1. (a) Zirtîrna chungchângah Pathian chhiahhlawhte chuan hun rei tak ata tawh eng nge an hriatthiam a, chu chu engtin nge tûn laiah pawh a nih? (b) He thuziakah hian eng nge kan sawiho vang?

PATHIAN chhiahhlawhte chuan, hun rei tak ata tawhin zirtîrna pêk chuan hlawhtlinna a thlen tih an hre thiam a. Thlahtu Abrama chuan “ama mi, zir thiam sa tawh” te chu Lota chhan chhuak tûrin a tîr chhuak a, an hlawhtling a ni. (Gen. 14:14-16) Lal Davida hun lai khân, Pathian ina hlasatu tûrte chuan ‘LALPA tân hla sak an zir’ a, Pathian an chawimawi a ni. (1 Chro. 25:7) Tûn lai hian, thlarau lam indonaah Setana leh a hnungzuite chu kan do va. (Eph. 6:11-13) Chu bâkah, theih tâwp chhuahin Jehova chawimawi kan tum bawk. (Heb. 13:15, 16) Chuvângin, hlawhtling tûr chuan hmân lai Pathian chhiahhlawhte ang bawkin zirtîrna kan mamawh a. Kohhranah hian Jehova chuan upate chu mi dangte zirtîr tûrin mawhphurhna a pe a ni. (2 Tim. 2:2) Thil tawn nei upate chuan, berâmte enkawltu nih tling tûra unaupate an zirtîrnaah eng tih dânte nge an hman?

2. Upa chuan zirlai hnêna thiamna ṭhenkhat a zirtîr hmain eng nge a tih duh ang a, engvângin nge?

² Upa i nih chuan huan siamtu nêna khaikhin theih i ni a. Thlai a chîn hmain, huan siamtu chuan thlaiin rah ṭha tak a chhuah theih nân lei chu a châwm ṭhat a ngai tih a hria a ni. Chutiang bawkin, thiltawn nei tlêm zâwk unaupa hnêna thiamna ṭhenkhat i zirtîr hmain, zirtîrna a dawn tûrte a thinlunga a chhân lêt ṭhat lehzual theih nân, Bible aṭanga thu ṭha ṭhenkhat sawipui a ngai tih i hre mai thei a ni.—1 Tim. 4:6.

3. (a) Marka 12:29, 30-a kan hmuh Isua thusawi chu engtin nge zirlai nêna inbiaknaah kan hman theih? (b) Upain zirlai tâna a ṭawngṭaisakna chuan eng nghawng nge a neih theih?

³ Lalram thutakin zirlai ngaihtuahna leh thiltihte chu a thunun chen hriat nân heti hian i zâwt thei ang, ‘Jehova hnêna i inpumpêkna chuan engtin nge i nun dân a thlâk danglam?’ tiin. Chu zawhna chuan engin nge kan rawngbâwlna thianghlim chu rilru zawng zawnga rawngbâwlna nihtîr tih chungchânga inbiakna awmze nei tak min neihtîr thei a ni. (Mk. 12:29, 30 chhiar rawh.) Chu inbiakna tâwpah chuan, zirlai chu a zirna hlen tûra a mamawh thlarau thianghlim pe tûrin Jehova hnênah ṭawngṭaiin i dîlsak thei a. Thinlung taka i ṭawngṭaisak a hriatna chuan unaupa chu a va tichak dâwn êm!

4. (a) Zirlai thlarau lama ṭhan chhohna awmtîr thei Bible thu ṭhenkhat chu sawi rawh. (b) Upate’n mi dangte an zirtîr huna an tum ber chu eng nge ni?

⁴ Zirtîrna i pêk ṭan tirhah inhuamna te, rinawmna te, leh inngaihtlâwmna te neih a ngai tih hre thiam tûra zirlai ṭanpuitu tûr Bible thu ṭhenkhat chu sawipui rawh. (1 Lal. 19:19-21; Neh. 7:2; 13:13; Tirh. 18:24-26) Lei atâna lei ṭha a pawimawh ang bawkin, chûng miziate chu zirlai tân neih a pawimawh a. Chûng miziate chuan thlarau lamah rang takin a ṭhan chhohtîr ang. France rama kohhran upa pakhat, Jean-Claude-a chuan heti hian a sawi a: “Zirtîrna ka pêknaa ka tum ber chu, zirlai chu thlarau lam thil ngaihsak mi nihtîr hi a ni a. Zirlai chu Pathian Thu-a kan hmuh ‘thilmakte’ hmu tûra ‘a mit tihvârsak’ tûrin Bible châng engemaw tak chhiar dun theihna hun remchâng ka zawng ṭhîn,” tiin. (Sâm 119:18) Zirlai thuam ngheh theih dân kawng dangte chu engte nge ni?

5. (a) Zirlai hnêna thlarau lam thiltumte sawipui chu eng ang khawpa pawimawh nge ni? (b) Engvângin nge upate chuan anni chu an naupan lai aṭanga an zirtîr ang? (Footnote en rawh.)

⁵ Zirlai chu ‘Thlarau lama i thiltumte chu engte nge ni?’ tiin zâwt la. Thiltum a nei mumal lo a nih chuan, a tâna inâwm leh a tlin theih tûr thiltum nei tûrin ṭanpui rawh. Thlarau lam thiltum i neihte chu hrilh la, chu i thiltum i hlen huna i hlimzia chu phûr takin hrilh bawk ang che. Hei hi mâwl mang tak angin lang mah se, a hlawhtling a ni. Africa-a upa leh pioneer thawk kawp Victor-a chuan, heti hian a sawi: “Ka naupan laiin upa pakhatin ka thiltum chungchângah ngun taka a thlan zawhnate min zâwt a. Chûng zawhnate chuan ka rawngbâwlna chungchâng ngun taka inngaihtuah ṭan tûrin min ṭanpui a ni,” tiin. Thiltawn nei upate chuan unaupate chu an kum upat hma—an tleirâwl lai—aṭanga an kum mil zêla kohhrana chanvote pêkna hmanga zirtîrna ṭan chu a pawimawh tih an sawi uar bawk. Chutianga hma taka zirtîrna chuan naupangte chu kum sawm hnih an tlin dâwn lama rilru lapêng thei thil tam tak an tawh hunah pawh thlarau lam thiltumte nei tlat tûrin a ṭanpui ang.—Sâm 71:5, 17 chhiar rawh. *

6. Isua’n mi dangte a zirtîr dân pawimawh tak pakhat chu eng nge ni?

 ⁶ Zirlai chu a tih tûr chauh ni lovin, a tih chhante hrilhfiahna chuan rawngbâwl a châkna chu a chawktho bawk ang. A chhan leh vâng i hrilhfiah hian, Zirtîrtu Ropui ber, Isua i entawn tihna a ni. Entîr nân, a tirhkohte hnêna zirtîr siam tûra mawhphurhna a pêk hmain, Isua chuan thu âwih a ṭul chhan a hrilh a ni: “Lei leh vâna thuneihna zawng zawng ka hnêna pêk a ni tawh,” tiin. Tichuan, heti hian a sawi belh a ni: “Chutichuan kal ula, hnam tina mi zirtîrahte siam ula,” tiin. (Mt. 28:18, 19) Engtin nge Isua zirtîr dân chu i entawn theih?

7, 8. (a) Engtin nge tûn laia upate chuan Isua zirtîr dân chu an entawn theih? (b) Zirlai fak chu eng ang taka pawimawh nge ni? (c) Eng rawtnate’n nge upate chu mi dangte zirtîr tûra ṭanpui thei? (“ Mi Dangte Zirtîr Dân Tûr,” tih thuziak bâwma mi chu en rawh.)

⁷ Zirlai chu thil pakhat ti tûra tih a nih chhan Bible aṭangin hrilhfiah rawh. Chutiang chuan, Bible thu bulte nêna inmila thil ngaihtuah tûrin i zirtîr a ni ang. Entîr nân, unaupa pakhat chu Kingdom Hall luhna kawng tithianghlim tûr leh kal nâna him taka dah tûrin i tîr angah han inchan teh. Tita 2:9, 10 thu i sawipui thei a, tichuan Kingdom Hall tih thianghlim hna a thawhna chuan ‘Pathian min Chhandamtu zirtîrna thu a cheimawi’ belh dâwn tih hrilhfiah rawh. Tin, a hnathawh chu kohhrana putar pitarte’n an hlâwkpui theih dân ngaihtuah tûrin zirlai chu sâwm bawk ang che. Chutianga zirlai nêna inbiakna chuan ani chu dân leh hrai lam aia mite ngaihtuah zâwk tûrin a ṭanpui ang a. Kohhrana unaute’n a rawngbâwlna an hlâwkpui dân a hmuhna aṭangin hlimna a nei bawk ang.

⁸ I rawtna siamte zâwm tûra theih tâwp a chhuah avângin zirlai chu fak bawk ang che. Chutianga tih chu eng ang taka pawimawh nge ni? Tuiin thlai a châwm theih ang bawkin, tih tak zeta fakna chuan ani chu a ṭhantîr ang.—Matthaia 3:17 nên khaikhin rawh.

9. (a) Ram hausaa upa ṭhenkhat chuan zirtîrna chungchângah eng harsatna nge an hmachhawn? (b) Engvângin nge unaupa naupang zâwk ṭhenkhat chuan an nunah thutak an dah hmasak loh?

⁹ Ram hausaa awm upate chuan harsatna dang an hmachhawn thei a: Baptisma chang tawh kum 20 chuang leh 30 chuang tawhte chu kohhrana inhmang tûrin tihphûr dân tûr chungchângah a ni. Khawthlang Lam ram 20-a thiltawn nei upate chu unaupa naupang ṭhenkhatin kohhrana inhman an hreh chhan zawh an ni a. Chhânna kan dawnte zînga langsâr tak pakhat chu: Ṭhalai ṭhenkhat chu thlarau lam thiltumte ûm tûra fuih an ni lo, tih hi a  ni. A ṭhenah phei chuan, thlarau lam thiltum nei duh ṭhalaite chu an nu leh pate’n khawvêl lam hnathawhte tum zâwk tûra fuih an ni tlat! Chûng naupangte chuan thutak chu an nunah an dah hmasa ngai lo a ni.—Mt. 10:24.

10, 11. (a) Inthlahdah deuh anga lang unaupa chu a rilru thlâk tûrin upain engtin nge zâwi zâwia a ṭanpui theih? (b) Chutiang unaupa chu upain eng Bible thute nge a sawipui theih a, engvângin nge? (Footnote en rawh.)

¹⁰ Unaupa pakhat chu inthlahdah deuh anga a lan chuan a ngaihtuahna thlâk tûrin theih tâwp chhuah leh dawhtheih a ngai thei a; mahse, chu chu thil theih loh a ni lo. Huan siamtuin thing ṭhenkhat zârte chu zâwi zâwia tihngîlsak a, a ṭhanchhoh dân a thlâksak theih ang maiin, nang pawhin unaupa ṭhenkhat chu kohhrana chanvote dawn duhna nei tûra a rilru put hmang thlâk tûrin zâwi zâwiin i ṭanpui thei a ni. Engtin nge?

¹¹ Unaupa nêna inṭhianna ṭha nei tûrin hun pe rawh. Ani chu kohhranin a mamawh tih hriattîr rawh. Tichuan, hun engemaw zât a liam hnuah, amah chu ṭhutpuiin Bible châng pakhat chu chhûtpui la, Jehova hnêna a inpumpêkna chungchâng ngaihtuah tûrin ṭanpui ang che. (Thur. 5:4; Is. 6:8; Mt. 6:24, 33; Lk. 9:57-62; 1 Kor. 15:58; 2 Kor. 5:15; 13:5) Ani chu heti hian i zâwt thei ang, ‘Jehova hnêna i inpumpêk khân a hnênah eng nge i tiam?’ tiin. Hetianga zâwtin a thinlung chawh thawh tum rawh, ‘Baptisma i chan ni khân Jehova rilru chu eng anga a awm nge i rin?’ (Thuf. 27:11) ‘Setana rilru chu eng angin nge a awm?’ tiin. (1 Pet. 5:8) Ngun taka thlan Bible chângte chhiarna chuan unaupa rilru a nghawng theih dân chu ngainêp ngai rêng rêng suh ang che.—Hebrai 4:12 chhiar rawh. *

12, 13. (a) Zirlai a nih laiin eng rilru put hmang nge Elisa chuan a târ lan? (b) Engtin nge Jehova chuan Elisa rinawmna chu mal a sâwm?

¹² In ṭanpuina kan mamawh nangni ṭhalaite lamah eng nge ngai ve? Hlawhtling tûrin eng rilru put hmangin nge ṭanpui ang che u? A chhânna hriat nân, tûn hmaa zirlai pakhat nuna thilthleng ṭhenkhat hi i lo ngaihtuah ang u.

¹³ Kum 3,000 vêl kalta khân, zâwlnei Elija chuan ṭhalai Elisa chu a chhiahhlawh ni tûrin a sâwm a. Elisa chuan sâwmna chu a pawm nghâl a, hna hnuaihnung tak thawhsakin kum upa zâwk rawng chu rinawm takin a bâwl a ni. (2 Lal. 3:11) Tichuan, kum ruk vêl zirtîrna a dawn hnuah, Israel rama Elija rawngbâwlna chu a tâwp ṭep tawh tih a hria a. Chutih lai tak chuan, Elija chuan ṭha taka a zirtîrna dawng tawh a chhiahhlawh chu amah zui tawh lo tûrin a hrilh a; mahse, Elisa chuan Elija hnênah: “Ka awmsan tawp lo vang che,” tiin vawithum lai a hrilh a ni. Ani chuan amah zirtîrtu hnêna a theih anga rei awm chu a tum tlat a. Elija mak tak maia lâk bova a awm dân hmuhtîrna hmangin, Jehova chuan Elisa rinawm nghehna leh rinawmna chu mal a sâwm a ni.—2 Lal. 2:1-12.

14. (a) Engtin nge tûn laiah zirlaite chuan Elisa chu an entawn theih? (b) Zirlai tân engvângin nge rinawm a pawimawh êm êm?

¹⁴ Tûn laiah engtin nge Elisa chu i entawn theih? Hna hniam tak pawh tiamin, chanvo i dawnte chu pawm nghâl ṭhîn rawh. Nangmah zirtîrtu che chu ṭhian angin thlîr la, i tâna theih tâwp a chhuahna chu i ngaihlu hle tih hriattîr ang che. I chhân lêt dân chuan a hnênah: “Ka awmsan tawp lo vang che,” tiin i hrilh tih theih a ni ang. A pawimawh ber chu, i chanvo dawn engpawh rinawm taka  thawh zawh hi a ni. Engvângin nge hei hi a pawimawh êm êm? Rinawmna i lantîr hnuah chauh upate chuan kohhrana mawhphurhna dang chelh belh tûrin Jehova’n a duh che tih an hriat chian theih dâwn avângin.—Sâm 101:6; 2 Timothea 2:2 chhiar rawh.

15, 16. (a) Eng kawngtein nge Elisa chuan a zirtîrtu chungah zahna a lantîr? (A thupui chunga milem en rawh.) (b) Engtin nge Elisa chuan zâwlnei dangte chu a thlamuan?

¹⁵ Elija aiawhtu Elisa chanchin chuan, tûn laiah unaupate’n thiltawn nei upate chungah zahna an lantîr theih dân a târ lang bawk a. Elija leh Elisa’n Jeriko-a zâwlnei ho an tlawh hnuah, an pahnih chuan Jordan Luiah an kal a. Chutah chuan, “Elija chuan a puan chu a la a, a tumtêl a, tui chu a han vua a, lehlam lehlamah a lo inṭhen ta a.” Lei châra an kal kai hnuah, anni chu ‘an kal dun pahin, an tî tî zêl a.’ Elisa chu thil engkim zir thiam tawhah a inngai lo tih a chiang hle. Elija lâk bova a awm hmaa a thusawi zawng zawng chu a rilruah a vawng reng a. Tichuan, Elija chu ṭhâwngaleivira lâk chhoh a ni ta a ni. A hnuah, Jordan-ah kîrlehin Elisa chuan Elija puanin tui chu a vua a, a au va: “LALPA, Elija Pathian chu khawiah nge?” tiin. Tichuan, tuite chu a inṭhen leh ta a ni.—2 Lal. 2:8-14.

¹⁶ Elisa thil mak tih hmasak ber hi Elija thilmak tih hnuhnung ber nên a inang tih i lo hria em? Chu chu engvângin nge ngaihven awm tak a nih? Hruaitu ber a nih hnuah pawh thil kal hmang vawilehkhata thlâk danglam nghâl ngai niin a hre lo pawh a ni thei ang. Chu aimahin, Elija rawngbâwl dân anga chhunzawmin, amah zirtîrtu zahna a lantîr a, chu chuan zâwlnei dangte a thlamuan a ni. (2 Lal. 2:15) A hnuah, zâwlnei anga kum 60 rawng a bâwl chhûngin, Jehova’n ani chu Elija thilmak tihte aia ropui zâwkte a tihtîr a ni. Tûn laia zirlai i nih angin heta ṭangin eng nge i zir theih?

17. (a) Engtin nge tûn laia zirlaite chuan Elisa rilru put hmang chu an entawn theih? (b) A hun takah, engtin nge Jehova chuan zirlai rinawmte chu a hman mai theih?

¹⁷ Kohhranah mawhphurhna ṭhenkhat i dawn hian, chu chu kal phung thlâk nân—a hmaa lo tih ṭhin dân kalh chiaha thiltih nân—i hmang tûrah ngai suh. Thil thlâk danglam a ṭûl leh ṭûl loh chu, thlâk i duhnaah innghat lovin, kohhran tâna a ṭûl dân leh Jehova inawpna pâwl kaihhruainaah a innghat zâwk a ni. Elisa chuan Elija thiltih dânte anga tihna hmangin zâwlnei dangte a thlamuan bâkah, Elija chungah zahna a lantîr a; chutiang bawkin, nang pawhin thiltawn nei upate Bible ṭanchhana thiltih dân anga tihzawmna hmangin, i unaute chu i thlamuan thei a, thiltawn nei upate zahna i lantîr thei bawk a ni. (1 Korinth 4:17 chhiar rawh.) Mahse, thiltawnte i neih chhoh zêl rualin, Jehova inawpna pâwl hmasâwn zêl ruala kohhran a kal theih nân thlâk danglamnaah i tel ve thei ang. Dik tak chuan, Elisa chunga a thlen ang bawkin, a hun takah Jehova chuan nangni zirlai rinawmte chu in zirtîrtute aia thil ropui zâwk ti tûrin a chêttîr thei che u a ni.—Joh. 14:12.

18. Engvângin nge tûn laiah kohhrana unaupate zirtîrna pêk chu ngaih pawimawh hle tûr a nih?

¹⁸ He thuziak leh thuziak hmasaa rawtnate hian upa tam takte chu mi dangte zirtîr nâna hun insiam tûra a chêttîr kan beisei a. Chûng zirtîrnate chu kohhrana unaupa tling takte chuan lâwm taka pawmin, Jehova berâmte enkawl nân fing takin hmang hlawm rawh se. Chutianga tihna chuan khawvêl puma kohhrante chu a thuam nghet ang a, hun pawimawh tak lo thleng tûrah hian rinawm ṭheuh tûrin min ṭanpui bawk ang. (w15-E 04/15)