1. Engtin nge Leviticus-bu chuan min ṭanpui theih?

LEVITICUS bu-ah hian, thianghlimna hi Bible-a lehkhabu dang zawng zawngte aiin a chuang tam ber a. He mizia hi Jehova betu dik takte tâna neih ngai a nih avângin, Leviticus bu hriatthiamna leh hlutna chuan thianghlim tûrin min ṭanpui ang.

2. Leviticus hmêlhmang ṭhenkhat chu eng nge ni?

² Zâwlnei Mosia ziah Leviticus bu hi “Pathian Lehkha Thu zawng zawng” zînga tel a ni a, zirtîrna kawngah a sâwt a ni. (2 Tim. 3:16) A bung tinah chuan Jehova hming chu a chawhrualin vawi sâwm lai a lang a ni. Leviticus bu hriatthiamna chuan Pathian hming tichhe thei thil engpawh pumpelh tûrin min tichak ang. (Lev. 22:32) Leviticus bua thu mal “Kei hi LALPA ka ni,” tih chuan Pathian thu zâwm tûrin min hriattîr ṭhîn tûr a ni. He thuziakah leh a dawta thuziakah hian Pathian biakna thianghlima tel tûra min ṭanpui thei Leviticus bua chuang lunghlu anga sawi theih tûr thil ṭha takte chu i lo en ang u.

3, 4. Arona leh a fapate bual faina chuan eng nge a entîr? (A thupui chunga milem en rawh.)

³ Leviticus 8:​5, 6 chhiar rawh. Jehova chuan Arona chu Israelte puithiam lalber ni tûr leh a fapate chu Israel hnam tâna puithiam  ni tûrin a thlang a. Arona chuan Isua Krista a entîr a, a fapate chuan Isua hnungzui hriak thihte a entîr bawk a ni. Chuti chu, Arona bual faina chuan Isua tihthianghlimna a entîr em? Entîr lo ve, Isua chu sualna nei lo leh ‘hmêlhem lo’ a nih avângin tihthianghlim a ngai lo. (Heb. 7:26; 9:14) Mahse, Arona bual fai tawhna dinhmun chuan Isua thianghlimna leh felna a entîr a ni. A nih leh, Arona fapate bual faina chuan eng nge a entîr?

⁴ Arona fapate bual faina chuan vân lam puithiam ni tûra thlânte tihthianghlimna chu a lo entîr lâwk a. Arona fapate bual faina leh hriak thihte baptisma channa chuan inanna a nei em? Nei lo, baptisma chu sual thenfaina a ni lo va, Pathian Jehova hnêna inpumpêk pumhlûmna a entîr zâwk a ni. Hriak thihte bual faina chu “tuia sila thu” hmanga neih a ni a, chutiang tûr chuan Krista zirtîrnate chu thinlung zawng zawnga an nunpui a ngai a ni. (Eph. 5:​25-27) Chutiang chuan tihthianghlim leh thenfai an ni. Eng nge ‘berâm dangte’ chungchâng ve hi le?​—⁠Joh. 10:⁠16.

5. Engvângin nge berâm dangte chu Pathian Thu hmanga tihthianghlim an ni kan tih theih?

⁵ Arona fapate chuan Isua berâm dangte zînga “mipui tam tak” a entîr lo. (Thup. 7:⁠9) Chuti chu, an zînga baptisma chang tawhte chu Pathian Thu hmanga tihthianghlim leh tlenfai an ni ve em? Ni e, tihthianghlim leh tlenfai an ni! Lei lam beiseina neite’n Isua thisen ṭangkaina leh pawimawhna chungchâng Bible sawite an chhiar hian, chûng thute chu an ring a, ‘a chhûn azânin rawng an bâwl’ a ni. (Thup. 7:​13-15) Hriak thihte leh berâm dangte tihthianghlim rengna chu an ‘chêtze mawi takah’ a lang chhuak a. (1 Pet. 2:12) An Berâm Pu, Isua thu ngaithlaa rinawm taka zuitu hriak thihte leh berâm dangte thianghlimna leh inpumkhatna a hmuh hian Pathian Jehova chu a va lâwm dâwn êm!

6. Eng anga inbih chian nge sâwt ang?

⁶ Tisa lama thianghlim tûra Israel puithiamho phûtna chuan tûn laia Jehova mite tân awmzia a nei hle a. Kan Bible zirpuite chuan kan biakna hmun a thianghlim tih leh kan inthuamna a fel faiin, a thianghlim bawk tih an hmu fo a ni. Mahse, puithiamho thianghlimna chuan Jehova biakna tlânga chhotu apiang chuan ‘thinlung thianghlim’ an nei tûr a ni tih hre tûrin min ṭanpui a. (Sâm 24:​3, 4 chhiar rawh; Is. 2:​2, 3.) Kan Pathian rawngbâwlna thianghlim chu rilru leh thinlung thianghlim bâkah taksa lama thianghlimna nêna hlan tûr a ni. Chu mi atân chuan mahni inbih chian fo a ngai a, chu mi hnuah ṭhenkhat tân chuan an thianghlim theihna tûrin nasa taka inthlâkthlengna neih pawh a ngai thei ang. (2 Kor. 13:⁠5) Entîr nân, hre reng chunga saruak lem leh thuziakte entu baptisma chang tawh chu, ‘Ka thianghlimzia ka lantîr em?’ tiin a inzâwt ang a. Tichuan, chu a thiltih bawlhhlawh tak bânsan tûrin ṭanpuina a zawng tûr a ni.​—⁠Jak. 5:⁠14.

7. Leviticus 8:​22-24-na nêna inmilin, Isua’n eng entawn tûr nge a siam?

⁷ Israelte’n puthiam an neih ṭan khân, berâmpa thisen chu Puthiam Lalber Arona leh a fapate beng ding lam hmâwrah te, kut ding lam zungpuiah te, ke ding lam zungpuiah te hnawihsak a ni a. (Leviticus 8:​22-24 chhiar rawh) Hetianga thisen hmanna hian puithiamte’n an mawhphurhnate thu âwih takin an hlen ang tih a entîr a ni. Chutiang bawkin, Puithiam Lalber Isua chuan hriak thihte leh berâm dangte tân entawn tûr ṭha famkim a siam a. A beng chu Pathian kaihhruaina ang zêlin a chhi a ni. A kutte chu Jehova duhzâwng tih nân a hmang a, a kête  chu thianghlimna kawng ata a pêng ngai lo.​—⁠Joh. 4:​31-34.

8. Jehova betu zawng zawng chuan eng nge an tih ang?

⁸ Hriak thih Kristiante leh Isua berâm dangte chuan an Puithiam Lalber rinawmna kawng chu an zui tûr a ni a. Jehova betu zawng zawngte chuan Pathian Thua chuang kaihhruainate chu an zâwm tûr a ni a, chutiang chuan thlarau thianghlim tihlungngaihna chu an pumpelh ang. (Eph. 4:30) Anni chuan ‘an kete tân kawng ngîl an siam’ tûr a ni.​—⁠Heb. 12:⁠13.

9. Engtin nge Governing Body member-te nêna hna lo thawk tawh ṭhîn unaupa pathumte’n an ngaih dân an sawi chhuah a, engtin nge an thusawite chuan thianghlimna lantîr zawm zêl tûra a ṭanpui che?

⁹ Governing Body member-te nêna kum sâwm têl hna lo thawkho tawh lei lam beiseina nei unaupa pathumte’n thinlung taka an thusawi chu lo ngaihtuah ta ila. Pakhatna chuan: “Hei hi rawngbâwlna chanvo danglam bîk tak a nih rualin, anni nêna hnai taka inkawmna aṭangin thlarauva hriak thihte pawh ṭha famkim an ni lo tih lan chhuah châng a awm ṭhîn a. Mahse, kum tam tak chhûnga ka thiltum pakhat chu hmahruaitute thu âwih tlat hi a ni,” a ti a. Unau pahnihna chuan: “2 Korinth 10:5 ang chi ‘Krista thu âwihna’ chungchâng sawina Bible chângte chuan hmahruaitute laka intulût tûr leh thu âwih taka thlâwp tlat tûrin min ṭanpui a. Hei hi thinlung aṭanga thu âwihna a ni,” a ti. Unau pathumna chuan: “Jehova hmangaihte hmangaih a, a huatte huat a, a kaihhruaina vawn tlata, a duhzâwngte ti tih awmzia chu a inawpna pâwl leh lei atâna a thiltum tihmasâwn tûra a mi hmante lakah intukluh hi a ni,” tiin a sawi bawk. He unaupa hian Governing Body member ni ta Nathan Knorr-a entîrna chu a hre reng a, kum 1925 chhuak Vênnainsâng-a “Hnam Pianna” tih thuziakte chu mi ṭhenkhatin ringhlel mah se, a pawm thlap tih a hria a ni. Chutiang thu âwihna chuan unaupa rilru chu a khawih hle a. A chunga târ lan tâk unau pathumte thusawi chhût ngunna chuan thu âwihna hmanga thianghlimna lantîr tûrin a ṭanpui ang che.

10. Thisen khapna Pathian dân zawm chu eng ang khawpa pawimawh nge ni?

¹⁰ Leviticus 17:10 chhiar rawh. Jehova chuan Israel mite chu “eng thisen pawh” ei lo tûrin thu a pe a. Sa thisen emaw, mihring thisen emaw laka inthiar fihlîm chu Kristiante lakah pawh phût a ni. (Tirh. 15:​28, 29) Pathianin ‘kan chunga a hmai a thuar’ leh a kohhranho zîng ata min tuithlâr tûr ngaihtuah ringawt pawh chu a râpawm hle a ni. Pathian chu kan hmangaih a, a thu kan âwih duh bawk. Nunna atâna dinhmun hlauhawm tak kan hmachhawn hunah pawh, Jehova hre lotute leh a thu âwih lotute ngenna leh thil phûtte tihsak loh chu kan tum tlat a ni. Ni e, thisen laka kan inthiar fihlîm avângin nuihzat pawh kan tuar ngei ang; mahse, Pathian thu âwih chu kan thlang a ni. (Jud. 17, 18) He mi chungchângah eng thlîr dânin nge thisen ei lo tûra “fîmkhur” tlat tûr leh thisen inthunna pawm lo tûrin min tichak ang?​—⁠Deut. 12:⁠23.

11. Engvângin nge Inremna Nî chu serh leh sâng satliah mai a ni lo kan tih theih?

¹¹ Hmân lai Israel puithiam lalin Inremna Nî-a ran thisen a hmanna chuan thisen chungchânga Pathian thlîr dân hre thiam tûrin min ṭanpui a. Thisen chu pawimawh tak atân chauhva hman tûr a ni. Chu chu Jehova ngaihdamna zawngtute sual thawi nân a ni a. Bâwngpa leh kêlpa thisen chu thuthlung bâwm khuhna lamah leh a hmaah an theh a. (Lev. 16:​14, 19) Chutianga tihna chuan Jehova tân Israel mite sual ngaihdamna  kawng a hawng a ni. Chu bâkah, Jehova chuan ran chu ei atâna talh a nih chuan a thisen chu tichhuaka vaivuta vûr tûr a ni, “tisa zawng zawng nunna chu a thisen chu a ni si a,” tiin thu a pe a. (Lev. 17:​11-14) Hêng zawng zawng hi serh leh sâng pawimawh lutuk lo a ni em? Ni lo ve. Inremna Nî-a thisen hman dân leh leia leih baw tûra thupêk chu Nova leh a thlahte hnêna thisen chungchânga Jehova thupêk hmasa nên a inrem a ni. (Gen. 9:​3-6) Pathian Jehova chuan nunna châwm nâna thisen ei chu a khap a ni. Chu chuan Kristiante tân eng awmzia nge a neih?

12. Engtin nge Hebrai Kristiante hnêna Paula lehkha thawn chuan thisen leh ngaihdamna a thlunzawm?

¹² Tirhkoh Paula’n Hebrai Kristiante hnêna lehkha a thawn khân, thisenin a tihthianghlim theih dân chungchâng chu heti hian a sawi a ni: “Dân thu zawngin engkim thaw mai hi thisena tihthianghlimin a awm ṭhîn a, thisen chhuah lohvin ngaihdamna rêng a awm lo,” tiin. (Heb. 9:22) Paula chuan rana inthawina chuan hlutna engemaw chen nei mah se, Israelte chu mi sual an la nih thu leh sual la bo pumhlûm tûr chuan thil dang an mamawh belh thu a hriatnawntîr a ni tih a hrilh tel bawk. Ni e, Dân Thu chu ‘thil ṭha, lo awm tûrte anpui tak nei si lo a ni.’ (Heb. 10:​1-4) Engtin nge sual ngaihdamna chu neih theih ni ta ang?

13. Isua’n Jehova hnêna a thisen hlu tak a hlanna chungchâng chu engtin nge i ngaih?

¹³ Ephesi 1:7 chhiar rawh. Inhuam taka ‘kan aia inpetu,’ Isua Krista thihna inthawina chuan amah leh a Pa hmangaihtu zawng zawngte tân awmze thûk tak a nei a. (Gal. 2:20) Mahse, kan sualte ngaihdamna thlena min chhuah zalêntu dik tak chu Isua a thih a, a thawhleh hnua a thiltih hi a ni. Isua chuan Mosia Dân hnuaia Inremna Nî-in a lo entîr lâwk chu a tifamkim a ni. Chu mi nîah chuan, puithiam lalber chuan biak bûka​—⁠a hnuah Solomana temple-a​—⁠Hmun Thianghlim ber chhûngah chuan rana inthawina thisen chu keng lûtin, Pathian hmaah a va hlân a ni. (Lev. 16:​11-15) Chutiang bawkin, Isua chuan ama thisen hlu tak kenga vânah  lûtin Jehova hmaah a va hlân a. (Heb. 9:​6, 7, 11-14, 24-28) Isua thisena rinna kan lantîr avânga kan sualte ngaihdamna leh chhia leh ṭha hriatna thiang kan nei hi kan va lâwm tak êm!

14, 15. Engvângin nge thisen chungchânga Jehova dân hriatthiam leh zawm chu a pawimawh?

¹⁴ Tûnah chuan, Jehova’n “eng thisen pawh” ei lo tûra min hrilh chhan chu i hre chiang lehzual tawh em? (Lev. 17:10) Pathianin thisen a serh thianghlim chhan chu i hre thiam em? Ani chuan thisen chu nunna nêna intluk reng angin a thlîr a ni. (Gen. 9:⁠4) Thisen chungchânga Pathian thlîr dân chu kan pawm tûr a ni a, thisen laka inthiar fihlîm tûra a thupêk chu kan zâwm tûr a ni tih i pawm em? Tute tân pawh Pathian nêna inrem theih dân awmchhun chu Isua tlana inthawina rin leh min Siamtu tân thisenin awmze danglam bîk tak a nei tih hriat hi a ni.​—⁠Kol. 1:​19, 20.

¹⁵ Kan zînga tupawh hian thisen chungchângah buaina kan hmachhawn thut thei reng a. A nih loh pawhin, chhûngkaw zînga mi emaw, ṭhian ṭha emawte chuan thisen thun chungchângah buaina an hmachhawn thut thei a ni. Chutiang hun khirh takah chuan thisen them te tak tê leh inenkawl dân chungchângah pawh thu tlûkna siam a ngai bawk a ni. Chuvângin, zir bingna nei a, rîkrum thil atâna lo inbuatsaih chu thil pawimawh tak a ni a. Ṭawngṭaina nêna chutianga tihna chuan thisen chungchânga ding nghet tlat tûr leh rinna phatsanna thil ti lo tûrin min ṭanpui ang. Pathian Thuin a duh loh thil engemaw tihna hmanga Jehova thinlung tihlâwm loh chu kan duh lo rêng rêng! Damdawi lama mi thiam tam tak leh thisen inthun duhtute chuan nun chhanhimna a ni tiin, mite chu thisen pe tûrin an ngên a ni. Mahse, Jehova mi thianghlimte chuan Siamtuin thisen hman dân tûr chungchângah thu tlûkna siam tûrin dikna a nei tih an hria a. Pathian tân chuan “eng thisen pawh” hi a thianghlim a ni. Thisen chungchânga a dân pêk chu zawm kan tum tlat tûr a ni a. Nungchang thianghlimna hmangin, Pathian hnênah nun chhanhimna Isua thisen​—⁠sualte ngaihdamna leh chatuana nunna min pe thei thisen awmchhun​—⁠kan ngaihhlutzia kan târ lang a ni.​—⁠Joh. 3:⁠16.

16. Engvângin nge Jehova mite chu an thianghlim ang?

¹⁶ Pathianin Israel mite chu Aigupta sal tânna ata a chhan chhuah lai khân, an hnênah: “In Pathian ni tûra Aigupta ram ata hruai chhuak chhotu che u LALPA chu ka ni si a: kei ka thianghlim si a, chuvângin nangni pawh in thianghlim tûr a ni,” a ti a. (Lev. 11:45) Jehova a thianghlim avângin Israel mite chu thianghlim tûra beisei an ni. Jehova Thuhretute kan nih angin, keini pawh kan thianghlim tûr a ni. Chu mi chungchâng chu Leviticus bu chuan chiang takin a sawi a ni.

17. Tûnah Bible-a Leviticus bu hi engtin nge i ngaih?

¹⁷ Leviticus bu a ṭhen lai kan ngaihtuahna chu a ṭangkai hle a. He thuziak hian Pathian thâwk khum Leviticus bu i ngaihhlutna a tizual ngei ang. Leviticus-a thu ṭha tak ṭhenkhat ngaihtuahna chuan thianghlim tûr kan nih chhan i hriatthiamna chu a tipung ngei ang tih rinhlelh rual a ni lo. Mahse, he Pathian thâwkkhum lehkhabu aṭang hian thlarau lam thil hlu dang engte nge kan la hmuh dâwn? Jehova hnêna rawngbâwlna thianghlim hlan chungchângah eng dang nge kan zir belh theih? A dawta thuziakah hêng thute ngaihtuah a ni ang. (w14-E 11/15)