1, 2. Isua’n a thawhleh nî khân, engtin nge a zirtîrte a tihchak?

ISUA thawhleh nî a la ni reng a. Zirtîr pahnihte chu Jerusalem khua aṭanga mêl sarih (11.2 km) vêla hla khaw pakhatah an kal a ni. Isua a tho leh tawh tih an hre lo va, chuvângin a thihna chuan a tilungngai hle a. Vawilehkhatah, Isua chu rawn inlârin an rualin a kal ve a. A zirtîrte chu a thlamuan ta a ni. Engtin nge a thlamuan? “Mosia leh zâwlneite zawng zawng lehkhaah a ṭan a, Pathian Lehkha zawng zawnga ama chanchin ziak apiang chu anmahni a hrilhfiah zêl a.” (Lk. 24:​13-15, 27) Chutah chuan, Pathian Lehkha Thute a “hrilhfiah” avângin an thinlung a harh huai a ni.​—⁠Lk. 24:⁠32.

² Chu mi tlai vêkah chuan zirtîr pahnihte chu Jerusalem-ah an kîr leh a. Tirhkohte an va hmuh chuan an thiltawn chu an hrilh ta a. A chanchin an sawi lai mêk chuan Isua chu an zaa hmaah chuan a rawn inlâr a ni. Mahse, a zirtîrte chuan an hlau hle a. An thinlung chu rinhlelhnain a khat a ni. Engtin nge Isua’n anmahni chu a tihchak? “Pathian Lehkha Thu hriat nân an thinlung a tifing ta a,” tiin kan chhiar a ni.​—⁠Lk. 24:⁠45.

3. Eng harsatnate nge kan hmachhawn mai theih a, kan rawngbâwlna chungchânga thlîr dân inbûk tâwk nei tûrin engin nge min ṭanpui thei?

³ Chûng zirtîrte ang bawkin, lungngaih châng kan nei thei a. Lalpa hna thawhnaah kan buai hle pawh a ni thei; mahse, a  rah chhuah kan hmuh mai loh avângin kan lunghnual thei a ni. (1 Kor. 15:58) A nih loh leh kan Bible zirpuite chuan hma an sâwn chak lo hle pawh a ni thei bawk a. An zînga ṭhenkhat phei chuan Jehova an hawisan hial pawh a ni thei a ni. Chuti chu, kan rawngbâwlna thlîr dân inbûk tâwk nei tûrin eng nge kan tih theih? Min ṭanpui thei thil pakhat chu Pathian Lehkha Thua chhinchhiah Isua tehkhin thu sawite awmzia chiang taka hriat hi a ni. Chûng tehkhin thute zînga pathum leh chuta ṭanga kan zir theihte chu i lo ngaihtuah ang u.

4. Buh chi thehtu muhîl chungchâng Isua tehkhin thu awmzia chu eng nge ni?

⁴ Marka 4:​26-29 chhiar rawh. Buh chi thehtu muhîl chungchânga Isua tehkhin thu awmzia chu eng nge ni? Tehkhin thua buh chi thehtu chuan Lalram puang chhuaktu tute pawh a entîr a. Buh chi chu mi rilru ṭhate hnêna hrilh Lalram thuchah a ni. Nî tina kan tih ṭhin pângngai angin, buh chi thehtu chu ‘zânah muhîlin chhûnah a tho va.’ Buh ṭhang lian tûr chuan a chîn hun aṭanga a seng hun thleng, hun engemawti chhûng nghah a ngai a. Chu mi hun chhûng chuan ‘chi chu a lo ṭiakin a lo ṭhang a ni.’ Chu a ṭhan chhohna chu “amahin” zawi zawiin a intahtawlin a thleng a ni. Chutiang bawkin, thlarau lama ṭhan chhohna pawh a intahtawl tê têin zawi zawiin a thleng a. Miin Pathian rawngbâwl tûr khawpa hma a sâwn hian, rah a chhuah ṭan a tih theih a ni, a nun chu Jehova hnêna inpumpêka baptisma chan duhna a neih avângin.

5. Engvângin nge Isua’n buh chi thehtu muhîl tehkhin thu chu a sawi?

⁵ Engvângin nge Isua’n he tehkhin thu hi a sawi? Isua chuan “rilru dik tak nei a piang” te thinlunga thutak chi ṭhantîrtu chu Jehova a ni tih hre tûrin min ṭanpui a. (Tirh. 13:​48, NW; 1 Kor. 3:⁠7) Chi kan tuh a, tuiin kan châwm a; mahse, kan ṭhantîr thei lo va, kan ṭhan luihtîr thei hek lo. Tehkhin thua buh chi thehtu ang bawkin a ṭhan chhoh dân chu kan hre lo a ni. Kan nî tin nuna kan thiltih ṭhinte avângin, a ṭhan chhoh dân chu kan hre thei lo. Mahse, a hnuah Lalram chi chuan rah a lo chhuah thei a. Zirtîr tharin buh sengnaa min thawhpui hian a mi ṭanpuina chu kan hlâwkpui a ni.​—⁠Joh. 4:​36-38.

6. Thlarau lama ṭhan chhohna chungchângah eng nge kan pawm ang?

⁶ He tehkhin thu aṭang hian eng nge kan zir theih? A hmasa berin, Bible zir lai thlarau lama hma sâwn dân tûr chu kan thunun thei lo tih kan pawm a ngai a ni. Mahni tlin tâwk hriatna chuan Bible zirlaite chu baptisma chang tûra nawr emaw, tur emaw tûra thlêmna pumpelh tûrin min ṭanpui ang. Mi chu theih tâwp chhuaha ṭanpuiin kan thlâwp thei a; mahse, inpumpêk tûra thu tlûkna chu ama siam tûr a ni tih inngaitlâwm takin kan pawm a ni. Inpumpêkna chu thinlung taka Pathian hmangaihna aṭanga lo chhuak a ni tûr a ni a. Chutiang a nih loh chuan Jehova’n a pawm lo vang.​—⁠Sâm 51:12; 54:6; 110:⁠3.

7, 8. (a) Isua tehkhin thua buh chi thehtu muhîl chungchâng aṭangin thil dang eng nge kan zir theih? Entîrna pe rawh. (b) Hei hian Jehova leh Isua chungchâng eng nge min zirtîr?

⁷ A pahnihnaah chuan, he tehkhin thuin a zirtîr hriat thiamna chuan kan rawngbâwlnain rah a chhuah nghâl lo a nih pawhin lunghnual mai lo tûrin min ṭanpui a. Dawhtheihna kan neih a ngai a ni. (Jak. 5:​7, 8) Zirlai chu theih tâwp chhuaha kan ṭanpui phawt chuan, buh chiin rah a chhuah loh pawhin, chu chu kan rinawm loh vâng a ni lo tih kan hria a. Jehova chuan thutak chi chu inthlâkthleng duhna nei rilru inngaitlâwmte thinlunga a ṭhan chhoh a phal a ni. (Mt. 13:23) Chuvângin,  kan rawngbâwlna hlawhtlinna chu a rah chhuah aṭangin kan teh tûr a ni lo. Jehova mithmuhah chuan, kan rawngbâwlna hlawhtlinna chu kan zirtîrte chhân lêt dânah a innghat lo. Chu aimah chuan, kan rawngbâwlna rah chhuah chu eng pawh ni se, ani chuan theih tâwp kan chhuahna chu a ngai hlu a ni.​—⁠Luka 10:​17-20; 1 Korinth 3:8 chhiar rawh.

⁸ A pathumnaah chuan, miin inthlâkthleng tûra hma a lâk dân chu kan hmu ṭhîn lo va. Entîr nân, nupa tuak khat chuan anmahni Bible zirpuitu missionary hnênah chuan baptisma la chang lo thuchhuahtu nih an duh thu an hrilh a. Ani chuan thuchhuahtu ni thei tûrin an meizial zûk an bânsan a ngaih thu a hrilh a. Anni chuan thla tam tak kalta aṭang tawha zialzûk an bânsan tawh thu an han hrilh chuan mak a ti hle a ni. Engvângin nge an bânsan? Jehova chuan an meizial zûk chu a hmu theiin, vervêkna chu a hua tih an hriat vâng a ni. Chuvângin, an thinlung chuan missionary hmaa zial zu law law tûr emaw, zialzûk bânsan hulhual tûr emawa thu tlûkna siam tûrin anni chu a chêttîr ta a. Thu tlûkna dik siam tûrin tûn hnaia an neih Jehova hmangaihna chuan anni chu a ṭanpui a ni. Missionary chuan an inthlâkthleng ang tih ngaihna hre lo mah se, anni chu thlarau lamah an ṭhang chho a ni.

9. Lêngkhang tehkhin thu awmzia chu eng nge ni?

⁹ Matthaia 13:​47-50 chhiar rawh. Lênkhang chungchânga Isua tehkhin thu awmzia chu eng nge ni? Isua chuan mi zawng zawng hnêna Lalram thuchah hrilhna chu tuifinriata lênkhang lian tak den nên a khaihkhin a. Lên chuan “sangha chi tin reng” a fûn khâwm ang maiin, kan thu hrilh rawngbâwlna chuan mi maktaduai tam takte chu a hîp a ni. (Is. 60:⁠5) Kan inkhâwmpuite leh kum tina kan neih Hriatrengna inkhâwmtea mi tam tak an rawn telna hian chu chu a târ lang chiang hle. He entîrna sangha ṭhenkhat chu “a ṭha” a, anni chu Kristian kohhran chhûnga lâk khâwm an ni. Mahse, a dangte chu “a chhia” a ni tih hriat a ni a, lênin a fûn khâwm zawng zawng chu Jehova tân pawm theih a ni lo.

10. Engvângin nge Isua’n lênkhang tehkhin thu hi a sawi?

¹⁰ Engvângin nge Isua’n he tehkhin thu hi a sawi? Entîr nei sangha thliar hranna chuan hrehawm nasa tak chhûnga rorêlna hnuhnûng ber tûr chu a kâwk lo. Chu aimah chuan, he kalhmang suaksual tâwpna hun chhûnga thilthleng tûrte târ lanna a ni zâwk a ni. Isua chuan thutakin a hîp zawng zawngte chu Jehova tân an ding nghet lo vang tih a târ lang. Mi tam takte chu an rawn inkhâwm a. Mi dangte chuan Bible kan zirpui chu an duh a, mahse, Jehova rawngbâwl tûrin intiamna an nei duh lo. (1 Lal. 18:21) Mi tam tak dangte chuan Kristian kohhran an bêl duh tawh lo bawk. Ṭhalai ṭhenkhat chu Kristian nu leh pate enkawlna hnuaia sei lian an ni a; mahse, Jehova tehnate ngainatna an la nei hrih lo bawk a ni. Dinhmun chu eng ang pawh ni se, Isua chuan mi tinin mahnia thu tlûkna an siam a ngai tih a sawi uar a. Chutiang mi mal thu tlûkna siamtute chu “hnam tinrêng” thil “duhzâwngte,” a nih loh leh thil hlute angin a thlîr a ni.​—⁠Hag. 2:⁠7.

11, 12. (a) Engtin nge lênkhang tehkhin thu chu kan hlâwkpui theih? (b) Hei hian Jehova leh Isua chungchâng eng nge min zirtîr?

¹¹ Engtin nge lêngkhang tehkhin thu chu kan hlâwkpui theih? He tehkhin thu-in a zirtîrte hriatthiamna chuan Bible zirpui emaw, kan fate zînga pakhatin emaw thutak a ta a nihtîr loh avânga manganna leh beidawn lutukna pumpelh tûrin min ṭanpui a ni. Theih tâwp kan chhuah chung pawhin chutiang chu a thleng thei si a. Bible zir duhna an neih emaw, thutaka enkawl an nihna emaw vâng  maiin, mi chuan Jehova nêna inlaichînna ṭha tak a nei chho vang tihna a ni nghâl ngawt lo. Jehova rorêlna hnuaia intulût duh lote chu Pathian mite zîng ata lâk hran an ni ang.

¹² Chu mi awmzia chu thutak hawisantute’n kohhrana an rawn belh leh phal a ni dâwn lo tihna a ni em? A nih loh leh, miin Jehova hnêna a nun a pumpêk loh chuan ani chu “a chhia” anga kumkhuaa ngaih tûr a ni ang em? Ni lo ve. Chutiang mite tân chuan hrehawm nasa tak a lo thlen hmain hun remchâng a la awm a ni. Chutiang mite hnênah Jehova chuan: “Ka hnênah lo kîr ula, tichuan in hnênah ka lo kîr ang,” tiin a hrilh a tih theih ang. (Mal. 3:⁠7) Chu chu Isua’n fapa tlân bo tehkhin thu-ah a sawi uar hle a ni.​—⁠Luka 15:​11-32 chhiar rawh.

13. Fapa tlân bo tehkhin thu awmzia chu eng nge ni?

¹³ Isua sawi fapa tlân bo tehkhin thu awmzia chu eng nge ni? He tehkhin thua khawngaihna nei tak pa ber chuan kan Pa vâna mi, Jehova a entîr a. A ro chan tûrte dîl chhuak a, tlak raltu fapa chuan kohhran aṭanga kal bote a entîr a ni. Chutianga kal bovin, Jehova hnên ata inmi hran Setana khawvêl “khaw lam hla takah” an zin tia sawi theih an ni. (Eph. 4: 18; Kol. 1:21) Mahse, ṭhenkhat chu a hnuah an inhre chhuak a, Jehova inawpna pâwl pan lehna kawng hautak chu zawhin an rawn kîr leh a ni. Inchhîrna nei hêng mi inngaitlâwm takte chu ngaihdam peih kan Pa chuan phûr takin a lo lâwm ṭhîn.​—⁠Is. 44:22; 1 Pet. 2:⁠25.

14. Engvângin nge Isua’n fapa tlân bo tehkhin thu hi a sawi?

¹⁴ Engvângin nge Isua’n he tehkhin thu hi a sawi? Jehova chuan kal bote chu a hnêna lo kîr leh tûrin a duh tih Isua chuan hriat nuam takin a sawi a. Tehkhin thu-a pa ber chuan a fapa a lo kîr leh ang tih a beisei reng a. A fapa lo kîr leh a han hmuh chuan, “hla taka a la awm laiin” a pa chuan hmanhmawh taka tlânin a lo hmuak a. Thutak ata kal bote tân rei rial lova Jehova hnêna kîr leh tûra fuihna ṭha tak a va ni êm! Anni chu thlarau lamah an chau hle pawh a ni thei a, kîr leh chu zahthlâk tak leh harsa tak a ni thei bawk. Mahse, kîr leh chu manhla tak a ni​—⁠an lo kîr leh hun chuan vâna mite pawh an lâwm dâwn si a.​—⁠Lk. 15:⁠7.

15, 16. (a) Isua sawi fapa tlân bo tehkhin thu aṭangin eng nge kan zir theih? Entîrna ṭhenkhat pe rawh. (b) Hei hian Jehova leh Isua chungchâng eng nge min zirtîr?

¹⁵ Engtin nge fapa tlân bo tehkhin thu chu kan hlâwkpui theih? Jehova chu kan entawn  tûr a ni. Thil ti sual inlamlêtte lâwm duh lo khawpa “kherkhiap lutuk” chu kan duh ngai tûr a ni lo. Chu chuan thlarau lama ‘intihchhiatna’ bâk a thlen lo vang. (Thur. 7:16) Heta ṭang hian zir tûr dang kan la nei a. Kohhran chhuahsantu tuemaw chu ṭanpui theih tawh loh anga thlîr lovin, “berâm bo” angin kan thlîr zâwk tûr a ni. (Sâm 119:176) Kohhran aṭanga kal bo tuemaw kan tawh chuan, lo kîr leh tûrin hmangaihna nên ṭanpuina ṭangkai tak kan pe ang em? Upate’n ṭanpuina an pêk theih nân anni chu kan hriattîr nghâl ang em? Isua sawi fapa tlânbo tehkhin thu aṭanga kan thil zirte kan nunpui chuan chutiang chuan kan ti ngei ang.

¹⁶ Tûn lai fapa tlân bo ṭhenkhatin Jehova zahngaihna leh kohhran ṭanpuina an dawnte an hlutzia an sawi chu chhinchhiah ang che. Kum 25 lai hnawhchhuah tawh unaupa pakhat chuan heti hian a sawi a: “Jehova hnên aṭanga ‘harh hun’ ka dawn avângin, lâk luh leh ka nih aṭangin ka hlimna chu a pung chho zêl a. (Tirh. 3:19) Mi tinte chuan min ṭanpuiin min hmangaih hlawm hle! Tûnah chuan thlarau lam chhûngkaw ropui tak ka nei ta,” tiin. Kum nga lai Jehova a kal bosan hnua rawn kîrleh unaunu ṭhalai pakhat chuan heti hian a sawi a ni: “Isua sawi hmangaihna ka chunga chiang taka lantîr a nih avânga ka awm dân hi ka sawi thiam lo. Jehova inawpna pâwl zînga mi nih hi chanvo hlu tak a ni!” tiin.

17, 18. (a) Tehkhin thu pathum kan ngaihtuahna aṭangin zir tûr ṭangkai tak eng nge kan neih? (b) Eng tih nge kan tum tlat ang?

¹⁷ Hêng tehkhin thu pathumte aṭang hian eng nge kan zir? Pakhatnaah chuan, thlarau lama ṭhan chhohna chu kan thunun thei lo tih pawm a ngai a. Chu chu Jehova ṭhantîr tûr a ni. A pahnihnaah chuan, kan Bible zirpuite leh rawn inkhâwm zawng zawngte chu thutakah an ding nghet vek ang tih ka beisei thei lo. A tâwpnaah chuan, mi ṭhenkhatin thutak kalsanin Jehova hnuchhawn mah se, an lo kîrleh ang tih beiseina i nei reng ang u. An lo kîrleh a nih chuan Jehova thlîr dân lantîr tûr zâwngin i lo lâwm ang u.

¹⁸ Hriatna te, hriat thiamna te, leh finnate chu i zawng chhunzawm zêl ang u. Isua tehkhin thute kan chhiar hian, a awmzia te; Bible-a chhinchhiah a nih chhan te, a zirtîrna kan nunpui theih dân te, leh Jehova leh Isua chungchâng kan zir theih te chu i inzâwt ang u. Chutianga kan tihna chuan Isua thusawi awmzia kan hre thiam chiang a ni tih kan lantîr a ni ang. (w14-E 12/15)