1. Thil kan la hmuh lohte mitthla theihna chu engtin nge kan hlâwkpui theih? (A thupui chunga milem en rawh.)

KAN la hmuh loh thilte kan mitthla thei hi Pathian thilthlâwnpêk a ni a. Chu chuan ruahmana fing tak min siamtîr theiin, thil ṭhate beiseina min neihtîr thei bawk. Jehova chuan nakin huna thil lo thleng tûrte chu a hre lâwk thei a, chûng chu Bible aṭangin min hrilh ṭhîn a ni. Thil lo thleng tûrte chu kan mitthla thei a. Dik tak chuan, thil kan la hmuh lohte mitthla theihna chuan rinna nei tûrin min ṭanpui a ni.—2 Kor. 4:18.

2, 3. (a) Engvângin nge kan thil mitthlain a ṭanchhan chu a pawimawh? (b) He thuziakah hian eng zawhnate nge kan sawiho vang?

² Kan hmuh ngai loh thilte mitthlana chuan thil awm tak tak lote a ṭanchhan thei a. Entîr nân, hmeichhe naupangtêin phêngphehlep chunga chuang anga a inmitthla chuan chu chu suangtuahna mai a ni. Mahse, Hani’n a fapa Samuela chu biak bûka rawngbâwl tûra a va thlah huna a awm dân tûr a mitthlana chuan ṭanchhan tûr a nei—rilrua tih a tum tlat chu. Chu chuan a thiltumte hlen tûrin ani chu a ṭanpui a ni. (1 Sam. 1:22) Chutiang bawkin, Pathianin tih atâna a lo tiam tawhte kan mitthla  chuan, thil lo thleng ngei ngei tûrte chu kan ngaihtuah tihna a ni.—2 Pet. 1:19-21.

³ Bible hun laia mi rinawm tam takin Pathian thutiamte an lo mitthla ṭhîn tih chu rinhlelh rual a ni lo. Engtin nge chûng mite chuan nakin huna an dawn tûr malsâwmnate mitthlana chu an hlâwkpui? Pathianin thu âwih mihringte tâna malsâwmna a sawi lâwkte ngaihtuah chu engtin nge kan hlâwkpui theih?

4. Abela chuan nakin hun tûr mitthla tûrin ṭanchhan tûr eng nge a neih?

⁴ Mi rinawm hmasa ber, Abela chuan Jehova thutiam thlen famkimna a “hmu” em? Ani chuan Pathian thu-a chuang rûl hnêna a thutiam: “Nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang: chu mi chuan i lû a la tithitling ang a, nangin a ke artui i la tithitling ang,” tih a thlen famkim dân tûr a hre lâwk tih kan sawi thei lo. (Gen. 3:14, 15) Mahse, Abela chuan chu thutiam chu nasa taka a ngaihtuah ngei a rinawm a, mihringte chuan Adama leh Evi-te’n an sual hmaa an neih ang nun ṭha famkim nei leh tûr chuan tuemaw ‘ke artui tihthitlin’ a ngai ang tih a hriat ngei a rinawm. Nakin hun atâna a mitthla chu eng pawh ni se, Pathian thutiama innghat rinna a nei a; chuvângin, Jehova chuan a inthawina hlan chu a pawmsak a ni.—Genesis 4:3-5; Hebrai 11:4 chhiar rawh.

5. Engvângin nge nakin hun tûr a mitthlana chuan Enoka chu a tihchak ang?

⁵ Mi rinawm Enoka chuan Pathian dodâl zâwnga thu khauh tak tak sawitu Pathian ngaihsak lo mite a hmachhawn chung pawhin rinna a târ lang a. Jehova chu “mi zawng zawng chunga rorêl tûr leh Pathian ngaihsak lote zawng zawng Pathian ngaihsak lohna hna Pathian ngaihsak lo chunga an thawh zawng zawng kawngah leh Pathian ngaihsak lo mi sualten a chungah thu khauh tak an sawi zawng zawng kawnga thiam loh chantîr tûrin Lalpa chu a mi thianghlim sîngkhatte nên a lo kal” dâwn tih hrilh lâwk tûrin Enoka chu Pathianin a thâwk khum a ni. (Jud. 14, 15) Rinna târ langtu a nih angin, Enoka chuan Pathian ngaihsak lote awm tawh lohna khawvêl chu a mitthla thei ngei ang.—Hebrai 11:5, 6 chhiar rawh.

6. Tuilêt hnuah Nova’n a rilruah eng nge a vawn chhunzawm zêl theih?

⁶ Nova chu a rinna avângin Tuilêtah a dam khawchhuak a. (Heb. 11:7) Tuilêt hnuah, a rinna chuan rana inthawi tûrin a chêttîr a ni. (Gen. 8:20) Abela ang bawkin, mihringte chu a tâwpah sual leh thihna bâwih ata chhuah an ni ang tih rinna a nei a ni. Nova chu Tuilêt hnua Nimroda’n Jehova dodâla thil a tih hun thlengin a la dam a, rinna leh beiseina a la nei reng a ni. (Gen. 10:8-12) Mihringte chu rorêlna tawrhhlelhawm tak ata te, an rochun sual ata te, leh thihna ata te an zalên hun a ngaihtuahna chuan a tiphûr ngei ang. Keini pawhin, chutiang hun ropui tak chu kan “hmu” thei a—chu chu a hnai tawh hle!—Rom 6:23.

7. Abrahama te, Isaaka te, leh Jakoba te chuan nakin hun tûr eng nge an “hmuh” theih?

⁷ Pathianin an thlahte hmanga khawvêla hnam tinin malsâwmna an dawng thei dâwn tih a tiam avângin, Abrahama te, Isaaka te, leh Jacoba te chuan nakin hun ropui tak chu an mitthla thei a. (Gen. 22:18; 26:4; 28:14) An thlahte chu mi tam tak lo niin, Pathian pêk Ram Tiam an la luah dâwn a ni. (Gen. 15:5-7) Chûng Pathian ṭih mite chuan rinna avângin an thlahte’n chu ram an luah dân  tûr chu an “hmu” thei a. Mihringte’n ṭhat famkimna an hloh aṭang khân, Adama chân tâk malsâwmnate chu a bo hlen dâwn lo tih Pathian Jehova’n a chhiahhlawh rinawmte chu a tiam tawh a ni.

8. Rinna nasa tak târ lang tûrin Abrahama chu engin nge ṭanpui?

⁸ Abrahama’n rinna nasa tak a târ lan theih chhan chu Pathian thutiamte a mitthla theihna niin a lang. Bible chuan Abrahama leh Pathian chhiahhlawh mi rinawm dangte chuan an hun laiin ‘thiltiamte chu chang lo’ mah se, “chûng chu hla tak aṭanga hmuin chibai an lo bûk tawh,” tih a sawi a. (Hebrai 11:8-13 chhiar rawh.) Abrahama chuan a thil beiseite chu a tak a ni tih târ lanna tam tak a nei a, a mita a hmuh loh chu hmu ang mai a ni.

9. Engtin nge Pathian thutiamte a rinna chu Abrahama chuan a hlâwkpui?

⁹ Abrahama’n Pathian thutiamte a rinna chuan Pathian duhzâwng tih a tumna chu a tinghet a. Rinnain ani chuan Ur khawpui chu a chhuahsan a, Kanaan ram khawpui a engah mah hian inbenbel a tum lo. Ur khawpui ang bawkin, Pathian ngaihsak lo sawrkârte avângin Kanaan ram khawpuite chu a nghet lo a ni. (Jos. 24:2) Abrahama chuan a dam chhûng zawngin “khua lungphûmte nei mi, Pathian rêlbâwl leh siam chu a nghâk reng” a ni. (Heb. 11:10) Abrahama chu Jehova rorêlna hnuaia hmun ngheta awm angin a ‘inhmu’ a. Abela te, Enoka te, Nova te, Abrahama te, leh anmahni ang mi dangte chuan thawhlehna chu an ring a, “khua lungphûmte nei mi,” Pathian Ram hnuaia leia nun chu an beisei a ni.—Hebrai 11:15, 16 chhiar rawh.

10. Engtin nge Sari chuan nakin hun tûr a thlîrna chu a hlâwkpui?

¹⁰ Abrahama nupui Sari chungchâng hi han ngaihtuah teh. Nakin hun tûr a ṭha zâwnga a thlîrna chuan kum 90 mi nia fa a la neih loh pawhin rinnain thil a ti a. A thlahte chu Jehova thutiam malsâwmnate chên angin a hmu tih theih a ni. (Heb. 11:11, 12) Engin nge chutiang beiseina chu neihtîr? Jehova’n a pasal Abrahama hnênah heti hian a sawi a ni: “Ani chu mal ka sâwm ang a, chu lo pawh chu ama lakah chuan fapa ka pe ang che: a ni, amah chu mal ka sâwm ang a, chi hrang hrang thlahtunu a ni tawh ang; hnam hrang hrang lalte ama lakah chuan an lo chhuak ang,” tiin. (Gen. 17:16) Sari chuan Isaaka a neih hnu chuan, Abrahama hnêna Pathian thutiam dangte thlen famkimna mitthla chhan tûr ṭha tak a nei ta a ni. Keini pawhin Pathian thutiam lo thleng ngei tûrte kan mitthla thei hi thilpêk hlu a va ni tak êm!

11, 12. Engtin nge Mosia chuan Jehova hmangaihna a neih?

¹¹ Jehova chunga rinna târ lang a, Pathian hmangaihna nasa tak neitu dang chu Mosia a ni a. Aigupta lal in ropui taka a chên laiin, thu neihna leh hausakna chu awlsam takin a ngaina thei a ni. Mahse, a nu leh pa dik takte hnên aṭangin Jehova chungchâng leh Hebrai mite chu bâwih ata chhuakin, Ram Tiam pêk an ni dâwn tih Pathian thiltum chu a zir ngei ang. (Gen. 13:14, 15; Ex. 2:5-10) Mosia’n nakin huna Pathian mite malsâwmna dawn tûr a ngaihtuah ṭhin chuan, a thinlungah eng nge ṭhang lian tûra i ngaih? Challan duhna nge ni ang a, Jehova hmangaihna zâwk?

¹² Bible chuan: “Rinnain Mosia chuan a lo puitlin hnu khân Pharaoa fanua fapaa vuah a duh lo va; rei lo tê atân sual nawmna hlimpui ai chuan Pathian mite nêna tihduhdah tuar a thlang ta zâwk a; Krista an hmuhsitna  chu Aigupta ram rote ai chuan sum ropui zâwkah a ruat a; lâwmman pêk tûr chu a thlîr ṭhin avângin,” tiin min hrilh a ni.—Heb. 11:24-26.

13. Engtin nge Mosia chuan Pathian thutiamte ngun taka ngaihtuahna chu a hlâwkpui?

¹³ Mosia chuan Israel mite tâna Jehova thutiam ngun taka a ngaihtuah hian, Pathian a rinna leh a hmangaihna chu a ṭhang chho zêl a. Pathian ṭih mi dangte ang bawkin, Jehova’n thihna ata mihringte a chhuah zalên hun tûr chu a mitthla thei ngei ang. (Job. 14:14, 15; Heb. 11:17-19) Hebrai mite leh mihring zawng zawngte khawngaihtu Pathian a hmangaih pawh hi a mak lo ve. Mosia nun pumhlûm chu rinna leh hmangaihnain a chêttîr a. (Deut. 6:4, 5) Pharaoa’n tihhluma a vau hunah pawh Pathian a rinna leh a hmangaihna bâkah, nakin hun hlim awm tak a mitthlana chuan, Mosia chu huaisen tûrin a tichak a ni.—Ex. 10:28, 29.

14. Eng anga ngaihtuah hi nge suangtuahna dik tak chu?

¹⁴ Tûn laia mi tam takte chuan nakin hun tûr chu inâwm lo takin an mitthla a. Entîr nân, anni chu rethei hle mah se, hausak leh him taka awm chu an mitthla a; tûna mihringte nun erawh chu “thawhrimna leh lungngaihna mai a ni.” (Sâm 90:10) Mihringte beisei tûr dik tak chu Pathian Ram chauh a ni tih Bible-in a sawi laiin, anni chuan mihring sawrkâr hnuaia lungkhamna awm lova nun chu an mitthla a. (Dan. 2:44) Mi tam tak chuan Pathianin he khawvêl suaksual hi tiboral lo tûrah an ngai a; mahse, Bible chuan a tiboral dâwn tih chiang takin a sawi thung. (Zep. 1:18; 1 Joh. 2:15-17) Nakina lo thleng tûr Jehova thiltumte ngaihsak lo chûng mite beiseina chu suangtuahna mai a ni.

15. (a) Kristiante chuan an beiseina mitthlana chu engtin nge an hlâwkpui? (b) Pathianin a thutiamte a thlen famkimtîr huna i nghahhlelh ber chu sawi rawh.

¹⁵ Kawng lehlamah chuan, kan beisei chu vân a ni emaw, lei a ni emaw pawh ni se, mitthla tûra fuih kan ni a. Pathian thutiamte hlim taka chên angin i inmitthla thei em? Pathian thutiamte thlen famkimna i ngaihtuah hunah, i hlim ngei ang tih rinhlelh rual a ni lo. Leia chatuana nung angin i ‘inhmu’ pawh a ni thei a. He khawvêl pumpui hi paradis-a siamnaah mi dangte thawhpui angah han inchan teh. Nangmah ang bawkin, i vêngte chuan Jehova an hmangaih a. I hrisêl ṭhain, i chak a, hmabâk hlimawm tak i nei a ni. Siam ṭhatna hna thawktute chuan an ngaihsak tak zet che avângin nun hlimawm tak i nei a. I thiltih apiangin mi dangte hlâwkna leh Pathian chawimawina a thlen avângin i thiamnate chu phal takin i hmang bawk a ni. Entîr nân, mitthi tho lehte chu Jehova hre tûrin i ṭanpui a ni. (Joh. 17:3; Tirh. 24:15) Hei hi suangtuahna mai a ni lo. He mitthla duhawm tak hian nakin hun chungchânga Bible thutak a ṭanchhan si a.—Is. 11:9; 25:8; 33:24; 35:5-7; 65:22.

16, 17. Kan beiseina chungchâng sawi chu engtin nge kan hlâwkpui?

¹⁶ Jehova’n a thutiamte a thlen famkimtîr huna kan tih duhte chungchâng Kristian unaute hnêna kan sawi hian, nakin hun tûr kan mitthla chu a fiah lehzual a ni. Kan zînga tumahin khawvêl thar lo thlen huna kan mi mal dinhmun tûr chu hre chiang thei lo mah ila, thil ni thei âwmte kan sawi hian kan infuih tawnin, Pathian thutiam a takzia kan rinna kan târ lang a ni. Tirhkoh Paula’n Rom khuaa a unaute a tlawh khân, anni  chuan “inthlamuan tawn” chu an ngaihlu hle a, keini pawhin hêng hun khirh takah hian kan ngaihlu ve a ni.—Rom 1:11, 12.

¹⁷ Nakin hun tûr mitthlana chuan, tûn laia harsatna kan tawhte ngaihtuah lutuk lo tûrin min ṭanpui thei bawk a. Tirhkoh Petera chuan, chutiang ngaihtuahna chu a nei a ni mai thei, Isua hnênah heti hian a sawi si a: “Ngai teh, keinin engkim kalsanin kan zui ta chia; eng nge kan hmuh ang le?” tiin. Petera leh mi dangte chu nakin hun tûr mitthla thiam tûra ṭanpui nân Isua’n heti hian a chhâng lêt a ni: “Tih tak meuhvin ka hrilh a che u, Siamtharnaah chuan, Mihring Fapa a ropuina ṭhutphaha a ṭhut hunah, nangni mi zuitute ho hi, Israel hnam sawm leh hnam hnihte chu ngaihtuahin, lalṭhutphah sâwm leh pahnihah in la ṭhu ve ang. Tin, mi tin inte emaw, unaute emaw, farnute emaw, pa emaw, nu emaw, fate emaw, ramte emaw ka hming avânga kalsan apiang chuan a leh za an hmu ang a, chatuana nunna an la chang bawk ang,” tiin. (Mt. 19:27-29) Chuvângin, Petera leh zirtîr dangte chuan khawvêl pumpuia ro an rêl hun tûr leh, chu chuan thu âwih mihringte tân malsâwmna ropui tak a thlen hun tûr chu an ngaihtuah thei a ni.

18. Engtin nge Pathian thutiamte thlen famkim hun ngaihtuah chu tûn laiah kan hlâwkpui?

¹⁸ Jehova lei lam chhiahhlawhte chuan Pathian thutiamte thlen famkim hun chungchâng ngaihtuahna chu an hlâwkpui ṭhîn a. Abela chuan nakin hun ṭha zâwk mitthla thei tûr, rinna nei tûr, leh beiseina rin tlâk nei thei tûr khawpin Pathian thiltumte hriatna a nei tam tâwk a ni. Abrahama chuan rinna thiltih langsâr takte a tih theih chhan chu thutiam “thlah” chungchânga Pathian hrilh lâwkna thlen famkimna thil engemaw a ‘hmuh’ vâng a ni. (Gen. 3:15) Mosia chuan “lâwmman pêk tûr chu a thlîr ṭhin avângin” rinnain thil a ti a, Jehova a hmangaihna chu a ṭhang chho a ni. (Heb. 11:26) Jehova thutiam thlen famkimna mitthla tûra kan theihnate kan hman zêl hian, amah kan rinna leh kan hmangaihna pawh a pung chho zêl ang. He Pathian thilpêk a ṭha thei ang bera kan hman theih dân chu a dawta thuziakah sawiho a ni ang. (w15-E 05/15)