1. Pathianin leiah mi a nei tih chungchânga mi ṭhenkhat ngaih dân chu eng nge ni?

TUN laia thil chîk mi tam takte chuan, Kristianna ram chhûng leh pâwna sakhaw liante’n mihringte hlâwkpui tûr thil an ti meuh lo tih an hria a. Mi ṭhenkhat chuan chutiang sakhuate chuan an zirtîrna leh an nungchang hmanga Pathian an kalh avângin Pathian duhsakna an dawng lo tih an pawm a ni. Mahse, anni chuan sakhua zawng zawngah hian mi ṭha tak an awm a, anni chu Pathianin a hmu a, leia amah betu angin a pawm ang tih an ring bawk. Anni chuan sakhaw dik lo chhuahsan a, a hranga Pathian biak a ṭûlna an hre lo. Mahse, he ngaih dân hi Pathian ngaih dân a ni em? Bible-a Jehova betu dik takte chanchin ṭhenkhat ennawnin a chhânna i lo zawng chhuak ang u.

2. Tute nge Jehova neih hran mite lo ni a, anni chu engin nge mi dangte laka ti hrang bîk? (A thupui chunga milem en rawh.)

² B.C.E. kum zabi 20-na aṭang tawh khân, Jehova chuan leiah hian mi a nei hrang daih tawh a. “Ringtu zawng zawng pa” tia koh Abrahama chu a hnua mi za têl lo awmna chhûngkaw  lû a ni. (Rom 4:11; Gen. 14:14) Kanaan rama lalte chuan ani chu “lal ropui tak” anga ngaiin, zahthiam takin an cheibâwl a ni. (Gen. 21:22; 23:⁠6) Jehova chuan Abrahama leh a thlahte chu thu a thlunpui a. (Gen. 17:​1, 2, 19) A hnênah chuan: “Hei hi kei leh nang leh i hnua i thlahte kâra ka thuthlung i zawm tûr chu a ni; in zînga mipa tawh phawt chu serh tan tûr a ni. . . . Chu chu nangmah nêna kan inkâra thuthlung chhinchhiahna a ni ang,” tiin a hrilh a ni. (Gen. 17:​10, 11) Chutiang chuan, Abrahama leh a chhûngkuaa mipa zawng zawngte chuan an serh an tan ta a. (Gen. 17:​24-27) Serh tanna chu Abrahama thlahte chauhvin Jehova nêna thuthlunga inlaichînna an nei tih târ langtu chhinchhiahna a ni.

3. Abrahama thlahte chu eng angin nge an rawn pun chhoh?

³ Abrahama tupa Jakoba, a nih loh leh Israela chuan fapa 12 a nei a. (Gen. 35:​10, 22b-26) A hnuah chuan, hêng a fapate hi Israel hnam 12-te thlahtu an lo ni ta a ni. (Tirh. 7:⁠8) Jakoba leh a chhûngte chuan ṭâm avângin Aigupta ramah inhumhimna an zawng a, chutah chuan Jakoba fapa Josefa chu Pharaoa tân ei leh in lama hotu ber leh a mi rin ber a lo ni a. (Gen. 41:​39-41; 42:⁠6) Jakoba thlahte chu an lo tam deuh deuh va, mi ‘chi hrang hrang awm khâwm’ an lo ni ta a ni.​—⁠Gen. 48:4; Tirhkohte 7:17 chhiar rawh.

4. A tîrah chuan, Aigupta mite leh Jakoba thlahte inkârah eng ang inlaichînna nge awm?

⁴ Jakoba thlahte chu Aigupta ram Nile lui mawng lam Gosen ram an tihah chuan kum 200 aia tam an awm a. (Gen. 45:⁠9.10) Aigupta rama an awm hun chanve vêl chhûng chu Aigupta mite nên inngeih dial dialin an awm a, khaw têahte chuan thlamuang takin an berâm rualte leh bâwng rualte nên chuan an awm a. Josefa hriaa ngaihlutu Pharaoa chuan ṭha takin a lo lâwm a ni. (Gen. 47:​1-6) Aigupta mite tân chuan berâm vêngtute chu engtin emaw takin hmuhsit awm an ni a. (Gen. 46:​31-34) Mahse, an rama Israel mite an awm chu rem an tih a ngai a ni.

5, 6. (a) Engtin nge Aigupta rama Pathian mite dinhmun chu a inthlâk? (b) Engtin nge Mosia nunna chu humhim a nih a, Jehova chuan A mite tân eng nge a tih?

⁵ Mahse, Pathian mite dinhmun chu nasa takin a la inthlâkthleng ang. “Aigupta ramah chuan Josefa hre lo, lal thar a lo awm ta a. Tichuan a mite hnênah, ‘Ngai teh u, Israela thlahte hi kan aiin an tamin an chak tâk zâwk hi le,’ ” a ti a.“Tin, Aigupta mite chuan Israela thlahte chu rim takin an thawhtîr a: hnathawh hautak tak, lung chârna leh leirawhchante siamtîr leh lohvah hna tinrêngte, hrehawm taka thawhtîrin an chhawr vak vak a, an thawhna zawng zawngah chuan rim takin an chhawr zêl a.”​—⁠Ex. 1: 8, 9, 13, 14.

⁶ Pharaoa hian Hebrai mipa naupang piang zawng zawng chu an pian ve leh tihlum nghâl tûrin thu a pe hial a. (Ex. 1:​15, 16) Chutih hun lai tak chuan Mosia chu a lo piang a ni. Thla thum mi vêl a nih chuan a nu chuan Nile lui phairuang kârah a thukru a, Pharaoa fanu chuan Mosia chu a chhar ta a. A hnuah chuan a fapaah a pawm ta a ni. Vânneihthlâk takin, a naupan chhûng chu a nu dik tak, mi rinawm Jokebedi chuan a enkawl a, tichuan ani chu Jehova chhiahhlawh rinawm a rawn ni ta a ni. (Ex. 2:​1-10; Heb. 11:​23-25) Jehova chuan a mite hrehawm tawrhna chu a “ngaihsak reng” a, Mosia hruaina hnuaiah anmahni chhan chhuah chu a tum ta a. (Ex. 2:​24, 25;  3:​9, 10) Chutiang chuan Jehova “tlante,” a nih loh leh chhan chhuahte an rawn ni ta a ni.​—⁠Ex. 15:13; Deuteronomy 15:15 chhiar rawh.

7, 8. Engtin nge Jehova mite chu hnam thianghlim an lo nih?

⁷ Jehova chuan Israelte chu hnam pakhat angin la din hrih lo mah se, a mite angin a pawm a. Chuvângin, Mosia leh Arona chu Pharoa hnêna: “LALPA Israel-hote Pathianin heti hian a ti, ‘Ka mite hi thlalêrah ka hnênah lo kût tûrin rawn kaltir rawh,’ ” tia sawi tûrin a hrilh a ni.​—⁠Ex. 5:⁠1.

⁸ Israel mite Aigupta awpbehna ata chhan chhuah nân, Pathianin hri sâwm a lêntîr a, Pharaoa leh a sipaite chu Tuipui Sen-ah a tiborâl bawk a ni. (Ex. 15:​1-4) Thla thum pawh a ral hmain, Jehova chuan Sinai Tlâng-ah Israel mite thu a thlunpui a, an hnênah: “Ka thu in ngaihthlâk tak zet a, ka thuthlung hi in pawm chuan khawvêl zawng zawng zîngah hian ka tân ro thlan bîk  . .  hnam thianghlim in ni ang,” tiin a hrilh a ni.​—⁠Ex. 19: 5, 6.

9, 10. (a) Deuteronomy 4:​5-8-a târ lan angin, engtin nge Dân chuan Israel mite chu mi dangte laka a tihhran? (b) Engtin nge Israelte chuan “Pathian tân mi thianghlim” an ni tih an lantîr ang?

⁹ Aigupta rama an awm laia bâwih an nih hma khân, Hebrai mite chu tlâng mi angin an inrêlbâwl a, chhûngkaw lûte, a nih loh leh thlahtute chuan thu an nei a. Hêng chhûngkaw lûte hi an hun hmaa Jehova chhiahhlawhte ang bawkin, thu neitute, rorêltute, leh an chhûngkaw tâna puithiamte angin an ṭang a ni. (Gen. 8:20; 18:19; Job. 1:​4, 5) Amaherawhchu, Mosia hmangin Jehova chuan Israel mite chu hnam dang zawng zawng laka tihrangtu tûr dân thu a pe ta a. (Deuteronomy 4:​5-8 chhiar rawh; Sâm 147:​19, 20) Dân chuan puithiamho a dah hrang a, an hriatna leh finna avânga zahkai “upate” chuan rorêlna dik an awmtîr a ni. (Deut. 25: 7, 8) Dân thupêk chuan sakhaw lam leh khawtlâng lam thila hnam piang hlim thiltih tûrte chu chiang takin a hrilhfiah a ni.

¹⁰ Israel mite Ram Tiam-a an luh hma lawk khân, Jehova chuan a dânte chu hrilh nawnin Mosia hnênah: “Vawiinah hian a tiam che u ang khân, a thupêk zawng zawngte in zawm a, ama pual bîk ni tûr leh a lo sawi tawh anga LALPA in Pathian tân mi thianghlim in nih theihna tûr leh hnam a siam zawng zawng zînga fak te, hming ṭhat te, chawimawi te hlawh tûrin LALPAN a thlang che u a ni,” tiin a hrilh a ni.​—⁠Deut. 26:​18, 19.

11-13. (a) Tute nge Pathian mi thlante zînga rawn tel? (b) Israel mi ni lote chuan Jehova biak an duh chuan eng tih nge an duh ang?

¹¹ Jehova chuan leiah hnam thlan a nei tawh chung pawhin, a mite zînga Israel mi ni lote an awm chu a khap lo. Aigupta ram aṭanga a chhan chhuah khân, Aigupta mite tiamin, Israel mi ni lo “mipui inpawlhsawp tam tak [an ruala] an kal ve” a phal a ni. (Ex. 12:38) Hri sarihna a lêntîr lai khân, “Pharaoa chhiahhlawhte zînga” mi ṭhenkhat chuan Jehova an ṭih a, anni chu Israelte ruala Aigupta kalsantu mipui inpawlhsawp tam tak zîngah an tel ngei ang.​—⁠Ex. 9:⁠20.

¹² Israel mite’n Kanaan ram la tûra Jordan lui an kân hma lawk khân, Mosia chuan an hnênah: “Ram dang mite chu hmangaih ve rawh u,” tiin a hrilh a. (Deut. 10:​17-19) Pathian mi thlante chuan Mosia hmanga dân bul a pêkte zâwm duhtu ram dang mi tupawh chu an zîngah an pawm tûr a ni. (Lev. 24:22) Ram dang mi ṭhenkhat chu Jehova  betu an rawn ni a, Israel mi Naomi hnênah Moab mi Ruthi thusawi: “I chite chu ka chite an ni ang a, i Pathian chu ka Pathian a ni ang,” tih ngaih dân chu an nei a ni. (Rut. 1:16) Chûng ram dang mite chu saphun an lo ni ta a, an mipate chuan an serh an tan a. (Ex. 12:​48, 49) Jehova chuan a mi thlante zînga mi angin anni chu a lâwm a ni.​—⁠Num. 15:​14, 15.

¹³ Solomona’n Jehova hnêna biak in a hlan lai khân, Israel mi ni lo Pathian betute tân ruahmanna siamsak a ni a, chu chu a ṭawngṭainaah a lang a ni: “I mi Israelte ni lo, hnam dang mi, i hming ropui tak leh i kut chak tak leh i bân phar avânga ram hla tak ata lo kal a, he mi in lam hawia an rawn ṭawngṭai hunin nangin i awmna vânan lo ngaithla la, hnam dangte pawh an koh dân che ang zêlin an chungah ti ang che; tichuan i mi Israelte ang bawkin khawvêla hnam tinin i hming an hria ang a, an ṭih ang chia, he in ka sak hian i hming a pu tih an hre dâwn nia,” tihah hian. (2 Chro. 6:​32, 33) Isua hun lai pawh khân, Jehova biak duhna nei Israel mi ni lote chuan A thuthlung mite zînga awm chu an duh a ni.​—⁠Joh. 12:20; Tirh. 8:⁠27.

14-16. (a) Eng kawngin nge Israel mite chu Jehova tâna thuhretu hnam an nih ang? (b) Tûn laia Jehova mite chuan eng mawhphurhna nge an neih?

¹⁴ Israel mite chuan an Pathian Jehova an bia a, hnam dangte erawh chuan anmahni pathiante an bia a. Zâwlnei Isaia hun lai khân, Jehova chuan khawvêl dinhmun chu court-a rorêl sakna nên a khaihkhin a. Ani chuan hnamte pathian chu an pathianna nemngheh nân thuhretu ko chhuak tûrin a cho va, heti hian sawi a ni: “Hnam tinrêng inkhâwm sela, mi tin awm khâwm rawh se: an [pathiante] zîngah tuin nge hei hi sawi thei a, tûn hma thilte min hriattîr thei? Thiam chantîra an awm theihna tûrin an thuhretute chu rawn hruai rawh se: a nih loh leh, bengin hria sela, ‘Thutak a ni,’ ti rawh se,” tiin.​—⁠Is. 43:⁠9.

¹⁵ Hnamte pathian chuan an pathianzia finfiahna engmah an pe thei lo va. Anni chu milem mai an nih avângin an ṭawng thei  lo va, hmun tina phurh sawn an ngai ṭhîn. (Is. 46:​5-7) Kawng leh lamah chuan, Jehova chuan a mi Israelte hnênah chuan heti hian a sawi a ni: “Mi hriata, mi rina, amah chu ka ni tih in hriat theihna tûrin nangni hi mi hriatpuitute in ni, ka chhiahhlawh ka thlana pawh chu,  . . ka awm hmâ chuan Pathian rêng rêng din an awm lo va, ka awm hnuah pawh an awm hek lo vang. Kei, keimah ngei hi, LALPA chu ka ni: keimah lo chu chhandamtu rêng rêng an awm lo. . . . Chuvângin nangni hi ka thu mi hriatpuitute in ni, . . . kei chu Pathian ka ni,” tiin.​—⁠Is. 43:​10-12.

¹⁶ “Pathian Chungnungber chu tu nge ni?” tih chungchânga khawvêl pum huap thu buai neihah chuan, Jehova mi thlante chuan Jehova chu Pathian dik awmchhun a ni tih chiang tak leh fiah takin an târ lang a ni. Jehova chuan anni chu “ka mi, ka thlante, mi fakna tilangtu tura ka tâna ka mi siamte chu,” tiin a ko va. (Is. 43: 20, 21) Anni chu a hming putute an ni a. Aigupta ram aṭanga Jehova chhan chhuah an nih avângin leia mi dangte hmaa a lalchungnunna thlâwp tûrin mawhphurhna an nei a ni. A nihna takah chuan, an dinhmun chu zâwlnei Mika’n tûn laia Pathian mite chanchin a ziak ang tûr a ni: “Hnam tinin mahni pathian ṭheuh an bia ang a, keini pawh LALPA kan Pathian chu kumkhuain kan bia ang,” tih hi.​—⁠Mik. 4:⁠5.

17. Jehova mithmuhah, engtin nge Isarel mite chu grêp hrui suak ṭâwng tak an lo nih?

¹⁷ Israel mite an Pathian Jehova chunga an rinawm lo chu a pawi hle. Thing bul, lung bula siam hnamte pathian biakna chuan a hneh a ni. B.C.E kum zabi pariatnaah zâwlnei Hosia chuan Israel chu grêp hrui ṭâwng tak niin a sawi a. Tichuan heti hian a ziah belh a ni: “Isarel [chuan] . . . a maichâmte a tipung a. . . . Rilru pahnih an nei a, tûnah chuan thiam loh changin an awm ang,” tiin. (Hos. 10:​1, 2) Kum 150 vêl hnuah chuan, A mi rinawm lote hnêna Jehova thu chhuak chu Jeremia chuan: “Chi dik tak hmangin grêp ṭha tak ka phun che a, eng tiziaa inleta, ka tân grêp suaka lo chang ta nge i nih? . . . I pathian, i siamte kha khawiah nge an awm tâk ni? Anni chu tho zâwk sela, i mangan laiin an chhandam thei mahna che . . . Ka mite erawh chuan . . . mi lo theihnghilh ta,” tiin a ziak a ni.​—⁠Jer. 2:​21, 28, 32.

18, 19. (a) Engtin nge Jehova chuan a hming pu atân mi thar a siam ang tih a sawi lâwk? (b) A dawta thuziakah eng nge kan zirho vang?

¹⁸ Israel mite chuan biakna dik leh Pathian thuhretu rinawm tak nia rah ṭha tak chhuah ai chuan, milem biakna rah ṭha lo tak an chhuah a. Chuvângin, Isua chuan a hun laia Juda hruaitu vervêkte hnênah: “Pathian ram chu in hnên ata lâksak a ni ang a, a rah chhuah tûr hnam hnênah pêk a ni ang,” tiin a hrilh a ni. (Mt. 21:43) Jehova’n zâwlnei Jeremia hmanga a sawi lâwk ‘thuthlung thara’ telte chauh chu, chu hnam thar, thlarau lam Israel-ah chuan an tel ang. Chu thuthlung thara tel tûr thlarau lam Israel mite chungchângah Jehova chuan: “Kei hi an Pathian ka ni ang a, anni chu ka mite an ni ang,” tiin a sawi lâwk a ni.​—⁠Jer. 31:​31-33.

¹⁹ Kan lo hmuh tawh angin, tisa lam Israelte an rinawm loh hnuah Jehova chuan kum zabi khatnaa a mite chu thlarau lam Israel ni tûrin a siam a ni. Chuti a nih chuan, tûn laia leia a mite chu tute nge ni? Engtin nge rilru ṭha pute chuan Pathian betu dikte an hriat hran theih ang? Chu chu a dawta thuziakah kan ngaihtuah ang. (w14-E 11/15)