1, 2. (a) Isua’n ni hnuhnûng chungchângah eng nge a sawi? (b) Eng zawhnate nge kan ngaihtuah ang?

ISUA’N hrilh lâwkna ngaihvenawm berte zînga mi a sawi laia Jerusalem biak in chhuk en theihna hmun, Oliv Tlânga ṭhut ve chu a ropui ngei ang le. Petera te, Andria te, Jakoba te, leh Johana te chuan nakin hun rei tak hnua lo thleng tûr Isua hrilh lâwkna sawi chu ngun takin an ngaithla a. Isua chuan an hnênah he khawvêl suaksual tâwpna leh chu mi hnua Pathian Rama ro a rêl hun tûr chungchâng tam tak a hrilh a ni. Chu hun pawimawh tak chhûng chuan, a “bawih rinawm, fing tak” chuan leiah a ai awhin, a chhiahhlawhte hnênah an mamawh thlarau lam chaw chu a hun apiangin a pe dâwn tih a hrilh a ni.—Mt. 24:45-47.

² A dawtah, Isua’n nula thianghlim sâwm tehkhin thu chu a sawi zawm a. (Matthaia 25:1-13 chhiar rawh.) Hêng zawhnate hi i lo ngaihtuah ang u: (1) Tehkhin thuin a zirtîr tum ber chu eng nge ni? (2) Tehkhin thu-a zilhna thu chu engtin nge hriak thih mi rinawmte’n an nunpui a, eng nge a rah chhuah? (3) Engtin nge Isua  sawi tehkhin thu chu tûn laiah kan hlâwkpui ṭheuh theih?

3. Tûn hmain, kan thu leh hla chhuahte chuan nula thianghlim sâwm tehkhin thu chungchâng chu eng angin nge a târ lan a, chu chuan eng nge a rah chhuah mai theih?

³ Thuziak hmasaa kan hmuh tawh angin, tûn hnai kum sâwmbîahte chuan, bâwih rinawm chuan Bible thute chu entîr nei leh thlen famkimna ropui zâwk nei angin a hrilhfiah uar tawh lo va, a taka nunpui theih dân tûr lam chu a uar chho tawlh tawlh a ni. Tûn hma chuan kan thu leh hla chhuahte chuan Isua sawi nula thianghlim sâwm tehkhin thua tel thil engkim, khâwnvâr te, khâwnvârtui te, a ûm te, leh thil dang dangte chuan entîr a nei vek anga târ lan châng a nei ṭhîn a ni. Mahse, he tehkhin thu-in min hriattîr a tum thuchah pawimawh tak hi kan lo hmaih rengte a ni thei ang em? A chhânna chu kan vai tân a pawimawh hle tih kan hmu ang.

4. Tehkhin thu-a (a) mo neitu nihna (b) nula thianghlimte nihna chu engtin nge kan hriatthiam theih?

⁴ He tehkhin thu-a Isua’n zirtîr a tum ber chu i lo en ang u. A hmasain, a changtute hi han ngaihtuah teh. Tehkhin thu-a mo neitu chu tu nge ni? Isua chuan ama chungchâng a sawi tih a chiang hle. Ṭum dangah phei chuan mo neitu angin a insawi hial si a! (Lk. 5:34, 35) A nih leh nula thianghlimte chu tute nge ni? Tehkhin thu-ah Isua chuan mo neitu a lo kal huna an khâwnvârte chhi ênga lo inpeih tûrin nula thianghlimte chuan mawhphurhna an neih thu a sawi a. Isua’n a hnungzuitu hriak thih “pâwl tlêmte” hnêna chutiang bawk kaihhruaina a pêk chu chhinchhiah ang che: “Puan veng rengin, in khâwnvâr pawh alh rengin awm ula; miin an pu lawi chaw ei a lo haw huna kawngkhâr a rawn kik veleh a, lo hawn thei nghâl tûra an lo nghâk reng ang hian awm rawh u,” tih hi. (Lk. 12:32, 35, 36) Chu bâkah, Krista hnungzuitu hriak thihte chu nula thianghlim nêna tehkhin tûrin tirhkoh Paula leh Johana-te chu thlarauva thâwk khum an ni bawk. (2 Kor. 11:2; Thup. 14:4) Matthaia 25:1-13-a chhinchhiah tehkhin thu chu Isua’n a hnungzuitu hriak thihte a zilhna leh a vaukhânna a ni tih a chiang hle.

5. Engtin nge Isua’n a tehkhin thu sawi a thlen famkim hun tûr chungchâng chu a târ lan?

⁵ A dawtah chuan, a hun hi han ngaihtuah teh. Isua zilhna thu chu eng hun atân nge ni? Isua chuan tehkhin thu tâwp lamah a hun chungchâng chu chiang takin min hrilh a ni: “Mo neitu chu a lo thleng ta a,” tiin. (Mt. 25:10) July 1, 2013 chhuak Vênnainsâng-a târ lan angin, Matthaia bung 24 leh 25-a chhinchhiah Isua hrilh lâwknaah chuan a ‘lo kalna,’ a nih loh leh a ‘lo thlenna’ chungchâng vawi riat a tel a, chu mi a sawina apiangah Grik thu mal pakhat hman a ni. Chu thu mal hmanna apiang chu, Isua’n hrehawm nasa tak chhûnga rorêl tûr leh he khawvêl suaksual tiboral tûra a lo kal tûr thu a sawina a ni. Chuti chu, he tehkhin thu hi ni hnuhnûng chhûnga thleng a ni a, a vâwrtâwp chu hrehawm nasa takah a ni ang.

6. A chhehvêl thute aṭangin, tehkhin thuin zirtîr a tum ber chu eng nge ni?

⁶ Tehkhin thuin zirtîr a tum ber chu eng nge ni? A chhehvêl thute kha hre reng rawh. Isua chuan a “bawi rinawm, fing tak” chungchâng a sawi zo chiah a. Chu bâwih chu hriak thih mipa tlêm tê, ni hnuhnûng chhûnga Krista hnungzuitute zînga hmahruaitu tûrte an ni ang. Isua chuan chûng mipate chu rinawm reng tûrin a vaukhân a ni. A dawtah, huap zau deuh tûrin Isua chuan ni hnuhnûnga a hnungzuitu hriak thih zawng zawngte chu an lâwmman dawn tûr an chân loh nâna “ngaihven” reng tûra zilh nân he tehkhin thu hi a sawi a ni. (Mt. 25:13) Tûnah chuan tehkhin thu hi bih chiangin a zilhna thute hriak thihte’n an nunpui dân chu i lo en ang u.

7, 8. (a) Nula thianghlim fingte chu an inpeih reng a ni tih târ langtu mize pahnih chu eng nge ni? (b) Engtin nge hriak thihte chu an inbuatsaih?

⁷ Isua tehkhin thu chuan a âte ang lo taka mo neitu lo kal hun atâna lo inpeih nula thianghlimte chu a sawi uar a. Engvângin nge? A chhan pahnih chu: an inbuatsaihna leh harhvânna hi a ni. Nula thianghlimte chu zâna mo neitu a lo thlen hun chu harhvâng taka lo nghâk tûra ruat an ni a, hun phûrawm tak a lo thlen hma loh zawnga khâwnvârte chhi renga harhvâng reng tûr an ni. Mahse, nula âte ang lo takin, nula thianghlim pangate chu an inbuatsaih tak zet a, an khâwnvârte an chhit ên reng theih nân khâwnvâr tui chu a ûmahte an rawn keng a ni. Chûng nula thianghlimte ang bawkin hriak thih mi rinawmte chu an inbuatsaih em?

⁸ Tehrêng mai! Ni hnuhnûng chhûng zawngin hriak thih rinawmte chuan nula thianghlim fingte ang bawkin thil an ti a, tâwpna a lo thlen hmaa an thawh tûrte rinawm taka thawk tûrin an inbuatsaih a ni. Rinawm taka rawngbâwl tûra an chân ngaite chu chhûtin, an rawngbâwlna hlen tûrin Setana khawvêl pêk theih thil tam takte chu an chân dâwn tih a tîr aṭangin an hria a ni. Jehova rawngbâwlna atân liau liau an inpe a, a rawng chu tiam chin neiin an bâwl lo; Jehova leh a Fapa an hmangaih vâng leh an chunga an rinawm avângin an bâwl a ni. Rinawmna an vawng reng a, he khawvêl rilru put hmang leh hausak âtchilhna te, nungchang bawlhhlawhna te, leh mahni hma sialna rilru put hmangte chu an hnâwl a ni. Chuvângin, Mo neitu lo thleng har anga a lan hunah pawh rilru buai lovin, tiêngtute anga êng zual deuh deuhvin, an inpeih reng a ni.—Phil. 2:15.

9. (a) Mutthlûkna chungchângah Isua’n engtin nge a vaukhân? (b) Engtin nge hriak thihte chuan: “Ngai teh u, mo neitu chu a lo kal e!” tia au thâwm chu an chhân lêt? (Footnote en rawh.)

⁹ Chûng nula thianghlimte inpeih reng tûra ṭanpuitu mize pahnihna chu harhvânna a ni. Hriak thihte zînga ṭhenkhat tân zân men laia mutthlûk chu thil theih a ni em? Ni tehrêng mai. Isua’n nula thianghlim sâwmte chungchângah mo neitu a lo kal har chuan “an zain an muthlu a, an lo muhîl ta a,” a tih avângin. Isua chuan thlarauvin duhna leh châkna nei mah se, taksa chak lohna chuan mi a tichau thei tih a hre chiang hle. Hriak thih rinawmte chuan chu vaukhânna chu an ngaihsak a, harhvâng tak leh inring renga awm tûrin tûn hma zawng aiin an thawk rim a ni. Tehkhin thu-ah, nula thianghlim zawng zawng chuan zâna au thâwm: “Ngai teh u, mo neitu chu a lo kal e!” tih chu an chhâng lêt a. Mahse, harhvâng taka awmte chauh chuan a tâwp thlengin an tuar peih a ni. (Mt. 25:5, 6; 26:41) Tûn laia hriak thih rinawmte chungchâng hi eng nge ni ve? Ni hnuhnûng chhûng zawng hian, anni chuan, “Ngai teh u, mo neitu chu a lo kal e!” tih au thâwm anga ngaih theih tûr finfiahna ṭha takte chu an chhâng lêt ṭhîn. Anni pawhin Mo Neitu lo kal hun atâna inpeih renga awmin an tuar chhuak bawk. * Mahse, tehkhin thu-a a vâwrtâwp chuan hun kawh bîk a nei a ni. Engtin nge?

10. Nula thianghlim a fingte leh a âte inkâra inbiakna chuan eng zawhna hriatthiam harsa tak nge a chawh chhuah?

¹⁰ Tehkhin thu-a hriatthiam harsa ber chu a tâwp dâwn lama nula thianghlim a âte leh a fingte inkâra inbiakna hi a ni. (Matthaia 25:8, 9 chhiar rawh.) Chu chuan he zawhna hi  a siam chhuak a ni: “Pathian mite chanchinah hian engtik khân nge mi rinawmte chuan ṭanpuina dîltute chu ṭanpui an duh loh?” tih hi. A chhânna hriat nân tehkhin thu a thlen hun chu kan ngaihtuah nawn leh tûr a ni. Kan hriatthiamna thar berah chuan Mo Neitu, Isua chu rorêl tûrin hrehawm nasa tak tâwp lamah a lo kal dâwn tih hi hre chhuak leh ang che. Chuti chu, nula thianghlim âte’n ṭanpui an dîl hun chu hrehawm nasa tak tâwp hma lawkah a ni kan ti thei ang em? Kan ti thei dâwn niin a lang, chutih hunah chuan hriak thihte chuan chhinchhiahna hnuhnûng ber chu an chang tawh dâwn si a.

11. (a) Hrehawm nasa tak a inṭan hmain eng nge thleng ang? (b) Nula thianghlim a fingte’n a âte chu khâwnvârtui zuartute hnêna kal tûra an kawhhmuhna chuan eng nge a târ lan?

¹¹ Chuvângin, hrehawm nasa tak a inṭan hmain leia awm hriak thih rinawmte chuan chhinchhiahna hnuhnûng ber an dawng tawh ang. (Thup. 7:1-4) Chuta ṭang chuan, vânah an kal dâwn tih a chiang ta a ni. Mahse, hrehawm nasa tak inṭan hma kumte chu han ngaihtuah teh. Ngaihven renga awm lo va, an rinawmna hlohtu hriak thihte chungah eng nge thleng ang? Anni chuan vâna an lâwmman tûr chu an chân ang. Hrehawm nasa tak inṭan hmain chhinchhiahna hnuhnûng ber chu an dawng dâwn lo tih a chiang hle. Chutih hunah chuan, mi rinawm dangte chu an aiah hriak thih an ni ang. Hrehawm nasa tak a inṭan hunah chuan chûng a âte chuan Babulon Khaw Ropui tihboralna chu mak an ti hle ang. Chutih hunah chauh chuan Mo Neitu lo kal hun atân an inpeih lo tih an inhre chhuak chauh pawh a ni thei ang. Chutianga a tlai hnuah, beidawng taka ṭanpuina an dîl chuan eng thil nge thleng ang? Isua sawi tehkhin thu-in min pêk a chhânna chu a lungchhiatthlâk hle. Nula thianghlim fingte chuan a âte hnênah an khâwnvârtui an pe duh lo va, chu aimahin a zuartute hnênah kal tûrin an hrilh ta zâwk a ni. A hun chu “zan lai takah” a ni tih hre reng rawh. Chu mi hunah chuan khâwnvârtui zuartute chu an zawng hmu ang em? Hmu lo vang. A tlai lutuk tawh si a.

12. (a) Hrehawm nasa tak chhûngin, chhinchhiahna hnuhnûng ber an dawn hmaa rinawm ta lo hriak thihte chuan eng thil râpthlâk tak nge an tawh ang? (b) Nula thianghlim âte ang mite tâwpna tûr chu eng nge ni?

¹² Chutiang bawkin, hrehawm nasa tak chhûng chuan hriak thih mi rinawmte chuan a rinawm lote chu engti kawng mahin an ṭanpui thei lo vang. A tlai lutuk tawh avângin ṭanpui theih an ni tawh lo vang. Chutiang mite chuan eng nge an tawh ang? Nula thianghlim a âte khâwnvârtui zawng tûra an kalna chu a sâwt dâwn lo va, chutia an kal bo hlâna thilthleng chu Isua chuan: “Mo neitu chu a lo thleng ta a; tichuan, a peihte chu amah nên lawi chaw eiin an lût a; tin, kawng chu an khâr ta a,” tiin a sawi. Krista chuan hrehawm nasa tak tâwp dâwn lama a ropuina nêna a lo kal hunah hriak thih rinawmte chu vânah a hruai khâwm ang. (Mt. 24:31; 25:10; Joh. 14:1-3; 1 Thes. 4:17) Nula thianghlim a âte nêna inang mi rinawm lote chu kawngkhâr khârsan an ni ang a. Anni chu: “Ka pu, ka pu, min hawnsak rawh!” tiin an au va. Mahse, rorêlna huna kêl ang mi tam takte dawn ang chhân lêtna chu an dawng a ni: “Tih tak meuhvin ka hrilh a che u, ka hre lo che u a ni,” tih hi. A va lungchhiatthlâk dâwn êm!—Mt. 7:21-23; 25:11, 12.

13. (a) Engvângin nge Krista hriak thih hnungzuitu tam takte chu an rinawm dâwn lo tia thu tâwp kan siam a ngaih loh? (b) Engvângin nge Isua zilhna ṭawngkam chu hriak thihte a rinzia târ lanna anga lâk theih a nih? (A thupui chunga milem en rawh.)

¹³ Kan sawi tâkte ngaihtuahin, eng thu tâwp nge kan siam ang? Isua chuan a hnungzuitu hriak thih tam tak chu an rinawm lo vang a, an aiah mi dang lâk a ngai ang a tihna a ni em? Ni lo. Ani chuan a “bawi rinawm, fing tak” chu bâwih sual ni ngai lo tûrin a vaukhân a ni. Chu chu, bâwih rinawm chu bâwih suala a  chan a beisei tihna a ni lo. Chutiang bawkin, he nula thianghlim sâwmte tehkhin thu hian vaukhânna khauh tak a pe a. Nula thianghlim panga an fing a, panga dang an â tih chu hriak thih mi a chanvete an rinawm lo vang tihna a ni lo. Hriak thih mi tinte’n an rinawm dâwn leh dâwn loh chungchângah thu tlûkna pumhlûm an siam thei tihna mai a ni. Tirhkoh Paula chu hriak thih a Kristian unaute hnêna thu a sawinaah chutiang ngaih dân tho chu sawi chhuak tûra thlarauva thâwk khum a ni. (Hebrai 6:4-9 chhiar rawh; Deuteronomy 30:19 nên khaikhin rawh.) Paula chuan khauh takin vaukhân mah se, a Kristian unaute hmaah “thil ṭha zâwk” a awm tih sawiin, anmahni a rinzia chu a sawi zawm a ni. Chutiang bawkin, Isua sawi tehkhin thu chuan vaukhânna khauh tak a pe a. Krista chuan a hnungzuitu hriak thih tu pawh chu an rinawm reng theiin lâwmman phûrawm tak an dawng thei tih a hria a ni.

14. Engvângin nge ‘berâm dangte’ pawhin nula thianghlim sâwm tehkhin thu chu an hlâwkpui theih?

¹⁴ Isua sawi nula thianghlim sâwm tehkhin thu chu hriak thihte chungchâng sawina a nih avângin, he thu-ah hian Krista ‘berâm dangte’ tân hlâwkna tûr a awm lo niin thu tâwp kan siam tûr a ni em? (Joh. 10:16) Ni lo ve! Tehkhin thu-in a zirtîr tluangtlam tak chu: “Ngaihven reng rawh u,” tihna mai a ni tih hre reng ang che. Chu vaukhânna chu hriak thihte tân chauh a ni em? Isua chuan ṭum khat chu heti hian a sawi a ni: “In hnêna ka sawi hi mi zawng zawng hnêna sawi ka ni. Inring rengin [a nih loh leh, ngaihven rengin] awm rawh u,” tiin. (Mk. 13:37) Isua chuan a hnungzuitu zawng zawngte chu rinawm taka rawngbâwlna atâna an thinlung buatsaih tûr leh ang khat veka ngaihven renga awm tûrin a duh a ni. Chuvângin, Kristian zawng zawngte chuan an nuna rawngbâwlna dah pawimawh berin, he mi chungchânga hriak thihte kaihhruaina chu an zâwm a ni. Kan vai hian nula thianghlim a âte’n a fingte hnênah khâwnvârtui an dîl tih kan hre reng thei a. An dîlna hlawhtling lo chuan tumahin kan rinawm ai min rinawmsak thei lo va, thutakah min awmsak thei bawk lo va, ngaihven rengin min awmsak thei bawk hek lo tih min hriatnawntîr a ni. Kan vai hian Jehova’n a ruat Rorêltu fel tak hnênah mahni chanchin kan sawi ṭheuh vang. Chu mi atân kan lo inpeih tûr a ni; nakin lawkah a lo kal dâwn si a!

15. Engvângin nge Krista nupui neihna chu Kristian dik zawng zawngte tân thil phûrawm tak a nih?

¹⁵ Kristian zawng zawngin Isua tehkhin thu-a thilthleng chu an hlâwkpui thei bawk. Tihah chuan, Berâm No nupui neihna chungchâng phûrpui lo tu nge awm ang? Hriak thihte chu vânah an awm ang a; Armageddon indona a tâwp hnuah anni chu Krista mo an ni ang. (Thup. 19:7-9) Chu mi huna leia awm mi tinte chuan chu vâna inneihna chu an hlâwkpui ang, mi zawng zawng tân sawrkâr ṭha famkim min tiam si a. Kan beiseina chu vân a ni emaw, lei a ni emaw pawh ni se, nula thianghlim sâwm tehkhin thuin a zirtîr thu pawimawh tak chu zir i tum tlat ang u. Jehova’n kan tâna a dah beiseina ropui tak kan neih theih nân, kan thinlung buatsaihin leh, nghet tak leh harhvâng taka awmna hmangin kan inpeihzia i lantîr ang u! (w15-E 03/15)