Kum 3,000 vêl kalta khân, hla phuahtu pakhat chuan: “Hlauh awm tak leh mak taka siam ka ni,” tiin a ziak a. (Sâm 139:14) Mûr pakhat aṭanga nausên a pian chhuah theih dân i ngaihtuah hian mak i ti a ni lâwm ni? Mi tam tak chuan thil nungte pian hmang chi hrang hrang chu Siamtu vânga lo awm a nih an ring a ni.—Sâm 139:13-17; Hebrai 3:4 chhiar rawh.

Vân siamtu leh lei hi chên theiha siamtu chuan nunna pawh a siam bawk a. (Sâm 36:9) Ani chuan mihringte be pawhin, a chanchin min hrilh bawk a ni.—Isaia 45:18 chhiar rawh.

Kan taksa pian hmang leh ramsate taksa pian hmang chuan inanna tam tak a nei a. Hei hi Siamtuin mihringte leh ramsate hi leia chêng tûra a siam vâng a ni. Mihring hmasa ber chu ramsa aṭanga siam lovin, vaivut aṭangin a siam zâwk a ni.—Genesis 1:24; 2:7 chhiar rawh.

Mihringte chu ramsate lakah kawng pawimawh tak chi hnihin an danglam a. A pakhatna chu, mihringte chuan hriat theihna te, hmangaihna te, leh Siamtu zahnate an nei thei a. A pahnihnaah chuan, ramsate chu chatuana nung tûra siam an nih loh laiin, mihringte erawh chu chatuana nung tûra siam an ni. Mahse, mihring hmasa berin Siamtu kaihhruaina a hnâwl avângin mi zawng zawngin thihna an ro chung a ni.—Genesis 1:27; 2:15-17 chhiar rawh.