu Jehova Thuhretute’n an thawhlâwm hmanga chhawmdâwl a ni.—Mt. 10:8.

11, 12. Engtin nge Jehova Thuhretute’n khawvêl puma thu an hrilhna chuan a ṭha zâwngin mi dangte a nghawng?

¹¹ Kristian thu hriltu inpumpêk leh zirtîrtu kan nih angin Jehova Thuhretute chuan thutak an hmu tawh tih an inhriat avângin chu thuchah chu ram tina hnam hrang hrangte hnêna hrilh tûrin nasa takin an inpe a. He Kristian hna pawimawh taka tel tûr hian mi tam takte chu awlsam zâwkin an nung a, ṭawng dang zirin, hnam dangte milin an  insiamrem a ni. Jehova Thuhretute Isua Krista hnungzuitu dik tak an ni tih mi tam takte rin nghehtîrtu thil dang chu khawvêl puma chanchin ṭha hrilh leh zirtîr hna hi a ni.

¹² Thuhretute’n hêng thil zawng zawngte an tih nachhan chu thutak an hmu tih an inhriat vâng a ni. Mahse, Jehova Thuhretute’n thutak an nei tih mi maktaduai tam takte rintîrtu thil dang pawh a la awm a, chu chu eng nge?—Rom 14:17, 18 chhiar rawh.

13. Engtin nge Thuhretute’n inawpna pâwl an vawn thianghlim?

¹³ Kan hun laia thutak nei tih inhria, Kristian inpumpêk takte thusawi chu kan hlâwkpui thei a ni. Rei tak aṭanga Jehova chhiahhlawh ni tawh chuan heti hian a rilru a sawi chhuak a ni: “Zilh emaw, thunun emaw ngai chu tupawh ni se, Jehova inawpna pâwl nungchang lama a thianghlim nân leh tih bawlhhlawh a nih loh nân theihtâwpa ṭan lâk a ni,” tiin. Engtin nge nungchang lama tehna sâng tak chu zawm a nih? Pathian Thua tehnate leh Isua leh a zirtîrte’n tih dân tûr an hnutchhiahte zuina hmangin a ni. Chuvângin, tûn laia Jehova Thuhretute chanchinah hian Pathian tehnate an zawm duh loh avânga Kristian kohhran aṭanga hnawh chhuahte chu tlêmte an ni a. Tûn hmâa Pathian pawm loh zâwnga nung ṭhîn, an nun thlâk danglam tawhte pawh tiamin, a tam zâwkte chuan thianghlim leh entawn tlâka nun an tum tlat a ni.—1 Korinth 6:9-11 chhiar rawh.

14. Kohhrana hnawh chhuah zînga tam takte chuan eng nge an tih a, chu chuan eng nge a thlen?

¹⁴ Kohhranin Bible kaihhruaina a zawm avânga hnawh chhuah ngai a hnawh chhuahte chungchâng chu engtin nge ni ang? An zînga tam takte chu thil sual an tihte avângin an inlamlêt a, kohhran chhûngah lâkluh leh an ni. (2 Korinth 2:6-8 chhiar rawh.) Bible-a nungchang tehna sâng takte zawmna chuan Kristian kohhran chu a vawng thianghlim a ni. Kristian nia inchhâl kohhran tam takte chuan an mi leh sate chu an duh apiang tih an phalsak laiin, Thuhretute chu Jehova tehnate milin an nung tlat a. Chu chuan mi tam takte chu Jehova Thuhretute’n thutak an nei tih a rintîr a ni.

15. Engin nge unaupa pakhat chu thutak a nei tih rintîr?

¹⁵ Engvângin nge Thuhretu dangte chuan thutak an nei tih an rin? Kum 54-a upa unaupa pakhat chuan: “Ka tleirâwl chhoh aṭangin ka rinna chu ban, a nih loh leh thu bul pathum: (1) Pathian a awm; (2) Bible hi a thâwk khum a ni; tih leh (3)  tûn laia Jehova Thuhretute kohhran hi a hmang a, mal a sâwm, tihahte hian a innghat tih ka ring tlat a. Kum tam tak chhûng Bible ka zirlai chuan chûng bante chu fiah ka tum a, an ngheh takzet leh zet loh fiah ka tum reng ṭhîn. Kum a han ral zêl chuan a finfiahna ka hmu chho zêl a, ka  rinna chu tihchak a niin, thutak ka nei tih ka ring nghet ta a ni,” tiin a hrilhfiah.

16. Unaunu rilru hnehtu thutak chu eng nge?

¹⁶ Khawvêl puma Thuhretute hmunpui, New York-a rawngbâwl mêk unaunu pakhat chuan Jehova inawpna pâwl chungchângah heti hian a sawi a ni: “Jehova hming puang chhuak rengtu awm chhun a ni a. Atîra ziak Bible-a Pathian hming vawi 7,000 vêl lai a lang chu thil âwm tak a va ni êm! ‘A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn,’ tih 2 Chronicles 16:9-a fuihna thu chu ka ngaihlu hle. Thutak chuan Jehova’n a chakna min hmuhtîr theih nâna rilru dik tak neih dân min zirtîr a. Ka tân chuan Jehova nêna kan inlaichînna chu a hlu ber a. Min châwmtu Pathian hriatna min pêkna kawnga Isua chanvo pawh ka ngaihlu hle bawk,” tiin.

17. Pathian awm ring lotu ni tawh ṭhîn pakhat chu eng thilin nge a rilru hneh a, engvângin nge?

¹⁷ Pathian awm ring lotu ni tawh ṭhîn pakhat chuan heti hian a sawi a ni: “Thil siamte chuan Pathianin mihringte’n nun nuam tak an neih a duh a, chuvângin hrehawm an tawrh reng a phal dâwn lo tih min rintîr a ni. Chu bâkah, khawvêlah hian Pathian ngaihsak lohna a hluar chhoh zêl laiin Jehova mite chuan rinna, ṭhahnemngaihna, leh hmangaihna an nei nasa tawlh tawlh thung a. Pathian thlarau chauhvin chutiang thilmak chu tûn laiah hian a ti thei a ni,” tiin.—1 Petera 4:1-4 chhiar rawh.

18. Unaupa pahnih dangte’n an rilru an sawi chhuahna chu engtin nge i ngaih?

¹⁸ Thuhretu rei tak lo ni tawh pakhat chuan mite hnêna kan hrilh ṭhin thutak a rin nachhan chu heti hian a sawifiah: “Kum engemaw zât Pathian thu ka zirna chuan Thuhretute’n kum zabi khatnaa Kristiante tih dân theihtâwpin zui an tum tih min rin nghehtîr a ni. Khawvêl hmun hrang hranga ka han zin kual chuan khawvêl puma Jehova Thuhretute inpumkhatna chu keimah ngeiin ka hmu ta a. Bible-a thutak chuan lungawina leh hlimna min pe a ni,” tiin. Unaupa kum 60 aia upa tawh chu thutak a hmu ngei tih a rin ngheh chhan zawh a nih chuan, Isua Krista chungchâng sawiin: “Isua nun dân leh rawngbâwl dân ngun taka ka zir hnu chuan a entawn tûr siam chu ka ngaihlu ta hle a. Isua Krista hmanga Pathian hnaih zual tûrin ka nun dân ka siam danglam a ni. Krista tlanna inthâwina avânga chhandamna nei thei ka ni tih ka inhria a. Mitthi zîng ata kaihthawh a ni tih ka hre bawk. Chu thilthleng mit ngeia hmutute thusawi rintlâk tak pawh hmuh theihin kan kawl a ni,” tiin a chhâng a ni.—1 Korinth 15:3-8 chhiar rawh.

19, 20. (a) Eng mawhphurhna nge Paula’n Rom kohhrana unaute hnênah a sawi uar? (b) Kristian inpumpêk tawhte kan nih angin, eng chanvo hlu nge kan neih?

¹⁹ Ṭhenawmte hmangaihtu Kristian kan nih angin thutak kan hriat hlu tak chu mi dangte hrilh lovin kan awm thei lo. Paula chuan Rom kohhrana unaute chu hetiang hian a chhûtpui a ni: “‘I kain Isua chu Lalpa a ni tih i ṭan a, mitthi zîng ata Pathianin a kai tho tih i thinlunga i rin chuan chhandamin i awm ang,’ tih hi. Miten thinlungin an ring a, felna an hmu ṭhîn a; kain an ṭan a, chhandamna an hmu bawk ṭhîn,” tiin.—Rom 10:9, 10.

²⁰ Jehova Thuhretu inpumpêk tawhte kan nih angin, thutak kan nei tih kan ring nghet a, Pathian Ramin ro a rêl tûr thu mi dangte hnêna hrilh tûrin chanvo hlu kan nei tih kan hre bawk a ni. Chuvângin, Bible chungchâng mite zirtîr chauh ni lovin, thutak i nei tih i nuna lantîr chu tum tlat ang che. (w14-E 09/15)