1-3. Nupate chuan eng harsatnate nge an hmanchhawn? (A thupui chunga milem en rawh.)

KUM 38 lai hlim taka nupui nei tawh pa pakhat chuan heti hian a sawi a: “Theih tâwp chhuaha hma i lâk a, i inneihna hlawhtling tûra i duhzia i lantîr chuan Jehova malsawmna i dawng ang,” tiin. Ni e, nupate chuan hun nuam tak an hmang theiin, hun harsaah pawh an inṭanpui tawn thei a ni.—Thuf. 18:22.

² Mahse, nupate tân ‘tisaa hrehawm’ ṭhenkhat tawh chu thil pângngai tak a ni. (1 Kor. 7:28) Engvângin nge? Nî tin buainate hmachhawnna chuan nupa inkârah inhmuhthiam lohna a thlen thei a. Ṭha famkima lei kan thunun theih loh vânga lo awm ṭhîn rilru natna te, inhriat sualna te, leh inbiak pawh fuh lohnate chuan inneihna ṭha berah pawh harsatna a thlen thei a ni. (Jak. 3:2, 5, 8) Nupa tam tak chuan fate enkawl paha hna hautak thawh chu harsa an ti bawk. Rilru hahna leh taksa chauhna avângin nupate tân an inneihna tihngheh nâna hun hman dun a ti harsa a. Sum lama harsatna te, hrisel lohna te, a nih loh leh harsatna dangte chuan an inhmangaihna leh an inzah tawnna chu a tichhe thei a. Chu bâkah, inneihna ṭha leh nghet anga langte pawh hi hetiang “tisa thiltih”  chi hrang hrang, inngaih te, hurna te, huatna te, inhauna te, thîkna te, thinurna te, leh inkhinna te avângin a nghet lo thei a ni.—Gal. 5:19-21.

³ Dinhmun tichhe lehzual tûrin, ‘ni hnuhnûngah’ hian inneihna atâna tûr hlauhawm mahni hmasialna leh Pathian ngaihsak lohna rilru put hmang a hluar hle a. (2 Tim. 3:1-4) A tâwpah chuan, inneihna chuan hmêlma hlauhawm tak beihna chu a hmachhawn a ngai bawk. Tirhkoh Petera chuan heti hian min vaukhân a ni: “In khingpui Diabola chu sakeibaknei rûm ṭhîn angin a ei theih tûr zawngin a phi ruai ṭhîn,” tiin.—1 Pet. 5:8; Thup. 12:12.

4. Inneihna hlimawm leh nghet chu engtianga neih theih nge ni?

⁴ Japan rama pa pakhat chuan: “Sum leh pai lama harsatna avângin ka rilru a hah hle a. Chutah, ka nupui ka biak pawh ṭhat loh avângin, ani pawhin rilru hahna tam tak a neih phah a. Chu bâkah, tûn hnai mai khân natna khirh tak a vei ṭan a. A châng phei chuan, kan rilru hahna avângin inhnial buaina a lo chhuak a ni,” tiin a sawi. Harsatna ṭhenkhat chu nupate tân pumpelh theih a ni lo va, mahse chingfel theih loh a ni lo. Jehova ṭanpuinain nupate chuan inneihna hlimawm tak leh nghet tak an nei thei a ni. (Sâm 127:1 chhiar rawh.) Tûnah chuan, inneihna nghet leh tlo tak dinna tûr thlarau lam thil pangate chu i lo sawiho vang u. Chu mi hnuah, chûng thilte hmangaihnaa char ngheh tlat theih a nih dân kan ngaihtuah bawk ang.

5, 6. An inneihnaa Jehova teltîr tûrin nupate chuan eng nge an tih theih?

⁵ Inneihna nghet neih nâna thil pawimawh tak chu rinawmna leh inneihna Bul Ṭantu hnuaia intukluh hi a ni a. (Thuhriltu 4:12 chhiar rawh.) Nupui pasalte chuan Jehova pêk kaihhruaina duhawm takte zawmna hmangin an inneihnaah Jehova an teltîr thei a ni. Hmân laia Pathian mite chungchângah Bible chuan: “Ding lama in pên velah emaw, vei lama in pên veleh emaw, in bengin in hnung lama thu, ‘Hei hi kawng a nih hi, tah hian kal rawh,’ tiin a hre zêl ang,” tiin a sawi a. (Is. 30:20, 21) Tûn laiah, nupate chuan Pathin Thu chhiar dunna hmangin Jehova thusawi an “hre” thei a ni. (Sâm 1:1-3) Chhûngkuaa Pathian Biakna hlimawm tak leh thlarau lama mi ti harhvâng thei takte neihna hmangin an inneihna chu an tinghet lehzual thei a ni. Setana khawvêl beihna hmachhawn thei tûr chhûngkaw dinnaah chuan nî tina ṭawngṭai dun pawh a pawimawh hle bawk.

⁶ “Mi mal harsatnate, a nih loh leh inhriat sualnate’n kan hlimna a lâk bo apiangin, Pathian Thua thurâwnte chuan dawhthei tûr leh ngaihdam peih tûrin min ṭanpui a. Hêng miziate hi inneihna hlawhtling neih nân a pawimawh hle,” tiin German rama Gerhard-a chuan a sawi. Nupate chuan thlarau lam thilte ti dûna an inneihnaa Pathian an teltîr hian, hlim taka Pathian nêna an inzawm tlat bâkah, anmahni pawh an inzawm tlat bawk a ni.

7. Engtin nge pasalte chuan lû an nihna chu an hman ang?

⁷ Pasalin lû nihna a hman dân chuan inneihna hlimawm leh nghet din tûrin tih theih tam tak a nei a. Bible chuan: “Mipa tawh phawt lû chu Krista a ni, hmeichhe lû chu mipa a ni,” tiin a sawi. (1 Kor. 11:3) A chung leh a hnuaia thute chuan Krista’n mipate chunga a thuneihna a hman ang bawkin, pasalte’n lû nihna an hmang tûr a ni tih a târ lang. Isua chuan a thu a duh emaw, a phût sâng lutuk emaw ngai lo va, chu aimahin hmangaihna te, ngilneihna te, nunnêmna te, thuhnuairawlhna te, leh rilrua  inngaihtlâwmna te a lantîr reng zâwk a ni.—Mt. 11:28-30.

8. Engtin nge pasal chuan a nupui hmangaih leh zah a hlawh theih?

⁸ Kristian pasalte chuan an nupuite’n an chunga zahna lantîr tûrin an phût fo tûr a ni lo. Chu aimahin, anni chuan ‘an khawsak dânah bêl keh awl zâwk an nih hre thiam,’ a nih loh leh an ngaihtuahzia an lantîr a, “an chawimawi” a ni. (1 Pet. 3:7) Mi dang hma leh hma lovah pawh pasalte chuan zahna ṭawngkam leh khawngaihna tel thiltihte hmangin an nupuite an hlutzia an lantîr a ni. (Thuf. 31:28) Chutianga hmangaihna nên lû nihna chelhtu pasal chuan a nupui hmangaih leh zah a hlawh bâkah, an inneihna chungah Pathian malsâwmna a thlen bawk a ni.

9. Engtin nge nupui chuan inngaitlâwm taka intukluhna a lantîr theih?

⁹ Mahni hmasial lo leh thu bula innghat Jehova kan hmangaihna chuan a kut chak tak hnuaia intihnuai tûrin min ṭanpui ṭheuh va. (1 Pet. 5:6) Nupui intulût takin Jehova thu neihna a zahzia a lantîr dân kawng pawimawh tak pakhat chu chhûngkuaa thawhho duhna leh inṭanpui duhna a nei hi a ni. Bible chuan: “Nupuite u, Lalpaa a âwm tâwk ang zêlin in pasalte hnênah intulût rawh u,” tiin a sawi a. (Kol. 3:18) Dik takin, pasalin thu tlûkna a siam zawng zawngte chu a nupui duhzâwng a ni vek kher lo vang. Mahse, a thu tlûkna siam chuan Pathian Dân a kalh loh chuan, nupui intulûk tak chuan a zâwm duh ngei ang.—1 Pet. 3:1.

10. Engvângin nge hmangaihna avânga intukluh chu a pawimawh êm êm?

¹⁰ Nupui chuan a pasal tâna “kawppui” nih theihna dinhmun ngaihsânawm tak a nei a. (Mal. 2:14) Intukluhna lantîr reng chungin, a ngaihtuahna leh a rilru veizâwngte chu zahna nêna sawi chhuakin chhûngkua anga thu tlûkna siam hunah thurâwn ṭha tak a pe a ni. Pasal fing chuan a nupui thusawite chu ngun takin a ngaithla ang. (Thuf. 31:10-31) Hmangaihna avânga intukluhna chuan hlimna te, remna te,  leh chhûngkuaa inlungrualna te a awmtîr a; chu bâkah, nupate chu Pathian an tilâwm tih an hriatna aṭanga lo awm lungawina a neihtîr bawk a ni.—Eph. 5:22.

11. Engvângin nge ngaihdamna neih chu a pawimawh?

¹¹ Inneihna nghet din nâna thil pawimawh tak pakhat chu ngaihdamna a ni a. Nupate ‘an indawh tawna an inngaihdam tawn’ hian an inneihna chu a lo nghet sauh ṭhîn. (Kol. 3:13) Kawng leh lamah chuan, nupate’n tûn hmaa an lungnih lohnate rilrua chhinchhiah reng a, a thara inbeih nâna an hman hian an inneihna chu a derthâwng ta ṭhîn a ni. Bang khîin in a tiderthawng ang bawkin, lungnih lohna leh thinurna rilrua paina chuan mi dangte ngaihdam a ti harsa zual thei a ni. Chu mi nêna inkalh takin, nupate chuan Jehova’n an mahni a cheibâwl anga, an inngaihdam tawn hian inneihna nghet tak an din thei a ni.—Mik. 7:18, 19.

12. Engtin nge hmangaihna chuan “sual tam tak a khuh”?

¹² Hmangaihna dik tak chuan ‘thil sual a hre reng ngai lo.’ A nihna takah chuan, “hmangaihnain sual tam tak a khuh” a ni. (1 Kor. 13:4, 5, C.L. Re-edited;  1 Petera 4:8 chhiar rawh.) Kawng danga sawi chuan, hmangaihna chuan ngaihdam theih chin tûr a bituk lo a ni. Tirhkoh Petera’n mi a ngaihdam chin tûr a zawh khân, Isua chuan: “Vawi sarih hmun sawmsarih thlengin,” tiin a chhâng a. (Mt. 18:21, 22) A nihna takah chuan Kristian tân mi dangte ngaihdamna kawngah tiam chin a awm lo a tihna a ni.—Thuf. 10:12. *

13. Ngaihdam duh lohna rilru put hmang chu engtin nge kan hneh theih?

¹³ “Nupate an inngaihdam duh loh hian thinurna leh inrin lohna a nasa chho va, chu chu inneihna atân tûr hlauhawm tak a ni. Ngaihdam peihna chuan inneihna a tinghetin, nupate chu a inhnaihtîr lehzual a ni,” tiin Annette-i chuan a sawi. Ngaihdam duh lohna rilru put hmang hneh thei tûr chuan lâwm nachâng hriatna leh ngaihhlutna rilru put hmang neih tum ang che. I kawppui chu tih tak zetin fak ṭhîn rawh. (Kol. 3:15) Chutianga tiin, ngaihdam duhna rilru put hmang neitute dawn ṭhin rilrua thlamuanna te, inpumkhatna te, leh Pathian malsâwmna te chu dawng ang che.—Rom 14:19.

14, 15. Dân Rangkachak chu eng nge ni a, chu chu inneihnaah eng ang takin nge a ṭangkai?

¹⁴ Zahawm tak leh zahder thiam taka cheibâwl chu i duh ang tih rinhleh rual a ni lo. I ngaihtuahnate pawmsak a nih a, i rilru veizâwngte ngaih pawimawh a nih hian i lâwm ṭhîn a. Mahse, tuemawin hetianga an sawi hi i hre tawh ngai em? “Mi tih angin ka ti lêt ve ang,” tih hi. A châng chuan chutianga chhân lêt chu hriatthiamawm tak ni thei mah se, Bible erawh chuan: “‘Ka chunga a tih angin a chungah ka ti ang,’ ti suh,” tiin min hrilh a ni. (Thuf. 24:29) A nihna takah chuan, Isua chuan dinhmun harsate ṭha zâwka chingfel tûrin thu min râwn a. He dân hian hriat a hlawh êm avângin Dân Rangkachak tiaa koh a ni fo: “Miin in chunga an tiha in duh tûr ang zêlin mi chungah pawh ti ve rawh u,” tih hi. (Lk. 6:31) Isua sawi awmzia chu ngilneih lohna chu ngilneih lohnaa chhâng lêt lovin, miin min cheibâwl dân tûra kan duh ang takin mi dangte kan cheibâwl tûr a ni, a tihna a ni a. Nupa inkârah  chuan, kan inlaichînna aṭanga dawn kan duh ang chu kan pe chhuak ve tûr a ni, tihna a ni.

¹⁵ Nupate chuan an kawppuite rilru veizâwng an hriatthiam hian an inlaichînna an tinghet a. South Africa-a pa pakhat chuan,“Dân Rangkachak chu nunpui kan tum tlat a. Lung nih loh châng zawng a awm ngei mai a; mahse, zahawm tak leh zahder thiam taka cheibâwl nih kan duh anga incheibâwl tawn chu kan tum tlat a ni,” tiin a sawi.

16. Nupate chuan eng thil nge an tih loh vang?

¹⁶ I kawppui chak lohna emaw, danglam bîkna emaw chu pho lang lo la, fiamthu ang pawhin sawi lang ngai suh. Inneihna chu tu nge chak zâwk a, tu nge au ring thei zâwk a, a nih loh leh tuin nge rilru tina thei ṭawngkam chhâk chhuak thei zâwk tia inelna a ni lo tih hre hreng rawh. Kan vai hian tlin lohna kan nei vek a, mi dangte tihlungnih loh châng kan nei ṭheuh a ni. Mahse, nupa a tu zâwk tân pawh tihelna ṭawngkam leh ngaihnêpna ṭawngkam hman chhan tûr a awm lo va, a aia chhe zâwk innam sawkna leh kut inthlâkna angte tih chhan tûr a awm hek lo.—Thufingte 17:27; 31:26 chhiar rawh.

17. Engtin nge pasalte chuan Dân Rangkachak chu an nunpui theih?

¹⁷ Hnam ṭhenkhat chuan mi sawisak hmang emaw, an nupuite kut thlâk hmang mi emaw chu mipa nihna angin an thlîr a; mahse, Bible chuan: “Mi thinnel chu mi chak aiin a ṭha zâwk a, a rilru thunun hneh chu khaw latu aiin,” tiin a sawi. (Thuf. 16:32) Nungdam tawh zînga mi ropui ber, Isua Krista entawn a, thinurna insûm tûr chuan nungchang lama chakna neih a ngai a ni. Ṭawngkam leh kutthlâk hiala a nupui sawisatu chu a pâ lo rêng rêng a, chutiang mi chuan Jehova nêna an inlaichînna a hloh ang. Bible chuan heti hian a sawi a ni: “Thinrim ula, sual erawh chu sual suh u; in thinur chu niin tlâkpui suh se,” tiin.—Eph. 4:26.

18. Engvângin nge hmangaihna chu neih reng a pawimawh?

¹⁸ 1 Korinth 13:4-7 chhiar rawh. Hmangaihna chu inneihnaa neih ngai mize pawimawh ber a ni a. “Lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te chuan inthuam rawh u. Tin, chûng zawng zawng chungah chuan hmangaihna inbel rawh u, chu chu phuar famkimna a ni.” (Kol. 3:12, 14) Krista neih ang mahni hmasial lo hmangaihna hi inneihna nghet neih nâna thil ṭûlte châr khâwmtu cement ang a ni a. Chu chuan lungnih lohnate thlentu mize lama tlin lohnate, hrisêl lohna nasa takte, lungngaihna thlentu sum leh pai lama harsatnate, leh kawppuite chhûngkhatte nêna inrem lohnate a awm chung pawhin inneihna chu a tinghet tlat ang.

19, 20. (a) Engtin nge nupate chuan inneihna nghet leh hlimawm tak chu hlawhtling taka an din theih? (b) A dawta thuziakah eng nge kan sawiho vang?

¹⁹ Inneihna hlawhtling nei tûr chuan hmangaih taka inpêkna, rinawmna, leh theih tâwp chhuaha ṭan lâk a ngai ngei mai a. Harsatna an tawh huna inṭhen tum mai ai chuan, nupate chuan an inlaichînna chu dam khawchhuak chang chang ni lovin, tihduah hluah hluah an tum tûr a ni. ‘Hmangaihna chu engtikah mah a reh loh avângin,’ Jehova hnêna inpumpêk nupate chu harsatna an tawhte chingfel tûrin Pathian an hmangaihna leh anmahni an inhmangaih tawnna chuan a chêttîr ṭhîn a ni.—1 Kor. 13:8; Mt. 19:5, 6; Heb. 13:4.

²⁰ Tûn ‘hun khirh takah’ hian inneihna hlimawm leh nghet tak din chu a harsa hle a. (2 Tim. 3:1) Mahse, Jehova ṭanpuina nên chuan din theih a ni. Chutichung pawhin, nupate chuan khawvêla nungchang chhiatna hluar takte chu an la hmachhawn ve reng bawk a. A dawta thuziakah chuan nupate’n an inneihna an tihngheh theih dân kan sawiho vang. (w15-E 01/15)