A KAWM THU | PATHIAN RAM—I TAN ENG AWMZIA NGE A NEIH THEIH?
Pathian Ram—Isua Tâna A Pawimawh Chhan
Isua chuan leia rawng a bâwl chhûng khân thil tam tak a sawi a. Entîr nân, a hnungzuitute chu ṭawngṭai dân te, Pathian tihlâwm dân te, leh hlimna dik tak hmuh theih dân te a zirtîr a. (Matthaia 6:5-13; Marka 12:17; Luka 11:28) Mahse, thil dang aia a sawi hnem zâwk, a thinlung luah bertu chu—Pathian Ram a ni.—Luka 6:45.
Thuziak hmasaa kan hmuh tawh angin, Isua chuan a nun chu “thu hril leh Pathian ram chanchin ṭha thlen” nân a hmang zo va. (Luka 8:1) Nasa taka thawk rimin, Pathian Ram chanchin mite hnêna zirtîr tûrin Israel ram chu a fang chhuak a, mêl za tam tak kêin a kal a ni. Isua rawngbâwlna chu Chanchin Ṭha bu pali-ah chhinchhiah a ni a, chûngah chuan Pathian Ram chu atîra ziakah vawi 100 chuang a lang a ni. Chûng zînga a tam zâwk chu Isua sawi a ni a; mahse, chu pawh chu Pathian Ram chanchin a sawite zînga tlêm tê chauh a ni ngei ang!—Johana 21:25.
Engvângin nge leia a awm laiin Isua tân Pathian Ram chu a pawimawh êm êm? Pakhatah chuan Pathianin chuta rorêl tûrin amah a thlang tih a hriat vâng a ni. (Isaia 9:6; Luka 22:28-30) Mahse, Isua chuan thiltihtheihna leh ropuina a neih tûr ringawt a ngaihtuah lo. (Matthaia 11:29; Marka 10:17, 18) Pathian Ram chu ama hlâwkna tûr atâna puang darh a ni lo. Isua’n Pathian Ram * a ngaihven reng chhan bul ber chu chu Ramin a hmangaih tak a Pa leh amah zuitu rinawmte tâna a tihsak tûrte vâng a ni.
LALRAMIN ISUA PA TANA A TIH TUR CHU
Isua chuan a Pa vâna mi chu a ngaina hle a. (Thufingte 8:30; Johana 14:31) A Pa mize duhawm tak, A hmangaihna, A khawngaihna, leh A rorêl diknate chu a ngaihlu hle a ni. (Deuteronomy 32:4; Isaia 49:15; 1 Johana 4:8) Chuti a nih chuan, Pathianin mihringte hrehawm tawrhna a ngaihsak lo tih leh Pathianin hrehawm kan tawrh a duh tih ang chi, a Pa chungchânga thu dik lo theh darhte hriat chu a duh lo hle ngei ang. Hei hi Isua’n ‘Pathian Ram chanchin ṭha’ hrilh a phûr hle chhan pakhat a ni—nakinah chuan Lalramin a Pa hming chhia a rawn thuam mawi dâwn tih a hre si a. (Matthaia 4:23; 6:9, 10) Engtin nge a thuam mawi ang?
Jehova chuan Lalram hmangin mihringte hlâwkpui tûr inthlâk danglamna nasa tak a rawn thlentîr ang a. Mi rinawmte mit ata “mittui zawng zawng a hrufai ang.” Ani chuan chûng mittui tlâknate thlentîrtu chu a tireh vek ang a, “thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang” tih min tiam a ni. (Thu Puan 21:3, 4) Pathian chuan Lalram hmangin mihringte hrehawm tawrhna zawng zawng a tireh tawh ang. *
Jakoba 5:11). Chu bâkah, a mi hmangaih takte—mi rinawmte—chungah hlâwkna a thlen dâwn tih a hre bawk a ni.
Isua’n mite hnêna Lalram chanchin hrilh a phûr viau pawh chu a mak lo ve! Lalram chuan a Pa thiltihtheihzia leh khawngaihna a ngahzia a târ lang dâwn tih a hria a. (LALRAMIN MIHRING RINAWMTE TANA A TIHSAK TUR CHU
Isua chu leia a lo kal hma hun rei tak aṭang tawhin vânah a Pa bulah a awm tawh a. A Pa chuan Fapa chu engkim a siamtîr a, ani chuan vân ropui tak leh a chhûnga awm arsi chhiar sên loh leh arsi hlâwmte, kan chênna lei mawi tak leh ramsate chu a siam a ni. (Kolossa 1:15, 16) Isua chuan chûng zîngah chuan mihringte chu ‘a lâwm’ ber a ni.—Thufingte 8:31.
Mihringte a hmangaihna chu Isua rawngbâwlnaah a lang chiang êm êm a. Atîr aṭangin, a mamawhte hnêna “chanchin ṭha hril tûra” leia lo kal a nih thu a sawi a ni. (Luka 4:18) Mahse, Isua chuan mite ṭanpui chungchâng a sawi mai lo. Mihringte a hmangaihna chu a lantîr nawn fo a ni. Entîr nân, a thusawi ngaithla tûra mipui tam tak an kal khâwm chuan “a khawngaih êm êm a, an dam lote a tidam a.” (Matthaia 14:14) Natna khirh tak vei mi pakhatin Isua’n a duh phawt chuan a tidam thei tih a rinzia a sawi chhuah chuan, Isua chu hmangaihnain a chêttîr ta. Chu pa hnênah chuan khawngaihna nei takin: “Ka duh e, lo thianghlim tawh ang che,” tia hrilhin, ani chu a tidam a ni. (Luka 5:12, 13) Isua’n a ṭhian Mari chu a unaupa Lazara sûna ṭap a han hmuh chuan, “a rilruin a rûm a,” “a lungngai a,” tichuan “a ṭap ta a.” (Johana 11:32-36) Chu mi hnuah chuan, ngaihtuah phâk loh tûr thil a ti ta—Isua chuan ni li lai thi tawh Lazara chu a kaitho ta a nih kha!—Johana 11:38-44.
Isua chuan chutih laia a thilmak tihte chuan rei a daih dâwn lo tih a hria a. A tihdamte chu engtik nîah emaw chuan an na leh ang a, a kaihthawhte pawh an thi leh dâwn tih a hria a ni. Amaherawhchu, Pathian Ram chuan chutiang harsatnate chu chatuan atân a rawn titâwp dâwn tih Isua’n a hria a. Chuvângin, thilmak tihnaa lungawi mai lovin, Isua chuan “Ram chanchin ṭha” chu taima takin a hril bawk a ni. (Matthaia 9:35) A thilmak tihte chuan Pathian Ramin lei pum puia thil a la tih tûrte chu a entîr lâwk a. Chu mi huna thleng tûr Bible thutiamte chu i lo ngaihtuah ang u. (w14-E 10/01)
-
Hrisêl lohna a awm tawh lo vang.
“Chumi hnuah chuan mitdelte mit chu tihmenin a awm ang a, bengngawngte beng chu tihvârin a awm ang. Chumi hunah chuan ke baite chu sakhi angin an zuang ang a, ṭawngtheilote lei chu hlim takin a zai ang.” Chu bâkah, “chu mi khuaa awm chuan ‘Ka dam lo ve,’ a ti lo vang.”—Isaia 33:24; 35:5, 6.
-
Thihna a awm tawh lo vang.
“Mi felte chuan ram hi an luah ang a, a chhûngah hian kumkhuain an awm ang.” —Sâm 37:29.
“Thihna chu a lem hlen ta; Lalpa PATHIAN chuan mi zawng zawng hmai ata chu mittuite a hru fai ang.”—Isaia 25:8.
-
Thi tawhte chu an nung leh ang.
“Thlâna awm zawng zawngin a aw an hria ang a, an chhuak vek ang.”—Johana 5:28, 29.
“Mi felte leh fel lote thawhlehna a awm ang.”—Tirhkohte 24:15.
-
In leh lo nei lo leh hna nei lo an awm tawh lo vang.
“Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Mi dang awmna tûrin in an sa tawh lo vang a, mi dang eiah grêp huan an siam tawh lo vang . . . ka mi thlante chu rei tak an thawh chhuah chungah chuan an lâwm dâwn a ni.”—Isaia 65:21, 22.
-
Indo a awm tawh lo vang.
“Ani chuan indonate chu kâwlkil thlengin a tireh ṭhîn.”—Sâm 46:9.
“Hnam dangin hnam dang chungah khandaih an lek tawh lo vang a, indo dân pawh an zir tawh hek lo vang.”—Isaia 2:4.
-
Ṭâm a tla tawh lo vang.
“Lei hian a thil ṭo chu a pe a: Pathian, keimahni Pathian ngei chuan, mal min sâwm ang.” —Sâm 67:6.
“Leiah, tlâng chungahte hian, buh tam tak a awm ang.”—Sâm 72:16.
-
Rethei an awm tawh lo vang.
“Pachhiate chu theihnghilhin an awm fo lo vang.”—Sâm 9:18.
“Pachhiain a auhvin ani chuan a chhanhim ang a, mi rethei, ṭanpuitu nei lo pawh chu, a chhanhim ang a. Mi rethei leh pachhiate chu a khawngaih ang a, pachhiate nunna chu a chhandam ang.”—Sâm 72:12, 13.
Pathian Ram chungchânga hêng thutiamte i ngaihtuah hian, Isua’n Pathian Ram a ngaih pawimawh chhan chu i hre thiam thei em? Pathian Ram chuan tûn laia kan hmuh harsatnate hi a titâwp vek dâwn tih a hriat avângin, Isua chuan leia a awm lai khân, a ngaithla duh apiangte hnêna Pathian Ram chanchin hrilh chu a phûr hle a ni.
Pathian Ram chungchânga Bible-a thutiamte chu duhawm i ti em? I tih chuan, engtin nge chu Lalram chungchâng chu i zir belh theih ang? Tin, a malsâwmnate hlâwkpui ngei tûrin eng nge i tih theih? He thuziak tâwpna ber hian chûng zawhnate chu a chhâng ang.
^ par. 5 Isua chu vâna a nun reng a, vâna a kîr leh hnuah pawh Pathian Ram chu a rilrua a awm reng dâwn avângin, he thuziakah hian a rilru put hmang chu tûna thilthleng mêk anga târ lan a ni.—Luka 24:51.
^ par. 8 Pathianin mihringte hrehawm tawrhna hun engemawti chhûng awm a phal chhan chungchâng hriat belh nân, Jehova Thuhretute tihchhuah Bible Zirtîrna Dik Tak Chu Eng Nge Ni? tih lehkhabu bung 11-na chu en rawh. www.pr418.com/lus-ah hmuh theih a ni bawk.