1, 2. (a) Kum zabi khatnaa Kolossa khuaa Kristian kohhran chuan beih a tâwk tih engin nge târ lang? (b) Kolossa khuaa unaute chu nghet taka an awm reng theih nân eng vaukhânna nge pêk an nih?

KUM zabi khatnaa Kolossa khuaa Kristian kohhran chuan beih a tâwk a! Kohhran chhûnga mi ṭhenkhat chuan Mosia Dân zui tûr tia zirtîrin, inṭhendarhna an awmtîr a. Mi dangte chuan a lutuka mahni intihhrehawmna telna, milem betute ngaih dân chu an thlâwp a ni. Chûng zirtîrna dik lote chu do lêt nân, tirhkoh Paula chuan Kolossa khuaa mite vaukhân pahin fuihna thu a ziak a: “Fîmkhur rawh u, chutilochuan tupawhin Krista thu ang ni lovin, mihring thu rochhiah leh khawvêl A Aw B ang zâwkin an thu fing leh bumna mai maiin râl lâkin an la dah ang che u,” tiin.​—⁠Kol. 2:⁠8.

² Chûng hriak thih Kristiante chuan an rilru chu ‘khawvêl A Aw B-ah’ nghat sela chuan, chhandamna atâna Jehova ruahmanna siam chu an hnuchhawn a ni dâwn a ni. (Kol. 2:​20-23) Pathian nêna an inlaichînna hlu tak vênghim tûra ṭanpui nân, Paula chuan: “Chung lama thil awmahte chuan in rilru nghat  tlat rawh u, leia thil awmahte chuan nghat lovin,” tiin a zilhhau a ni. (Kol. 3:⁠2) Ni e, Krista unaute chuan ‘vâna an tâna beiseina dahsak,’ rochan chhe thei lo dawng tûra beiseina an neihah an rilru an nghat tlat tûr a ni.​—⁠Kol. 1:​3-5.

3. (a) Hriak thih Kristiante chuan eng beiseina nge an rilrua an dah tlat? (b) He thuziakah hian eng zawhnate nge kan sawiho vang?

³ Chutiang bawkin, tûn laia hriak thih Kristiante chuan vân Ram leh “Krista luahpuitute” ni tûra an beiseinaah an rilru chu an nghat a. (Rom 8:​14-17) Mahse, lei lam beiseina neite chungchâng ve hi le? Engtin nge Paula thute chu an tân pawh a nih? Eng kawngin nge “berâm dang” chuan “chung lama thil awmahte” chuan an rilru an nghah theih? (Joh. 10:16) Harsatna tâwk chung pawha, chung lama thil awmahte an rilru nghat tlattu Abrahama leh Mosia ang hmân lai mi rinawmte entawn tûr siam ngaihtuahna chu engtin nge kan hlâwkpui ṭheuh theih?

4. Engtin nge berâm dangte chuan chung lama thil awmahte rilru an nghah theih?

⁴ Berâm dang chuan vân lam beiseina nei lo mah se, chung lama thil awmahte chuan an rilru an nghat ve thei a ni. Engtin nge? An nuna Pathian Jehova leh Lalram dah hmasakna hmangin. (Lk. 10:​25-27) Chutianga ti thei tûr chuan, Krista chu kan entawn a. (1 Pet. 2:21) Kum zabi khatnaa kan unaute ang bawkin, Setana khawvêl ngaih dân dik lo te, khawvêl finna te, leh hausak âtchilhna rilru put hmangte chu kan hmachhawn a. (2 Korinth 10:5 chhiar rawh.) Isua entawntute kan nih angin, chutiang thlarau lama beihnate lakah harhvâng taka kan invên a ngai a ni.

5. Engtin nge hausak ûmna chungchânga kan ngaihtuahna chu kan inenfiah theih ang?

⁵ Hausak ûmna lama khawvêl thlîr dân chu kan nunah a lo lût em? Kan thil ngainatte chu kan ngaihtuahna leh thiltihah a lang chhuak ṭhîn a. Isua chuan: “I ro awmna apiangah i rilru pawh a awm ang,” tiin a sawi a ni. (Mt. 6:21) Kan thinlungin min hruaina lam hre thei tûrin, a khât tâwka mahni inenfiahna neih ṭhin chu a ṭha a ni. Heti hian inzâwt rawh: ‘Sum chungchâng ngaihtuah nân, hun engzât nge ka hman ṭhin? Sumdâwnna lama ṭha tûr te, sum peipunna lam te, a nih loh leh nuamsa taka khawsak dân tûrte ngaihtuah nân hun tam tak ka sêng em? Nge ni a, thlarau lam thil ngaihsaktu mit fîm neih chu ka tum tlat zâwk?’ tiin. (Mt. 6:22) Isua chuan ‘leia ro khâwl khâwm’ ngai pawimawhtute chu thlarau lam dinhmun hlauhawm takah an ding tih a târ lang a ni.​—⁠Mt. 6:​19, 20, 24.

6. Engtin nge tisa duhzâwngte chu kan do hneh theih?

⁶ Kan ṭhat famkim lohna chuan kan tisa duhzâwng anga thil tih duhna min neihtîr a. (Rom 7:​21-25 chhiar rawh.) Kan nuna Pathian thlarau thianghlim hnathawh tel lo chuan, ‘thim thiltihahte’ kan tlu lût thei a ni. Chûng zîngah chuan “zu in buai leh zu ruia awm . . . hur leh inngaih hmanga awm” ang chite a tel a. (Rom 13:​12, 13) ‘Leia thil awmte’​—⁠kan tisa duhzâwng thilte​—⁠do hneh tûr chuan kan rilru chu chung lama thil awmahte kan nghah tlat a ngai a ni. Chutianga ti tûr chuan thawhrim a ngai a. Chuvângin tirhkoh Paula chuan: “Ka taksa ka tichhel a, ka thuhnuaiah ka dah tawh a ni,” tiin a sawi. (1 Kor. 9:27) Nunna atâna intlânsiaknaa tel reng tûr chuan, kan inkhawngaih thei lo tih rinhlelh rual a ni lo. “[Pathian] lâwmzâwng” mi ni tûra hmân laia mi rinawm pahnihte thiltih chu i lo ngaihtuah ang u.​—⁠Heb. 11:⁠6.

7, 8. (a) Abrahama leh Sari-te chuan eng harsatnate nge an tawh? (b) Abrahama chuan khawiah nge a rilru a nghah tlat?

⁷ Jehova’n Abrahama chu an chhûngkuaa Kanaan rama pêm tûra a tih khân, inhuam takin a zâwm a. Abrahama rinna leh thu âwihna avângin Jehova chuan thu thlunpuiin: “Chi ropui takah ka siam ang chia, mal pawh ka sâwm . . . ang che,” tiin a sawi a ni. (Gen. 12:⁠2) Mahse, a hnu kum tam takah pawh Abrahama leh Sari chuan fa an la nei lo cheu va. Jehova chuan Abrahama hnêna a thutiam chu a theihnghilh tawh a ni ang em? Chu bâkah, Kanaan rama nun chu thil awlai a ni lo. Abrahama leh a chhûngte chuan Mesopotamia rama Ur khawpui hausa tak chu an kalsan tawh a. Mêl 1,000 (km 1,600) chuanga hla Kanaan ramah an zin a, chutah chuan puan inah khawsain, ṭâm leh suam hmangte kut an tuar a ni. (Gen. 12:​5, 10; 13:18; 14:​10-16) Mahse, Ur khaw hausa leh nuam taka kîr leh châkna an nei chuang lo!​—⁠Hebrai 11:​8-12, 15 chhiar rawh.

⁸ Abrahama chuan “leia thil awmahte” rilru nghat lovin, “LALPA chu a ring” zâwk a. (Gen. 15:⁠6) Ni e, Pathian thutiamte ngaihtuahin chung lama thil awmahte chuan a rilru a nghat tlat a ni. Chu mi avâng chuan, Abrahama hnêna Pathian Chungnungbera a inlâr khân a rinna chu malsâwmin a awm ta a ni. Pathianin a hnênah: “ ‘Vân lam khi en la, arsite khi i chhiar theih chuan chhiar teh khai,’ a ti a. Tin, amah vêkin a hnênah, ‘I thlahte chu khiti zât khi an la ni ang,’ ” tiin a hrilh a ni. (Gen. 15:⁠5) Chu chu a va thlamuanthlâk dâwn tak êm! Abrahama’n vâna arsi de chuaite a en chhoh apiangin, a thlahte tipung tûra Jehova thutiam chu a hre chhuak ṭhîn ngei ang. A hnêna tiam a nih ang ngeiin, Abrahama chuan Pathian hun ruatah roluahtu tûr fapa a nei ta a ni.​—⁠Gen. 21:​1, 2.

9. Engtin nge Abrahama entawn tûr siam zuina chuan Pathian rawngbâwlnaa buai reng tûra min fuih?

⁹ Abrahama angin, keini pawhin Pathian thutiamte thlen famkim hun tûr chu kan nghâk a. (2 Pet. 3:13) Chung lama thil awmahte rilru kan nghah tlat loh chuan, chûng thutiamte chu thleng har lutuk angin a lang thei a, thlarau lam thiltihah kan inthlahdah thei a ni. Entîr nân, tûn hmain pioneer i thawh theih nân, a nih loh leh rawngbâwlna i zauh theih nân inpêkna i lo nei tawh ngai em? I nei tawh ngai a nih chuan i fakawm hle a ni. A nih leh, tûnah eng nge i an? Abrahama chuan “khua lungphûmte nei mi” chu rilruah a vawng reng tih hre reng ang che. (Heb. 11:10) Ani chuan “Pathian a ring a, tin, chu rinna chu a felnaa ruat a ni.”​—⁠Rom 4:⁠3.

10. Mosia chuan a tleirâwl laiin eng ang nun nge a neih?

¹⁰ Chung lama thil awmahte rilru nghat tlattu dang leh chu Mosia a ni. A tleirâwl laiin, ani chu “Aigupta mite finna zawng zawng an zirtîr a.” Chu chu zirna satliah mai a ni lo. Chutih lai chuan Aigupta ram chu khawvêla thiltithei ber a nih mai bâkah, Mosia chu an lalber, Pharaoa ina khawsa a ni a. Chu a zirna sâng tak avânga “a thu-ah leh a thiltihah a ropui êm êm” pawh chu a mak hran lo. (Tirh. 7:22) Mosia tâna hun remchâng awm theite chu han ngaihtuah teh! Mahse, ani chuan thil sâng zâwk daih​—⁠Pathian duhzâwng tihnaah chuan a rilru a nghat tlat a ni.

11, 12. Eng zirtîrna nge Mosia’n a ngaihhlut êm êm a, chu chu engtin nge kan hriat?

¹¹ A nausên laiin, a nu tak Jokebedi chuan Mosia chu Hebrai Pahian chanchin a zirtîr ngei ang a. Mosia chuan hausakna engpawh aiin Jehova hriatna chu a ngaihlu zâwk daih a ni. Chuvângin, Pharaoa ina a awm avânga lo awm thei chanvote leh hun remchângte chu  a chân a ni. (Hebrai 11:​24-27 chhiar rawh.) Mosia chu thlarau lama zirtîrna a dawnte leh Jehova a rinna chuan chung lama thil awmahte a rilru nghat tlat tûrin a chêttîr tih a chiang hle.

¹² Mosia chuan a hun lai khawvêla zirna ṭha ber chu a dawng a, mahse, chu chu Aiguptaa a nihna tihsân nân emaw, a hming tihthan nân emaw, a nih loh leh hausak ûm nân emaw a hmang em? Hmang lo. Lo hmang ta sela chuan ‘Pharaoa fanua fapaa vuah duh lovin, rei lo tê atân sual nawmna hlimpui aia Pathian mite nêna tihduhdah tuar chu a thlang’ hauh lo vang. Mosia chuan thlarau lama zirtîrna a dawn chu Jehova duhzâwng tih nân a hmang tih a chiang hle.

13, 14. (a) Engin nge Mosia chu Jehova pêk chanvo chelh thei tûra ṭanpui? (b) Mosia ang bawkin, eng nge kan tih ngai mai thei?

¹³ Mosia chuan Jehova leh A mite chu a ngaihven hle a. Kum 40 mi a nih khân, Pathian mite Aigupta sal tânna ata hruai chhuak thei tûrah a inngai a ni. (Tirh. 7:​23-25) Mahse, Pathian Jehova’n chu chanvo a pêk hma chuan Mosia chuan thil mamawh a la nei a. Inngaihtlâwmna, dawhtheihna, zaidamna, leh insûmtheihna ang chi miziate a neih a la ngai a ni. (Thuf. 15:33) Mosia chuan fiahna leh harsatna lo thleng tûrte chhêl taka tuar chhuak thei tûrin zirtîrna a mamawh a. Kum sawmbi tlêmte chhûng berâm vêngtu anga hnathawhna chuan, hêng Pathian duhzâwng miziate nei tûrin a mamawh zirtîrna a pe dâwn a ni.

¹⁴ Berâm vêngtu a nih laia zirtîrna a dawn aṭangin Mosia chu a inzir em? Inzir e! Pathian Thu chuan Mosia chu “lei chunga mihring zawng zawnga zaidam lâwtlak a ni” tih a sawi. (Num. 12:⁠3) Inngaihtlâwmna a nei a, chu chuan mi chi hrang hrang leh an buaina khirh takte chu dawhthei taka chingfel tûrin a ṭanpui a ni. (Ex. 18:26) Chutiang bawkin, “hrehawm nasa tak” pal tlanga Pathian felna khawvêl thara lût tûra min ṭanpuitu tûr thlarau lam miziate kan neih a ngai a ni. (Thup. 7:14) Mi thinchhe tak, a nih loh leh lungni lo hma tak anga kan ngaihte pawh tiamin, mite nêna inrem thei tak kan ni em? A unaute chu: “Mi zawng zawng chawimawi rawh u, unauhote chu hmangaih rawh u,” tia tirhkoh Petera fuihna thu chu kan nunpui thei a ni.​—⁠1 Pet. 2:⁠17.

15, 16. (a) Engvângin nge thil dik leh ṭhaa kan rilru nghah chu a pawimawh? (b) Engvângin nge Kristiante tâna mize ṭha neih reng chu a pawimawh?

¹⁵ ‘Hun khirh takah’ kan awm a. (2 Tim. 3:⁠1) Chuvângin, thlarau lama harhvâng reng tûr chuan kan rilru chu thil dik leh ṭhaa kan nghah a pawimawh a ni. (1 Thes. 5:​6-9) Kan nun pêng pathuma chutianga kan tih theih dân i lo ngaihtuah ang u.

¹⁶ Kan nungchang: Petera chuan nungchang ṭha neih a pawimawh tih a hria a. Ani chuan: “Jentailte zînga in chêtzia chu mawi tak ni rawh se, chutichuan . . . in thil tihṭhat an hmuhte avângin fanin an awm hunah chuan Pathian an chawimawi thei ang,” tiin a sawi a ni. (1 Pet. 2:12) Inah emaw, hnathawhnaah emaw, school-ah emaw, infiamnaah emaw, a nih loh leh rawngbâwlnaah emaw, khawi hmunah pawh awm ila, kan nungchang mawi tak hmanga Pathian Jehova chawimawi chu kan tum tlat a ni. Mihring ṭha famkim lo kan nih avângin, thil tihsual châng kan nei ṭheuh ngei mai. (Rom 3:23) Mahse, “rinna intihsiakna ṭha chu bei” zawm zêlin, kan ṭhat famkim lohna chu kan do hneh thei a ni.​—⁠1 Tim. 6:⁠12.

17. Krista Isua neih ang rilru put hmang chu engtin nge kan entawn theih? (A thupui chunga milem chu en rawh.)

¹⁷ Kan rilru put hmang: Nungchang ṭha  neih nêna inzawm tlat pakhat chu rilru put hmang dik leh ṭha neih hi a ni a. Tirhkoh Paula chuan: “He rilru, Krista Isua pawha awm bawk kha, nangmahniah awm rawh se,” tiin a sawi a ni. (Phil. 2:⁠5) Eng ang rilru put hmang nge Isua’n a neih? Ani chu a inngaihtlâwm a. Inngaihtlâwmna chuan a rawngbâwlnaah mahni inphat tûrin a chêttîr a ni. Mi dangte hnêna Pathian Ram chanchin ṭha hrilh chu a ngai pawimawh ber a. (Mk. 1:38; 13:10) Pathian Thu chu thu neitu berah a ngai a ni. (Joh. 7:16; 8:28) Pathian Lehkha Thu Thianghlim chu a sawi chhuah a, a humhim a, a hrilhfiah theih nân taima takin a zir bawk. Inngaihtlâwmna kan neih a, rawngbâwlna leh mi mala Bible zirnaa ṭhahnem kan ngaih chuan, kan ngaihtuahna chuan Krista ngaihtuahna a ang tawlh tawlh ang.

18. Eng kawng pawimawh takin nge Jehova hna chu kan ṭanpui theih?

¹⁸ Kan ṭanpuina: Jehova chuan ‘Isua hmingin mi tin​—⁠vâna mite, leia mite​—⁠chu ṭhingṭhittîr’ a tum a. (Phil. 2:​9-11) Isua chuan dinhmun sâng tak a chelh chung pawhin inngaitlâwm takin a Pa duhzâwng a ti a, keini pawhin kan ti ve tûr a ni. (1 Kor. 15:28) Engtin nge kan tih ve ang? ‘Hnam tina mite zirtîra siamna hna’ chu theih tâwp chhuaha ṭanpuiin kan ti ve thei a ni. (Mt. 28:19) “Mi zawng zawng chungah thil ṭha” tih kan duh a, kan vêngte leh kan unaute chunga thil ṭha tih chu kan duh a ni.​—⁠Gal. 6:⁠10.

19. Eng nge tih kan tum tlat ang?

¹⁹ Chung lama thil awmahte kan rilru nghat tûra Jehova’n min hriat nawntîr avângin kan va lâwm tak em! Chutianga ti thei tûr chuan, ‘kan hmaa intlânsiakna tûr awmah chuan chhel taka’ kan tlân a ngai a ni. (Heb. 12:​1, 2) Kan vai hian ‘Lalpa tân angin thinlung zawng zawngin’ i thawk ang u, tichuan theih tâwp kan chhuahna chu kan Pa vâna mi chuan mal a sâwm ngei ang.​—⁠Kol. 3:​23, 24. (w14-E 10/15)