Khawvêla mihring maktaduai tam takte chuan Pathian Ram an beisei a. Anni chuan Isua’n a hnungzuitute hnêna ṭawngṭai dân a zirtîr chu an zui a ni: “I ram lo thleng rawh se. I duhzâwng . . . leia mi’n ti rawh se,” tih chu.​—⁠Matthaia 6:⁠10.

Inkalh tak maiin, mi tam takin Pathian Ram an ngaihven hle laiin, sakhaw tam zâwkte chuan an ngaihsak lo va. He mi chungchângah hian hmân lai chanchin ziaktu H. G. Wells-a chuan, Isua’n “Vân Ram tia a koh a zirtîrna a ngaih pawimawh tehrêng nên,” he zirtîrna hian “Kristian kohhran tam zâwkte zirtîrnaah . . . ngaih pawimawh a hlawh lo” chu mak a tih thu a sawi a ni.

Pathian Ram ngai pawimawh lotu kohhrante ang lo takin, Jehova Thuhretute chuan Pathian Ram chu an ngai pawimawh hle a ni. Han ngaihtuah teh: Tûna i chhiar mêk kan lehkhabu chhuah pawimawh ber hi ṭawng 220-a tihchhuah a ni a. A chhuah apiang hian, copy maktaduai 46 dâwn lai chhut chhuah a niin, khawvêla magazine sem chhuah tam ber a ni. He magazine thuchah ken ber chu eng nge ni? A hming pum hi han en teh: Vênnainsâng Jehova Lalram Puanchhuahna , tih hi. *

Engvângin nge Jehova Thuhretute chuan Pathian Ram chungchâng puang chhuak tûra nasa taka an beih? Kawng khatah chuan, Pathian Ram chu khawvêla lehkhabu pawimawh ber, Bible thuchah ken pawimawh ber a ni tih kan rin vâng a ni a. Chu bâkah, tûn laia mihringte harsatna tawh chinfelna awmchhun a ni tih kan ring tlat bawk a ni.

Jehova Thuhretute chuan mite chu Pathian Ram ngaihventîrin, Isua entawn tûr siam chu zui an tum tlat a. Leia a awm lai khân, Isua chuan Pathian Ram chu a nunah leh a rawngbâwlnaah a ngai pawimawh ber a ni. (Luka 4:43) Engvângin nge Isua’n Lalram a ngaih pawimawh êm êm? Chu chuan i tân eng awmzia nge a neih theih? A dawta thuziaka lang Bible chhânna ngaihtuah tûrin kan sâwm a che. (w14-E 10/01)