1, 2. Bial kantute chuan kohhran tam taka eng dinhmun nge an hmuh?

BIAL kantu chuan upahote nêna an inkhâwmna chu a titâwp dâwn a. Chûng berâm vêngtute a han en chuan, an zînga ṭhenkhat chu a pa rual an ni tih a hmu a, a lainat hle a ni. Mahse, anmahni ngaihtuahna a neih bawk avângin, heti hian a zâwt a ni, “Unaute u, kohhrana mawhphurhnate chelh thei tûrin mi dangte chu engtin nge in zirtîr?” tiin. Anni chuan bial kantuin a tlawh hnuhnûn ber ṭuma mi dangte zirtîrna pêk ngaihsak lehzual tûra a fuihna chu an la hre reng a. A tâwpah, upate zînga pakhat chuan, “Dik taka sawi chuan, kan zirtîr vak lo,” tiin a sawi a ni. Upa dangte pawhin pawmpuiin an lû an lo bu nghauh nghauh va.

² Kristian upa i nih chuan, chu inkhâwma thilthleng ang chu i tawng ngai em? I tawn ngei a rinawm. Khawvêl puma bial kantute chuan kohhran tam taka berâmte ngaihsak tûrin unaupate—kum upate leh naupang zâwkte—chuan zirtîrna an mamawh lehzual tih an hmu a. Chu chuan harsatna pakhat a chawk chhuak a ni. Engvângin nge?

3. (a) Engtin nge Bible chuan zirtîrna pêk a pawimawhzia a târ lan a, hei hi engvângin nge kan zavaia kan ngaihven ang? (Footnote en rawh.) (b) Engvângin nge upa ṭhenkhatin mi dangte hnêna zirtîrna pêk chu an harsat mai theih?

 ³ Berâm vêngtu i nih angin, mi mala zirtîrna pêk chu a pawimawh tih i hriat a rinawm hle. * Kohhrana mite thlarau lama chak tûr leh kohhran tharte din thei tûrin unaupa tam tak kan mamawh tih i hria a ni. (Isaia 60:22 chhiar rawh.) Pathian Thuin “mi dangte zirtîr” tûrin a fuih che tih i hre bawk. (2 Timothea 2:2 chhiar rawh.) Chutichung pawhin, atîra kan sawi tâk upate ang bawkin, zirtîrna pêk chu harsa i ti mai thei. Chhûngkaw mamawhte, hna ṭûlte, kohhran mawhphurhnate, leh thil dang hmanhmawhthlâkte i thawh hnu chuan kohhrana mi dangte zirtîr tûrin hun i nei tawh meuh lo pawh a ni thei a. Chutiang a nih chuan, mi dangte zirtîrna pêk chu eng anga pawimawh nge a nih i lo ngaihtuah ang u.

4. Zirtîrna pêk hun tûr sawn hlat châng a awm thei a; chu chu engvâng nge ni thei ang?

⁴ Upa ṭhenkhatin zirtîrna atâna hun pêk an harsat chhan pakhat chu eng nge ni thei ang? Mi ṭhenkhat chuan: ‘Zirtîrna pêk chu a pawimawh a; mahse, tih khawtlai theih loh kohhran thil pawimawh dangte ai chuan a pawimawh nêp zâwk. Zirtîrna pêk hun ka sawn hlat chuan, kohhran chu a kal dân pângngaiin a kal thei ang,’ tiin an ngaihtuah mai thei. I ngaihsak vat ngai thil ṭûl tam tak a awm tih chu dik mah se, zirtîrna pêk hun tihkhaw tlaina chuan thlarau lama kohhran ṭhatna tûr chu a tichhe thei a ni.

5, 6. Entîrnaa driver leh engine enkawlna a thlîr dân aṭangin eng nge kan zir theih a, hei hi kohhrana zirtîrna pêkna chungchângah engtin nge kan hman theih?

⁵ He entîrna hi han ngaihtuah teh: Driver chuan a motor vawng ṭha reng tûr leh tlân thei dinhmuna dah reng tûrin engine oil chu a hun apianga thlâkin engine a enkawl reng a ngai tih a hria a. Mahse, chu chu petrol thun khah ang tlukin a hmanhmawhthlâk lovah a ngai mai thei. Petrol a thun loh chuan, rei lo têah a motor chu a ding tawp dâwn si a. Ani chuan heti hian a ngaihtuah mai thei, ‘Engine oil ka thlâk hman loh pawhin, rei lo te chhûng chu a tlân thei tho vang,’ tiin. Chutianga tih chu eng nge a hlauhawmna? Driver chuan engine enkawl hun tûr a sawn hlat reng chuan, engtik nî emawah a motor chu a chhe tawp ang. Chutiang hunah chuan, a motor tlân leh thei tûra siam nân hun leh sum tam tak a sên a ngai dâwn a ni. Zir tûr chu eng nge ni?

⁶ Upate chuan hmanhmawh taka tih ngai thil pawimawh tih tûr tam tak an nei a, an tih loh chuan kohhranah nghawng pawi tak a nei thei a ni. Entîrnaa driver-in petrol a thun khat ṭhîn ang maiin, upate chuan ‘thil pawimawh zualte’ an fiaha an tih a ngai a. (Phil. 1:10, New World Translation) Mahse, upa ṭhenkhat chuan ngaihtuah nghâl ngai thil pawimawh tak takte an tih avângin, engine enkawlna anga sawi theih tûr mi dangte zirtîrna pêk chu an ngaihthah thei a ni. Upate’n thil pawimawh tak zirtîrna pêk hun tûr an sawhsawn reng chuan, rei lo têah kohhran chuan thiltih ngaite titu tûr unaupa puitlingte chu a nei lo nghâl mai ang.

7. Zirtîrna pêk nâna hun insiamtu upate chu engtin nge kan thlîr ang?

⁷ Chuti a nih chuan, zirtîrna pêk a pawimawh lutuk lo anga ngaihna lakah kan  invêng tûr a ni. Hun rei tak thlîra an hun neih chu thiltawn nei tlêm unaupate zirtîr nâna hmangtu upate chu sum enkawltu fing an ni a, kohhran pum tân malsâwmna an ni tak zet a ni. (1 Petera 4:10 chhiar rawh.) Engtin nge kohhranin anni chu a hlâwkpui?

8. (a) Eng miziate leh ngaihtuahnatein nge upate chu mi dangte zirtîr tûra chêttîr? (b)  “Mamawh zualna hmuna rawngbâwltu” upate chuan eng mawhphurhna hmanhmawhthlâk tak nge an chelh? (“ Thawh Ngei Ngei Tûr Hna Pakhat,” tih thuziak chuanna bâwm chu en rawh.)

⁸ Thiltawn ngah tak upate pawhin kum upatna chuan kohhran tâna an thil tih theihte chu a titlêm tial tial dâwn tih inngaitlâwm takin an pawm tûr a ni a. (Mik. 6:8) Chu bâkah, ‘hun leh khawrêl avângin’ kohhrana an mawhphurhnate chu an chelh reng thei lo pawh a ni thei tih an ngaihtuah tel bawk tûr a ni. (Thur. 9:11, 12; Jak. 4:13, 14) Jehova berâmte an ngaihsak avângin, nakin hun tûr thlîrtu upate chuan kum tam tak chhûng an rawngbâwlna aṭanga an neih an thiltawnte chu unaupa naupang zâwkte hnênah hunbi neiin an hrilh ṭhîn a ni.—Sâm 71:17, 18 chhiar rawh.

9. Nakina thilthleng tûr eng hian nge zirtîrna pêk chu thil pawimawh tak nihtîr?

⁹ Mi dangte zirtîrtu upate chu eng kawng dangin nge berâmte tân malsâwmna an nih? Anni chuan kohhran invênhimna chu an tinghet a ni. Engtin nge? Mi dangte zirtîr tûra upate theih tâwp chhuahna zârah kohhran ṭanpuitu tûr unaupa tam tak an awm a; anni chuan tûnah mai ni lovin, a bîk takin hrehawm nasa tak chhûnga buaina a awm hunah kohhran chu nghet taka ding tûr leh inpumkhat tlat tûrin an ṭanpui ang. (Ezek. 38:10-12; Mik. 5:5, 6) Chuvângin, upa duh takte u, mi dangte zirtîrna pêk chu tûn laia in rawngbâwlna pêng pakhat nihtîr tûrin kan ngên a che u.

10. Mi dangte zirtîr nâna hun nei thei tûrin upain eng nge a tih ngai?

¹⁰ Kohhran thil pawimawha i inhmanna chuan hun âwl dang nei tawh rêng rêng lo nia inhriatna a neihtîr ang che tih chu kan hria a. Chuvângin, chûng i hun hmante zînga ṭhenkhat chu la chhuakin, mi dangte zirtîr nâna i hman a ngai thei ang. (Thur. 3:1) Chutianga tih chu inkhâwlna finthlâk tak a ni ngei ang.

11. (a) Zirtîrna pêk chungchânga ram hrang hranga upate rawtna pêk chu engvângin nge ngaihven awm tak a nih? (b) Thufingte 15:22-a sawi angin, upa dangte rawtna siam ngaihtuah chu engvângin nge a ṭangkai ang?

¹¹ Tûn hnai khân, thlarau lama hma sâwn tûra unaupate ṭanpuina kawnga hlawhtling upate chu an ṭanpui dân zawh an ni a. * Chûng upate dinhmun chu inang lo hle mah se, mak tak maiin an sawi chu a inang vek a ni. Hei hian eng nge a târ lan? Tirhkoh Paula hun lai ang bawkin, Bible ṭanchhan zirtîrna chu “ram tina kohhranho pâwl tina” zirlai zawng zawngte tân a hman theih vek a ni tih a târ lang. (1 Kor. 4:17) Chuvângin, he thuziakah leh a dawta thuziakah hian, hêng upate siam rawtna ṭhenkhat chu kan sawiho vang. (Thuf. 15:22) A fiah zâwk theih nân, thuziakte chuan zirtîrna petute chu “zirtîrtute” tiin leh zirtîrna dawngte chu “zirlaite” tiin a sawi ang.

12. Zirtîrtu chuan eng nge a siam ngai a, engvângin nge?

¹² Zirtîrtu tân zirtîr theihna tûr boruak ṭha siam a ngai a. Huan enkawltuin chi a theh hmaa lei a chawh phut ang bawkin, zirtîrtu chuan thil thar a zirtîr ṭan hmain zirlai thinlung chu a buatsaih, a nih loh leh a fuih hmasa tûr a ni. Chuti chu, mi dangte zirtîr tûrin  zirtîrtu chuan eng angin nge boruak ṭha a siam hmasak ang? Hmân lai zâwlnei pakhat thil tih dân chu zuiin a ti thei a ni. Chu chu eng tih dân nge ni?

13-15. (a) Zâwlnei Samuela chuan eng chanvo nge a dawn? (b) Samuela chuan a chanvo dawn chu engtin nge a hlen? (A thupui chunga milem en rawh.) (c) Engvângin nge Bible-a chhinchhiah Samuela chungchâng hi tûn laia upate’n an ngaihven ang?

¹³ Kum 3,000 chuang liamta khân, ni khat chu Jehova chuan zâwlnei upa tawh tak Samuela hnênah: “Naktûk hetih hunah hian Benjamin ram aṭangin i hnênah mi pakhat ka rawn kaltîr dâwn a, ka mi Israelte chunga hotu ni tûrin hriak i thih ang,” tiin a hrilh a. (1 Sam. 9:15, 16) Samuela chuan hruaitu a nihna a tâwp dâwn tih leh Jehova’n a aiawhtu tûr hriak thih tûrin a tîr tih a hria a ni. Ani chuan, ‘Chu pa chu a hna thawk thei tûrin engtin nge ka buatsaih theih ang?’ tiin a ngaihtuah ngei ang. Tih dân tûr a hre ta a, ruahmanna a siam ta a ni.

¹⁴ A tûkah, Samuela’n Saula a hmuh chuan, Jehova’n a zâwlnei hnênah chuan: “Enteh, i hnêna ka mi sawia kha,” tiin a hrilh a. Tichuan, Samuela chuan a ruahman angin a ti ṭan ta a. Saula chu mikhual pindana chaw eipuiah a sâwm a. Chutah chuan Saula leh amah zuitu chu ṭhutthlêng ṭha ber leh sa hrang ṭha ber pein, heti hian a hrilh a ni: “Kîl la, ei rawh; a hun hun atân hei hi kan lo ruatsak rêng che a ni,” tiin. Tichuan, Samuela leh Saula chu zâwlnei in lam panin an kal a, an kal pahin an inbia a. Samuela chuan chaw hlui a kîlpuina leh thawveng taka kea a kalpuinain a siam boruak ṭha chu hman ṭangkai a duh a ni. Tichuan, Saula chu a in chung zâwla chho tûrin a sâwm a. Tlai thlifîm vâwt takah, Samuela chuan Saula chu an mut hma loh zawng ‘inchung zâwlah a titipui a.’ A tûkah chuan, Samuela chuan Saula chu hriak a thih a, a fawh hnuah, kaihhruaina dang a pêk belh a. Chu mi zawhah, Saula chu thil lo thleng tûrte atâna buatsaihin a kaltîr a ni.—1 Sam. 9:17-27, C.L. Re-edited; 10:1.

¹⁵ Ram hruaitu ni tûra mi tuemaw hriak thih chu, kohhran upa emaw, kohhranho rawngbâwltu emaw ni tûra unaupa zirtîrna pêk nên a inang lo va. Chutichung pawhin, tûn laia upate chuan Samuela tih dân aṭangin zir tûr hlu tak an nei a ni. Chûng zînga pahnih chu i lo ngaihtuah ang u.

16. (a) Israel mite’n lal an ngen khân, Samuela’n engtin nge a ngaih? (b) Samuela chuan Saula hriak thih tûra a mawhphurhna chu eng angin nge a hlen?

¹⁶ Inhuam takin ti la, hreh suh. Israel mite’n mihring lal an duh tih Samuela’n a hriat khân, a beidawngin, a mite’n amah an hnâwlna niin a ngai a. (1 Sam. 8:4-8) Mipuite ngenna tihsak a hreh êm avângin Jehova chuan tihsak tûrin vawi thum lai a hrilh a ni. (1 Sam. 8:7, 9, 22) Chutichung pawhin, Samuela chuan a thinlungah amah thlâktu tûr huatna emaw, a chunga thinurna emaw a pai lo. Jehova’n Saula hriak thih tûra a hrilh khân, zâwlnei chuan hreh chung chung leh a rûn dâl chauhva ti lovin, hmangaihna avânga duh tak chung zâwkin a ti a ni.

17. Tûn laia upate’n engtin nge Samuela rilru put hmang chu an entawn a, chu chuan eng lungâwina nge a pêk?

¹⁷ Samuela ang bawkin, tûn laia thiltawn nei upate chuan an zirtîrte chungah ngilneihna rilru put hmang an lantîr a. (1 Pet. 5:2) Chûng upate chuan kohhrana an chanvo chelh ṭhenkhat hloh ṭhen an hlauh avângin, mi tharte chu an zirtîr loh phah lo. Zirtîrtu rilru zau tak putute chuan zir duhna nei zirlaite chu anmahni eltu anga thlîr lovin, kohhran tâna thilpêk hlu tak, “ṭanpuitu,” a nih loh leh hna thawhpuitu angin an thlîr zâwk a ni.  (2 Kor. 1:24; Heb. 13:16) Zirlaite’n an thiamnate kohhran hlâwkpui atâna an hmang hmuh chu mahni hmasial lo zirtîrtute tân a va lungawithlâk tak êm!—Tirh. 20:35.

18, 19. Engtin nge upa chuan zirlai thinlung chu a buatsaih theih a, engvângin nge chutianga hma lâk chu a pawimawh êm êm?

¹⁸ Zirtîrtu mai ni lovin, an ṭhian ni rawh. Samuela’n Saula a hmuh nî chuan hriak ûm phawrhin Saula lûah hmanhmawh taka leiha hriak a thih hnuah lal thar chu a tîr chhuak nghâl thei reng a ni. Chutiangin ti ta se, lal tûra hriak thih zawng a ni ngei ang a; mahse, lal tûra buatsaih a ni rêng rêng lo vang. Chutianga tih ai mahin, Samuela chuan Saula thinlung chu zâwi zâwia buatsaih tûrin hun a pe a. Chaw hlui a kîlpui hnu, muang chânga a kalpui hnu, rei tak a biak hnu, leh chawlh hahdamna ṭha tak an neih hnuah, zâwlnei chuan Saula hriak thih theihna hun remchâng a lo thleng niin a ngai a ni.

¹⁹ Chutiang bawkin, tûn laia zirtîrtu pawhin a zirtîrna chu boruak zângkhai tak awmtîr tûr leh zirlai nêna inṭhianna nghet tak nei tûra hun pe hmasain zirna chu a ṭan tûr a ni a. Chutiang inṭhianna nei tûra upain hma a lâk dân chu a ram azir leh tualchhûng dinhmun leh hnam dânte azirin a danglam thei ang. Chutichung pawhin, khawi hmunah pawh awm la, upa buai tak i ni chung pawha zirlai hun i hmanpui chuan, a hnênah, “Ka tân i pawimawh a ni,” tih i hrilh ang a ni ang a. (Rom 12:10 chhiar rawh.) Chu sawi chhuah loh thu chu hmun tina awm zirlai inpe takte chuan ṭha takin an hre thiam ang a, an hlut hle ngei ang.

20, 21. (a) Zirtîrtu hlawhtling tak thil tih dân chu engtin nge i sawi ang? (b) A dawta thuziakah eng nge kan sawiho vang?

²⁰ Upate u, hei hi hre reng ang che u: Zirtîrtu hlawhtling tak chu, mi dangte zirtîr nuam ti mi mai ni lovin, a mi zirtîr hmangaihtu hi a ni, tih hi. (Joh. 5:20 nên khaikhin rawh.) Chu hmangaihna chu zirlaiin a hre nghâl thei a, chu chuan zirtîrna a chhân lêt dân chu nasa takin a nghawng a ni. Chuvângin, upa duh takte u, zirtîrna inpêk hunah zirtîrtu mai ni lovin, ṭhian ni ang che u.—Thuf. 17:17; Joh. 15:15.

²¹ Zirlai thinlung a buatsaih hunah, upa chuan a mamawh zirtîrna pêk chu a duh ngei ang. Upa chuan eng tih dân nge a hman theih? Chu chu a dawta thuziakah kan sawiho vang. (w15-E 04/15)