Bible Ṭanchhan Zawhnate Chhânna
Rorêlna Nî chu eng nge ni?
Rorêlna nî chu engvângin nge hun hlimawm tak a nih ang?
Bible hun laiin, Pathianin rorêl dik lohna laka a mite hum tûrin rorêltute a hmang a. (Rorêltute 2:18) Bible chuan lo thleng tûr Rorêlna Nî chu Pathian Jehova’n leia ro a rêl a, rorêl dik lohna ata mihringte a chhan chhuahna hun hlimawm tak niin a sawi a ni.—Sâm 96:12, 13; Isaia 26:9 chhiar rawh.
Pathianin Isua chu mitthite leh mi nungte chunga fel taka rorêl tûrin a ruat a. (Tirhkohte 10:42; 17:31) Mi tam tak chu Pathian hre lovin an thi tawh a. Rorêlna Nî-ah Isua chuan chûng mite chu Pathian dik an hriat a, an hmangaih theihna tûrin a kaitho vang.—Tirhkohte 24:15 chhiar rawh.
Engvângin nge Rorêlna Nî chuan kum sâng khat a awh ang?
Kum sâng khat chhûngin mitthite chu kaihthawh an ni ang a. (Thu Puan 20:4, 12) Anni chuan Pathian dânte zir tûr leh zâwm tûrin hun an mamawh ang. Mi nâwlpuite ngaih dân nêna inkalh takin, anni chu an thawhleh hnua an thiltih ang zêla rorêlsak an ni ang tih Bible chuan a târ lang a ni.—Rom 6:7 chhiar rawh.
Bible chuan kum sâng rorêlna inṭan hmaa vawi leh khata lo thleng tûr rorêlna ni chanchin chu a sawi bawk a. Chu nî chu he magazine a kâwm thu-a târ lan angin khawvêl tâwpna tia koh a ni bawk. Chu mi nîah chuan Pathianin amah ngaihsak lo, mi suak sual zawng zawng chu a tiboral vek ang. (2 Petera 3:7) Chuvângin, Pathian kan hmangaihna vawng reng tûrin kan fîmkhur tûr a ni.—2 Petera 3:9, 13 chhiar rawh. (wp15-E 05/01)
