TUN hnai mai khân zir chîk mi pakhatin Kristian sakhaw pâwl chi hrang hranga awm ṭhalai 800 aia tamte hnênah Isua’n ṭawngṭaina a chhâng tih an rin leh rin loh a zâwt a. Zaa 60 chuangte chuan a chhâng tih an ring nghet tlat a ni. Mahse, hmeichhe pakhat chuan Isua hming chu thai chhiain, a aiah “Pathian” tiin a ziak a ni.

Engtin nge i ngaih? Isua hnênah nge kan ṭawngṭai ang a, Pathian hnênah zâwk? * A chhânna hriat nân, Isua’n a zirtîrte hnêna ṭawngṭai dân tûr a zirtîr dân hi i lo ngaihtuah hmasa ang u.

Isua’n tu hnênah nge kan ṭawngṭai ang tih chungchâng min zirtîrin, kan tân entawn tûr min hnutchhiah a ni.

ISUA ZIRTIRNA: A zirtîrte zînga pakhatin Isua hnêna: “Lalpa, ṭawngṭai dân . . . min zirtîr ve ta che,” a tih khân, Isua’n heti hian a chhâng a ni: “In ṭawngṭai chuan heti hian ti ang che u, ‘Kan Pa,’” tiin. (Luka 11:1, 2) Chu bâkah, Tlâng Chunga Thusawi hmingthang takah, Isua chuan a thu ngaithlatute chu: “I Pa . . . hnênah chuan ṭawngṭai rawh,” tiin a hrilh bawk. Hetianga sawiin anni chu a thlamuan bawk: “Amah in dîl hmain in Pa chuan engte nge in mamawh tih a hre reng,” tiin. (Matthaia 6:6, 8) A thih hma zân khân, a zirtîrte hnênah: “Pa hnênah engpawh in dîl chuan, keima hmingin a pe ang che u,” tiin a hrilh a. (Johana 16:23) Chutiang chuan, Isua’n a Pa leh kan Pa, Pathian Jehova hnêna ṭawngṭai tûrin min zirtîr a ni.—Johana 20:17.

ISUA ENTAWN TUR SIAM: Isua chuan mi dangte hnêna ṭawngṭai dân tûr a zirtîr ang bawkin, amah ngei pawhin: “Aw ka Pa, lei leh vân Lalpa, . . . ka fak a che,” tiin a ṭawngṭai a. (Luka 10:21) Ṭum dangah, “Isua a vanvadâk a, ‘Ka Pa, ka thu i ngaihthlâk avângin i chungah ka lâwm e,’” tiin a ṭawngṭai a ni. (Johana 11:41) A thih dâwnah pawh: “Ka Pa, i kutah ka thlarau ka kawltîr e,” tiin a ṭawngṭai bawk. (Luka 23:46) A Pa, vâna mi—“lei leh vân Lalpa”—hnênah ṭawngṭaiin, kan tân entawn tûr ṭha min hnutchhiah a ni. (Matthaia 11:25; 26:41, 42; 1 Johana 2:6) Isua zirtîr hmasate chuan a kaihhruaina pêk chu hetiang zâwng hian an hre thiam em?

Isua vâna a kîr hnu lawkah, a zirtîrte chuan dodâltute tihhrehawm leh vau an tâwk a. (Tirhkohte 4:18) Ṭanpuina dîlin an ṭawngṭai a—mahse, tu hnênah nge an ṭawngṭai? “Pathian hnênah” anmahni ṭanpui zêl tûrin ‘a chhiahhlawh thianghlim Isua hmingin’ an ṭawngṭai a ni. (Tirhkohte 4:24, 30) Chutiang chuan zirtîrte chuan ṭawngṭaina chungchânga Isua kaihhruaina pêk chu an zâwm a. Isua hnênah ni lovin, Pathian hnênah an ṭawngṭai a ni.

Kum tam tak hnuah, tirhkoh Paula chuan amah leh a ṭhiante ṭawngṭai dân chu a sawi a. A Kristian unaute hnêna lehkha a thawnnaah heti hian a sawi a ni: “In tâna ṭawngṭai fovin, Pathian kan Lal Isua Krista Pa hnênah chuan lâwmthu kan hril ṭhîn,” tiin. (Kolossa 1:3-5) Paula chuan a rinpuite hnênah pawh: “Kan Lalpa Isua Krista hmingin, Pathian, Pa  ngei hnênah chuan engkim chungah lâwmthu hril fo rawh u,” tiin a ziak bawk. (Ephesi 5:20) Hêng thute aṭang hian, Paula chuan mi dangte chu a “Pathian, Pa hnênah chuan” Isua hminga ṭawngṭai tûrin a fuih tih kan hmu a ni.—Kolossa 3:17.

Kristian hmasate ang bawkin, ṭawngṭaina chungchânga Isua kaihhruaina pêk chu zâwmin amah kan hmangaihzia kan lantîr thei a ni. (Johana 14:15) Kan Pa vâna mi hnênah chauh kan ṭawngṭai hian Sâm 116:1, 2 thu: “LALPA chu ka hmangaih a ni, ka aw . . . a ngaihthlâk avângin. . . . Ka dam chhûng zawngin amah chu ka ko vang,” tih hian kan tân awmzia a nei lehzual a ni. * ▪ (wp15-E 01/01)