1, 2. (a) Engvângin nge Israel mi 24,000-te chuan malsâwmna ropui tak chu an chân? (b) Engvângin nge chu hmân lai thilthleng chu kan tân a pawimawh?

RAM TIAMA an luh hma lawkah, Israel mipa sîng khat chuan “Moab-ho fanute chu an pâwl ta hlawm a.” Chuvângin, Jehova chuan mi 24,000 a tiboral a ni. Han ngaihtuah teh—Israel mite chuan hun rei tak chhûng an lo nghah tawh an rochan tûr chu an nei ṭêp tawh a, mahse, chu malsâwmna ropui tak mai chu thlêmnaa an tlâwm avângin an chân ta a ni.—Num. 25:1-5, 9.

² Chu chhiatna râpthlâk tak chu “keini, hun tâwp lo thlennate hi, min zilhna tûrin” chhinchhiah a ni. (1 Kor. 10:6-11) Tûn ‘ni hnuhnûng,’ tâwp lamah hian, Pathian chhiahhawhte chu khawvêl thar kawtkaiah mai an awm tawh a. (2 Tim. 3:1; 2 Pet. 3:13) Mahse, lungchhiatthlâk takin, Jehova betute zînga mi ṭhenkhat chu an fîmkhur tâwk lo va. Nungchang bawlhhlawhna thangah an âwk a, a rah chhuah ṭha lo tak takte chu an seng a ni. Chutiang mite tân chatuan malsâwmna chân mai a hlauhawm a ni.

3. Engvângin nge nupate chuan Jehova vênghimna leh kaihhruaina an mamawh? (A thupui chunga milem chu en rawh.)

 ³ Tûn lai nungchang bawlhhlawhna hluar tak avângin, nupate chuan an inneihna vênhim tuma ṭan an lâkna a thlâwn mai a nih loh nân, Jehova kaihhruaina leh vênhimna chu an mamawh a. (Sâm 127:1 chhiar rawh.) Nupate chuan an thinlung vên ṭhatna te, Pathian hnaihna te, mihring thara inthuamna te, inbiak pawhna ṭha te, leh nupa nun ṭha taka hmanna te aṭanga an inneihna an tihngheh theih dân kan sawiho vang.

4. Engin nge Kristian ṭhenkhat chu thil sual tihtîr?

⁴ Kristian pakhat chu nungchang bawlhhlawh tûra thlêmin engtin nge a awm theih? Nuchang bawlhhlawh kawng hlauhawm tak chu mit aṭangin a inṭan fo va. Isua chuan: “Tupawh ngaih châka hmeichhe melh apiang chu, a thinlungah a uirê tawh reng a ni,” tiin a sawi a. (Mt. 5:27, 28; 2 Pet. 2:14) Thil sual tihnaa Kristian tam takte tlûk luh chhan chu saruak lem te, tîsa châkna chawk tho thei lehkhabu te, a nih loh leh Internet-a thil ṭha lote en leh chhiarna hmanga nungchang lama an invên ṭhat tâwk loh vâng a ni. Mi dangte chu nungchang bawlhhlawhna a ngial a ngana târ lanna video-te, stage show-te, a nih loh leh TV program-te an en vâng a ni a. A ṭhen chu nightclub-ah leh saruaka lâmna hmunah te, a nih loh leh châkna chawk tho thei tûr zâwnga inhmehna massage parlor-ahte an kal a ni.

5. Engvângin nge kan thinlung hi kan vên ṭhat a ngaih?

⁵ Mi ṭhenkhat chu an kawppui ni lote ngaihsakna lâk an duh avângin thlêmnaah an tlu lût a. Insûmtheihna tlâkchhamna leh nungchang bawlhhlawhna a hluarna khawvêlah hian, thinlung bum hmang leh chhe lailet dêr tân chuan mahni kawppui ni lote ngaihzâwn chu a awlsam hle. (Jeremia 17:9, 10 chhiar rawh.) Isua chuan: “Thinlungah hian ngaihtuahna sualte, tualthahte, uirênate, inngaihte, . . . a lo chhuak si ṭhîn,” tiin a sawi.—Mt. 15:19.

6, 7. (a) Thinlung bumhmang chuan mi chu eng thil sual tihna kawngah nge a hruai theih? (b) Engtin nge nungchang lama invênna tlu chhe tûr chu vên theih a nih?

⁶ Thinlung chhe lailet dêra châkna sualin bu a lo khuar tawh chuan, inngainatna nei mi pahnih chuan an kawppuite hnên chauhva an sawi tûr thute chu an inhrilh tawn thei a. Rei lo têah, awm dun theih dân hun remchâng an zawng a, tum rêng vâng ni lova inhmu palh anga lang tûra ruahmanna siamin an inhmu ta ziah a. An châknate a lo sosân chuan nungchang thianghlim vawn an harsat tial tial a. An thiltihte chu a ṭha lo tih hre reng mah se, sual kawng zawha an kal thui zawh poh leh bânsan mai chu a harsa tawlh tawlh a ni.—Thuf. 7:21, 22.

⁷ Châkna dik lo leh ṭawngkam bawlhhlawhte chu kut invawnsak te, infawh te, mipat hmeichhiatna chawktho tûr zâwnga inchûl te, leh hmangaihna inlantîrna dangte’n a han zui hnu chuan thlarau lama kan invênna chu zâwi zâwiin a tluchhhe ta ṭhîn a ni. A tâwpah chuan, anni chu ‘mahni châknaa hruai bo leh hîpin’ an awm a. Châkna chuan no a pai a, chu chuan “sual a hring” a ni—mipat hmeichhiat hmanna sual chu. (Jak. 1:14, 15) A va lungchhiatthlâk tak êm! An pahnih hian, Jehova ṭanpuinain inneihna thianghlimna zah sela chuan, hetiang nungchang lama tlûkchhiatna hi an pumpelh thei ngei ang. Mahse, inneihna thianghlim zahna chu engtin nge kan neih theih ang?

8. Engtin nge Jehova nêna inṭhianna chuan nungchang lama vênhimna a pêk?

⁸ Sâm 97:10 chhiar rawh. Nungchang thianghlimna vênhim theih dân pawimawh tak chu Jehova nêna inṭhianna neih hi a ni a. Pathian mize duhawmte kan zir a, ‘a fa duh takte anga Pathian awm dân latute kan nih a, hmangaihnaa awm reng’ kan tum tlat chuan, “inngaih leh bawlhhlawh zawng zawng” do tlat tûra thuam kan ni ang. (Eph. 5:1-4) “Inngaite leh uirête chu Pathianin a ngaihtuah dâwn” tih hriain, nupate chuan an inneihna chu chawimawi a, tihbawlhhlawh loh an tum tlat a ni.—Heb. 13:4.

9. (a) Engtin nge Josefa chuan mipat hmeichhiatna hmang tûra thlêmna chu a do? (b) Josefa entîrna aṭangin eng nge kan zir theih?

⁹ Pathian chhiahhlawh rinawm ṭhenkhat chu hnathawh zawha Thuhretu ni lote nêna inkâwmin, nungchang lamah an invêng ṭha tâwk lo va. Hnathawh hun chhûngah pawh thlêmna a lo chhuak thei a ni. Tlangvâl hmêlṭha tak Josefa chuan a hnathawhnaah a pu nupuiin a duh hle tih a hria a. Nî tin mai hian a pu nupui chuan thlêm thlûk a tum a. A tâwpah chuan, “‘Min mutpui rawh,’ tiin a silhfênah a lo man a.” Mahse, Josefa chuan a tlân chhiatsan a ni. Chutiang thlêmna hnuaia thlarau lama invêng tlat tûrin Josefa chu engin nge ṭanpui? Pathian nên an inlaichînna tihchhiat loh a tum tlatna chuan a nungchang thianghlimna leh a rinnawna vawng tûrin a ṭanpui a ni. A tum ruhna avângin a hna a chân a, dik lo taka lung ina tântîr a ni bawk a; mahse, Jehova chuan mal a sâwm a ni. (Gen. 39:1-12; 41:38-43) Kristiante tân hnathawhna hmunah emaw, hmun dangah emaw an kawppui ni lo tuemaw nêna thlêmna tawhtîr thei dinhmunte chu pumpelh a ngai a ni.

10. Engtin nge mihring thara inthuamna chuan chhûngkua a vênhim?

¹⁰ Mihring thar chu “thutak felna leh thianghlimnaa Pathian anga siam” a nih avângin, chu chu nupate tân thlarau lama invên nân a pawimawh hle. (Eph. 4:24) Chûng mihring thara inthuam tawhte chuan an taksa pêng “inngaih te, bawlhhlawh te, hurna te, châkna sual te, duhâmna te,” chu an “tihlum” a ni. (Kolossa 3:5, 6 chhiar rawh.) “Tihlum” tih ṭawngkam chuan tîsa châkna bawlhhlawh kan do nasat a ngaihzia a târ lang a. Kan kawppui ni lote ngaih châkna min neihtîr thei thil eng pawh chu kan pumpelh ang. (Job. 31:1) Pathian duhzâwng mila nun kan tum hian, ‘sual lam huat’ dân leh ‘ṭha lam pawm tlat,’ dân kan zir a ni.—Rom 12:2, 9.

11. Engtin nge mihring thara inthuamna chuan inneihna chu a tihngheh theih?

¹¹ Mihring thar chuan “a siamtu” Pathian Jehova mizia a lantîr a. (Kol. 3:10) Nupate chuan “lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te” nêna inthuamna hmanga an nungchang an vawn thianghlim tlat hian malsâwmna an va dawng tak êm! (Kol. 3:12) ‘Krista thlamuannain an thinlunga ro a rêl’ hian nupate chu an inpumkhat lehzual bawk. (Kol. 3:15.) Nupate tân ‘hmangaih taka inlainat tawnna’ neih chu malsâwmna a va ni êm! ‘Chawimawi kawnga induhsak tawnna,’ a nih loh leh chawimawi hmasatu nihna chuan lâwmna a pe a ni.—Rom. 12:10.

12. Inneihna hlimawm tak nei tûrin eng miziate nge pawimawh nia i hriat?

¹² Nupa hlim tak an nih chhan an zawh chuan Sid-a chuan heti hian a sawi a: “Theih tâwp chhuahin hmangaihna inlantîr kan tum reng a. Chu bâkah, thuhnuairawlhna pawh hi a pawimawh hle niin kan hria,” tiin. A nupui Sonja-i pawhin: “Khawngaihna hi neih ngai  mize pawimawh tak a ni a. Chutah, awlsam reng lo mah se, inngaihtlâwmna lantîr chu kan tum reng bawk a ni,” tiin a sawi ve bawk.

13. Inneihna tihngheh nâna thil pawimawh tak pakhat chu eng nge ni a, engvangin nge?

¹³ Khawngaihna tel ṭawngkam chu inneihna ngelngheh nâna thil pawimawhte zînga pakhat a ni tih rinhleh rual a ni lo. Nupate chu an hmêl hriat lohte emaw, an ran vulhte emaw an biak dân aia hniam zâwka an inbiakpawh chuan, chu chu a lungchhiatthlâk hle ang! “Khâkna te, thinurna te, tauhna te, ânna te, sawichhiatna te,” an hman hian, nupate chuan an inneihna chu zâwi zâwiin an tinghet lo thei a ni. (Eph. 4:31) Insawisêl reng emaw, mi tichhe thei ṭawng elna emaw hmanga an inneihna tihchhiat aiin, nupate chuan ngilneihna, khawngaihna, leh lainatna tel ṭawngkam hmangin an inlaichînna chu an tihngheh a ngai zâwk a ni.—Eph. 4:32.

14. Eng thiltihte nge fing thiam taka kan pumpelh ang?

¹⁴ Bible chuan “ngawih hun a awm” a ti a. (Thur. 3:7) Hei hi kan kawppuite be lovin ngawi kan dawh reng tûr tihna a ni lo, chu chuan thil ṭûla inbiak pawhna tûr pawh a dang si a. German rama nu pakhat chuan: “Chutiang dinhmunah chuan ngawih rengnain kawppui rilru a tina thei a ni,” tiin a sawi a. Mahse, heti hian a sawi belh bawk a ni: “Thinur laia rilru fîm tak neih chu awlsam lo hle mah se, thinur hrîkthlâk mai chu a ṭha ber lo. Chutah, ngaihtuah chiang mang lovin i kawppui rilru tina thei ṭawngkam i chhâk chhuak emaw, thil i ti emaw thei a, chu chuan dinhmun chu a tichhe zual thei a ni,” tiin. Inânkhumnate, inbiak duh lohnate chuan nupa inkâra buaina chu a chingfel lo. Chu aimahin, anni chuan thu inhmuh lohnate chu thilthleng ṭhîn pângngai ang leh rei tak awh inhnialnaa chantîr lovin, an inneihna chu an tinghet zâwk a ni.

15. Engtin nge inbiak pawhna ṭhain inneihna chu a tihngheh theih?

¹⁵ Nupate tân an rilru veizâwngte leh an ngaihdânte inhrilh tawnna hun an neih hian an inneihna chu a lo nghet ṭhîn a. Kan thusawi  ang tlukin kan sawi dân pawh a pawimawh a ni. Chuvângin, dinhmun harsa tak hnuaiah pawh i awphawiah leh i ṭawngkam chhuakah chuan khawngaihna teltîr tum tlat ang che. Chutianga i tih chuan i thusawi chu i kawppui tân ngaihthlâk a nuam ang. (Kolossa 4:6 chhiar rawh.) Nupate chuan an kawppuite tâna ‘a ṭulzia ang zêla siam ṭha tûra thu ṭha apiang chauh’ sawiin, an inneihna chu inbiak pawhna ṭha nên an tinghet thei a ni.—Eph. 4:29.

16, 17. Engvângin nge nupate tân rilru lam leh mipat hmeichhiatna lam mamawh hre thiama inphuhhrûksak chu a pawimawh?

¹⁶ Nupate chuan mahni mamawh aia an kawppuite mamawh ngaih pawimawh zâwkna hmangin, inneihna nghet tak an din thei a ni. (Phil. 2:3, 4) Nupate chuan an kawppuite rilru lam leh mipat hmeichhiatna lam mamawh chu hre thiama an inphuhrûksak a ngai a ni.—1 Korinth 7:3, 4 chhiar rawh.

¹⁷ Lungchhiatthlâk takin, ṭhenkhat chuan an kawppuite chungah hmangaihna an lantîr lo va, nupa nun an hmanpui lo bawk a; tin, mipa ṭhenkhatin nupuite dimdâwih chu pâ lohthlâkah an ngai a ni. Bible-in: “Pasalte chuan an chênpui an nupuite chu hriat thiam an tum tûr a ni,” tiin a sawi. (1 Pet. 3:7, Phillips) Chan tûr tâwk pe kan tih hian mipat hmeichhiatna hman chauh a kâwk lo tih pasal tân hriat a ngai a. Pasalin mipat hmeichhiatna hman hun chauh ni lova, eng lai pawha a nupui a hmangaiha a duat chuan a nupui tân nupa nun hman chu nuam a ti zâwk ngei ang. Ngaihsakna an inlantîr tawn hian, an rilru lam leh tîsa lam mamawhte inphuhhrûksak chu a awlsam lehzual ang.

18. Engtin nge nupate chuan an inneihna an tihngheh theih?

¹⁸ Kawppuite laka rinawm loh chu thiam inchantîr nâna hman theih ni lo mah se, chutianga rinawm lohna chu kawppuite laka hmangaihna leh ngaihsakna hmuh tâwk loh vâng a ni thei a. (Thuf. 5:18; Thur. 9:9) Chuvângin, Bible chuan nupate chu heti hian a fuih a ni: “Reilotê a atân rem in tih ve ve chauh loh chuan atua mah intidâwng suh u,” tiin. Engvângin nge? A chhan chu ‘an insûm zawh loh chuan Setanan a thlêm’ theih vâng a ni. (1 Kor. 7:5) Nupate tân an ‘insûm zawh lohna’ avânga Setana thlêmna hnuaia tlâwm a, a tuemaw zâwk uirêna suala tlûk chu a va lungchhiatthlâk dâwn êm! Kawng leh lamah chuan, nupate chuan ‘mahni ṭhatna tûr zawng lova mi dang ṭhatna tûr zawng zâwk a,’ tih tûr a nih vâng ni lova hmangaihna lantîrna anga thlîra chan tûr tâwk an inpêk hian, a rah chhuah hmangaihna nêna inlaichînna duhawm tak chuan inneihna chu a tinghet a ni.—1 Kor. 10:24.

19. Eng nge tih kan tum tlat ang a, engvângin nge?

¹⁹ Felna khawvêl thar kawtkaiah kan awm tawh a. Chuvângin, tîsa châknaa inhman chu Moab Phaizâwla Israel mi 24,000-te tâna chhiatna a nih ang bawkin kan tân pawh chhiatna a ni thei a ni. Chu thil zahthlâk tak leh lungchhiatthlâk tak a târ lan hnuah, Pathian Thu chuan heti hian min hrilh a ni: “Dinga inring chu fîmkhur rawh se, chutilochuan a tlu dah ang e,” tiin. (1 Kor. 10:12) Chuvângin, kan Pa vâna mi chungah leh kan kawppuite chunga rinawm rengna hmanga kan inneihna tihngheh chu a pawimawh hle. (Mt. 19:5, 6) Tûn hma zawng aia nasain, ‘bawlhhlawh kai lo leh sawisêl bo va, thlamuang taka awma min hmuh theih nân, taihmâk kan chhuah’ a ngai a ni.—2 Pet. 3:13, 14. (w15-E 01/15)