1, 2. C.E. 33, Pentiskost nî khân, eng inthlâkthlengna nge thleng a, tute nge Jehova mi tharte lo ni ta? (A thupui chunga milem en rawh.)

C.E. 33 Pentikost nî chu leia Jehova mite chanchinah hun pawimawh ber a ni a. Inthlâkthlengna pawimawh tak a thleng a ni. Chu mi nî chuan, a thlarau thianghlim hmangin Jehova chuan hnam thar​—⁠thlarau lam Israel, “Pathian Israelte,”​—⁠chu a hring a. (Gal. 6:16) Abrahama hun lai aṭangin a vawikhatna atân, Pathian mite chu tisa lam serhtanna hmanga chhinchhiah an ni tawh lo vang. Chu ai chuan, chu hnam thara mi tinte chungchângah, Paula chuan: “Serhtan tak chu, rilru lama tan a ni,” tiin a ziak a ni.​—⁠Rom 2:⁠29.

² Pathian hnam thara tel hmasa berte chu Jerusalem pindan chungnunga inhmuhkhâwmnaa tel tirhkohte leh Isua zirtîr dangte an ni a. (Tirh. 1:​12-15) Anni chuan thlarau thianghlim an dawng a, Pathian fate ni tûra thlarauva hrin an ni. (Rom 8:​15, 16; 2 Kor. 1:21) Hei hian Krista palaina leh a thisena tihngheh thuthlung thar chu hman ṭan a ni tih a târ lang. (Lk. 22:20; Hebrai 9:15 chhiar rawh.) Hêng zirtîrte hi Jehova hnam thar, a mi tharte an lo ni ta a. Thlarau thianghlim pêk an nih avângin Jerusalema Judate Chawlhkâr Kût, a nih loh  leh Pentikost nî hmang tûra Rom ram awp zawng zawng aṭanga lo kal Judate leh saphunte hnênah an ṭawng hman chi hrang hrangin thu an hril thei a ni. Chûng mite chuan thlarauva hrin Kristiante hmanga thu hrilh “Pathian thiltih ropuite” chu anmahni ṭawng ngeia hriain, an hre thiam a ni.​—⁠Tirh. 2:​1-11.

3-5. (a) Pentikost nî khân Judate hnênah Patera’n eng thu nge a hrilh? (b) Chu mi hnua eng hmalâknate hian nge Jehova hnam thar piang hlim chu ṭhan chhohtîr?

³ Jehova chuan Judate leh saphunte tâna he hnam thar, Kristian kohhran chhûnga mi nih theihna kawng hawnnaa hma hruai tûrin tirhkoh Petera chu a hmang a. Pentikost nî khân, Petera chuan Judate hnênah Isua, ‘thinga an khenbeha’ chu ‘Pathianin Lal leh Krista ni fâwma a siam’ avângin Isua chu an pawm tûr a ni tih huaisen takin a sawi a ni. Mipuite’n an tih tûr an han zawh chuan, Petera chuan: “Sim ula, in sual ngaihdam nân Isua Krista hmingin baptisma chang ṭheuh rawh u; tichuan thlarau thianghlim pêk hi in hmu ang,” tiin a chhâng a ni. (Tirh. 2:​22, 23, 36-38) Chu mi nî chuan mi 3,000 lai chu thlarau lam Israel hnam thara belhchhahin an awm ta a. (Tirh. 2:41) Chu mi hnuah chuan, ṭhahnem ngai taka tirhkohte thu hrilhna chuan rah a chhuah chhun zawm zêl a. (Tirh. 6:⁠7) Hnam thar chu an lo ṭhang chho ta zêl a ni.

⁴ A hnuah chuan, Samari mite hnênah pawh thu hrilh ṭan a ni a, a hlawhtling ta hle a ni. Chanchin ṭha hriltu Philipa chuan mi tam tak chu baptisma a chantîr a, mahse, thlarau thianghlim erawh an dawng nghâl mai lo. Jerusalema governing body chuan Samari mite hnênah chuan tirhkoh Petera leh Johana chu an tîr a, “tirhkohte chuan an chungah an kut an nghat a, thlarau thianghlim an hmu ta a.” (Tirh. 8:​5, 6, 14-17) Chutiang chuan, chûng Samari mite pawh chu thlarau lam Israelte zînga mi an lo ni ta a ni.

⁵ C.E. 36 kumah, thlarau lam Israel hnam thara mi dangte an luh theih nân Petera chu hman a ni leh a. Chu chu, Rom sipai za hotu Kornelia leh a chhûngte leh a ṭhiante hnêna thu a hrilh khân a thleng a ni. (Tirh. 10:​22, 24, 34, 35) Bible chuan: “Peteran chûng thu chu a sawi lai tak chuan thu hretute zawng zawng [Juda ni lote] chungah chuan thlarau thianghlim a lo thleng ta a. Tin, serhtanho zînga ringtute Petera rawn zui apiang chuan thlarau thianghlim pêk chu Jentailte chungah pawh leih a nih avângin mak an ti hle a,” tiin a sawi. (Tirh. 10:​44, 45) Chuvângin, tûnah chuan serhtan loh Jentail ringtute pawh thlarau lam Israel hnam thar zînga mi an ni thei ta a ni.

6, 7. Eng kawngin hnam thara mite chuan ‘Jehova hming putute’ anga thil an tih ang a, engti khawpa nasain nge an tih ang?

⁶ C.E. 49, kum zabi khatnaa Kristiante governing body inkhâwmnaah chuan tirhkoh Jakoba chuan: “Pathianin ama hming pu  atân an zîng ata mite la chhuak tûrin Jentailte a kan ṭan tirh dân thu chu Sumeona [Petera] hian a sawi ta a,” tiin a sawi a. (Tirh. 15:14) Jehova hming pu he hnam thar zîngah hian Judate leh Juda mi ni lo ringtute an tel a ni. (Rom 11:​25, 26a) A hnuah, Petera chuan: “Hmân lai khân mi rêng in ni lo va, tûnah erawh chuan Pathian mi in ni ta a,” tiin a ziak a. An thiltih tûr chu sawiin, Petera chuan: “Thim ata chhuaka, a êng mak taka lût tûra kotu che u ṭhatna chu in entîr theih nân nangni zawng chi thlan, lal puithiamho, hnam thianghlim, Pathian mite ngei in ni si a,” tiin a sawi. (1 Pet. 2:​9, 10) Anni chuan a hming an puta chu fakin, vântlâng hmaah a hming an chawimawi tûr a ni a. Lei leh Vâna Lalchungnungber, Jehova tâna thuhretu huaisen tak an ni tûr a ni.

⁷ Tisa lama Israelte ang bawkin, thlarau lam Israelte chu Jehova’n “ka mi, ka thlante, mi fakna tilangtu tura ka tâna ka mi siamte” tia a kohte an ni. (Is. 43:​20-21) Chûng hun laia an biak pathian dik lo zawng zawngte hai langin, Kristian hmasate chuan Jehova chu Pathian dik awmchhun a ni tih huaisen takin an puang a. (1 Thes. 1:​9, 10) Anni chuan ‘Jerusalem khuaah te, Judai leh Samari ram khaw tinah te, leh kâwlkil thlengin’ Jehova leh Isua thu an hriattîr a ni.​—⁠Tirh. 1:8; Kol. 1:⁠23.

8. Kum zabi khatnaa Pathian mite hnênah tirhkoh Paula chuan eng vaukhânna nge a pêk?

⁸ Paula chu kum zabi khatnaa ‘Jehova hming putu’ mi huaisen tak a ni a. Khawvêl lam mi fing takte hmaah dingin, ani chuan Jehova chu “Pathian, khawvêl leh a chhûnga thil zawng zawng siamtu” a nihzia leh ani chu “lei leh vân lal” a nihzia sawiin Jehova lalchungnungna chu huaisen takin a humhim a ni. (Tirh. 17:​18, 23-25) A missionary zin vawithumna tâwp dâwn lamah chuan, Paula chuan Pathian hming putute chu heti hian a vaukhân a ni: “Ka kal hnuin chinghne kawlhte in zîngah an lo lût ang a, pâwlho chu an zuah lo vang tih ka hria e. In zînga mi ngei pawh hi, zirtîrhote in hnêna pakaitîr tûrin thu hran sawi in lo la awm ang,” tiin. (Tirh. 20:​29, 30) He sawi lâwk kalpênna hi kum zabi khatna tâwp dâwn lamah chuan a lang chiang tawh hle a ni.​—⁠1 Joh. 2:​18, 19.

9. Tirhkohte an tih hnu khân, ‘Jehova hming putute’ chungah eng thil nge thleng?

⁹ Tirhkohte an thih hnu khân, chu kalpênna chu a pung chak hle a, Kristianna ram sakhuate a piang chhuak ta a. ‘Jehova hming putute’ nih ahnêkin, kalpêng Kristiante chuan an Bible lehlinna tam takah Pathian hming takngial pawh an paihbo a ni. Anni chuan milem betute thil tih dân chu la lûtin, Bible thu nêna inkalh an thurinte leh an “indona thianghlim” leh an nungchang bawlhhlawhnate hmangin Pathian an chawimawi lo a ni. Chuvângin, kum zabi tam tak chhûng chu Jehova chuan leiah hian amah betu tlêmtê chauh a nei a, mahse anni chu ‘a hming putute’ anga ṭha taka rêlbâwl an ni lo.

10, 11. (a) Buh lem leh buh tak tehkhin thuah Isua’n eng nge a sawi lâwk? (b) Kum 1914 hnu khân, engtin nge Isua tehkhin thu chu a thlen famkim a, eng nge a rah chhuah?

¹⁰ Buh lem leh buh tak tehkhin thuah khân, Isua’n kalpênna awmtîrtu thlarau lama thimna hun, zân a thlen tûr thu a sawi lâwk a. Ani chuan “mi an muthlih hlânin” Diabola chuan Mihring Fapain buh tak a thehna hmunah buh lem a theh dâwn tih a sawi a ni. A chi hnih chuan “khawvêl tâwp” thlengin an ṭo za ang. Isua chuan “chi ṭha” chu “ram fate” an niin, “buh lemte” chu “mi sual fate” an nih thu a sawi bawk. Tâwpna hun chhûng hian Mihring Fapa chuan  entîr nei buh lem zîng ata buh takte thliar hrang tûrin vântirkohte chu ‘buh ât tûrin’ a tîr chhuak ang a. Chutah, ram fate chu seng khâwm an ni ang. (Mt. 13:​24-30, 36-43) Engtin nge chu chu a lo thlen a, Jehova’n lei chunga mi a neihna nên engtin nge a inkûngkaih?

¹¹ Kum 1914-ah khân “khawvêl tâwpna” a in ṭan a. Chu mi kuma inṭan indona a thlen chhûng chuan “Ram fate,” hriak thih Kristiante chu sâng tlêm tê chauh an ni a, Babulon Khaw Ropui hnuaiah sal angin thlarau lamah an tâng a ni. Kum 1919-ah Jehova chuan anni chu a chhan chhuak a, “buh lem,” a nih loh leh Kristian suakte nêna an inan lohna chu chiang takin a siam a. “Ram fate” chu: “Ni khatah ram a piang thut dâwn em ni? Vawilehkhatah hnam hrinin a awm thut dâwn em ni? Zion chuan nau a vei veleh a fate chu a hring ta pang si a,” tia Isaia sawi lâwk thu chu tifamkimin hnam pakhatah a siam a. (Is. 66:⁠8) Zion, thlarau mite awm khâwmna Jehova inawpna pâwl chuan thlarau lam hriak thih a fate a hring a, hnam pakhatah a siam a ni.

12. Engtin nge hriak thihte chuan tûn laia ‘Jehova hming putute’ an nihzia an lantîr?

¹² Kristian hmasate ang bawkin, hriak thih “Ram fate” chu Jehova thuhretute an ni tûr a ni a. (Isaia 43:​1, 10, 11 chhiar rawh.) Chutiang an nih avângin, anni chu an Kristian nungchang ṭha leh “Ram chanchin ṭha hi hnam zawng zawng hriattîrna” chuan a tidanglam a ni. (Mt. 24:14; Phil. 2:15). Hetiang kawng hian, anni chuan mi maktaduai tam takte chu Jehova hmaah thiam an chantîr a ni.​—⁠Daniela 12:3 chhiar rawh.

13, 14. Jehova be tûr leh a pawm tlâka rawngbâwl tûrin, thlarau lam Israel mi ni lote chuan eng nge an tih ngai a, chu chu engtin nge Bible-ah hrilh lâwk a nih?

¹³ Thuziak hmasaa kan hmuh tawh angin, hmân lai Israel ramah khân, ram dang mite chu pawm tlâka Jehova betu an ni thei a; mahse, Jehova thuthlunpui mite an kawm a ngai a ni. (1 Lal. 8:​41-43) Chutiang bawkin,  tûn laiah pawh thlarau lam Israel mi ni lo te chuan Jehova mi “Ram fate”​—⁠Jehova hriak thih Thuhretute​—⁠an kâwm ngei ngei tûr a ni.

¹⁴ He tâwpna huna a mite nêna Jehova be tûra mipui tam tak kal khâwmna chungchâng chu hmân lai zâwlnei pahnih hmanga sawi lâwk a ni a. Isaia chuan: “Chi tam takte chu an kal ang a, ‘Lo haw ula LALPA tlângah, Jakoba Pathian inah chuan i chho vang u; tichuan ani’n a kawng chanchinte chu min zirtîr ang a, a kalkawngahte chuan kan kal ang,’ an ti ang: Zion aṭang chuan dân thu chu a lo chhuak dâwn si a, LALPA thu chu Jerusalem aṭangin a lo chhuak dâwn a ni,” tiin a sawi lâwk a. (Is. 2:​2, 3) Chutiang bawkin, zâwlnei Zakaria pawhin: “LALPA zawng tûr leh LALPA duhsakna chu ngên tûrin mipui tam tak leh hnam chak takte Jerusalemah an lo kal ang,” tiin a sawi lâwk bawk. Anni chu “mi sâwm, hnam ze tinrêng aṭanga lo chhuakte” nêna entîrin a sawi a, thlarau lam Israel mi fênfualah vuanin: “I hnênah Pathian a awm tih kan hriat avângin i hnênah kan kal ve dâwn e, an ti ang,” tiin an sawi a ni.​—⁠Zak. 8:​20-23.

15. ‘Berâm dangte’ chu eng hnathawhnaah nge thlarau lam Israel mite nêna an “kal ve”?

¹⁵ ‘Berâm dangte’ chu Ram chanchin ṭha hrilhnaah thlarau lam Israelte nên an “kal ve” a. (Mk. 13:10) “Berâm vêngtu ṭha” Isua Krista kaihhruaina hnuaiah anni chu hriak thihte nên “pâwl khatin” an awm a, Pathian mite an lo ni ta a ni.​—⁠Johana 10:​14-16 chhiar rawh.

16. Engtin nge Jehova chuan “hrehawm nasa tak” tâwpna lam chu a thlêntîr ang?

¹⁶ Babulon Khaw Ropui tihchhiat a nih hnu chuan, Jehova mite chu nasa taka beih rawn an ni ang a, chutih hunah chuan, Jehova’n a chhiahhlawhte tâna a siam vênhimna hnuaia kan awm a ngai ang. He beihna hi “hrehawm nasa tak” tâwp dâwn lamah a ni ang a, Jehova ngei chuan he inbeihna tûr hun thlangin a ruahman ang. (Mt. 24:21; Ezek. 38:​2-4) Chutih hunah chuan, Goga chuan “hnamte zîng ata hruai khâwm tawh” Jehova mite chu a bei ang. (Ezek. 38:​10-12) Chu beihna chu Goga leh a mite chunga Jehova rorêlna thlen hun tûr chhinchhiahna a ni ang. Pathian Jehova chuan a lalchungnungna leh a hming a thianghlimzia a ti lang ang; heti hian a sawi si a: “Hnam tam takte mithmuhah ka intilang ang, tin, kei hi LALPA ka ni tih an hria ang,” tiin.​—⁠Ezek. 38:​18-23.

17, 18. (a) Goga’n Jehova mite a beih hunah chuan eng kaihhruaina nge kan dawn ang? (b) Jehova vênhimna dawn kan duh chuan eng nge kan tih ang?

¹⁷ Goga beihna a inṭan chuan Jehova chuan a chhiahhlawhte hnênah: “Hawh u, ka mite u, in pindan chhûngahte lût ula, in kawngte chu inkhâr khum rawh u: lungnih lohna hi a kian hmâ loh chu mitkhapkâr lek biru rawh u,” tiin a hrilh ang. (Is. 26:20) Chu hun pawimawh takah chuan, Jehova chuan nun chhanhim nâna mamawh kaihhruainate min pe ang a, ‘pindan chhûng’ tih chuan kan tualchhûng kohhrante nên inzawmna ṭha tak a neih ngei a beisei awm hle.

¹⁸ Chuvângin, hrehawm nasa tak chhûnga Jehova vênhimna hlâwkpui kan duh chuan, Jehova chuan leiah mi a nei hrangin, kohhranahte a din a ni tih kan hriat a ngai a. Anni nêna ding nghet tlatin kan tualchhûng kohhrante nên inzawmna hnaih tak kan nei reng tûr a ni. Kan thinlung zawng zawngin: “Chhandamna hi LALPA ta a ni. I malsâwmna chu i mite chungah awm rawh se,” titu fakna hla phuahtu thu puan chhuahnaah chuan i tel ve ang u.​—⁠Sâm 3:⁠8. (w14-E 11/15)