A chanchin Bible-a kan chhiar Setana tih hi sual zawng zawng chhinchhiahna mai a ni, tia sawi chu a awlsam ang reng a. Mahse, chu chu Bible zirtîrna dik tak a ni em? Chutiang chu ni ta se, engvângin nge Bible chuan Setana chu Isua Krista leh Pathian Engkimtitheia nêna inbia anga a sawi? Chutianga an inbiakna pahnih chungchâng chu i lo ngaihtuah ang u.

Isua’n a rawngbâwlna a ṭan khân, Diabola chuan vawi thum thlêm a tum a. A hmasain, Setana chuan Isua chu a rilṭâmna tireh a, Pathian pêk thiltihtheihna chu mahni tâna hmang tûrin a thlêm a. A dawtah, Diabola chuan Isua chu a nun âtthlâk taka thâp tûr leh mahni inchawimawi tûrin a cho va. A tâwpah, Setana chuan Isua hnênah vawi khat chibai a bûk chuan khawvêl ram zawng zawng chunga thu neihna a pe dâwn tih tiamin a thlêm a ni. Isua chuan fing vervêk taka thlêmna pathum chu Bible ṭanchhanin a hnâwl vek a ni.​—⁠Matthaia 4:​1-11; Luka 4:1–13.

A nih leh, Isua chu tu nên nge an inbiak? Amaha awm sualna nên em ni? Bible sawi dân chuan, Isua chu “kawng tinrênga thlêmna tâwk tawh, sual erawh chu sual lo” a ni. (Hebrai 4:15) Bible chuan: “Ani chuan thil rêng a tisual lo va, a kaah ngamthlêmna a awm hek lo,” a ti bawk. (1 Petera 2:22) Isua chu a ṭha famkim reng a, rinawmna a vawng  nghet tlat a ni. Amahah chuan sualna engmahin zung a kaih a phal ngai lo. Chuvângin, Isua chuan amaha awm sual engemaw a be lo va; mi tak tak tuemaw a bia tih a chiang hle a ni.

Chu an inbiakna chuan Setana chu mi tak tak a ni tih finfiahna dang a pêk belhchhah a ni.

• Diabola’n Isua hnênah vawi khat chibai a bûk chuan khawvêl chunga thu neihna pêk a tum tih hre chhuak leh la. (Matthaia 4:​8, 9) Setana chu awm tak tak lo ta se, he a thil pêk tum hian awmzia a nei lo vang. Chu bâkah, Isua chuan chutiang thu neihna nasa tak nei anga Setana inchhâlna chu a hnial lo.

• Isua’n thlêmnate a hnâwl hnuah, Diabola chuan “a remchân hun atân a kalsan ta a.” (Luka 4:13) Hetah hian Setana chu a khawi zâwk nge a an? Sual nihna nge ni a, hmêlma sual tak, mi beih tum ngar ngartu zâwk?

• Isua chu “vântirhkohten a rawng an bâwlsak” tih hre reng ang che. (Matthaia 4:11) Chûng vântirhkohte chu Isua mamawh fuihna leh ṭanpuina petu thlarau mi tak tak an ni em? An ni tih a chiang hle. Chuti chu, Engvângin nge Setana chu thlarau mi awm tak tak a ni tih bâk loh chu thil dang anga kan ngaih tehlul ang?

Entîrna pahnihna chu Pathian ṭih mi Joba chanchin nêna inkûngkaihna a ni a. Chu chanchin ziak chuan Pathian leh Diabola’n ṭum hnih lai inbiakna a neih thu a sawi a ni. A ṭum hnihin Pathianin Joba rinawmna chu a fak ve ve a ni. Setana chuan Joba chu mahni hmasialna avânga Pathian rawngbâwl a ni, a ti tlat a; thu danga sawi chuan Pathianin Joba rinawmna chu a leiin a lei a ni a tihna a ni. A nihna takah chuan, Diabola chu Pathian aia Joba chanchin hre tam zâwkah a inchhâl a ni. Jehova chuan Setana chu Joba thil neihte, a fate, leh a hrisêlnate thlenga a tihchhiatsak a phal ta a. * A hnuah, Jehova chu Joba chungchângah a dik zâwk tih a rawn lang chhuak a, Setana chu dawthei a nihzia finfiah a ni ta. Pathian chuan Joba rinawmna chu mal a sâwm a ni.​—⁠Joba 1:​6-12; 2:​1-7.

Kan târ lan tâk Pathian leh Setana inbiaknaah chuan Jehova chuan amaha awm sual chu a bia em ni? Bible chuan: “Pathian zawng a kawng chu a ṭha famkim a,” tiin a sawi a. (2 Samuela 22:31) Pathian Thu chuan: “Lalpa Pathian, Engkimtitheia . . . chu, a thianghlim e, a thiang hlim e, a thianghlim e,” tiin a sawi bawk. (Thu Puan 4:⁠8) Thianghlim tih chu tak, bawlhhlawh lo, sual laka fimhlîm tihna a ni. Jehova chu a ṭha famkimin, sawisêlbo a ni a. Sualna mizia engmah a nei thei lo.

Thenkhat chuan Joba pawh chu mi awm tak tak a ni lo va, chuvângin an inbiakna zawng zawng chu a ngial a ngana lâk chi a ni lo, an la ti mai thei a. Mahse, chu chuan awmzia a nei em? Bible châng dangte chuan Joba chu mihring awm tak tak a ni tih a târ lang. Entîr nân, Jakoba 5:​7-11-ah chuan Joba chu harsatna tawh huna chhel tûra Kristiante chêttîr nân leh chutiang chhelna chu Pathian Jehova’n a lâwmzia hriattîr nâna hman a ni tih kan hmu a ni. Joba chu mi tak tak a nih loh va, Setana beihna pawh chu thu phuahchawp mai mai ni sela chuan, chu entîrna chu eng atân mah a ni lo vang. Chu bâkah, Ezekiela 14:​14, 20-a mi fel pathum târ lante zîngah chuan Joba pawh a tel a. Nova leh Daniela te ang bawkin Joba chu mi awm tak tak a ni a, rinna nasa tak nei mi a ni. Joba chu mihring awm tak tak a nih si chuan amah beia tiduhdahtu pawh a awm tak tak dâwn lâwm ni?

Bible chuan Setana hi thlarau taksa nei mi awm tak tak angin a sawi tih a chiang hle. Mahse, heti hian i ngaihtuah mai thei, ‘Tûn lai khawvêl changkâng takah hian kei leh ka chhûngkuate tân Setana chu a hlauhawm em?’ tiin.

I awmna khawpuiah mi sual pâwl khat an rawn lût thut angah han ngaihruat teh. Mi mal sahimna leh ṭhenawm khawvêng nunphung a tla hniam ang tih chu a chiang a ni. Tûna kan sawi tâk nêna thuhmun dinhmun dang chu han ngaihtuah teh: Setana leh a ramhuaite​—⁠Setana ang bawka Pathian laka hel leh awm tak takte​—⁠chu leia paih thlâk an ni. A sawhkhâwk chu eng nge ni ta ang? Tualchhûng leh khawvêl puma chanchin thar i hmuhte hi han ngaihtuah teh.

• Khawvêl puma tihtâwp tum a ni chung pawhin, âtthlâk taka tharum thawhna hi a pung chho telh telh tih i hmu em?

• Nu leh pa tam takte’n an ngaimawh chung pawhin, film-ahte chuan dawithiamna lam a hluar chho telh telh tih i hmu em?

• Humhim tûra ṭan lâk nasat a ni chung pawhin, chhehvêl boruak tihchhiat nasat leh thing leh maute tihchereu nasat a ni tih i hmu em?

• Mihringte hian dik lohna nasa tak an neiin, chakna engemaw tak hian chhiatna lamah a nawrlui tlat niin a lang em?

Tûn lai buainate phêna awm nia Bible-in a sawi chu lo chhinchhiah ang che: “Drakon lian pui, rûlpui tar Diabola leh Setana an tih, khawvêl zawng zawng bumtu chu an paih thla ta a; leiah an paih a, a tirhkohte pawh an paih thla tel ve a. . . . Lei leh tuifinriat chung a pik e! Diabola chuan hun tlêm tê chauh a nei tih a inhriat avânga thinur êm êma in hnêna a lo chhuk tâk avângin,” tih hi. (Thu Puan 12:​9, 12) Finfiahnate an ngaihtuah chian hnuah mi tam tak chuan Setana chu khawvêl thunun tlattu thlarau thil siam hlauhawm tak a ni tiin thu tâwp an siam a ni.

A lak ata vênhim i nih theih dân tûr chu i ngaihtuah mai thei a. Chu chu ngaihtuah tham tak a ni. A dawta thuziak hian ṭanpuina sâwt tak a pe ang che. (w14-E 11/01)