KAN vai hian mite thinur lai chu kan hmu tawh ang a, keimahni ngei pawhin thinur châng kan nei ang tih chu rinhleh rual a ni lo. Thinurna hi khap beh ngai rilru veizâwng ṭha lo anga kan thlîr mai theih laiin, thinur chhan tûr ṭha tak nei niin kan inhre fo va, a bîk takin tuemawin kan dikna neih min rah behsak anga a lan hian a ni lehzual a ni. American Psychological Association thuziak pakhat chuan “thinurna hi mihring rilru veizâwng pângngai tak leh hrisêlna atâna ṭha a ni,” tiin a sawi.

Chutiang thlîr dân chu Kristian tirhkoh Paula thu ziah ngaihtuah chuan a pawm tlâk viau niin a lang mai thei. Mite chuan thinur châng an nei thei tih pawmin, ani chuan heti hian a sawi: “Thinrim ula, sual erawh chu sual suh u; in thinur chu niin tlâk pui suh se,” tiin. (Ephesi 4:26) He mi han thlîr hian, kan thinurna kan hrithla tûr nge ni a, kan thinurna thunun tûrin ṭan kan la zâwk dâwn?

Paula’n thinurna chungchânga zilhna thu a pêk lai chuan, fakna hla phuahtu thuziak: “Hlau [a nih loh leh, khûr] ula, thil tisual suh u,” tih hi a rilruah a awm a nih ngei a rinawm. (Sâm 4:⁠4) Mahse, thlarauva thâwk khum Paula fuihna thuin a sawi tum tak chu eng nge ni? Ani chuan heti hian a hrilhfiah zawm a ni: “Khâkna te, thinurna te, tauhna te, ânna te, sawichhiatna te zawng zawng chu bânsanin awm rawh se, sualna zawng zawng nên,” tiin. (Ephesi 4:31) A nihna takah chuan, Paula chuan Kristiante chu an thinurna hrithla lo tûrin a fuih a ni. Ngaihven awm takin, American Psychological Association thuziak chuan heti hian a sawi zawm a ni: “Zir chîkna chuan thinur hrîkthlâknain thinurna leh inhrosakna a tizual a, dinhmun chingfel tûrin . . . engti kawng mahin min ṭanpui lo,” tiin.

Chuti chu, engtin nge thinurna leh a nghawng ṭha lo zawng zawngte chu kan “dah bo” theih ang? Hmân lai Israel Lal fing Solomona chuan heti hian a ziak a ni: “A ngaihruat thiamnain mi a thin a tihnelsak ṭhîn a, bawhchhiatna haider chu a ropuina a ni,” tiin. (Thufingte 19:11) Mi a thinur hunah engtin nge “ngaihruat thiamnain” a ṭanpui?

Ngaihruat thiamna chu dinhmun hmuh thiamna a ni a. Ngaihruat thiamna nei tih chu a pâwnlâng piah lam hmuh thiamna nei tihna a ni. Chu chuan kan lungnih loh emaw, kan thinur emaw hunah engtin nge min ṭanpui?

Rorêl dik lohna kan hmuh hian kan thin a ur ngei ang a. Mahse, kan rilru vei anga tharum thawha kan chhâng lêt nghâl mai a nih chuan, keimahni ngei kan intina theiin, mi dang pawh kan tina thei a ni. Thunun loh mei chuan in a kan chhiat theih ang bawkin, thinurna thunun loh chuan kan hming ṭha leh mi dangte nêna kan inlaichînna bâkah, Pathian nêna kan inlaichînna thlengin a tichhe thei a ni. Chuvângin, kan chhûngrilah thinurna a so sâng a nih chuan, dinhmun chu ngun lehzuala bih chian a hun tihna a ni. Thil nih dân kimchang taka hriatna chuan kan rilru thunun tûrin min ṭanpui ngei ang.

Solomona pa, Lal Davida chuan Nabala nên an indâwrnaah thisen chhuahna sual a pumpelh chang chang a, dinhmun hre thiam tûra ṭanpui a nih avângin Davida chu a lâwm hle. Davida leh a mite chuan Judai ram thlalêrah Nabala berâmte an vênsak a. Berâm hmûl meh a hun chuan Davida chuan Nabala hnênah ei tûr ṭhenkhat a dîl a ni. Chutah Nabala chuan heti hian a chhâng a ni: “Ka chhang te, ka tui te leh ka berâm hmul mêttute tâna ka talh chu tute nge an ni tih pawh hriat hleih lohte hi ka  pe tehlul ang maw?” tiin. In deusawhna a va ni tak êm! Davida’n chûng thute chu a hriat chuan, a mi 400-te nên, Nabala leh a in chhûnga mipa zawng zawng tiboral tûrin an thawk chhuak a ni.​—⁠1 Samuela 25:​4-13.

Nabala nupui Abigaili chuan thil awm dân a hriat chuan, Davida hmu tûrin a kal chhuak a. Davida leh a mite a hmuh chuan, a ke bulah bawkkhupin heti hian a sawi a ni: “I chhiahhlawhnu hian i beng hriatah thu sawi sela i chhiahhlawhnu thusawi chu khawngaih takin ngaihthlâksak ang che,” tiin. Tichuan, Abigaili chuan Davida hnênah Nabala âtzia a hrilhfiah a, phuba a lâk chuan a la inchhîr ang tih a hrilh a ni.​—⁠1 Samuela 25:​24-31.

Abigaili thusawi aṭangin Davida chuan dinhmun khirh tak tivengtu tûr eng ngaihruat thiamna nge a chhar chhuah? A hmasain, Nabala chu mi â a ni tih leh, a dawtah phubâ a lâk chuan thisen chhuahnaah thiam loh a chang thei tih a hria a ni. Davida ang bawkin thil eng emaw avângin nasa takin i thinur pawh a ni thei e. Eng nge i tih ang? “Rei lo tê hun lain, thâwk la vak la, number 1 aṭangin 10 thleng chhiar ang che,” tiin Mayo Clinic chuan thinur insûm dân thuziakah rawtna a pe a ni. Ni e, buaina lo chhuah chhan ber chu ngaihtuah la, tichuan i thiltih tumin nghawng a neih dân tûr chu ngaihtuah bawk rawh. Ngaihruat thiamna chuan i thin tinel sela​—⁠a ni, hnawt bo hial rawh se.​—⁠1 Samuela 25:​32-35.

Chutiang bawkin, tûn laia mi tam tak chu an thinurna thunun tûra ṭanpui an ni a. Kum 23 mi Poland rama lung in tâng Sebastian-a chuan Bible zirna aṭanga a thinurna leh thin ramna thunun dân a zir thu a sawi a ni: “A hmasa berin, buaina ka ngaihtuah a. Chutah, Bible zilhna thu nunpui ka tum a. Bible hi kaihruaitu lehkhabu ṭha ber niin ka hria,” tiin.

Setsuo-a pawhin chu tih dân bawk chu a zui a. Heti hian a sawi a ni: “Hnathawhnaah hian ka thin a ur chuan mi dangte hi ka hau vak ṭhîn a. Tûna Bible ka zir hnuah chuan, mite hau vak ai chuan: ‘Tu nge dik lo chu? Buaina ber chu keimah ka ni lâwm ni?’ tiin ka inzâwt ṭhîn,” tiin. Hetiang zawhnate inzawhna chuan a thin a tihnelsak a, tichuan a rilrua a thinurna so sâng tak chu a thunun thei ta a ni.

Thinurna chu a nasa hle thei a, mahse, Pathian Thu aṭanga zilhna chu a chak zâwk a ni. Bible zilhna fing takte nunpuina leh Pathian ṭanpuina dîlna hmangin, nang pawn i thin i tinel thei, a nih loh leh i thinurna i thunun thei a ni. (w14-E 12/01)