Jehova Nêna In Inlaichînna Chu Eng Ang Khawpa Tak Nge Ni?
“Pathian hnaih rawh u, tichuan anin a hnaih ang che u.”—JAK. 4:8.
1. Engvângin nge Jehova nêna kan inlaichînna chu a nghet thei ang ber nihtîr kan tum tlat a ngaih?
JEHOVA hnêna inpumpêka baptisma chang tawh Thuhretu i ni em? I nih chuan thil hlu tak—Pathian nêna mi mal inlaichînna chu i nei a ni. Mahse, Setana khawvêl nêksâwrna mai ni lovin, kan taksa ṭha famkim lo nêksâwrna avâng pawhin chu inlaichînna chuan beihna a tâwk a ni. He dinhmun khirh tak hi Kristian zawng zawngte’n an hmachhawn a. Chuvângin, Jehova nêna kan inlaichînna chu a nghet thei ang ber nihtîr kan tum tûr a ni.
2. (a) Inlaichînna chu eng nge ni? (Footnote en rawh.) (b) Jehova nêna kan inlaichînna chu engtin nge kan tihngheh theih?
2 Jehova nêna in inlaichînna chu i tân eng anga tak nge ni? Chu in inlaichînna chu tihngheh lehzual i duh em? Tihngheh theih dân chu, Jakoba 4:8 chuan heti hian a sawi a ni: “Pathian hnaih rawh u, tichuan anin a hnaih ang che u,” tiin. Hei hian kal lam hâwng lam a nei tih chhinchhiah ang che. * Pathian hnaih tûra hma kan lâk chuan, ani pawhin min hnaih tûrin hma a la ṭhîn. He inpawh tawnna hian vawi tam tak neih nawn a nih hunah, Jehova nêna kan inlaichînna chu a tinghet sauh va. A tâwpah, chu inlaichînna chu kan tân a tak ta hle a ni. “Mitîrtu hi mi tak zet a ni, . . . ani chu ka hria,” tia sawitu Isua neih ang rin tlatna chu kan nei chho a ni. (Joh. 7:28, 29) Mahse, Jehova hnaih lehzual tûrin eng nge i tih theih?
Engtin nge Pathian nên i inbiak pawh theih? (Paragraph 3-na en rawh)
3. Eng hmangin nge Jehova nêna kan inbiak pawh theih?
3 Jehova hnaih tûra thil pawimawh tak pakhat chu amah nêna inbiak pawhna neih ziah hi a ni a. Engtin nge Pathian nên i inbiak pawh theih? Aw le, hmun hla taka awm i ṭhian pakhat nên engtin nge in inbiak pawh ṭhin? Lehkha in inthawn emaw, phone-in in inbe ṭhîn emaw ngei ang a, chutiang chuan in ti zing hle pawh a ni thei ang. A hnêna ṭawngṭai ziahin Jehova chu i bia a. (Sâm 142:2 chhiar rawh.) Tichuan, a Thu, Bible i chhiar ziah a, i chhût ngun hian Jehova i inbiaktîr anga sawi theih a ni. (Isaia 30:20, 21 chhiar rawh.) Chuti chu, he kal lam hâwng lam nei inbiak pawhnain Jehova nêna kan inzawmna a tihngheh dân leh mi mala kan inlaichînna a tih tak lehzual dân i lo ngaihtuah ang u.
BIBLE ZIRNA —JEHOVA’N A BIAK DAN CHE
4, 5. Jehova chuan a Thu, Bible hmangin a mi malin engtin nge a biak che? Entîrna pakhat pe rawh.
4 Bible-ah hian mihring mi nâwlpuite tâna Pathian thuchah a tel tih chu i pawm ngei ang a. Mahse, Bible-ah hian nangman Pathian Jehova i hnaih theih dân a tel em? Tel e. Engtin nge? Bible chhiara i zir ziah hian, Bible sawite i chhân lêt dân leh i dinhmuna a taka i nunpui theih dân chu ngaihtuah rawh; chutianga i tih chuan Jehova chu a Thu hmangin i inbiaktîr tihna a ni. Hei hian amah nêna inlaichînna ṭha lehzual a neihtîr ang che.—Heb. 4:12; Jak. 1:23-25.
5 Entîr nân, Isua thusawi: “Leia sûlrûl leh tuiêkin a ei chhiatnaah, . . . in tân rote khâwl khâwm suh u,” tih hi chhiarin, chhût ngun ang che. I nunah Lalram i dah hmasa tawh nia i inhriat chuan, Jehova’n a fak che tih inhriatna i nei a ni. Kawng lehlamah chuan, i nun chu tluang tlam zâwkin i la dah lo tih leh Lalram dah hmasak lehzual i la ngai nia i inhriat chuan, Jehova chuan amah i hnaih lehzual theihna tûra ṭan lâk i ngaihna lai a hriattîr che tihna a ni.—Mt. 6:19, 20.
6, 7. (a) Bible zirna chuan Jehova kan hmangaihna leh ama min hmangaihna chungah eng nghawng nge a neih? (b) Mi mala inzirna kan neih huna kan tum ber tûr chu eng nge ni?
6 Bible zirna chuan thlarau lama hma kan sâwn ngaihna laite min hriattîr mai lo. Jehova kawng duhawm takte min ngaihhluttîr lehzualin, amah hmangaih lehzual tûrin min tur bawk a ni. Pathian kan hmangaihna a ṭhan chhoh hian, ama min hmangaihna pawh a zual a, kan inzawmna pawh a nghet zual ṭhîn a ni.—1 Korinth 8:3 chhiar rawh.
7 Mahse, Jehova hnaih tûr chuan tum dik tak neia a Thu kan zir chu a pawimawh hle. Johana 17:3 chuan: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin a sawi. Chuvângin, kan tum ber tûr chu hriatna neih mai ni lovin, Mi tak tak anga Jehova “hriat” lehzual hi a ni.—Exodus 33:13 chhiar rawh; Sâm 25:4.
8. (a) Lalte pahnihna 15:1-5-a târ lan angin, Lal Azaria chunga Jehova thiltih chungchângah eng ngaihtuahna nge lo awm thei? (b) Jehova kan hriatna chuan a thiltih chungchânga rinhlelhna eng pawh chu engtin nge a paih bo?
8 Jehova kan hriat chian lehzual hian, Bible thuziak ṭhenkhata Jehova thiltih dân mak kan tih deuh hunah pawh ṭûl lo takin kan buai lo vang. Entîr nân, Juda Lal Azaria chunga Jehova thiltih dân hi engtin nge i ngaih? (2 Lal. 15:1-5) “Hmun sângahte chuan mite chu an la inthawiin, rimtui an la hâl reng ṭhîn,” mahse, Azaria chuan “LALPA mithmuhah thil ṭha tak a ti ṭhîn” tih chhinchhiah rawh. Mahse, “LALPAN lal chu a rawn hrem ta a, chutichuan a thih nî thlengin a lo phâr ta” a ni. Engvângin nge? Sawi lan a ni lo. Hei hian min tibuai tûr emaw, Jehova’n Azaria chu chhan ṭha tak awm lovin a hrem emaw tiin min ngaihtuahtîr tûr a ni em? Jehova kawngte kan hriat chian hle chuan chutiang chuan kan ngaihtuah lo vang. Pathian kawngte hriatnaah chuan Jehova chuan “a tâwk lekin” a hrem ṭhîn tih hriatna pawh a tel a. (Jer. 30:11) Chutiang hriatna chuan Azaria chunga Jehova thil tih chhante hre lo mah ila, A rorêlna chu a fel tih min rin nghehtîr a ni.
9. Jehova’n Azaria phâr natna a veitîr chhan chu eng nge ni?
9 Mahse, he mi ṭumah hian Bible hmun dangah a chanchin kim chang lehzual chu kan hmu thei a. Lal Azaria chu Lal Uzzia ti pawha hriat a ni a. (2 Lal. 15:7, 32) Chanchin thuhmun ziakna 2 Chronicles 26:3-5, 16-21-a sawi angin, Uzzia chuan hun engemawti chhûng chu Jehova mithmuhah thil ṭha a ti tih hre mah ila, a hnuah chuan “a rilru a lo sâng ta a, ṭha lo takin thil a ti a.” Chapo takin, ani chuan a thu neihna piah lamah puithiam hna chu chelh a tum a. Puithiam sawm riat leh pakhatin a ni chu hmachhawnin, khap an tum a ni. Engtin nge Uzzia chuan a chhân lêt? A chapozia a târ lang a. Puithiamte chungah “a thinur ta” a ni. Jehova’n a phârtîr pawh chu a mak lo ve!
10. Engvângin nge Jehova’n thilte a tih chhan hrilhfiahna kan mamawh reng loh vang a, a kawng felte kan rinnghehna chu engtin nge kan tihngheh theih?
10 A thu pawimawh lai chu i hmaih suh ang u. Bible-a thu dang tam takte angin, he mi chungchângah hrilhfiahna kimchang tak tel lo ta se engtin nge ni ang? Pathian felna chu i ringhlel mai ang em? Nge ni a, Bible-ah hian Jehova’n thil fel a ti reng ṭhîn tih rinna tûr chanchin ṭhahnem tâwk tak a chuang a; a nihna takah chuan, Jehova chu thil dik leh dik lo tehna ber a ni tiin i ngaihtuah zâwk dâwn? (Deut. 32:4) Jehova chu Mi tak tak anga kan hriat chian lehzual hian, a kawngte kan ngainatna leh kan ngaihhlutna chu a thiltih apiang atân hrilhfiahna kan mamawh loh thlengin a ṭhang chho vang. Chutiang ngaihhlutna chu Pathian min biak pawhna a Thu, Bible zir nân chhût ngun nâna ṭan i lâk dân mil zêlin a ṭhang chho vang tih ring tlat rawh. (Sâm 77:12, 13) Hei hian, Jehova nêna in inlaichînna a tinghetin, a titak lehzual ang.
ṬAWNGṬAINA —JEHOVA I BIAK DAN
11-13. Jehova’n ṭawngṭaina a ngaithla tih engtin nge i hriat theih? (A thupui chunga milem en rawh.)
11 Ṭawngṭaiin Jehova kan hnaih a. Kan fak a, lâwmthu kan hrilh a, a kaihhruaina kan zawng a ni. (Sâm 32:8) Mahse, Jehova nêna in inlaichînna tak tûr chuan, ṭawngṭaina a ngaithla tih i ring nghet tlat tûr a ni.
12 Mi ṭhenkhat chuan ṭawngṭaina chu rilru hahdamna mai niin an ngai a. Anni chuan i ṭawngṭaina chhânsak nia i hriat chhan chu, i ngaihtuahna zawng zawng i sawi chhuah a, i buaina i sawi lan a, chûng i harsatna zawng zawngte chinfel dân kawng i zawn vâng mai niin an ngai a ni. Chutiang hlâwkna awm theite mai bâkah, engtin nge tih tak zeta i ṭawngṭaina chu Jehova’n a ngaithla tak tak tih i hriat?
13 Hei hi han ngaihtuah teh: Isua chuan mihring anga a awm hmain, Jehova’n a chhiahhlawh mihringte ṭawngṭaina chu a chhâng ṭhîn tih a hria a. Tichuan, leia a rawngbâwl chhûngin, ṭawngṭaina chu a rilru veizâwngte a Pa vâna mi hnêna thlen nân a hmang a ni. Jehova’n a ngaithla tak tak lo niin ngai sela chuan—zan khuaa ṭawngṭainate pawh tiamin—chutiang chuan a ṭawngṭai ang em? (Lk. 6:12; 22:40-46) Ṭawngṭaina chu rilru hahdamna mai niah ngai sela chuan, a zirtîrte chu ṭawngṭai tûrin a zirtîr ang em? Ṭawngṭaina chu Jehova nêna inbiak pawhna tak tak a ni tih Isua chuan a hre chiang hle. Ṭum khat chu heti hian a sawi a ni: “Ka Pa, ka thu i ngaihthlâk avângin i chungah ka lâwm e. Kumkhuain ka thu i ngaithla ṭhîn tih ka hre reng a ni,” tiin. Keini pawhin Jehova chu “ṭawngṭaina ngaithlatu” a ni tih kan ring tlat thei a ni.—Joh. 11:41, 42; Sâm 65:2.
14, 15. (a) Ṭawngṭainaa dîl bîk neih chu engtin nge kan hlâwkpui? (b) Engtin nge unaunu pakhat ṭawngṭaina chuan Jehova nêna an inzawmna nghet tûra a ṭanpui?
14 Ṭawngṭainaah dîl bîk i neih hian, a chhânna chu hriat harsa deuh anga a lan hunah pawh Jehova chhânna chu i hre thei lehzual ang. I ṭawngṭaina chhânnate chuan Jehova chu i tân a ti tak lehzual ang. Chu bâkah, i rilru chhûngrila i veite Jehova hnêna i sawi chhuah tam poh leh ani chuan a hnaih lehzual ang che.
15 Kathy-i thiltawn hi han ngaihtuah teh. * Thlawhhma rawngbâwlnaa tel chu nuam a ti lo va; mahse, a tel ziah a ni. Heti hian a sawi a ni: “Thlawhhma rawngbâwlnaa tel chu nuam ka ti lo va. Nuam ka ti lo tak zet a ni. Ka ei zawnna hnathawh ka chawlhsan hnu chuan, upa pakhatin regular pioneer ka thawh a beisei thu min rawn hrilh a; dîlna form pawh min pe hial a ni. Chutah pioneer thawh chu ka rêlthlu ta a; mahse, rawngbâwlna nuam ka tih theih nân, nî tin Jehova hnênah ka ṭawngṭai ta a ni,” tiin. A ṭawngṭaina chu Jehova’n a chhâng em? Heti hian a sawi zawm a ni: “Tûn hi pioneer ka thawh kum thumna a ni tawh a. Rawngbâwlnaah hun tam zâwk ka hman avâng leh unaunu dangte hnên aṭanga ka inzir bawk avângin, thu hrilhna kawngah zâwi zâwiin hma ka sâwn chho ta. Tûnah chuan, thlawhhma rawngbâwlna nuam ka ti tawh mai ni lovin ka ngaina hle tawh a ni. Chu bâkah, Jehova nêna kan inlaichînna pawh tûn hma zawng aiin a nghet lehzual tawh a ni,” tiin. Kathy-i ṭawngtaina chuan Jehova nêna an inlaichînna chu tak tûrin a ṭanpui tih a chiang hle.
KAN TIH TURTE TIIN
16, 17. (a) Jehova nêna inlaichînna nung reng leh ṭhang chho reng nei tûrin eng nge loh theih lohva kan tih ang? (b) A dawta thuziakah eng harsatna chungchâng nge kan sawiho vang?
16 Jehova nêna inlaichînna neih chhoh chu dam chhûnga tih reng ngai a ni a. Pathian min hnaih kan duh chuan, amah hnaih tûra hma kan lâk a ngai a ni. Chuti chu, Bible zirna leh ṭawngṭaina hmangin kan Pathian nêna inbiak pawhna ṭha neih reng chu i tum tlat ang u. Chutianga kan tih chuan, Jehova nêna kan inlaichînna ṭhang chho reng chuan harsatna kan tawhte hlawhtling taka hmachhawn thei tûrin min ṭanpui ang.
Jehova nêna inlaichînna neih chhoh chu dam chhûnga tih reng ngai a ni (Paragraph 16, 17-na en rawh)
17 Mahse, ṭhahnem ngai taka kan ṭawngṭai chung pawha harsatnate’n min kiansan loh hunah harsa kan ti hle thei a, Jehova kan rinna chu a derthâwng thei a ni. Jehova chuan kan ṭawngṭainate a ngaithla tak tak lo vang ti emaw, amah nêna inlaichînna neiah min ngai lo a ni ang ti emawin kan ngaihtuah ṭan thei. Chutiang ngaihtuahna chu Pathian nêna kan inlaichînna hi a tak a ni tih rin tlatna nên engtin nge kan hmachhawn theih ang? A dawta thuziak chuan hemi chungchâng hi a sawi ang. (w15-E 04/15)
