Thuziak hmasate aṭangin, Pathian Ramin Jehova Thuhretute tâna awmzia a neih nasat dân chu i hre thiam tawh ngei ang a. Pathian Ramin hma lam huna malsâwmna a thlen tûrte zînga kan sawi tâk ṭhenkhat chu i ngaihven hle pawh a ni thei. Chutih rualin, chûng thutiamte chu a thlen tak tak i ring lêm lo pawh a ni thei bawk.

I thu hriat apiangte rin nghâl mai loh chu a finthlâk a. (Thufingte 14:15) Chutianga i fîmkhurna chu hman lai Beroia mite tih dân nêna khaikhin theihna lai a awm a ni. * Beroia mite chuan Lalram chanchin ṭha an hriat hmasak ṭum chuan an thu hriat chu an pawm a, chu chu thleng tûra an duh vâng maia pawm an ni lo. Chu ai chuan, “a dik leh dik loh hriat nân” Pathian Lehkhaah ṭha takin an zawng zâwk ṭhîn a ni. (Tirhkohte 17:11) Thu danga sawi chuan, Beroia mite chuan chanchin ṭha an hriat chu Bible nên an khaikhin ṭhîn tihna a ni. A hnuah chuan, chu chanchin ṭha chu Pathian Thuah a innghat tlat tih an lo hre chiang ta a ni.

Jehova Thuhretute chuan chutianga ti ve tûrin an sâwm che a. A thlâwna Bible zirna program hmangin, Pathian Ram chungchânga Jehova Thuhretute rin dân leh Bible zirtîr dân khaikhin tûrin kan sâwm che a ni.

Pathian Ram chanchin i zir belh bâkah, Bible i zirna chuan nuna zawhna pawimawh takte chhânna hmu tûrin a ṭanpui thei che a ni.

•   Khawi aṭangin nge kan lo awm?

• Nunin a tum chu eng nge ni?

• Engvângin nge Pathianin hrehawm tawrhna awm a phal?

• Kan thih hian eng thil nge thleng?

• Leilung hi tihboral a ni ang em?

• Chhûngkaw nun hlim neih theih dân chu eng nge ni?

A pawimawh berah, Bible zirna chuan “Pathian hnaih” tûra a ṭanpui dâwn che hi a ni. (Jakoba 4:⁠8) Pathian i hnaih zawh poh leh, Pathian Ramin tûnah mai ni lo, chatuana i tâna thil ṭha a tih tûrte chu i hmu thei ang. Isua ngei pawhin a Pa hnêna a ṭawngṭainaah: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin a sawi si a.​—⁠Johana 17:⁠3. (w14-E 10/01)