1, 2. Pathian chuan amah betu apui apangte tân eng nge a duhsak?

ṬHALAI i ni em? I nih chuan, khawvêl pum huap Jehova kohhran zînga mi i nih angin ngaihhlut hle i ni tih ring tlat ang che. Ram tam takah chuan baptisma chang tharte zînga tam tak chu ṭhalaite an ni. Jehova rawngbâwl tûra thu tlûkna siamtute zîngah ṭhalai tam tak an tel tih hmuhna chuan min a va tiphûr tak êm!

² Ṭhalai i nih angin, ṭhalai dangte nêna inkawm chu nuam i ti em? I ti ngei ang. Kan rualpuite nêna inkawmna aṭangin hlimna chi khat neih theih a ni. Mahse, naupang kan ni emaw, puitling kan ni emaw, kan sei len dân chu eng pawh ni se, Pathian chuan amah biaknaah inpumkhat tûrin min duh a. Tirhkoh Paula chuan Pathianin “mi zawng zawng chhandama awmah leh thutak hriaah a duh a ni,” tiiin a ziak a ni. (1 Tim. 2:​3, 4) Thu Puan 7:​9-ah chuan “hnam tin zînga mi te, chi tin zînga mi te, mi tin zînga mi te, ṭawng tin zînga mi te” aṭanga lo chhuak Pathian betute chanchin sawina chu kan hmu a ni.

3, 4. (a) Tûn lai ṭhalai tam takte zîngah eng rilru nge hluar êm êm? (b) Eng rilru put hmang nge Ephesi 4:25 nêna inrem?

³ Jehova chhiahhlawh ṭhalaite leh he khawvêl ṭhalaite chu an va inang lo tak êm! Jehova rawngbâwl lo mi tam tak chuan an duhzâwng  chauh ngaihtuahin, mahni hmasial takin an nung a. Zir chîk mi ṭhenkhat chuan anni chu “Chhuan Hmasial” tiin an ko va. An thusawi dân leh an thawmhnaw hâk dân aṭangin, “ṭhing tawh” nia an ngaih chhuan hmasate an hmuhsitzia an lantîr a ni.

⁴ Chutiang rilru neitute chuan min hual vêl a. Chuvângin, Jehova chhiahhlawh ṭhalai tam tak chuan chu mi rilru pumpelh a, Pathian thlîr dân pawm chu harsa an ti a ni. Kum zabi pakhatnaah pawh khân, Paula chuan Kristian unaute chu tûn hmaa an lo “awm” tawhna, “tûna âwih lo fate chhûnga thawk mêktu thlarau” pumpelh tûrin fuih an ngai tih a hria a ni. (Ephesi 2:​1-3 chhiar rawh.) Chu rilru pumpelh a ngai tih leh an unau zawng zawngte nêna lungrual taka thawh a ngai tih hretu ṭhalaite chu fak tlâk an ni a. Chutiang rilru put hmang chu “inpêng tawn ṭheuh kan ni si a” tia Paula thusawi nên a inrem hle a ni. (Eph. 4:25) He khawvêl hlui tâwpna kan hnaih rual hian, inlungrual taka thawhho chu a pawimawh zual deuh deuh dâwn a. Chuvângin, inpumkhat nâna inzawmkhâwm tlat a ngaihzia hre thiam tûra min ṭanpui thei Bible-a entîrna ṭhenkhat chu i lo ngaihtuah ang u.

5, 6. Lota leh a fanute chanchin aṭangin inzawm khâwmna chungchângah eng nge chiang taka lang?

⁵ Hun kal tawhah chuan, hun harsa an tawh huna a mite inlungrual taka an in ṭanpui tawn hian, Jehova chuan a mite chu lâwm takin a humhim a. Tûn laia Pathian chhiahhlawh a pui a pangte chuan Bible-a entîrna târ lante aṭangin an inzir thei a. Chutiang entîrnate zînga pakhat chu Lota hi a ni.

⁶ Lota leh a chhûngte chênna Sodom khawpui chu tihboral tûr a nih avângin, anni chu dinhmun hlauhawm takah an awm a. Pathian vântirhkohte chuan Lota chu tlâng ram lama himna zawng tûra fuihin: “I nunna tûrin tlân chhuak rawh,” tiin an hrilh a ni. (Gen. 19:​12-22) Lota chuan thu chu a zâwm a, a fanu pahnihte nên chuan khawpui an chhuahsan a ni. An chhûng khat mi dangte’n an chhuahsan ve lo chu a lungchhiatthlâk hle. Lota mâkpate tân phei chuan Lota chu “fiamthu sawi ang lek a ni.” Chuvângin an nun an chân phah ta a. (Gen. 19:14) Lota leh amah nêna inzawm tlata awm a fanute chauh chu an dam khawchhuak a ni.

7. Israel mite’n Aigupta an chhuahsan lai khân, inpumkhatna lantîrtute chu engtin nge Jehova’n a ṭanpui?

⁷ Entîrna dang ngaihtuah leh ta ila. Israel mite’n Aigupta an chhuahsan khân, pâwl hrang hranga inṭhenin, mahni duhna lam lamah an kal lo. Mosia’n “tuipui chungah a kut a han phar” a, Jehova’n tuipui chu a ṭhen khân, amah chauhvin emaw, Israel mi tlêm tê nên chauh emaw a kân hek lo. Jehova vênhimnain a hnam pum puiin an kân ta zâwk a ni. (Ex. 14:​21, 22, 29, 30) Inlungrualna an lantîr a, an lama ṭang Israel mi ni lo “mipui inpawlhsawp tam tak” chu an rualin an tel ve a ni. (Ex. 12:38) Chutih lai chuan mi ṭhenkhat, a nih loh leh ṭhalai ho khat emaw chuan an duhzâwng kawng zawhin, mahni thuin an kal hrang ang tih chu ngaihruat theih pawh a ni lo. Chutianga kal hranga Pathian Jehova vênhimna chân chu a âtthlâk hle dâwn lâwm ni?​—⁠1 Kor. 10:⁠1.

8. Jehosaphata hun laiin, engtin nge Pathian mite chuan inpumkhatna an lantîr?

⁸ Lal Jehosaphata hun lai khân, Pathian mite chuan an chhehvêla hmêlma hlauhawm “mipui tam tak” chu an hmachhawn a. (2 Chro. 20:​1, 2) Pathian chhiahhlawhte’n anmahni chakna rinchhana hmêlmate hneh an tum lo chu an fakawm hle. Anni chuan Jehova an rinchhan zâwk a ni. (2 Chronicles 20:​3, 4 chhiar rawh.) Tin, Pathian an rinchhannaah pawh mi tinin an duhzâwng leh ṭha an tih ang angin an ti lo. Bible chuan: “Judate zawng zawng chu an fanau tê tê, an nupuite an fate nên LALPA hmaah an ding a,” tiin min hrilh a ni. (2 Chro. 20:13) A pui a pangte chuan Jehova  kaihhruaina zâwm tûrin rinnain an bei tlâng a, an hmêlmate lakah Jehova chuan a vênghim a ni. (2 Chro. 20:​20-27) Hei hi Pathian mite kan nih anga harsatnate hmachhawn dân tûr entîrna ṭha tak a ni lâwm ni?

9. Kristian hmasate thiltih leh rilru put hmang aṭangin inpumkhatna chungchângah eng nge kan zir theih?

⁹ Kristian hmasate pawh thawhhona kawnga hriat hlawh tak an ni bawk. Entîr nân, Judate leh saphun tam tak Kristian an lo nih tâk hnu khân, anni chu “tirhkohte zirtîrin, inpâwlin, chhang phelin, ṭawngṭaiin ṭhahnemngai takin an awm reng” tih kan hmu a. (Tirh. 2:42) He inpumkhatna hi an in mamawh tawn lai ber, tihduhdahna an tawh lai hian a lang lehzual a ni. (Tirh. 4:​23, 24) Hun khirh tak kan hmachhawn lai hian inpumkhata kan thawh tlân a pawimawh hle a ni tih i pawm a ni lâwm ni?

10. Eng hunah nge inpumkhatna a pawimawh lehzual dâwn?

¹⁰ Mihring chanchina lungngaihna nasa ber a thlen hun chu a hnai tawh a. Chu chu zâwlnei Joela chuan “thimna leh khaw durna nî” angin a sawi a ni. (Joel. 2:​1, 2; Zep. 1:14) Chu hun chu Pathian mite tân inpumkhatna hun a ni ngei ang. Isua thusawi: “Khawii ram pawh mahni indo apiang an boral ṭhîn,” tih chu hre chhuak ang che.​—⁠Mt. 12:⁠25.

11. Sâm 122:​3, 4-a kan hmuh eng khaikhinna thu nge tûn laia Pathian mite sawi nâna hman theih a nih? (A thupui chunga milem en rawh.)

¹¹ He kal hmang tâna lo thleng tûr hrehawmna hun chhûng hian, kan inpumkhat tak zet a ngai dâwn a. Kan zînga kan neih ngai tûr thlarau lam inpumkhatna chu hmân lai Jerusalema chênna inte inhnaih dân nên khaikhin theih a ni a. Chûng inte chu bichilh taka sak a nih avângin, fakna hla phuahtu chuan Jerusalem khua chu “rinawm taka rem,” a nih loh leh khawpui pakhat anga inzawm tlat niin a sawi. Chuvângin, khuaa chêngte chu an inṭanpui tawnin, an invêng tawn thei a ni. Chu bâkah, tisa lama an inhnaihna chuan amah be tûra “LALPA hnamte” an kal khâwm huna an neih a hnam pumpuia thlarau lam inpumkhatna chu a entîr a. (Sâm 122:​3, 4 chhiar rawh.) Tûnah leh hun khirh tak lo thleng tûrah hian, chutiang bawka “rinawm taka rem,” a nih loh leh pakhat anga kan inzawm tlat chu a ngai a ni.

12. Lo thleng tûr Pathian mite beihna lak ata dam khawchhuak tûrin engin nge min ṭanpui ang?

¹² Engvângin nge chutih huna kan ‘inzawm tlat’ chu a pawimawh hle dâwn? Ezekiela bung 38 chuan ‘Magog rama mi, Goga’ hian Pathian mite a beihna chu a sawi lâwk a. Chu hun chu thil engemaw avânga inṭhen hran hun a ni lo rêng rêng ang. Chutih hunah chuan khawvêl ṭanpuina kan zawng lo ngei ang a. Chu ai mahin, kan unaute hnaiha awm tlat chu kan duh zâwk ang. Mahse, an zînga kan tel avâng maiin kan dam khawchhuak lo vang. Chu hun râpthlâk takah chuan, Jehova leh a Fapa chuan Jehova hming lamtute chu an chhandam ang. (Joel. 2:32; Mt. 28:20) Mahse, Pathian berâm zînga awmte anga inpumkhatna vawng lote​—⁠mahnia kal bote​—⁠chhandam ni tûra ngaih chu thil inâwm a ni dâwn em ni?​—⁠Mik. 2:⁠12.

13. Kan ngaihtuah tawhte aṭangin Pathian ṭihtu ṭhalaite chuan eng nge an zir theih?

¹³ Chuti chu, mahni in lâk hran chîng ṭhalaite kawng zawh chu a finthlâk lo tih a chiang hle a ni lâwm ni? Kan inmamawh tawn tak zet hun chu a lo thleng dâwn a. In mamawh tawnte zîngah chuan a pui a pang, kan vaiin kan tel vek a ni! Ni e, tûn hi inpumkhatna nei tûra thawh tlân dân zir hun a ni; chu inpumkhatna chu hun lo la thleng tûrah a pawimawh hle dâwn si a.

14, 15. (a) Eng thiltum neiin nge Jehova’n a pui a pangte chu a zirtîr? (b) Jehova chuan inpumkhat tûra min fuih nân eng thute nge a sawi?

¹⁴ Jehova chuan ‘thu khat vuaa a rawng kan  bâwl tlân theih nân’ min ṭanpui a. (Zep. 3:​8, 9) Ani chuan a chantuan remruat nên inrem tûrin min zirtîr a ni. Chutah chuan eng nge tel? A thiltum chu ‘engkim Kristaa fâwk khâwm’ hi a ni. (Ephesi 1:​9, 10 chhiar rawh.) Ni e, ani chuan lei leh vâna inpumkhat duhna nei thil siam zawng zawngte inpumkhattîr chu a duh a, chutianga a tihnaah chuan a hlawhtling ngei ang. Ṭhalai i nih angin, chu chuan Jehova inawpna pâwl nêna lungrual taka thawhho a ngaihzia hre tûrin a ṭanpui che em?

¹⁵ Jehova chuan chantuana inpumkhatna min neihtîr a tum avângin, tûna inpumkhatna nei tûrin min zirtîr a. Bible chuan “inbuaipui tawn ṭheuh” tûr te, “hmangaih taka inlainat tawn ṭheuh” tûr te, “inthlamuan tawn” tûr te, leh “intisâwt tawn ṭheuh” tûrtein min hrilh nawn fo va. (1 Kor. 12:​24, 25; Rom 12:10; 1 Thes. 4:18; 5:11) Jehova chuan Kristiante chu an ṭha famkim lo tih leh chu chuan inpumkhatna neih a tiharsa tih a hria a, chuvângin “inngaidam tawn” tûra ṭan kan lâk a ngai a ni.​—⁠Eph. 4:⁠32.

16, 17. (a) Kristian inkhâwmnain a tum pakhat chu eng nge ni? (b) Ṭhalai a nih laia Isua entawn tûr siam aṭangin ṭhalaite’n eng nge an zir theih?

¹⁶ Jehova chuan inzawm tlata awm dân kan zir theih nân Kristian inkhâwmnate min buatsaihsak bawk a. Hebrai 10:​24, 25-a chuang fuihna thute chu kan chhiar nawn fo va ni. Hêng inkhâwmnain a tum pakhat chu ‘hmangaih leh thil ṭha tiha inchawk tho tûra inngaihtuah tawn’ hi a ni a. Mahse, inkhâwmte chu kan “infuih tawn” theih nân leh ‘ni chu a lo hnai telh telha kan hriatin kan infuih tawn nasat lehzual sauh’ theih nâna min pêk a ni chu a chhinchhiah tlâk hle.

¹⁷ Isua chuan a naupan laiin chutiang inkhâwmna ngaihhlutna kawngah entawn tûr ṭha tak a siam a. Kum 12 mi a nih lai khân, a nu leh pate nên thlarau lama kal khâwmna lian takah a kal ve a. Ṭum khat phei chu a bo va, mahse, naupang dangte nêna an inkawm vânga bo a ni lo. Chu aimah chuan, Josefa leh Marite chuan ani chu biak ina zirtîrtute nên thlarau lam thil an sawiho lai chu an va hmu a ni.​—⁠Lk. 2:​45-47.

18. Engtin nge i ṭawngṭaina chuan inpumkhatna a awmtîr theih?

¹⁸ Inhmangaih tawnna neih leh Kristian inkhâwmna chu inpumkhatna tihngheh nâna kan hman bâkah, kan in ṭawngṭaisak tawn thei a ni. Kan unaute tâna Jehova hnêna dîlsak bîk kan neih hian, chu chuan kan inngaihtuah tawnzia min hriatchhuahtîr a ni. Hêng thilte  hi Kristian puitlingte chauh tih theih leh tih tûr a ni lo. Ṭhalai i nih chuan, thlarau lama i chhûngkuate nêna in inhnaih chhoh theihna tûrin hêng kawngte hi i hmang ṭangkai em? Chutianga i tihna chuan he khawvêl a boral hunah khawvêl hlui nên inzawmna i nei lo tih a tichiang ang.

19-21. (a) Eng kawng langsâr takin nge “inpêng tawn ṭheuh kan ni” tih kan lantîr theih? Entîrna pe rawh. (b) Unau ṭhenkhatte’n leilung chhiatna an chhân lêt dân aṭangin eng nge i zir?

¹⁹ Jehova mite chuan Rom 12:​5-a kan hmuh: “Inpêng tawn ṭheuh kan ni,” tih thu bul chu an nunpui a. Chu mi finfiahna chu leilung chhiatna a thlen hian kan hmu thei a ni. Kum 2011 December thla khân, thlipui nasa tak avângin Philippine rama Mindanao thliarkâr-ah tui a lian nasa hle a. Zan khat thil thu-ah in 40,000 aia tam chu tuiin a chîm a, kan unaute in tam tak pawh a tel a ni. Mahse, branch office chuan “chhawmdâwltu pâwlte’n hna an thawh hma pawhin hmun danga Kristian unaute chuan ṭanpuina an thawn tawh a ni,” tiin a sawi.

²⁰ Chutiang bawkin, Japan ram chhak lama lîrnghîng râpthlâk takin a tihchhuah tsunami avângin unau tam takte chuan an thil neih tam tak an chân a. Mi ṭhenkhat chuan an engkim an chân tak meuh a ni. A in chântu Yoshiko-i chu Kingdom Hall aṭanga mêl 25-a (km 40) hlaah a awm a. Ani chuan: “A hnuah chuan, lîrnghîng thlenni tûkah kan bial kantu leh unau dangte chuan min rawn zawng a, mak kan ti khawp mai,” tiin a sawi a. Nui var var chungin, heti hian a sawi zawm a: “Kohhran kal tlanga kan thlarau lam mamawhte nasa taka phuhrûksak kan ni chu kan hlut hle a. Chu bâkah, kawrchung te, pheikhawk te, bag te, leh paijama te kan dawng a ni,” tiin. Chhawmdâwlna lam ngaihtuahtu pâwl zînga pakhat chuan: “Japan ram puma unaute chuan mi pakhat anga thil tiin, inṭanpui tawn an tum ṭheuh va. Min ṭanpui tûrin ram hla tak United States aṭang pawhin an lo kal vang vang a ni. Chutiang khawpa ram hla aṭanga an lo kal chhan kan han zawh chuan, anni chuan, ‘Japan rama kan unaute nên kan inpumkhat tlat a; anni chuan ṭanpui an mamawh a ni,’ an ti a ni,” tiin a sawi. An mi leh sate nasa taka ngaihsaktu inawpna pawl zînga tel chu kan inchhuang hle a ni lâwm ni? Pathian Jehova chuan chutianga thlarau lama inpumkhatna chu a lâwm hle ngei ang tih kan chiang thei a ni.

²¹ Tûna chutiang rilru put hmang neihna chuan hmun danga awm kan unaute nêna kan inzawm theih loh hunah pawh lo thleng tûr manganna nasa tak chu inlungrual taka hmachhawn thei tûrin min ṭanpui ang. A nihna takah chuan, chu rilru put hmang chuan he khawvêl kal hmang tâwp dâwn lama kan tawh ngei beiseiawm tak harsatnate hmachhawn dân min zirtîr a ni. Japan rama typhoon thlipui tuartu Fumiko-i chuan: “Tâwpna a hnai tawh hle a. Leilung chhiatna awm tawh lohna hun kan beisei lai hian, kan Kristian unaute chu kan ṭanpui chhunzawm zêl a ngai a ni,” tiin a sawi.

22. Kristian inpumkhatna aṭangin eng hlâwkna tluantling nge lo chhuak thei?

²² Tûna inpumkhat dân zir mêk a pui a pangte chu, a nihna takah chuan, khawvêl inpumkhat lo tak chhiatnaa dam khawchhuak tûrin an inbuatsaih mêk a ni. Hmân lai ang bawkin, kan Pathian chuan a mite chu a chhan chhuak ang. (Is. 52:​9, 10) Pathian mi inpumkhat tlatte zînga mi nih i tum chuan, chutianga chhan chhuahte zîngah i tel thei tih theihnghilh ngai suh ang che. Thil dang min ṭanpui thei pakhat chu, tûna kan thil dawnte ngaihhlut lehzual hi a ni a. Chu chu a dawta thuziakah ngaihtuah a ni ang. (w14-E 12/15)