“KA FAPA hnawhchhuah a ni tih an puan ka ngaihthlâk lai chuan ka khawvêl zawng zawng a tâwp ta emaw tih mai tûrin ka awm a. Ka fapa upa ber a ni a, kan inṭhian ṭha hle a; thil tam tak kan ti dûn ṭhîn. Fapa entawn tlâk tak a ni ṭhîn a, vawi leh khatah pawm tlâk lohvin a khawsa ṭan ta a. Ka nupui chu a ṭap a ṭap mai a, a hnem dân tûr pawh kan hre lo. Nu leh pa nih tlin lohna kan nei em ni le, tiin kan inzâwt fo ṭhîn a ni,” tiin Julian-a chuan a sawi a.

In hnawhchhuahna chuan heti khawpa lungngaihna a thlen si chuan, chu chu engtin nge ruahmanna duhawm kan tih theih? Chutianga inhnawhchhuahna tûr chhan leh vâng engte nge Bible-in a pêk? Tin, tuemaw hnawhchhuah a nih chhan ber chu eng nge ni?

Jehova Thuhretute zînga pakhat hnawhchhuah a nih nân, thleng kawp ngei ngei tûr thil pahnih a awm a. A hmasain, Baptisma chang tawh Thuhretu pakhatin thil sual lian tak a ti a. A pahnihnaah, sual a sim duh lo a ni.

Jehova chuan kan lakah ṭhat famkimna phût lo mah se, a chhiahhlawhte’n tlin ngei ngei tûra a beisei thianghlimna kawngah tehna a nei a ni. Entîr nân, Jehova chuan mipat hmeichhiatna lama nungchang bawlhhlawhna te, milem biakna te, rûk rûkna te, hlêprûkna te, tualthahna te, leh dawithiamna te ang sual pawi tak ang chite hi pumpelh tûrin min phût a ni.—1 Kor. 6:9, 10; Thup. 21:8.

Jehova tehna thianghlimte chu a khirh lova, min vênghimtu tûr zâwk a ni tih i pawm dâwn lâwm ni? Tuin nge mi rin tlâk, mi ṭha leh inrem takte zînga nun chu duh lo vang? Chutiang boruak chu thlarau lama kan unaute zîngah kan hmu a; chu chu, a Thu-a a kaihhruainate nêna inmila nung tûra Pathian hnêna kan inpumpêkna thutiam azâra kan neih a ni.

Mahse, baptisma chang tawh Kristian pakhatin a mihring chak lohna avângin sual lian tak ti ta se, engtin nge ni ang? Tûn hmaa Jehova chhiahhlawh rinawmte chuan chutiangin thil an lo tisual a; mahse, Pathianin anni chu a hnâwl pumhlûm nghâl mai lo va. Lal Davida hi entîrna hriat hlawh tak a ni. Ani chu uirêna leh tualthahna sualah a tlu a; mahse, zâwlnei Nathana chuan: “LALPA pawhin i sual chu a dah bo ve ta e,” tiin a hriattîr a ni.—2 Sam. 12:13.

Pathianin Davida a ngaihdam chhan chu tih tak zeta a inchhîr vâng a ni. (Sâm 32:1-5) Chutiang bawkin, tûn laia Jehova chhiahhlawhte pawh inchhîrna an neih loh emaw, thil sual chu an tih zawm zêl emaw chauhvin, hnawhchhuah an ni ang a. (Tirh. 3:19; 26:20) Judicial committee-a tel upate hnêna tih tak zeta inchhîrna lantîr a nih loh chuan, thil tisualtu chu an hnawtchhuak tûr a ni.

Atîrah chuan, thil tisualtu hnawtchhuak tûra thu tlûkna siam chu a lutuk mah mah emaw, a ngil neih loh thlâk emawah kan ngai thei a; a bîk takin thil tisualtu chu kan ṭhian ṭhate an nih chuan  chutiang chuan kan ngai lehzual thei a ni. Mahse, Jehova Thu, Bible chuan chutiang thu tlûkna chu hmangaihna neih vânga siam a ni tih rin nachhan tûr ṭha tak min pe a ni.

Isua chuan: “Finna chu a thiltih [a nih loh leh, a rah chhuah] aṭangin a dikzia a lang,” tiin a sawi a. (Mt. 11:19) Inchhîrna nei lo thil sual titu hnawhchhuahna thu tlûkna fing chuan rah chhuah fel tak a nei a ni. Hêng thil pathumte hi ngaihtuah ta ila:

Thil sual titu hnawhchhuahna chuan Jehova hming a chawimawi. Jehova hming putu kan nih avângin, kan nungchang chuan loh theih lohvin a hming chungah nghawng a nei thei a. (Is. 43:10) Fapa nungchang chuan a nu leh pa a chawimawi emaw, an hming a tichhia emaw thei a; chutiang bawkin, Jehova mite nun dân chuan a hming a chawimawi emaw, a tichhia emaw thei a ni. Pathian hmingputute’n Jehova nungchâng tehnate an nunpui hian, chu chuan a hming a chawimawi a ni. Chu dinhmun chu hnam dang mite’n Pathian hming Jehova leh Juda an thlunzawmna Ezekiela hun lai nên kawng engemaw takin a inang a ni.—Ezek. 36:19-23.

Nungchang bawlhhlawh kan chîn chuan Pathian hming thianghlim chu kan tichhe ngei ang. Tirhkoh Petera chuan Kristiante chu: “Fa tihâwihte angin, inhriat loh laia in hmân lai châknate anga awm lovin; a kotu che u a thianghlim angin nangni pawh in chêtzia zawng zawngah lo thianghlim zâwk rawh u; ‘Nangni in thianghlim tûr a ni, kei ka thianghlim si a, tih ziak a nih kha,’” tiin a zilhhau va. (1 Pet. 1:14-16) Nungchang thianghlimna chuan Pathian hming a chawimawi a ni.

Mahse, Jehova Thuhretu pakhatin thil sual a tih chuan chu chu a ṭhiante leh a hmêlhriatte chuan an hre ngei ang. Hnawhchhuahna chuan Jehova’n thianghlimna vawng reng tûrin Bible kaihhruaina zuitu mi thianghlim a nei tih a târ lang a ni. Switzerland rama Kingdom Hall-a rawn inkhâwm mi thar pakhat chuan kohhran zînga mi nih a duh thu a sawi a. A unaunu chu nungchang bawlhhlawhna avânga hnawhchhuah a ni a. Ani chuan “nungchang bawlhhlawhna pawm zam mai lo” pâwl chu zawm a duh thu a sawi a ni.

Hnawhchhuahna chuan Kristian kohhran thianghlim tak chu a vênghim. Tirhkoh Paula chuan Korinth khuaa mite hnênah an zînga duh rêng vânga thil sual titute awm remtih a hlauhawmna chu a hrilh a. Ani chuan chutiang mite thununna ṭha lo chu dawidimin chhang hlâwm a puma a fan chhuah nên tehkhinin: “Dawidim tlêmtêin chhang hlâwm chu apumin a fan chhuak,” tih a sawi a. Chu mi hnuah: “Mi sual chu in zîng ata hnawt chhuak rawh u,” tiin anni chu a hrilh a ni.—1 Kor. 5:6, 11-13.

Paula’n “mi sual” tia a sawi chuan zahpah nei lo takin nungchang bawlhhlawhna a hmang niin a lang a. Kohhrana mi dangte chuan a nungchang chu an ngaihhnathiam ṭan ta hial a ni. (1 Kor. 5:1, 2) Chutiang sual lian tak tihna ngaihhnathiamna chuan, Kristian dangte chu an awmna khawpuia mite nungchang bawlhhlawhna ang zui ve duhna a neihtîr thei a ni. Duh rêng vânga thil sual tite ngaihhnathiamna chuan Pathian tehnate ngaihthahna a awmtîr a. (Thur. 8:11) Chu bâkah, thil sual tia inlamlêt duh lote chu “lungpui tui chîm vekte” ang an lo ni thei a, kohhrana mi dangte rinna lawng keh chhiatna a thlen thei a ni.—Jud. 4, 12.

Hnawhchhuahna chuan thil sual titu inhriat chhuahna a thlen thei. Ṭum khat chu Isua’n a pa in kalsan a, a rochan zawng zawng khawhraltu ṭhalai pakhat chungchâng a sawi a. Fapa tlân bo chuan a pa in pâwn lamah chuan nun chu ruak tak leh nunrâwng tak a ni tih a harsa zâwngin a hria a ni. A tâwpah chuan fapa tlân bo chu inhre chhuakin, a chhûngte hnêna kîr leh tûrin hma a la ta a ni. (Lk. 15:11-14) A fapa rilru inlam lêtna avânga lâwm êm êmtu hmangaihna nei tak pa ber chungchânga Isua thusawi chuan Jehova rilru put hmang hre thiam tûrin min ṭanpui a. Jehova chuan: “Mi suaksualin a awm dân a kalsan a, a nun hi ka lawmzâwng a ni zâwk,” tih min tiam a ni.—Ezek. 33:11.

Chutiang bawkin, Kristian kohhrana—an thlarau lam chhûngkuaa—awm tawh lo hnawhchhuahte chuan an thil chânte chu an hre chhuak mai thei a. An kawng sual zawh rah chhuah ṭha lo tak leh Jehova leh a mite nêna inlaichînna ṭha an neih laia an hlim dânte hriatna chuan anni chu a inhriat chhuahtîr thei a ni.

 Kohhran chhûnga lo lêt leh tûra hnawhchhuahte ṭanpui nân, hmangaihna leh nghehna neih a ngai a. Fakna hla phuahtu Davida chuan: “Mi fel chuan mi vaw rawh se, khawngaihna a ni ang, mi zilhhau rawh se, lûa hriak thih ang a ni ang,” tiin a sawi. (Sâm 141:5) Entîr nân: Thlasik khawvawh laia tlâng lâwn mi pakhat chau tak chu han mitthla teh. A taksa a vawh tawh êm avângin, a mutte pawh a chhuak ta a. Vûr kârah muhîl sela chuan a thi mai ang. Chhanchhuaktu lo kal tûr an nghah lai hian, a harh reng nân a ṭhianpa chuan a khât tâwkin a hmaiah a bêng ṭhuai ṭhîn a. A benna chu na hle thei mah se, chu chuan a nun a chhanhim thei a ni. Chutiang bawkin, Davida chuan mi felin a ṭhatna tûra na taka a siam ṭhat a ngaih châng a awm thei tih a hria a ni.

A tam zâwkah chuan, hnawhchhuahna hian thil sual titu mamawh tak thununna chu a pe ṭhîn. Kum sâwm vêl a liam hnu chuan, atîra kan sawi tâk Julian-a fapa chuan a nun a thianfai a, kohhranah rawn kîr lehin tûnah chuan upa a ni tawh a ni. Ani chuan: “Hnawhchhuah ka nihna chuan ka nun dân siam ṭha tûrin min nawr lui a. Hetiang thununna hi ka mamawh tak zet a ni,” tiin a sawi.—Heb. 12:7-11.

Hnawhchhuahna hi thlarau lama chhiat tawhna a ni ngei mai; mahse, ṭhat chhuah theih tawh lohna tûr chhiatna a nih kher a ngai lo. Hnawhchhuahnain a tum a hlen theih nân tih tûr kan nei ṭheuh a ni.

Upate chuan mi chu hnawhchhuah a nih thu hriattîr tûra mawhphurhna hrehawm tak an neih chu Jehova hmangaihna lantîr thei tûr zâwnga thawh an tum tlat a. An thu tlûkna siam an hriattîr hunah, kohhrana lâk luh leh a nih theihna tûra a tih ngaite chu ngilnei tak leh fiah takin an hrilh a ni. Jehova hnêna an rawn kîr leh theih dân tûr hriatnawntîr nân, chhe tê tala an kawng an thlâkzia lantîrtute chu upate chuan a khât tâwkin an tlawh thei ang. *

Chhûngkuaa mite chuan kohhran leh hnawhchhuah tâwktu an hmangaihna chu upate thu tlûkna siam zahin an lantîr thei a. Julian-a chuan: “Ka fapa a la ni reng a; mahse, a nun dân phung chuan kan inkârah hêm a thlâk a ni,” tiin a sawi.

Kohhrana mi zawng zawng chuan hnawhchhuah tâwktu nêna inzawmna leh inbiak pawhna nei lovin hmangaihna dik tak an lantîr thei a. (1 Kor. 5:11; 2 Joh. 10, 11) Chutiang chuan, Jehova’n upate hmanga a pêk thununna chu an tinghet a ni. Chu bâkah, kohhrana mite chuan hnawhchhuah tâwktu chhûngkuate hnênah hmangaihna leh ṭanpuina an pe lehzual thei a. Tûn hi an tân hun harsa tak a ni a; chuvângin kohhranin anni pawh kâwm duh lo anga inngaihna neihtîr tûr a ni rêng rêng lo.—Rom 12:13, 15.

Julian-a chuan: “Hnawhchhuahna hi kan mamawh tak ruahmanna a ni a, Jehova tehna ang zêla nung tûra mi ṭanpuitu a ni. Nâ ti hle mah ila, khua reiah rah ṭha tak a chhuah a. Ka fapa nungchang ṭhat lohna chu pawmzam mai ta ila chuan, kohhranah a rawn kîr leh ngai lo vang,” tiin a sawi a ni. (w15-E 04/15)