1. Thlarau thil siam pakhat Setana a rawn nih dân hrilhfiah rawh.

TUN HMAIN, Jehova hmaah dinhmun ṭha tak a chelh ṭhîn a. Mahse, he thlarau thil siam hian mihringte chibai bûk nih a châk ta tlat mai a. Chu châkna ṭha lo tak chu tihreh ahnêkin, sual a hrin thlengin a châwm lian ta zâwk a. (Jak. 1:14, 15) Chu thlarau thil siam chu Setana tih hmingin kan hria a, ani chu ‘thutakah a awm [nghet] lo.’ Jehova lakah a hel a, “dâwt pa” pawh a rawn ni ta a ni.—Joh. 8:44.

2, 3. “Setana,” “Diabola,” “rûlpui,” leh “drakon” tih ṭawngkamte hian Jehova hmêlma lian ber chungchângah eng nge a târ lan?

² A hel hun aṭangin, Setana chu Jehova hmêlma lian ber a lo ni a; mihringte ṭhian a ni lo chiang hle. Setana tih hming pêk a ni hian a sualzia a târ lang a. Setana tih awmzia chu “Dodâltu” tihna a ni a, chu chuan Pathian lalchungnunna a thlâwp lohzia leh nasa taka a do zâwkzia a târ lang a ni. Thil dang zawng aimahin, Setana chuan Jehova lalchungnunna tâwpna chu hmuh a duh a ni.

³ Thu Puan 12:9-a kan hmuh angin, Setana chu Diabola tia koh a ni bawk a, a awmzia chu “Sawichhetu” tihna a ni. He hian  Jehova chu dawthei tia a sawichhiatna min hriatnawntîr a ni. “Rûlpui tar” tih ṭawngkam hian, Eden huana ni lungchhiatthlâk tak, Evi bum nâna rûl a hman lai kha min hriat chhuahtîr a. “Drakon lianpui” tih chuan kan rilruah sakawlh ṭihbaiawm tak min hriat chhuahtîr a, chu chuan Jehova thiltum dodâl leh A mite tihboral a châkna nasa tak a hril hle a ni.

4. He thuziakah hian eng nge kan sawiho vang?

⁴ Setana chuan kan rinawmna a bei nasa tih a chiang hle. Chhan ṭha tak neiin Bible chuan heti hian min vaukhân a ni: “Ngaihven ula, fîmkhur rawh u; in khingpui Diabola chu sakeibaknei rûm ṭhîn angin a ei theih tûr zawngin a phi ruai ṭhîn,” tiin. (1 Pet. 5:8) Chu vaukhânna chu ngaihtuahin, he thuziakah hian Jehova leh A mite tâna hmêlma hlauhawm tak Setana laka invên a ngaihzia lantîrtu a mize pathum kan ngaihtuah ang.

5, 6. (a) Thlarau thil siamte chu “chaknaa ropuite” an nihzia târ langtu entîrna pe rawh. (b) Setana chu eng kawngin nge “thihna thuneitu” a nih?

⁵ Vântirhkoh tia hriat thlarau thil siamte chu ‘chaknaa ropui takte’ an ni a. (Sâm 103:20) Mihringte aia an ropui zâwk avângin an fingin an chak zâwk bawk. Vântirhkoh rinawmte chuan an thiltihtheihna chu thil ṭha tih nân an hmang ṭhîn a. Entîr nân, ṭum khat chu Jehova vântirhkoh pakhatin hmêlma Assuria sipai mi 185,000 a tihlum a—chu thiltih ropui tak chu mi pakhat tâna tih theih rual a ni lo va, sipai rual tân pawha thil harsa tak tûr a ni. (2 Lal. 19:35) Ṭum dangah, vântirhkoh pakhatin a thiltihtheihna chu tân ina tâng Isua tirhkohte chhuah nân a hmang a. Vêngtute hriat lohvin kawngkhârte chu a hawng a, tirhkohte chu a chhuahtîr a, a khâr leh a—vêngtute hma ngeiah chûng zawng zawng chu a ti a ni.—Tirh. 5:18-23.

⁶ Thlarau thil siam rinawmte’n an thiltihtheihna chu thil ṭha tih nâna an hman laiin, Setana erawh chuan thil sual tih nân a hmang thung a. A thiltihtheihna leh mi a thunun theihna chu a va nasa tak êm! Bible chuan ani chu “he khawvêl lal” tih leh “he khawvêl pathian” tiin a ko hial a ni. (Joh. 12:31; 2 Kor. 4:4) Diabol-Setana chu “thihna thuneitu” a ni hial bawk. (Heb. 2:14) Hei hian mite chu a duh duhin a tihlum thei tihna erawh a ni lo. Mahse, a tualthah duhna rilru put hmang chuan he khawvêl hi a fan chhuak vek a ni. Chu bâkah, Evi chu Setana buma a awm avâng leh Adama’n Pathian thu a âwih loh avângin, sual leh thihna chuan mi zawng zawng a fan chhuak bawk a ni. (Rom 5:12) Chutiang kawng chuan, Diabola chu “thihna thuneitu” a ni a. Isua koh ang ngeiin ani chu ‘tual thattu’ a ni. (Joh. 8:44) Kan hmêlma Setana chuan thil a va ti thei tak êm!

7. Engtin nge ramhuaite chuan thil an tih theihzia an târ lan?

⁷ Setana kan do hian amah chauh kan do lo va, lei leh vâna lalchungnunna thu buaia a lama ṭang zawng zawng pawh kan do tel a ni. Chûng zîngah chuan thlarau thil siam hel, a nih loh leh ramhuai ṭhahnem tâwk tak an tel a. (Thup. 12:3, 4) Ramhuaite chuan mihringte aia an chak zâwkzia an târ lang fo va, an mi sawisakte chu hrehawm nasa tak an tawrhtîr a ni. (Mt. 8:28-32; Mk. 5:1-5) Chûng vântirhkoh suaksualte thiltihtheihna emaw, “ramhuai lal” thiltihtheihna emaw chu ngainêp ngai suh. (Mt. 9:34) Jehova ṭanpuina tel lo chuan, Setana chu kan do hneh ngai lo vang.

8. (a) Setana thiltum chu eng nge ni? (A thupui chunga milem en rawh.) (b) I hmuh dânin, he khawvêl hian engtin nge Setana râwnzia a târ lan?

⁸ Tirhkoh Petera chuan Setana chu “sakeibaknei rûm ṭhîn” nên a khaikhin a. Lehkhabu  pakhat chuan, Grik thu mal “rûm” tia lehlin chu “ram sakawlh rilṭâma rûm” tihna niin a sawi. Chu chuan Setana râwnzia a va târ lang chiang tak êm! Khawvêl pumpui hi a thu nunna hnuaiah a awm reng tawh chung pawhin, ei belh tûr a duh a ni. (1 Joh. 5:19) A tân chuan khawvêl hi “chaw ei tuina” ang lek a ni mai thei. Setana chu a “chaw tak ber”—hriak thih a la bângte leh an ṭhian ‘berâm dangte’—lam a rawn hawi tawh a ni. (Joh. 10:16; Thup. 12:17) Jehova mite ei chu a tum nghet tlat a. Kum zabi khatna aṭanga tûn thlenga Isua hnungzuite nasa taka a tihduhdahna hian a râwnzia a finfiah a ni.

9, 10. (a) Engtin nge Setana chuan Israelte chungchânga Pathian thiltum chu dodâl a tum? (Entîrna pe rawh.) (b) Engvângin nge Setana chuan hmân lai Israelte chu a beih bîk? (c) Tûn laiah Jehova chhiahhlawh pakhatin thil sual pawi tak a tih hian Diabola chu engtin nge awm tûra i rin?

⁹ Pathian thiltum dodâl a tumna lamah, Setana chuan a râwnzia kawng dangin a lantîr leh a ni. Sakeibaknei rilṭâm chuan a sa ei tûr chu a khawngaih ngai lo. A thah hma pawhin a khawngaih lo va, a thah hnuah pawh a inchhîr hek lo. Chutiang bawkin, Setana pawhin ei a tumte chu a khawngaih lo a ni. Entîr nân, Diabol-Setana’n Israel mite chu nungchang bawlhhlawhna leh duhâmna suala an tlûk luh hun a chân dân tûr hi han ngaihtuah teh. Nungchang bawlhhlawh tak Zimria leh mi duhâm tak Gehazia chunga thilthleng lungchhiatthlâk tak i chhiar hian, sakeibakneiin a sa chân a man avânga a hlim hmêl chu i “mitthla” thei em?—Num. 25:6-8, 14, 15; 2 Lal. 5:20-27.

¹⁰ Setana’n hmân lai Israel mite beih chhan tûr ṭha tak a nei a ni. Chu hnam chuan Messia—Setana lû tithitling a, Jehova lalchungnunna thiamchantîrtu tûr—a hring chhuak dâwn si a. (Gen. 3:15) Setana chuan Israel mite an hlawhtlin chu a duh lo va, anni chu suala tihtlûk tumin theih tâwp a chhuah a ni. Setana chuan Davida a uirê khân pawi a ti lo va, zâwlnei Mosia Ram Tiama a luh theih loh khân a khawngaih hek lo. Chu aimahin, Pathian chhiahhlawh pakhatin thil sual lian tak a tih hian Setana chu a lâwm hle zâwk a ni. Chutianga hnehna a chan hun chu Diabola’n  Jehova a sawi chhiat hun a ni thei ngei ang.—Thuf. 27:11.

11. Setana’n Sari a beih chhan chu eng nge ni thei ang?

¹¹ Setana chuan Messia hring chhuaktu tûr thlah kal zêl chu a haw bîk hle a. Entîr nân, Abrahama chu “chi ropui takah” a siam dâwn tih hrilhhriat a nih hnu lawka thilthleng hi han ngaihtuah teh. (Gen. 12:1-3) Abrahama leh Sari chu Aigupta-a an awm laiin, Pharaoa chuan Sari chu a inah a hruai a ni—chu chu nupuia neih a tum vâng niin a lang. Mahse, Jehova chu inrawlhin Sari chu, nungchang lama dinhmun khirh tak lak ata a chhan chhuak a ni. (Genesis 12:14-20 chhiar rawh.) Chutiang thil tho chu, Isaaka pian hma lawkin Gerar-ah a thleng leh a. (Gen. 20:1-7) Chûng thilthlengte phênah chuan Setana a awm em? Ani chuan Ur khaw hausa tak chhuahsana puan ina chêng, Sari chu Pharaoa leh Abimeleka lal in ropui takin a thlêm thlûk a beisei a ni ang em? Sari chuan a pasal—leh Jehova—chu phatsanin, a uirêsan tûrah a ngai a ni thei ang em? Bible chuan a sawi lo; mahse, Diabola chuan Sari chu thutiam thlah hring chhuaktu atâna tlâk lo nihtîr a duh ngei ang tih rin nachhan tûr ṭha tak kan nei a ni. Chu hmeichhe ṭha takin an inneihna te, a hming ṭhatna te, leh Jehova nêna an inzawmnate a hloh chu pawi a ti rêng rêng lo vang. Setana chu a va râwng tak êm!

12, 13. (a) Isua pian hnuah Setana chuan a râwnzia engtin nge a târ lan? (b) Jehova an hmangaih avânga a rawngbâwl tum tûn laia naupangte chu Setana’n engtin nge a ngaiha i rin?

¹² Abrahama hnu kum zabi tam takah Isua a lo piang a. Setana chuan he nausên hi hmêl ṭha tak, duhawm tak, hlutna nei tak anga a ngaih ring suh. Chu aimahin, he nausên hi a rawn puitlin hunah thutiam Messia a ni dâwn tih a hria a. Dik tak chuan, Isua chu Abrahama thlah bul ber a ni a, ‘Diabola hnathawhte tiboraltu’ tûr a ni. (1 Joh. 3:8) Setana chuan he nausên nunna lâk hi a nunrâwnthlâk lutukah a ngai ang em? Ani chuan nunchang âwm leh mawi a nei lo. Naupang Isua nunna lâk nghâl chu a hreh lo rêng rêng a ni. Engtin nge a nunna lâk a tum?

¹³ Mi fingte’n “Judate lal lo piang” chungchâng an zawh chuan Lal Heroda chu a lungni lo hle a, naupang chu thah a tum ta a. (Mt. 2:1-3, 13) A thah ngei theih nân, Bethlehem leh a chhehvêla chêng kum hnih leh a hnuai lam mipa naupang zawng zawng tihlum vek tûrin thu a pe ta a ni. (Matthaia 2:13-18 chhiar rawh.) Isua chuan chu tualthahna hlauhawm tak chu a pumpelh a; mahse, hei hian kan hmêlma Setana chungchâng eng nge min hriattîr? Diabola’n mihringte nunna a hlut lohzia a finfiah chiang hle. Naupangte chungah lainatna a nei lo tih a chiang hle bawk. Setana chu “sakeibaknei rûm ṭhîn” a ni tak zet a ni. A râwnzia hi ngainêp ngai suh ang che!

14, 15. Engtin nge Setana chuan ‘ring lote rilru a tihdel’?

¹⁴ Setana chuan bumna hmang chauhvin mite chu hmangaihna Pathian, Jehova a hnuchhawntîr thei a. (1 Joh. 4:8) Chu bumna hmang tho chuan, mite chu “an thlarau lam mamawh hriate” ni lo tûrin a dang bet a ni. (Mt. 5:3, New World Translation) Chutiang chuan “Krista, Pathian anpui chanchin ṭha êng chuan anmahni a chhun ên theih lohna tûrin . . . ring lote rilru a tidel” a ni.—2 Kor. 4:4.

¹⁵ Setana’n mite bum nâna a hman ber chu sakhaw dik lo hi a ni a. Mite’n Jehova, “Pathian thîkthuchhia” be lo va, an thlahtute, a nih loh leh leia thil awmte emaw, thil nungte emaw an bia a hmuh hian a va lâwm dâwn  êm! (Ex. 20:5) Ṭha taka Pathian bia anga inngai mi tam tak chu rinna dik lo leh thil serh leh sângte phuar behin an awm a ni. Anni chu dinhmun khawngaihthlâk takah an ding a, an hnênah Jehova chuan heti hian a ngên a ni: “Chaw ni si lovah eng vângin nge tangka in sên? Puar leh fânna ni si lovah eng vângin nge in thâ in sên? Ka thu ngun takin ngaithla ula, thil ṭha chu ei rawh u, in nunna chu thil thauvah chuan hlim rawh se,” tiin.—Is. 55:2.

16, 17. (a) Engvângin nge Isua chuan Petera chu: “Setan, ka hnungah kal rawh!” tia a hrilh? (b) Hun hmâwr taka kan awm tawhzia chungchângah Setana chuan engtin nge min bum theih?

¹⁶ Setana chuan Jehova chhiahhlawh ṭhahnemngai takte pawh a bum thei a. Entîr nân, Isua’n a zirtîrte hnêna tihhlum a nih tûr thu a hrilh laia thilthleng kha han ngaihtuah teh. Rilru ṭha tak puin, Petera chuan, ani chu a hruai hrang a: “Lalpa, Pathianin khawngaih che rawh se; chûng chu i chungah a thleng tawp lo vang,” tiin a hrilh a. Isua’n Petera chu khauh takin: “Setan, ka hnungah kal rawh!” tiin a chhâng lêt a ni. (Mt. 16:22, 23) Engvângin nge Isua’n Petera chu “Setan” tia a koh? Isua chuan thil lo thleng tûr a hriat vâng a ni. Tlanna inthawina atâna a thih hun tûr leh, Diabola chu dawthei a nihzia a finfiah hun tûr a hnai tawh hle a. Chu mihring chanchina hun pawimawh lai berah chuan Isua tân mahni ‘inkhawngaih’ hun a ni lo. Inthlahdah taka awmtîr chu Setana duhzâwng tak a ni ngei ang.

¹⁷ He khawvêl tâwpna kan hnaih zêl rualin, keini pawh hun khirh takah kan nung a. Setana chuan inthlahdah tûr te, he khawvêla hmun inkhuarna hmanga mahni ‘inkhawngaih’ tûr te, leh hun hmâwr taka kan awm tawhzia theihnghilh tûr tein min duh a ni. Chutiang chu i chungah thlentîr suh! Chu aimahin, ‘ngaihven rengin awm zâwk rawh.’ (Mt. 24:42) Tâwpna chu a lo thleng lawk lo vang tih emaw, a lo thleng ngai lo vang tih emawa Setana bumna chu ring ngai suh ang che.

18, 19. (a) Mahni kan inngaih dân chungchângah Setana chuan engtin nge min bum mai theih? (b) Ngaihven tûr leh fîmkhur tûrin engtin nge Jehova’n min ṭanpui?

¹⁸ Setana chuan kawng dang pawhin min bum a tum a. Ani chuan Pathian tâna hmangaih theih rual loh leh kan sualte chu ngaihdam theih rual loh anga kan ngaih chu a duh a ni. Chu chu Setana bumna zînga mi a ni a. Tihah chuan, Jehova tâna hmangaih theih rual loh chu tu nge ni? Setana a ni. Ngaihdam theih rual loh chu tu nge ni? Setana bawk a ni. Mahse, Bible chuan heti hian min tiam a ni: “In hnathawh leh a hming chunga hmangaihna in lantîr . . . chu theihnghilh tûrin Pathian chu mi fel lo a ni si lo va,” tiin. (Heb. 6:10) Jehova chuan amah tihlâwm tuma theih tâwp kan chhuahna chu a ngaihlu a, a rawng kan bâwlna chu a thlâwn lo. (1 Korinth 15:58 chhiar rawh.) Chuvângin, Setana chu i inbumtîr lo vang u.

¹⁹ Kan hmuh tawh angin, Setana chu thiltithei tak, râwng tak, leh bumhmang tak a ni a. Engtin nge chutiang hmêlma hlauhawm tak chu kan do hneh theih ang? Jehova chuan vênhimna pe lovin min thlahthlam lo vang. A Thu, Bible chuan Setana kawngte chungchâng chu min zirtîr a, “a ngam thlêmna chu kan hai si lo.” (2 Kor. 2:11) Setana min bum dânte kan hriatthiam hian, ngaihvenin kan fîmkhur lehzual thei bawk ang. Mahse, Setana ngam thlêmnate hriat mai hi a tâwk lo. Bible chuan: “Diabola dodâl rawh u, tichuan a tlân bosan ang che u,” tiin a sawi si a. (Jak. 4:7) A dawta thuziakah chuan Setana kan do hneh theih dân kawng thumte kan sawiho vang. (w15-E 05/15)