Pathian Jehova chuan mihring a siam hma daih khân vântirhkoh maktaduai tam tak a siam a. (Joba 38:4, 7) Anni chu a chânga Pathianin a chhiahhlawh leia awm te kaihruai tûr leh vênghim tûra a hman, Pathian rawngbâwltu thlarau thil siam thiltithei tak an ni. (Sâm 91:10, 11) Tûn laiah hian, vântirhkohte chuan Isua hnungzuitute puan chhuah chanchin ṭha hlâwkpui tûrin mite chu an ṭanpui a ni.—Thu Puan 14:6, 7 chhiar rawh.

Vântirhkohte hnênah ṭawngṭaiin ṭanpuina kan dîl tûr a ni êm? Ni lo. Ṭawngṭaina chu Pathian biakna a ni a, chu chu Pathian tân chauh a ni. (Thu Puan 19:10) Pathian chhiahhlawh an nih avângin, vântirhkohte chuan mihringte kaihhruaina ni lovin Pathian kaihhruaina chu an zâwm a. Chuvângin, Isua hmingin Pathian hnênah chauh kan ṭawngṭai tûr a ni.—Sâm 103:20, 21; Matthaia 26:53 chhiar rawh.

Mihringte ang bawkin, vântirhkohte chu zalên taka duh thlân theihna neia siam an ni a. Lungchhiatthlâk takin, an zînga tam takte chu Pathian lakah an hel a ni. (2 Petera 2:4) Hel hmasa ber chu Setana a ni a, a dangte chuan a hnung zuiin, ramhuai an lo ni a. Tûn hnaiah khân, Setana leh a ramhuaite chu vân aṭangin leia paih thlâk an ni.—Thu Puan 12:7-9 chhiar rawh.

Kum 1914 aṭanga suahsualna leh tharum thawhna nasa taka a punna chuan Pathianin Setana leh a ramhuaite chu engmah ti thei lovin a siam thuai dâwn tih a târ lang. Tichuan, Pathian chuan lei chu atîra a tum ang takin paradis-ah a chantîr tawh dâwn a ni.—Thu Puan 12:12; 21:3, 4 chhiar rawh. (w14-E 09/01)