1. Jehova’n hnathawh chu eng angin nge a thlîr a, chu chuan eng ti tûrin nge a chêttîr?

JEHOVA chu a hnathawha hlim thei tak a ni a. (Sâm 135:6; Joh. 5:17) A thil siamte’n chutiang hlimna leh lungawina an neih ve theih nân, Jehova chuan hna nuam leh lungawithlâk tak a pe a ni. Entîr nân, a Fapa piang hmasa ber chu thil dangte siam nân a hmang a. (Kolossa 1:​15, 16 chhiar rawh.) Isua leia a lo kal hma pawh khân, vânah Pathian kiangah “mi themthiam angin” a awm thu Bible chuan min hrilh a ni.​—⁠Thuf. 8:⁠30.

2. Pathian thlarau fate chuan hna pawimawh tak leh lungawithlâk tak an nei reng tih engin nge târ lang?

² Jehova chuan a thlarau fate hnênah hnathawh tûr a pe reng tih târ langtu entîrnate chu Bible bu pumah a chuang a. Adama leh Evi’n thil sual an tih hnua, Paradis aṭanga hnawh chhuah an nih khân, Pathian chuan “nunna thing kûng chu vêng tûrin Eden huan chhak lampangah chuan Cherub-te leh mei khandaih vir tawn zawk zawk chu a awmtîr” a ni. (Gen. 3:24) Chu bâkah, Thu Puan 22:6 chuan Jehova’n “thil lo thleng lawk tûrte chu a bâwihte hnêna entîr tûrin a vântirhkoh a tîr,” tih a târ lang bawk a ni.

3. Isua leia a awm lai khân, engtin nge a Pa entawn tûr siam chu a zui?

³ Isua chuan mihring ṭha famkim anga leia a awm lai khân Jehova hna pêk chu lâwm takin a thawk a. A Pa entawn tûr siam chu zuiin, Isua pawhin a zirtîrte hnênah hna pawimawh tak thawh tûr a pe ve a ni. Beiseina nasa tak nêna an thawh theih nân an hnênah: “Tih tak meuhvin, tih tak meuhvin ka hrilh a che u, tupawh mi ring chuan thil ka tihte hi ani pawhin a ti ve ang; hêng aia thil ropui pawh hi a la ti ang, Pa hnênah ka kal dâwn avângin,” tiin a sawi a ni. (Joh. 14:12) Chutiang hnate a hmanhmawhthlâkzia sawi uar nân: “Chhûn a nih laiin mi tîrtu hna kan thawk tûr a ni; zân a nih dâwn tâk hi, chu mi hunah chuan tuman hna an thawk thei lo vang,” tiin a hrilhfiah a ni.​—⁠Joh. 9:⁠4.

4-6. (a) Engvângin nge Nova leh Mosia’n Jehova hna pêk an thawh zawh avângin kan lâwm ang? (b) Mihringte tâna Pathian hna pêk zawng zawngah chuan inanna eng nge awm?

⁴ Isua hun hma pawh khân, mihringte hnênah hna lungawithlâk tak pêk a ni tawh a. Adama leh Evi’n an hna thawh tûr hlen chhuak lo mah se, mi dangte chuan Pathian kaihhruaina pêk ang ngeiin an thawk chhuak a ni. (Gen. 1:28) Nova chu Tuilêta an dam khawchhuah theih nân lawng tuk dân tûr kaihhruaina chiang tak pêk a ni a. Jehova tirh ang ngei chuan a thawk a ni. A taihmâkna zârah vawiinah hian kan nung dam a ni si a!​—⁠Gen. 6:​14-16, 22; 2 Pet. 2:⁠5.

⁵ Mosia chu biak bûk sak dân tûr leh puithiam pâwl din dân tûr chungchângah kaihhruaina chiang tak pêk a ni a, chu chu ṭha takin a zâwm a ni. (Ex. 39:32; 40:​12-16) Rinawm taka chu chanvo a hlen chhuahna chu tûn thleng pawhin kan hlâwkpui a ni. Engtin nge? Tirhkoh Paula chuan Dân thu hmêlhmangte chu “thil ṭha, lo la awm tûrte” entîrna a nih thu a hrilhfiah a ni.​—⁠Heb. 9:​1-5, 9.

⁶ Pathianin a chhiahhlawhte hnêna a pêk hnathawh tûr chu a thiltum hlen chhuahna tûr mil zêlin, a khât tâwkin a danglam chho zêl a. Chuti chung chuan, an hnathawhte chuan englai pawhin Jehova a chawimawi a, ringtute tân hlâwkna a thlen reng ṭhîn. Chûng zîngah chuan leia a lo kal hma leh a lo kal laia Isua hnathawhte chu a tel ngei a. (Joh. 4:34; 17:⁠4) Chutiang bawkin, tûn laia kan hnathawh pawh hian Jehova a chawimawi a ni. (Mt. 5:16; 1 Korinth 15:58 chhiar rawh.) Engvângin nge?

7, 8. (a) Tûn laia Kristiante hnathawh tûr neih chu sawi rawh. (b) Jehova kaihhruaina chu engtin nge kan chhân lêt ang?

⁷ Jehova’n mi ṭha famkim lote chu a hnathawhpuite ni tûra a sâwm hi chawimawina a ni tih i pawm ngei ang. (1 Kor. 3:⁠9) Assembly Hall te, Kingdom Hall te, branch inte saknaa telte chuan Nova leh Mosia angin a taka in sak hna an thawk a. Tualchhûng Kingdom Hall chei ṭhatnaah i thawk emaw, Warwick, New York-a kan world headquarter thar tûr saknaah i thawk emaw pawh ni se, i chanvo neih chu hlut hle ang che. (A thupui chunga lemziak thiam ziah milem chu en rawh.) Chu chu rawngbâwlna thianghlim a ni si a. Mahse, a tam zâwkah chuan Kristiante chu thlarau lam in saknaa tel tûra sâwm an ni. Chu pawh chu Jehova chawimawi nân leh thuâwih mihringte hlâwkpui atân a ni. (Tirh. 13:​47-49) Chu hna a ṭha thei ang bera thawh a nih theih nân, kaihhruaina inâwm tak chu Pathian inawpna pâwl hmanga pêk chhuah a ni a. Hei hi a châng chuan hnathawh tûr thar dawnna pawh a ni thei ang.

⁸ Jehova chhiahhlawh rinawmte chuan theocratic kaihhruaina zawm chu an duh reng ṭhîn a. (Hebrai 13:​7, 17 chhiar rawh.) Atîrah chuan, kan hnathawh tûr kawng engemaw  taka kan thawh chhan chu kan hre chiang chiah lo mai thei. Mahse, Jehova’n ṭûl a tih anga inthlâkthlengna a siam engpawh zawm a ṭhatzia chu kan hre chiang hle a ni.

9. Hna chungchângah upate chuan kohhran tân entawn tûr eng nge an siam?

⁹ Upate’n kohhran an kaihhruai dânah hian Jehova duhzâwng hlen chhuah an duhna nasa tak chu a lang a. (2 Kor. 1:24; 1 Thes. 5:​12, 13) Anni chuan thawhrim leh dinhmun inthlâkthlengte mila thiltih an inhuamzia an târ lang a ni. Ram chanchin ṭha hrilh dân kawng tharte milin an insiamrem zung zung a. Ṭhenkhat chuan atîrah telephone-a thu hrilh te, lawng chawlh hmuna thu hrilh te, a nih loh leh vântlâng hmuna thu hrilh te chu hreh deuh mah se, rah ṭha a chhuah tih an hmu chhuak thuai ṭhîn a ni. Entîr nân, German rama pioneer palite chuan sumdâwnna hmun, tûn hmaa an lo hmaih ṭhinna hmuna thu hrilh chu an rêl a. An zînga pakhat, Michael-a chuan: “Kum tam tak chhûng chu hetiang rawngbâwlnaa kan tel loh avângin kan zâm hle a. Chu chu Jehova’n a hria a ni ngei ang, chu mi zîng chuan theihnghilh theih tawh loh tûr khawpa nuam rawngbâwlna kan nei a ni. Kan Lalram Rawngbâwlna-a kaihhruaina kan zui a, Jehova ṭanpuina kan rinchhan avângin kan va lâwm tak êm!” tiin a sawi a ni. I thu hrilhna bialah tih dân tharte chu hman i inhuam em?

10. Tûn hnai kumahte khân inawpna pâwl lam thilah eng insiamremna nge neih a nih?

¹⁰ Inawpna pâwl lam thila insiamremna neih a ṭûl châng a awm a. Tûn hnai kumahte khân branch office-te chu finkhâwm a ni nual a. Chutianga tihdanglamnate avângin chûng branch-a thawk unaute tân insiamrem ngai mah se, a sâwtna chu an hmu thuai a ni. (Thur. 7:⁠8) Chûng hnathawktu inhuam takte tân chuan tûn lai Jehova mite chanchina an tel ve chu a va hlimawm dâwn em!

11-13. Inawpna pâwl insiamremna avângin mi ṭhenkhat chuan eng harsatnate nge an tawh?

¹¹ Branch infinkhâwmna hmuna thawkte hnên aṭangin thil pawimawh tak kan zir thei a. Ṭhenkhat chuan an ram Bethel-ah kum sâwm têl rawng an lo bâwl tawh a. Central America-a Bethel chhûngkaw tlêm têa rawngbâwl nupa tuak khat chu a lêt 30 vêla lian Mexico ram Bethel-a sawn an ni a. Rogelio-a chuan: “Chhûngte leh ṭhiante kalsan chu a har khawp mai,” tiin a sawi. Mexico rama insawn tûra tih unau dang pakhat Juan-a chuan: “A vawi hnihna atâna piang nawn leh ang mai ka ni; ṭhian thar ka siam a ngai a. Siam thei tûr chuan hnam ze thar leh ngaihtuah dân thar mila insiamrem a ngai a ni,” tiin a sawi.

¹² German ram branch office-a insawn tûra tih Europe ram dang Bethel-a rawngbâwltute chuan chutiang bawk harsatna chu an tâwk a. Tlâng ram ngainatute chuan Alpine tlâng ropui tak awmna Switzerland chhuahsan a harsat dân tûr chu an hre thiam thei ngei ang. Austria ram aṭanga insawnte chuan chuta an nun dân thawventhlâk tak chu an ngai hmasa ber ṭhîn bawk.

¹³ Ram danga insawnte tân chuan an chênna hmun thar chu ngaia an neih phawt a ṭûl a, an la hriat loh unaute nêna hna an thawh tlân a ngaiin, hna dang an zir pawh a ngai ṭhîn a ni. Kohhran thar leh thu hrilhna bial thar mila an insiamrem leh ṭawng dang an zir pawh a ngai hial thei bawk. Chutianga inthlâk danglam chu thil harsa tak a ni thei. Mahse, Bethel-a rawngbâwltu tam tak chuan chûng harsatnate chu an pawm a ni. Engvângin nge?

14, 15. (a) Mi tam tak chuan eng hna pawh ni se, Jehova hnathawhpui an nihna chanvo an hlutzia engtin nge an târ lan? (b) Engtin nge kan tân entawn tûr ṭha an nih?

¹⁴ Grethel-i chuan: “Sâwmna ka pawm chhan chu Jehova hnênah amah ka  hmangaihna chu ram pakhat, in pakhat, a nih loh leh chanvo engemaw bîkah a innghat lo tih ka târ lanna a nih vâng a ni,” tiin a sawi a. Dayska-i chuan: “Sâwmna chu Jehova hnên aṭanga lo kal a ni tih ka hriat avângin, lâwm takin ka pawm a ni,” tiin a sawi ve bawk. André-a leh Gabriela-i pawhin: heti hian an sawi: “Hetianga rawngbâwlnaah hian mi mal duhnate dah pawimawh lo zâwk a, tam lehzuala Jehova rawngbâwl theihna hun remchâng kan hmu a. ‘Jehova hnên ata inthlâk danglamna thli a rawn tleh apiangin, a dangtu lo siam aiin lawngpuan lo zâr a ṭha zâwk,’ tiin kan inhrilh ṭhîn,” tiin.

¹⁵ Branch-te finkhâwm a nih avângin, Bethel-a rawngbâwltu ṭhenkhat chu pioneer thawk tûra ruat an ni a. Denmark, Norway, leh Sweden rama branch-te chu Scandinavia branch ni tûra finkhâwm a nih khân, Bethel-a rawngbâwltu tam takte chungah chutiang thil chu a thleng a ni. An zînga Florian-a leh Anja-i chuan: “Kan chanvo thar chu chona phûrawm tak angin kan thlîr a. Kan tân chuan, a hmun hi a pawimawh lo, Jehova mi hman nih hi thil ropui ber a ni. Malsâwmna nasa tak kan dawng tih dik takin kan sawi thei!” tiin an sawi. Kan zînga a tam zâwkte tân chutianga insiamremna neih ngai lo mah se, Lalram dah hmasatu hêng kan unaute inhuamna chu kan entawn thei dâwn lâwm ni? (Is. 6:⁠8) Jehova chuan khawi hmunah pawh ni se, amah nêna hnathawh theihna chanvo ngaihlutute chu mal a sawm reng ṭhîn.

16. (a) Galatia 6:4 chuan eng ti tûrin nge min hrilh? (b) Mihringte neih theih chanvo ropui ber chu eng nge ni?

¹⁶ Mihring ṭha famkim lote chuan mi dangte nêna inkhaikhin kan chîng ṭhîn a; mahse, Pathian Thu chuan a mi mala kan thil tih theihte ngaihtuah zâwk tûrin min hrilh a ni. (Galatia 6:4 chhiar rawh.) Kan zînga a tam zâwk chuan inawpna pâwlah hian thu neihna kan chang lo va. Tin, kan vai hian pioneer emaw, missionary emaw kan ni thei lo va, Bethel-ah lah rawng kan bâwl vek thei hek lo.  Chûngte chu chanvo ṭha tak a ni ngei mai! Mahse, mihringte neih theih chanvo ropui ber chu kan nei ṭheuh tih kan theihnghilh ngai tûr a ni lo. Chu chu Kristian rawngbâwlnaa Jehova hnathawhpui nihna chanvo a ni. Kan ngaihhlut tûr chanvo ṭha a va ni tak êm!

17. Setana khawvêl a awm chhûng chu eng thil nge awm chhunzawm zêl ang a; mahse, engvângin nge chu chu a lutuka lunghnual phah nâna kan hman loh vang?

¹⁷ Setana khawvêl a awm chhûng chu Jehova rawng kan bâwl theihna chuan chin tâwk a nei dâwn a. Kan chhûngkaw mawhphurhna te, hrisêlna te, a nih loh leh dinhmun dangte chu kan thunun thei lo mai thei. Mahse, chu chu a lutuka lunghnual phah nân kan hmang tûr a ni lo. A remchân hun apianga Pathian hming leh a Lalram hriattîrna hmanga Pathian hnathawhpuite i nih theihna chu ngainêp ngai suh. A pawimawh ber chu kan aia thawk tam thei zâwkte tâna Jehova ṭanpuina kan dîlsak rual a, theih tâwp chhuaha kan thawh ve hi a ni. Jehova hming chawimawitu apiang chu a mitah an hlu vek a ni tih hre reng ang che!

18. Eng nge nakina tih atâna dah kan inhuam ang a, engvângin nge?

¹⁸ Tlin lohna leh ṭhat famkim lohna kan nei chung pawhin Jehova chuan lâwm takin a hnathawhpuituahte min hmang a. Tûn ni hnuhnûnga kan Pathian Jehova kan thawhpui theihna chanvo chu kan va ngaihlu tak êm! Chuvângin, khawvêl tharah chuan Jehova’n “nunna taktak”​—⁠hlim tak leh inrem taka chatuana nunna min pe dâwn tih hriain, kan tuizâwng thil ûmte chu nakina tih atâna dah kan inhuam tûr a ni.​—⁠1 Tim. 6:​18, 19.

19. Jehova’n nakin hun atân eng nge min tiam?

¹⁹ Khawvêl thar kawtkaia ding kan nih angin, Ram Tiam an luh hma lawka Israelte hnêna Mosia thusawi kha ngaihtuah rawh: “LALPA in Pathian chuan in kutkawih zawng zawngah . . . a tipung ang che u,” tih hi. (Deut. 30:⁠9) Armageddon a tâwp hun chuan, Pathian hnathawhpuite chuan a lo tiam tawh angin lei hi an luah ang a. Tichuan, hnathawh tûr thar​—⁠lei paradis mawi taka siam hna​—⁠chu kan thawk ṭan tawh ang! (w14-E 10/15)