Hetiang zawhnate hi i lo inzâwt tawh ngai em? I inzâwt ngai a nih chuan, i mal lo ve. Khawvêl huapa mite chuan nuna zawhna pawimawh tak takte chu an ngaihtuah a. A chhânnate chu i hmu thei em?

Mi tam takte chuan, “Hmu thei e!” an ti a. Engvângin nge? Bible aṭanga chhânna lungâwithlâk tak an hmuh vâng a ni. Bible sawi chu hriat i duh em? I duh chuan Jehova Thuhretute pêk theih a thlâwna Bible zirna chu neih i duh ngei ang. *

Ni e, mi ṭhenkhat chuan Bible zir chungchângah heti hian an sawi ṭhîn: “Ka hman lo,” “A har lutuk,” “Intiamna neih ka hreh tlat,” tiin. Mahse, mi dangte chuan thlîr dân dang an nei a. Bible zirtîrna zir theihna hun remchâng chu lâwm takin an pawm a ni. Entîrna ṭhenkhat hi han ngaihtuah teh:

• “Catholic leh Protestant biak inahte ka inkhâwm ṭhîn a, Sikh temple-ah leh Buddhist monastery-ahte ka kal bawk ṭhîn a; chu bâkah, university-ah theology ka zir bawk. Mahse, Pathian chungchânga ka zawhna tam tak chu chhân a ni lo. Chutah, Jehova Thuhretute zînga pakhatin ka inah mi rawn tlawh a. Bible ṭanchhana chhânna mi pêkte chuan ka rilru a hneh hle a, Bible zir chu ka remti ta.”—Gill-i, England.

• “Nun chungchângah zawhna tam tak ka nei a; mahse, kan pastor min chhânna chu a lungâwithlâk lo. Mahse, Jehova Thuhretute zînga pakhat chuan ka zawhna chu Bible chauh hmangin min chhâng a. Zir belh ka duh leh duh loh min han zawh chuan, lâwm takin ka pawm ta a ni.”—Koffi-a, Benin.

• “Mitthite dinhmun chungchâng chu hriat ka châk a. Mitthite’n minungte an tina thei niin ka lo ring ṭhîn a; mahse, Bible sawi dân chu hriat ka duh a ni. Chuvângin, Thuhretu ka ṭhianpa pakhat hnênah Bible ka zir ta a ni.”—José-a, Brazil.

• “Bible chhiar ka tum a; mahse, ka hre thiam thei lo. Tichuan, Jehova Thuhretute an lo kal a, Bible hrilh lâwkna tam tak chu min hrilhfiah a. Eng dang nge ka zir belh theih tih hriat ka duh a ni.”—Dennize-i, Mexico.

• “Pathianin min ngaihsak tak zet em tih ka ngaihtuah ṭhîn a. Chuvângin, Bible-a chuang Pathian hnêna ṭawngṭai chu ka tum ta a. A tûkah Jehova Thuhretute’n ka kawngkhâr an rawn kik a, Bible zir chu ka pawm ta a ni.”—Anju-i, Nepal.

Hêng thiltawnte hian Isua thusawi: “An thlarau lam mamawh hriate chu an eng a thâwl e,” tih hi min hriatnawntîr a ni. (Matthaia 5:3 New World Translation.) Ni e, mihringte chu thlarau lam mamawh neiin an piang a. Chu an mamawh chu Pathian chauhvin a Thu Bible hmangin a phuhrûksak thei a ni.

A nih chuan, Bible zirnaah hian eng nge tel? Chu chu engtin nge i hlâwkpui theih? Hêng zawhnate hi a dawta thuziakah chhân a ni ang. (w15-E 04/01)