1, 2. C.E. 33 Nisan ni 14 zânah Isua’n eng thil nge a tih? (A thupui chunga milem en rawh.)

THLA bial zân a lo thleng a, Jerusalem khawpui chu a êna. A hun chu C.E. 33, Nisan ni 14 tlai a ni. Isua leh a tirhkohte chuan a hma kum zabi 15 kaltaa Israel mite Aigupta sal tânna ata chhuah zalên an nih hriat rengna Kalhlên Kût an hmang a. Isua chuan tirhkoh rinawm 11-te chu chaw danglam bîk tak a kîlpui a—chu chu, chu mi nî a tâwp hmaa Isua thihna tûr hriatrengna atân a ni. *—Mt. 26:1, 2.

² Isua’n chhang dawidim telh loh chu mal a sâwmsak a, tirhkohte hnênah chuan a pe a: “La ula, ei rawh u,” tiin a hrilh a. Uain no pawh chu a la a, lâwmthu a sawi a: “In zain in rawh u,” tiin a hrilh a ni. (Mt. 26:26, 27) Isua’n an ni chu ei tûr dang a pe lo dâwn lo va, mahse he zân pawimawh takah hian a hnungzuitu rinawmte hnênah thu hrilh tûr tam tak a nei a ni.

3. He thuziakah hian eng zawhnate nge kan sawiho vang?

 ³ Chutiang chuan Isua’n a thih hriatrengna chu a hmanpui a, chu chu “Lalpa Zanriah,” tia koh a ni bawk. (1 Kor. 11:20) Chu mi chungchângah chuan mi ṭhenkhatin heti hian an zâwt mai thei: Engvângin nge Isua thih hriatrengna chu hman a nih? Chhang leh uain chuan eng awmzia nge a neih? Engtin nge Hriatrengna atân kan inbuatsaih theih? Tute’n nge entîrna chu kîl ve thei? Kristiante’n an beiseina chungchânga Bible sawi chu engtin nge an chhân lêt? tiin.

4. Isua thihna chuan eng nge min tihsak?

⁴ Adama thlah kan nih angin, sual leh thihna kan rochun a. (Rom 5:12) Mihring ṭha famkim lo tumah hian a nunna tân emaw, mi dangte nunna tân emaw Pathian hnênah tlanna a pe thei lo. (Sâm 49:6-9) Mahse, Isua’n a thihna aṭangin pawm tlâk tlanna man—a taksa ṭha famkim leh a thisen chhuak—chu a pe tla thei a ni. Pathian hnêna tlanna hlutna hlânin, Isua’n sual leh thihna ata min chhuah zalên a, chatuana nun theihna kawng min hawnsak bawk a ni.—Rom 6:23; 1 Kor. 15:21, 22.

5. (a) Pathian leh Krista’n mihringte an hmangaih tih engtin nge kan hriat? (b) Engvânga Isua thih hriat rengna inkhâwmah kan tel ang?

⁵ Tlanna thilpêk chuan Pathianin khawvêl puma mihringte a hmangaih tih a târ lang a. (Joh. 3:16) Isua inthawina chuan amah pawhin min hmangaih tih a târ lang bawk. Ni rêng ang chu, mihring anga a rawn kal hmain Pathian “mi themthiam,” angin a awm a, Isua “lâwmna chu mihring fate chungah” a ni si a! (Thuf. 8:30, 31) Pathian leh Isua chunga lâwmna chuan Isua thih hriatrengna inkhâwma tel tûrin min chêttîr tûr a ni a, chutiang chuan he thupêk: “Mi hriat reng nân hei hi ti ṭhîn rawh u,” tih hi kan zâwm ang.—1 Kor. 11:23-25.

6. Hriatrengnaa chhang leh uain chu engtin nge kan thlîr ang?

⁶ Sakhaw mi ṭhenkhat chuan, Isua’n “Hei hi ka taksa a ni,” tiin leh “Hei hi ka thisen . . . a ni,” tia a sawi ṭanchhanin, chhang chu Isua taksa tak takah leh uain chu a thisen tak takah mak tak maia chang ta niin an ngai a. (Mk. 14:22-24) Mahse, chu chu thil theih a ni lo. Isua taksa leh thisen chu tirhkoh rinawmte hmaah a awm reng a, an kîl tûr chhang leh uain pawh an hmaa a awm reng avângin. Isua chuan ṭum danga a tih ṭhin angin, tehkhin thu hmangin a sawi tih a chiang hle.—Joh. 2:19-21; 4:13, 14; 10:7; 15:1.

7. Hriatrengnaa hman chhang chuan eng nge a entîr?

⁷ C.E. 33, chu hun pawimawh takah, Isua chuan Kalhlên Kût hmannaa chhang bâng awm chu a hmang a ni. (Ex. 12:8) Bible-ah chuan dawidim chuan ṭhat lohna emaw, sualna emaw kawh châng a nei a. (Mt. 16:6, 11, 12; Lk. 12:1) Chuvângin, Isua’n chhang dawidim telh loh a hmang chu sual nei lo a taksa entîr nân a inhmeh hle. (Heb. 7:26) Chuvângin, Hriatrengnaah pawh chutiang bawk chhang chu hman a ni.

8. Hriatrengnaa hman uain chuan eng nge a entîr?

⁸ C.E. 33 Nisan ni 14-a Isua hman uain chuan ama thinsen a entîr a, chutiang bawkin tûn laia Hriatrengna uain pawhin Isua thisen chu a entîr a ni. Jerusalem pâwn Golgotha hmunah, ‘sualte ngaihdam nân’ Isua thisen chu leih buak a ni a. (Mt. 26:28; 27:33) Hriatrengna chhang leh uain chuan thuâwih mihringte tâna Isua hlan a inthawina hlu tak a entîr avâng leh chu thilpêk duhawm tak chu  kan ngaihlut avângin, kum tina neih ṭhin Lalpa Zanriah atâna a mi mal taka kan inbuatsaih chu a inâwm hle.

9. (a) Engvângin nge Hriatrengna atâna Bible chhiar tûrte chhiar chu a pawimawh? (b) Tlanna chu engtin nge i ngaih?

⁹ Kan ni châng bua chuang Hriatrengna atâna Bible chhiar tûrte kan chhiar chuan a thih hma lawka Isua thiltihte kan ngaihtuah thei a. Chu chuan Lalpa Zanriah atâna kan thinlung buatsaih tûrin min ṭanpui ang. * Unaunu pakhat chuan: “Hriatrengna hi kan nghâk hlel hle ṭhîn. Kum tin hian awmzia a nei zual zêl a ni. Mitthi ina ka din a . . . , ka pa duh tak ruang ka en reng laia tlanna ngaih hlutna dik tak ka neih chu ka theihnghilh thei lo vang. . . . Tlanna chungchâng sawina Bible chângte leh a hrilhfiah dân zawng zawngte hi ka hria a! Mahse, thihna nunrâwngzia ka han tawn chiah chuan, tlannain kan tâna min tihsak tûrte avângin ka thinlung hi lâwmnain a khat a ni,” tiin a ziak a ni. Hriatrengna atâna kan inbuatsaih hian, Isua inthawinain min tihrehawmtu sual leh thihna ata min chhan chhuah dân pawh kan ngaihtuah tel tûr a ni rêng a ni.

10. Hriatrengna atâna inbuatsaihna chuan engtin nge kan rawngbâwlna a nghawng ang?

¹⁰ Hriatrengna atâna inbuatsaihnaah chuan, Hriatrengna hun chhûnga auxiliary pioneer thawh ang chi, kawng engemaw taka kan rawngbâwlna zauh tûra ruahmanna siam a tel thei ang. Lalpa Zanriaha tel tûra kan Bible zirpuite leh mi dangte kan sâwm hian, Pathian leh a Fapa leh Pathianin amah tilâwmtu leh faktute tâna malsâwmna a dahte sawi chhuahna aṭangin hlimna kan hmu ang.—Sâm 148:12, 13.

11. Engtin nge Korinth khuaa unau ṭhenkhatin Hriatrengna entîrnate chu tlâk si lo lova an kîl?

¹¹ Lalpa Zanriah atâna i inbuatsaih hunah, Korinth kohhrana mite hnêna tirhkoh Paula lehkha thawn hi ngaihtuah ang che. (1 Korinth 11:27-34 chhiar rawh.) Paula chuan tupawh ei tlâk lova chhang ei a, Lalpa no in apiang chu Isua Krista, “Lalpa taksa leh thisen chungah thiam loh a chang ang,” tiin a sawi a. Chuvângin, hriak thihte chuan ‘mahni  an infiah’ hnuah chauh entîrna chu an kîl thei ang. Chutilochuan, ‘mahni chunga rorêlna tûrin an eiin an in ṭhîn’ a ni ang. Nungchang ṭhat lohna avângin, Korinth khuaa unau tam tak chu ‘an chak lovin an bawrhsâwm a, [thlarau lamah] an muhîl’ a ni. Mi ṭhenkhat chuan Hriatrengna neih hma leh neih chhûngin an lo eiin an lo in nasat lutuk avângin rilru leh thlarau lamah an harhvâng lo a ni thei ang. Chutianga tlâk si lova entîrna chhang leh uain kîltute chuan Pathian lawm an hlawh lo.

12. (a) Paula’n Hriatrengna chu eng nên nge a tehkhin a, a kîltute hnênah eng vaukhânna nge a pêk? (b) Entîrna kîltu chuan sual pawi tak a tih chuan eng nge a tih ang?

¹² Paula chuan Hriatrengna chu mi dangte chaw hlui kîlpui nên a khaikhin a, anni chu heti hian a vaukhân a ni: “Lalpa no leh ramhuai no in in kawp thei lo vang; Lalpa dawhkâna mi leh ramhuai dawhkâna mi in ei kawp thei hek lo vang,” tiin. (1 Kor. 10:16-21) Lalpa Zanriaha entîrnate kîl ve ṭhîn mi pakhatin sual pawi tak a tih chuan thlarau lam ṭanpuina a zawng tûr a ni. (Jakoba 5:14-16 chhiar rawh.) Chutiang miin ‘sim hming pu tlâka rah’ a chhuah chuan, Hriatrengna entîrnate a kîl ve chu Isua inthawina a zah lohzia lantîrna a ni tawh lo.—Lk. 3:8.

13. Pathian min pêk beiseina chungchâng ṭawngṭaina nêna ngaihtuah chu engvângin nge kan hlâwkpui ang?

¹³ A mi mala Hriatrengna atâna kan inbuatsaih hian, Pathian min pêk kan beiseina chungchâng ṭawngṭaina nêna ngun taka ngaihtuah chu kan hlâwkpui ngei ang. Jehova chhiahhlawh inpumpêk tawh leh a Fapa hnungzuitu rinawm tumahin hriak thih Kristian an nihzia finfiahna chiang tak nei si lova Hriatrengna entîrnate kîl vein, Isua inthawina an zah lohzia lantîr chu an duh lo vang. Chuti chu, miin Hriatrengna entîrnate chu a kîl dâwn leh dâwn loh thu tlûkna engtin nge a siam theih ang?

14. Thuthlung thar chuan Hriatrengna entîrnate kîl leh kîl loh chungchângah nghawng eng nge a neih?

¹⁴ Thuthlung tharah a tel ngei tih rinhlelhna chhe tê pawh nei lote tân chauh Hriatrengna entîrnate chu kîl theih a ni a. Uain chungchângah, Isua chuan: “He no hi ka thisena thuthlung thar chu a ni,” tiin a sawi. (1 Kor. 11:25) Zâwlnei Jeremia hmangin, Pathianin Israel mite hnêna Dân thuthlung a thlun ang ni lo, thuthlung thar a thlung dâwn tih a sawi lâwk a. (Jeremia 31:31-34 chhiar rawh.) Pathianin thlarau lam Israel mite hnênah thuthlung thar chu a thlung a ni. (Gal. 6:15, 16) He thluthlung hi Krista thisena inthawina hmanga nemngheh a ni a. (Lk. 22:20) Isua chu thuthlung thar Palai a ni a, chu thuthlung thara lâk luh hriak thih rinawmte chuan vânah rochan an dawng a ni.—Heb. 8:6; 9:15.

15. Lalram thuthlungah tute nge tel a, an rinawm chuan eng chanvo nge an dawn ang?

¹⁵ Hriatrengna entîrnate kîl vete chuan Lalram thuthlungah an tel tih an hria a. (Luka 12:32 chhiar rawh.) Isua hnungzuitu hriak thih lo ni a, rinawm taka amah vuan tlat a, a hrehawm tawrhna ṭâwmpuitute chuan vâna a rorêlna pawh an ṭâwmpui ve ang. (Phil. 3:10) Lalram thuthlunga an tel avângin hriak thih rinawmte chuan Isua nên vânah lal angin chatuanin ro an rêl ang. (Thup. 22:5) Chutiang mite chuan Lalpa Zanriahah entîrnate chu an kîl ve a ni.

16. Rom 8:15-17 thu awmzia hi tawi têin hrilhfiah rawh.

¹⁶ Pathian fa an nihzia thlarauvin a hriattîrte chauh chuan Hriatrengna entîrnate chu an kîl tûr a ni a. (Rom 8:15-17 chhiar rawh.) Paula’n Aramaic ṭawngkam “Ka Pa!” tihna “Abba,” tih chu a hmang a. Chu ṭawngkam chu innêl taka “â pa” tihna leh zah taka “pa” tih hmang kawp ṭawngkam a nih avângin, naupang chuan chu ṭawngkam chu a pa a koh  hunah a hmang thei a ni. Chûng “fa nihna thlarau” dawngte chu thlarauva hrin Pathian fate an ni. Pathian thlarau chuan an rilruah a hriattîr a, Pathian Jehova hriak thih a fate an nihzia hriat thiamna a neihtîr a ni. Chu chu lei lam nun an nin tawh vâng mai a ni lo. Thih thlenga an rinawm phawt chuan, vân Rama Isua ro luahpui tûr an ni tih an inhre chiang a ni. Tûn lai hian, ‘mi thianghlim Jehova hriak thihna’ dawng Krista hniak hnung zuitu mi 1,44,000-te zînga tlêm tê chauh an awm tawh a. (1 Joh. 2:20; Thup. 14:1) A thlarau thianghlim avângin an ni chu, “Abba, Ka pa!” tiin an au chhuak a ni. Pathian nêna an inlaichînna chu a va duhawm tak êm!

17. Hriak thihte beiseina chu eng nge ni a, chu chu engtin nge an thlîr?

¹⁷ Hriak thih Kristian i nih chuan, vân lam beiseina chu mi mala i ṭawngṭainaa i telh tûr thu pawimawh tak a ni ngei ang. Bible-in vâna Mopa, Isua Krista ‘pasal atâna hualsak’ chungchâng a sawite chu nangma tân niin i hria a, Krista “mo” zînga tel chu i nghâkhlel hle a ni. (2 Kor. 11:2; Joh. 3:27-29; Thup. 21:2, 9-14) Pathianin a Thu, Bible-a a thlarau lam fate a hmangaihzia a sawi chhuah hian, nangmah a biakna che niin i inhre tlat a. Jehova Thu chuan hriak thih a fate hnênah kaihruainate a pêk hunah, thlarau thianghlim chuan zâwm tûr leh thinlung aṭanga, “Hei hi ka tân a ni,” ti tûrin a chêttîr che a. Chutiang chuan, Pathian thlarauvin i rilruah vân lam beiseina i nei tih a hriattîr che a ni.

18. Eng beiseina nge ‘berâm dangte’ chuan an neih a, chu chu engtin nge i ngaih?

¹⁸ Kawng leh lamah chuan, “berâm dang” zînga tel “mipui tam tak” zînga mi i nih chuan Pathianin lei lam beiseina a pe che a ni. (Thup. 7:9; Joh. 10:16) Lei Paradis-a chatuana nun chu i duh a, nakin huna leia nun chungchâng Bible sawite i ngaihtuah hian i hlim bawk a ni. I chhûngte leh mi fel dangte nêna remna nasa tak chen chu i nghâkhlel hle bawk. Ṭâm te, retheihna te, hrehawm tawrhna te, natna te, leh thihna te chuan mite a tihbuai tawh loh hun chu i nghâkhlel a ni. (Sâm 37:10, 11, 29; 67:6; 72:7, 16; Is. 33:24) Chatuana nun beiseina neia tho lehte lo hmuah chu i nghâkhlel hle bawk a ni. (Joh. 5:28, 29) Pathian Jehova’n lei lam beiseina a pêk che avângin i va lâwm tak êm! Entîrnate chu kîl ve lo mah la, Isua tlanna inthawina ngaihhlutzia lantîr nân Hriatrengna inkhâwmah i tel a ni.

19, 20. (a) Engtin nge Pathian pêk i beiseina chu a tak a chan theih ang? (b) Engvângin nge Lalpa Zanriah inkhâwmah i tel ang?

¹⁹ I beisei chu lei lam emaw vân lam emaw pawh ni se, chu chu Pathian Jehova, Isua Krista, leh a inthawina i rinna avâng chauhvin a tak a chang thei ang. Hriatrengna inkhâwma telna ṭangin, i beiseina leh Isua thih a pawimawhzia ngaihtuahna hun remchâng i nei ang. Chuvângin, Lalpa Zanriah hmannaa tel ngei chu tum ang che. Chu chu April 3, 2015, Zirtâwpni ni tlâk hnua neih tûr a ni a, khawvêl puma mi maktaduai tam takte chu Kingdom Hall-ah leh hmun dangah he hun pawimawh hmang tûrin an kal khâwm ang. Chuta tel ve ngei chu tum ang che.

²⁰ Hriatrengna inkhâwma i telna chuan Isua tlanna inthawina i ngaihhlutna chu a tizual ngei ang. Thu sawi ngun taka ngaihthlâkna chuan Jehova hmangaihna leh mihringte tâna a thiltum ropui tak takte chungchâng i hriatte chu i vêngte hnêna hrilh chhâwnna hmanga an chunga hmangaihna lantîr tûrin a chêttîr ang che. (Mt. 22:34-40) Chuvângin, Lalpa Zanriah inkhâwmnaah hian tel ngei chu tum ang che. (w15-E 01/15)