1, 2. (a) Sakhaw hruaitute chuan eng thu nge hriat an duh a, engtin nge Petera’n a chhân? (A thupui chunga milem en rawh.) (b) Chu mi ṭuma Petera huaisenna neih chhan chu eng nge ni?

ISUA thih hnu ni tam tak a ral hmain, tirhkoh Petera chuan mipa ho khat, hlauhawm tak leh huphurhawm tak chu a hmachhawn a. Anni chu Juda sakhaw hruaitu thiltithei takte an ni a​—⁠Isua tihhlumnaa bul tumtute an ni. Anni chuan Petera’n pian tirh aṭanga ke bai pakhat a tidam tih an hriatin, tu hming leh eng thiltihtheihnain nge a tihdam tih hriat an duh avângin an chhuahchhâl a. Tirhkoh chuan: “Nazareth Isua Krista, . . . in khenbeh, Pathianin mitthi zîng ata a kaihthawh leh kha, amaha hming ngeiin he mi hi hetah in hmaah damin a ding ta a nih hi,” tiin huaisen takin a chhâng a ni.​—⁠Tirh. 4:​5-10.

² A hma chuan, Petera chuan a hlauh êm avângin Isua chu vawi thum lai a phatsan a. (Mk. 14:​66-72) Tûna sakhaw hruaitute hmaa a huaisen chhan chu eng nge ni? Thlarau thianghlim vâng ni mah se, Patera’n Isua a tholeh ngei tih a hriat vâng pawh a ni tel a ni. Engin nge tirhkoh chu Isua a tho leh tih hriat chiantîr? Engvângin nge keini pawhin Isua a tho leh tih kan rin tlat theih?

3, 4. (a) Isua tirhkohte pian hma khân, eng thawhlehnate nge thleng? (b) Isua’n tute nge a kaihthawh?

³ Mitthite an tho leh thei tih chu Isua tirhkohte tân thil thar a  ni lo; an pian hma pawhin thawhlehna chu a thleng a. Pathianin zâwlnei Elija leh Elisa te chu mitthite kaitho tûrin thiltihtheihna a pe tih an hria a ni. (1 Lal. 17:​17-24; 2 Lal. 4:​32-37) Ruang pakhat thlâna an paih khân Elisa ruhte a tawk fuh a, ruang chu a nung leh a ni. (2 Lal. 13:​20, 21) Pathian Thu hi a dik tih kan rin ang bawkin, Kristian hmasate chuan he Bible thuziak hi an ring a ni.

⁴ Kan zain Isua mitthi kaihthawhna chanchinte chhiar chu nasa taka kan chakpui a rinawm a. Hmeithai fapa neihchhun a kaihthawh khân, ani chuan mak a tih hle ngei ang. (Lk. 7:​11-15) Ṭum dangah, Isua chuan hmeichhe naupang kum 12 mi a kai tho va. An fanu a thawhleh chuan amah sûntu a nu leh pate hlim dân tûr leh mak tih dân tûr chu han ngaihtuah teh! (Lk. 8:​49-56) Chu bâkah, Lazara kha thlân aṭanga dam ṭha taka a rawn pên chhuah chuan, a hmutute chu an lâwm hle ngei bawk ang!​—⁠Joh. 11:​38-44.

5. Engtin nge Isua thawhlehna chu a hmaa thawhlehnate nên a inan loh?

⁵ Tirhkohte chuan Isua thawhlehna chu a hmaa thawhlehnate nên a inang lo tih an hria a. A hmaa tho lehte chu taksa puin an tho va, a tâwpah chuan an thi leh a. Isua erawh chu chhe thei tawh lo thlarau taksain a tho leh a ni. (Tirhkohte 13:34 chhiar rawh.) Petera chuan Isua chu “tisaah chuan tihthihin a awm a, thlarauvah erawh chuan tihnunin a awm ta a,” tiin a ziak a. Chu bâkah, “Isua Krista chu vânah kalin Pathian ding lamah a awm a; vântirhkohho te, thuneihna te, thiltihtheihna te ama thu thua awmtîrin an awm” bawk. (1 Pet. 3:​18-22) A hmaa thawhlehnate chu a ropuiin a mak hle a; mahse, Isua thawhlehna nên chuan khaikhin theih a ni lo.

6. Engtin nge Isua thawhlehna chuan a zirtîrte a nghawng?

⁶ Isua thawhlehna chuan a zirtîrte chungah nghawng a nei thûk hle a. A hmêlmate rin dân ang lo takin a thi tawh lo. Ani chu mihring tuma tihnat theih loh thlarau thiltithei tak angin a nung reng tawh a ni. A thawhlehna chuan Pathian Fapa a nihzia a finfiah a, chu mi hriatna chuan zirtîrte chu lungngaihna nasa tak ata hlimna nasa tak a neihtîr a. Chu bâkah, an hlauhnate chu huaisennain a thlâkthleng ta a ni. Isua thawhlehna chu Pathian Jehova thiltuma pawimawh ber leh khawvêl hmun tina huaisen taka hrilh chhuah chanchin ṭhaa pawimawh ber a ni.

7. Isua’n tûnah eng nge a tih a, eng zawhnate nge lo chhuak?

⁷ Jehova chhiahhlawhte kan nih angin, Isua chu mi ropui mai a ni lo tih kan hre chiang a. Tûnah chuan a nung reng a, leia mi tinte nêna inkûngkaihna nei hna chu a kaihruai mêk a ni. Pathian vân lam Lalrama Lal a nih angin, Isua Krista chuan rei lo têah lei ata suahsualna a paih bo vang a, mite chatuana an nunna tûr paradis-ah a chantîr ang. (Lk. 23:43) Isua a thawhleh loh chuan hêng thil a enga mah hi a thleng thei lo vang. Chuti chu, thihna ata a tho leh ngei a ni tih rin theih chhan tûr eng nge kan neih? Dik takin, a thawhlehna chuan kan tân eng awmzia nge a neih?

8, 9. (a) Engvângin nge Juda sakhaw hruaitute chuan Isua thlân chu vêng tûra an ngen? (b) Hmeichhiate thlâna an va kal khân, eng thil nge thleng?

⁸ Isua tihhlum a nih hnu chuan, puithiam lalte leh Pharisaite chuan Pilata hnênah: “Ka pu, chu tihdertu chuan a dam lai khân, ‘Ni thum chinah ka tho leh ang,’ a ti tih kan hre reng a. Chutichuan thlân chu ni thum ni thlenga vêng ṭha tûrin thu pe rawh; chutilochuan a zirtîrte chuan amah chu an va ru hlauh ang a, vântlâng hnênah, ‘Mitthi zîng ata a tho leh ta a ni,’ an ti dah ang e; tichuan tihderna hnuhnûng zâwk chu a hmasa ai khân a  ṭha lo lehzual ang,” an ti a. Pilata’n an hnênah “Vêngtu sipaite in nei alâwm; kal ula, in theih ang apiangin vên ṭhattîr ta che u,” tiin a hrilh a. Chutiang chiah chuan an vên ṭhattîr ta a ni.​—⁠Mt. 27:​62-66.

⁹ Isua taksa chu thlân lung kerkuakah chuan zalhin, lung lian taka khâr hnan a ni a. Juda sakhaw hruaitute chuan Isua chu chu thlâna nung lova awmtîr reng an duh a ni. Mahse, Jehova chuan ngaihtuahna dang a nei a. Ni thum nîa Mari Magdalini leh Mari dangte chu thlâna an va kal chuan, lung chu lum sawna awmin, chuta vântirhkoh ṭhu chu an va hmu a. Vântirhkoh chuan hmeichhiate hnênah thlân chhûng chu va en tûr leh a ruak tih va hmu tûrin a hrilh a. “Hetah a awm tawh lo ve; . . . a thawhleh tawh kha,” tiin a hrilh a ni. (Mt. 28:​1-6) Isua chu a tho leh ta!

10. Isua thawhlehna chungchângah Paula’n eng finfiahna nge a pêk?

¹⁰ A hnu ni 40 chhûnga thilthlengte khân, Isua chu a tho leh ngei a ni tih rinhlelh chhan tûr engmah a hnutchhiah lo. Tirhkoh Paula chuan Korinth khuaa mite hnênah Isua a thawhlehzia finfiahna chu heti hian a khaikhâwm a ni: “A hmasa berin ka hmuh ve bawk chu ka hrilh chhâwn che u kha; khatia, Krista chu Pahtian Lehkah Thu ang zêla kan sualte avânga a thih a, an phûm a, Pathian Lehkha Thu ang zêla ni thum nia kaihthawha a awm a, Kiphaa hnêna a lo inlâr te kha; chu mi hnuah chuan sâwm leh pahnihte hnênah a inlâr leh a, chu mi hnuah chuan unau zanga aia tam hnênah a inlâr leh a, chu mi zînga mi tam zâwk chu tûn thlengin an la dam cheu va, ṭhenkhat erawh chu an muhîl ta a; chu mi hnuah chuan Jakoba hnênah a inlâr leh a; chu mi hnuah chuan tirhkoh zawng zawngte hnênah; tin, a tâwp berah chuan a hun lova piang ang, keima hnênah pawh a inlâr a,” tiin.​—⁠1 Kor. 15:​3-8.

11. Engtin nge Isua thawhlehna chu “Pathian Lehkha Thu ang zêla” thleng a ni kan tih theih?

¹¹ Isua a tho leh tih kan hriat theih chhan pakhat chu a thawhlehna hi “Pathian Lehkha Thu ang zêla” a thlen vâng a ni. Pathian Thu chuan Isua a thawhleh tûr thu a sawi lâwk a. Entîr nân, Davida chuan Pathian “mi thianghlim” ber chu thlâna hnutchhiah a ni dâwn lo tih a ziak a ni. (Sâm 16:10 chhiar rawh.) C.E. 33 Pentikost nî khân, tirhkoh Petera chuan he hrilh lâwkna Bible châng hi Isuaah a thleng famkim a ni tih heti hian a sawi a ni: “Tichuan chûng chu [Davida’n] a lo hriat lâwk reng avângin Krista thawh leh tûr thu a sawi a ni, ‘Mitthi khuaa hnutchhiahin a awm hek lo, a ruang pawh a ṭawih hek lo,’ tiin.”​—⁠Tirh. 2:​23-27, 31.

12. Tute’n nge tho leh Isua chu hmu?

¹² Isua a tho leh tih kan hriat theih chhan pahnihna chu thuhretu tam takte thusawi kan neih vâng a ni. Ni 40 chhûng chuan tho leh Isua chu an zalhna thlân awmna huanah te, Emmau khaw kalkawngah te, leh hmun dangahte pawh a zirtîrte hmaah a inlâr a ni. (Lk. 24:​13-15) Chûng hunahte chuan Petera pawh tiamin a mi mal leh a huhovin anni chu a bia a. Ṭum khat phei chu mipui 500 aia tam hmaah a inlâr a ni! Mita hmutu tam takte thusawi chu rin loh theih a ni lo.

13. Engtin nge zirtîrte ṭhahnemngaihna chuan Isua a tho leh tih an hriat chianzia a lantîr?

¹³ Isua a tho leh ngei tih kan hriat theih chhan pathumna chu a thawhlehna chanchin puan chhuahnaa zirtîrte neih ṭhahnemngaihna hi a ni. Krista thawhlehna chanchin ṭhahnemngai taka an puan chhuah avângin, anni chuan tihduhdahna te, hrehawm tawrhna te, leh thihna te an tuar a. Isua a thawhleh si loh chuan​—⁠chu chu in bumna mai a nih chuan​—⁠engvângin nge Petera chuan a  nun thâpin Isua hawtu leh a thihna thlentîrtu sakhaw hruaitute hnêna Krista thawhlehna thu chu a puan chhuah ang? Petera leh zirtîr dangte chuan Isua chu a tho lehin Pathianin hlen tûra a duh hna chu a kaihruai a ni tih an hriat chian vâng a ni. Chu bâkah, Isua thawhlehna chuan a zirtîrte pawh an tho leh ngei ang tih a tiam a. Entîr nân, Stephana chu mitthite thawhlehna a awm ang tih ring tlat chungin a thi a ni.​—⁠Tirh. 7:​55-60.

14. Isua a tho leh tih engvângin nge i rin?

¹⁴ Isua a tho leh tih kan hriat theih chhan palina chu tûnah Lal angin ro a rêl tawh a, Kristian kohhranho Lû angin rawng a bâwl tih finfiahna kan nei hi a ni. Chuvângin, Kristian dikte chu nasa takin an ṭhang a ni. Isua chu thihna ata tho leh lo ta se, hetiang hian an ṭhang ang em? Dik takin, tho leh lo ta se chuan a chanchin takngial pawh kan hre ngai hauh lo vang. Mahse, Isua chu a tho leh tawh tih leh tûna chanchin ṭha hmun tina kan hrilhnaah hma a hruaiin min kaihruai a ni tih rinna tûr chhan ṭha tak kan nei a ni.

15. Engvângin nge Isua thawhlehna chuan thu hril tûra huaisenna min pêk?

¹⁵ Krista thawhlehna chuan thu hril tûrin huaisenna min pe. Kum 2,000 chhûng chu Pathian hmêlmate chuan chanchin ṭha hrilhna tihtâwp nân hmanrua chi hrang hrang​—⁠kalpênna te, nuihsawhna te, tharum thawhna te, khap behna te, nghaisakna te, leh tihhlumnate chu​—⁠an hmang a. Mahse, engmah​—⁠‘min beihna tûra hriam chher rêng rêng’​—⁠chuan kan Lalram thu hrilhna leh zirtîr siamna chu a titâwp thei lo. (Is. 54:17) Setana chhiahhlawh a nih loh leh a bâwihte chu kan hlau lo. Min tiam ang ngeiin, Isua chuan kan hnêna awmin, min ṭanpui zêl ang. (Mt. 28:20) Kan hmêlmate chuan theih tâwp chhuah ṭhîn mah se, huaisen chhan tûr tam tak kan nei a, min ngawihtîr thei ngai lo vang!

16, 17. (a) Engtin nge thawhlehna chuan Isua thu zirtîrte dikzia a nemngheh? (b) Johana 11:​25-a sawi dânin, Pathianin eng thiltihtheihna nge Isua hnênah a pêk?

¹⁶ Isua thawhlehna chuan a thu zirtîr zawng zawng a dik tih a nemnghet. Paula chuan Krista chu thihna aṭanga kaihthawh a nih loh chuan Kristian rinna leh thu hrilhna chu engmah lo a ni ang tih a ziak a. Bible lama mi thiam pakhat chuan: “Krista kaihthawh a nih loh chuan . . . Kristiante chu inbumna râpthlâk takin a bum mi khawngaihthlâk tak an ni ang,” tiin a ziak a. Isua kha tho leh lo ta se, Chanchin ṭha ziakte chu hmêlmate tihhluma awm mi ṭha leh fing tak chanchin lungchhiatthlâk tak a ni ngei ang. Mahse, Krista chu a tho leh ngei a, nakin hun tûr chungchânga a sawite pawh tiamin a thu zirtîr zawng zawngte a dikzia chu nemngheh a ni.​—⁠1 Korinth 15:​14, 15, 20 chhiar rawh.

¹⁷ Isua chuan: “Kei hi thawhlehna leh nunna chu ka ni; tupawh mi ring chu thi mah sela a nung reng ang,” a ti a. (Joh. 11:25) Chu thusawi mak tak chu loh theih lohvin a thleng dik ang. Jehova chuan Isua hnênah nunna pêk kîr theihna a pe a; chutah chuan vâna thlarauva tho leh tûrte hnêna nunna pêk leh mai ni lovin, leia chantuan nunna beiseina neia lo tho leh tûr maktaduai tam takte hnêna nunna pêk pawh a tel a ni. Isua tlanna inthawina leh a thawhlehna chu kan tân thihna a awm leh tawh lo vang tihna a ni. Chu hriatna chuan hrehawm tawrhna engpawh tuar chhuak tûr leh huaisen taka thihna hial pawh hmachhawn tûrin a tichak che a ni lâwm ni?

18. Isua thawhlehna chuan eng nge min tiam?

¹⁸ Isua thawhlehna chuan leia mite chu Jehova tehna duhawm tak ang zêla rorêlsak an ni ang tih min tiam. Hmân lai Atheni khuaa mite hnênah Paula chuan: “A mi ruata chu, leia  mite fel takin a ngaihtuahtîr ang; chu chu Pathianin amah chu mitthi zîng ata kai thovin, mi zawng zawng hnênah a hriattîr tawh a ni,” tiin a sawi. (Tirh. 17:31) Ni e, Isua chu Pathian ruat rorêltu a ni a, thlei bîk nei lo leh hmangaihna nei takin ro a rêl ang tih kan chiang thei a ni.​—⁠Isaia 11:​2-4 chhiar rawh.

19. Engtin nge Krista thawhlehna rinna chuan min nghawng?

¹⁹ Isua thawhlehna rinna chuan Pathian duhzâwng ti tûrin min chêttîr. Inthawina atâna a thihna leh a hnua a thawhlehna awm lo ta se, sual leh thihnaa thiam loh chantîrna hnuaiah kan la awm reng ang. (Rom 5:12; 6:23) Isua chu tho leh lo ta se chuan heti hian kan sawi ve mai thei a ni: “I eiin i in ang u hmiang, naktûkah kan thi dâwn alâwm,” tiin. (1 Kor. 15:32) Mahse, hlimhlawp bâwlna nun chu kan ûm lo. Chu ai mah chuan, thawhleh beiseina chu kan hlutin thil engkimah Jehova kaihhruaina ngaihsak chhan tûr tam tak kan nei a ni.

20. Engtin nge Isua thawhlehna chuan Pathian ropuizia a nemngheh?

²⁰ Krista thawhlehna chuan ‘zawngtute hnêna lâwmman pêk hmang’ Jehova ropuizia chu ngawi reng chungin, ṭha takin a puang chhuak. (Heb. 11:⁠6) Isua chu thih theih tawh lohna vân nunna changa kai thovin, Jehova chuan a thiltihtheihna leh a finna ropui a va târ lang tak êm! Chu bâkah, Pathian chuan A thutiam zawng zawngte tifamkim tûra thiltihtheihna a neihzia a târ lang bawk. A thutiamte zîngah chuan lei leh vân huap thu buai remtu tûr ‘thlah’ a tiamna pawh a tel a. Chu thutiam thleng famkim tûr chuan Isua a thih a, a thawhleh a ngai a ni.​—⁠Gen. 3:⁠15.

21. Thawhlehna beiseina chuan i tân eng awmzia nge a neih?

²¹ Thawhleh beiseina chiang tak min petu Jehova chungah kan lâwm hle a ni lâwm ni? Bible chuan he thutiam hi min pe a ni: “Ngai teh, Pathian bâwktê chu mihring zîngah a lo awm ta, ani chu an hnênah a awm ang a, anni chu a mite an ni ang a, Pathian ngei chu an hnênah a awm ang a, an Pathian a ni bawk ang; an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭha te, nat te pawh a awm leh tawh hek lo vang; thil hmasate chu a ral ta,” tih hi. He beiseina ropui tak hi tirhkoh rinawm Johana hnênah: “Ziak rawh, hêng thu hi a rinawmin a dik si a,” tia nemngheh a ni. Tu hnên aṭangin nge Johana chuan thu puanchhuahna chu a dawn? Tho leh Isua Krista hnên aṭangin a dawng a ni.​—⁠Thup. 1:1; 21:​3-5. (w14-E 11/15)