1. (a) Engvângin nge tûna Setana kan do chu a pawimawh êm êm? (b) Setana chu kan do hneh thei tih engtin nge kan hriat?

SETANA chuan hriak thih a la bângte leh ‘berâm dangte’ chu a do va. (Joh. 10:16) Diabola thiltum ber chu a hun neih tlêm te chhûnga Jehova chhiahhlawh a tam thei ang berte ei hi a ni. (Thu Puan 12:9, 12 chhiar rawh.) Setana chu kan do hneh thei ang em? Thei e! Bible chuan: “Diabola dodâl rawh u, tichuan a tlân bosan ang che u,” tiin a sawi si a.—Jak. 4:7.

2, 3. (a) Engtin nge Setana a awm tak tak lo tih ngaih dân chuan a thiltum hlawhtling tûrin a ṭanpui? (b) Setana chu a awm tak tak tih engtin nge i hriat?

² Mi tam takte chuan Setana a awm tih ngaih dân chu an nuihzat a. An tân chuan, Setana leh ramhuaite chu mi awm tak tak an ni lo; thawnthubu te, ramhuai film te, leh video game tea changtute mai an ni. Chûng mite ngaihah chuan mi fingvâr tumahin thlarau sualho an awm tih an ring lo. Awle, Setana leh hmuh theih loh a ṭhuihhruaite chu mi awm tak tak ni lo thawnthua mi ang leka ngaih an ni chu Setana chuan pawi a ti ang em? Pawi a tih a rinawm lo hle! Setana tân chuan amah a awm tih ring lotute rilru tihdelsak chu a awlsam hle dâwn si a. (2 Kor. 4:4) Thlarau sual a awm lo tih ngaih dân lâr tak hi Setana’n mite a bum dân kawng tam tak zînga pakhat a ni.

 ³ Jehova chhiahhlawhte kan nih avângin, chutianga buma awmte zîngah chuan kan tel ve lo va. Rûl hmanga Evi a biakna aṭangin Diabola chu a awm tak zet tih kan hria a ni. (Gen. 3:1-5) Setana chuan Joba chungchângah Jehova a sawichhia a. (Job. 1:9-12) Isua thlêm tumtu pawh Setana bawk a ni. (Mt. 4:1-10) Tin, kum 1914-a Pathian Ram a pian hnuah, Setana chu hriak thih a la bângte “do tûrin” a chhuak bawk. (Thup. 12:17) Setana chuan hriak thih mi 1,44,000 te zînga a la bângte leh berâm dangte rinna tihchhiat a la tum zêl avângin, chu indona chu a la tâwp lo. Chu indonaa hnehna chang tûrin, Setana kan dodâlin, rinna nghet tak kan nei reng tûr a ni. Chutianga kan tih theih dân tûr chu he thuziakah hian sawiho a ni.

4. Engtin nge Setana chuan mi chapo tak a nihzia a târ lan?

⁴ Setana chu a inngaitlâwm lo rêng rêng a. A nihna takah chuan, thlarau thil siam pakhat tâna Jehova lalchungnunna cho tûra huaisenna nei a, amah eptu pathiana insiam chu chapona chhinchhiahna ber a ni. Chuvângin, Setana kan do theih dân kawng khat chu chapona hawisan a, inngaihtlâwmna neih hi a ni.—1 Petera 5:5 chhiar rawh.

5, 6. (a) Mahni inngaihhlutna neih chu a sual em? Hrilhfiah rawh. (b) Chapona neih a hlauhawmzia târ langtu Bible entîrna ṭhenkhat chu engte nge ni?

⁵ Mahni inrin tâwkna leh zahawm nia inhriatna neih chu a sual lo va; keimahni emaw, kan ṭhiante emawin thil ṭha tak an tih, a nih loh leh an neih huna lungâwina neih chu a sual lo. Tirhkoh Paula chuan Thessalonika khuaa mite hnênah chuan: “Mi tihduhdahna che u zawng zawngah leh hrehawm in tuarnaahte chuan in chhelzia leh in rinzia avângin Pathian kohhran pâwlte zîngah chuan keinin kan chhuang ṭhîn che u a ni,” a ti a. (2 Thes. 1:4) Chuvângin, mi dangte thil tih ṭhat avânga lungâwina neih leh engemaw chena inchhuanna neih chu a ṭha a ni. Kan chhûngkua te, hnamzia te, a nih loh leh kan seilenna te chu zahpui tûra beisei kan ni si lo va.—Tirh. 21:39.

⁶ Kawng lehlamah chuan, inlaichînna leh Jehova nêna inṭhianna tichhe thei chapona a awm a. Chutiang chapona chuan kan mamawh tak zilhnate inngaitlâwm taka pawm aiin, ngaih huatna min neihtîrin, min hnâwltîr thei a ni. (Sâm 141:5) Hetiang chapona hi “a lutuka mahni inngaihsânna,” a nih loh leh “chhan leh vâng ṭha a awm loh thlenga mi dangte aia ṭha zâwk nia inhriatna neite lantîr rilru put hmang” tia hrilhfiah a ni a. Jehova chuan chutiang chapona chu a hua a ni. (Ezek. 33:28; Amos. 6:8) Mahse, mihringte’n chapona an lantîr hian Setana chu a lâwm hle a ni; chu chu ama neih ang invaivungna rilru put hmang lan chhuahna a ni si a. Nimroda te, Pharaoa te, leh Absaloma te’n nasa taka chapona an lantîr hian Setana chu a va lâwm dâwn tak êm! An zain chapona thangah an âwk a ni si a! (Gen. 10:8, 9; Ex. 5:1, 2; 2 Sam. 15:4-6) Kaina tlûk chhiat chhan chu chapona vâng a ni bawk. Pathian ngeiin ani chu a zilh a; mahse, a zilhna pawm thei lo tûr khawpin a chapo va. Jehova zilhna chu luhlul takin a ngaihthah a, chhiatna râpthlâk takah a tlu lût ta thuai a ni.—Gen. 4:6-8.

7, 8. (a) Hnam inthliarna chu eng nge ni a, engtin nge chu chu chapona chi khat a nih theih? (b) Chaponain kohhrana awm remna a tihchhiat theih dân sawi rawh.

⁷ Tûn lai hian mite chuan chhiatna thlentu kawng ṭha lo tam tak hmangin chapona an lantîr a. A châng chuan chapona chu hnam inthliarna nên a kal kawp a ni. Dictionary pakhat chuan hnam inthliarna chu “hnam dang mite pâwngpaw huatna emaw, hmêlmâkna emaw a ni” tiin leh “hnam dang mite chuan mize dang leh theihna dang an nei a, hnam ṭhenkhat chu an chungnung bîk emaw, an hnuaihnung zâwk emaw anga ngaih tlatna,”  tiin a hrilhfiah a ni. Hnam chapona chuan intihbuaina te, indona te, leh mihring insâmnate a thlen a ni.

⁸ Chûng thil chu Kristian kohhranah chuan a awm tûr a ni lo ngei mai. Mahse, a châng chuan ringtute zînga inhnialna awm hi, chapona vânga inṭan a ni thei a, thunun theih lohvin a awm thei a ni. Chutiang chu kum zabi khatnaa Kristiante chungah a thleng tih chu Jakoba lehkha thawna zawhna thiltithei tak: “In zînga indona leh inhnialnate hi khawi aṭanga lo chhuak nge ni?” tih hian a târ lang chiang hle. (Jak. 4:1) Ni e, thinlunga intuh nghet inhmêlmâkna leh chungnung zâwk nia inngaihna chu kan ṭawngkam leh thiltihah a lang chhuak thei a, chu chuan mi dangte chungah rilru natna tam tak a thlen thei a ni. (Thuf. 12:18) Chapona chuan kohhrana awm remna chu a tichhe thei tih a chiang hle.

9. Engtin nge Bible chuan hnam inthliarna leh chapona do tûra min ṭanpui theih? (A thupui chunga milem en rawh.)

⁹ Mi dangte aia chungnung zâwk anga inngaihna kan nei a nih chuan, “thinlunga chapo apiangte chu LALPA tâna tenawm an ni,” tih thu hi kan hriat reng a ngai a. (Thuf. 16:5) Hnam dang te, chi dang te, a nih loh leh hnam ze dang neite kan thlîr dân pawh kan bih chian a ngai bawk. Hnam rilru emaw hnam chapopuina emaw kan neih chuan, Pathianin “bul hmun khat vekin hnam tin mi a siam,” tih hi kan hnâwl tihna a ni ang. (Tirh. 17:26) Mihring zawng zawngin thlahtu pakhat, Adama kan nei tih theih a ni a. Chuvângin, hnam ṭhenkhat chu an chungnung bîk emaw, an hnuaihnung zâwk emaw anga ngaih chu thil âtthlâk tak a ni. Chutiang ngaihtuahna kan neih chuan, kan Kristian hmangaihna leh inpumkhatna tichhe tûra Setana hnêna hun remchâng pe kan ni ang. (Joh. 13:35) Setana do va, hneh thei tûr chuan chapona dik lo zawng zawng chu kan do a ngai a ni.—Thuf. 16:18.

10, 11. (a) Engvângin nge khawvêl hmangaih chu thil awlsam tak a nih theih? (b) Eng kawngin nge Dema chuan khawvêl a hmangaih tih a târ lan mai theih?

¹⁰ Setana chu “khawvêl lal” a ni a, khawvêl hi a thuneihna hnuaiah a awm a ni. (Joh. 12:31; 1 Joh. 5:19) Chuvângin, he khawvêlin a chawilâr thil tam tak hian Bible tehnate a kalh a. Khawvêlin a pêk chhuah zawng zawngte hi a sual vek lo ngei mai. Mahse, Setana chuan a khawvêl chu kan châknate rêmchânga lâk nân leh suala min tlûk luhtîr nân emaw, khawvêl hmangaiha Jehova kan biakna min thlahthlamtîr nân emaw a hmang ang tih kan beisei tûr a ni.— Johana 2:15, 16 chhiar rawh.

¹¹ Khawvêl hmangaihnain kum zabi khatnaa Kristian ṭhenkhat chungah nghawng a nei niin a lang. Entîr nân, Paula’n: “Dema chuan tûn lai khawvêl hi a ngainat avângin mi kalsan a,” tiin a ziak a ni. (2 Tim. 4:10) Bible chuan Paula kalsantîr tûr khawpin Dema’n khawvêl a eng pêng ber hi nge a hmangaih tih chu a sawi lang lo. Dema chuan thlarau lam thilte aiin sum leh pai lam a ûm zâwk pawh a ni thei ang. Chutiang a nih chuan, Dema’n thlarau lam chanvo hlu phûrawm takte chu a chân tihna a ni—eng atân nge? Khawvêlin Dema a pêk theih thilte chuan Jehova’n Paula rawngbâwlpui anga a pêk tûr malsâwmna chu a tluk thei ngai dâwn em ni?—Thuf. 10:22.

12. Eng kawngtein nge ‘hausakna bumnaa’ kan tlûk luh theih?

¹² Chutiang thil chu kan chungah pawh a thleng thei a. Kristiante kan nih angin, keimahni leh kan chhûngte tîsa lam mamawh phuhhrûksak duhna kan nei a ni. (1 Tim. 5:8) Jehova chuan nuam taka nung tûrin min duh a—chu chu Adam leh Evi-te huan mawi taka a dahna aṭangin a lang chiang a ni. (Gen. 2:9) Mahse, Setana chuan kan châknate chu “hausakna bumna” hmangin remchângah a la thei  a. (Mt. 13:22) Mi tam tak chuan sumin hlimna a pêk an ring a, neihnunna chu hlawhtlinna niin an ngai bawk a ni. Chutianga ngaih chu inbumna a ni a, chu chuan kan thil neih hlu ber—Jehova nêna kan inṭhianna—min chântîr thei a ni. Isua’n a hnungzuitute chu heti hian a vaukhân a: “Tuman hotu pahnih rawng an bâwl kawp thei lo; pakhat huain pakhat an duh ang, a nih loh leh, pakhat ṭanin pakhat an hmusit ang. Pathian leh sum rawng in bâwl kawp thei lo ve,” tiin. (Mt. 6:24) Hausakna ringawt kan ûm chuan Jehova rawngbâwl kan bânsan tihna a ni a, chu ngei chu a ni, Setana’n ti tûra min duh chu! Sum leh sum hmanga lei theih thilte hian Jehova nêna kan inṭhianna a khuh bo chu i phal ngai lo vang u. Setana do tûr chuan khawvêl lam thilte thlîr dân inbûk tâwk kan neih reng a ngai a ni.—1 Timothea 6:6-10 chhiar rawh.

13. Engtin nge he khawvêl hian inneihna leh mipat hmeichhiatna thlîr dân dik lo chu a chawi lâr?

¹³ Setana khawvêla thang pakhat dang leh chu nungchang bawlhhlawhna hi a ni a. Tûn lai hian mi tam tak chuan inneihnaa rinawmna—leh inneihna hrim hrim pawh—chu khuahkhirhna leh a hmân lai tawh niin an ngai a. Entîr nân, film changtunu hming thang tak pakhat chuan: “Kawppui pakhat chauh neih chu a tu zâwk atân pawh a theih loh. A kawppui laka rinawm emaw, rinawm duh emaw an awm ka hre lo,” tiin a sawi a. Film changtupa pakhat chuan heti hian a sawi bawk: “Kan dam chhûnga kawppui pakhat chauh neih hi mihringte zia a nih leh nih loh ka chiang chiah lo,” tiin. Pathian pêk inneihna chu mi challang tak takte’n an sawichhiat hian Setana chu a lâwm hle ngei ang. Diabola chuan inneihna a thlâwp lo va, a hlawhtlin pawh a duh hek lo. Chuvângin, Setana dova hneh thei tûr chuan inneihna chungchânga Pathian ruahmanna siam chu kan pawm tlat tûr a ni.

14, 15. Engtin nge nungchang bawlhhlawhna chu kan do theih?

¹⁴ Nupui pasal nei tawh kan ni emaw, la nei lo kan ni emaw pawh ni se, nungchang bawlhhlawhna rêng rêng chu kan do tlat tûr a ni. Chu chu thil awlsam a ni em? Ni lo ve! Entîr nân, ṭhalai i nih chuan i school kalpuite’n inngaihzâwnna pawh awm lova mipat hmeichhiatna an hman dân emaw, lem dukdak lote an inthawn dân emaw intithei deuhva an sawi chu i hre mai thei a; lem dukdak lote inthawnna chu hmun ṭhenkhatah chuan naupang saruak lem awmtîrtu ber nia ngaih a ni. Bible chuan: “Mi ngaih hmang erawh chuan ama taksa chungah thil a tisual a ni,” tiin a sawi a. (1 Kor. 6:18) Mipat hmeichhiatna hman avânga natna inkaichhâwn theihte chuan hrehawm tawrhna leh thihna hial a thlen a ni. Chu bâkah, nungchang thianghlimna vawng lo ṭhalai tam tak chuan an thiltih avânga an inchhîr thu an sawi bawk. Nungchang bawlhhlawhna chu TV leh Internet-a a lan dân nên a inang lo hle; chûng chuan Pathian dân bawhchhiatnain sawh khâwk a nei lo tih min rintîr thei a ni. Chutiang ngaihtuahna chuan mite chu ‘sual bumnaah’ a tlûk luhtîr bawk.—Heb. 3:13.

¹⁵ Nungchang bawlhhlawhnaa inhmang tûra thlêmna i tâwk a nih chuan eng nge i tih theih? I chak lohna chu pawm rawh. (Rom 7:22, 23) Pathian hnênah chakna dîlin ṭawngṭai rawh. (Phil. 4:6, 7, 13) Nungchang bawlhhlawhna thlen thei dinhmunte chu pumpelh rawh. (Thuf. 22:3) Thlêmna i tawh hunah, tawi muang lovin hnâwl nghâl rawh.—Gen. 39:12.

16. Setana thlêmna chu Isua’n engtin nge a chhân lêt a, chuta ṭangin eng nge kan zir?

¹⁶ Isua chuan thlêmna dona kawngah kan tân entawn tûr ṭha tak a siam a. Ani chu Setana thutiamte bumin a awm lo va, a sâwtna leh sâwt lohna bûk tûrin hun a khawhral hek  lo. Chu aimahin, ani chuan heti hian a chhâng lêt nghâl a ni: “Tih ziak a ni,” tiin. (Matthaia 4:4-10 chhiar rawh.) Isua chuan Pathian Thu a hria a, chu chuan thlêmna a tawh huna hma la vat tûr leh Bible chângte la chhuak tûrin a ṭanpui a ni. Setana dova hneh thei tûr chuan, nungchang bawlhhlawh tûra min thlêmna chu kan hnâwl tûr a ni.—1 Kor. 6:9, 10.

17, 18. (a) Eng râlthuam dangte nge Setana’n a neih a, chu chu engah nge mak kan tih loh vang? (b) Setana hmabâk chu eng nge ni a, chu chuan chhel tûrin engtin nge a tihchak che?

¹⁷ Chapona te, hausak âtchilhna te, leh nungchang bawlhlawhna te hi Setana râl thuam zînga pathum chauh a ni a. A dang tam tak a la nei a ni. Entîr nân, Kristian ṭhenkhat chuan an chhûngkaw zînga mite dodâlna te, an school kalpuite hnên aṭanga nuihzatna te, a nih loh leh an thu hrilh rawngbâwlna chunga sawrkâr khap behnate chu an tâwk a ni. Chûng harsatnate chu mak kan ti lo, Isua’n a hnungzuitute hnênah heti hian a lo vaukhân si a: “Keima hming avângin mi zawng zawng huat in ni ang; nimahsela a tâwp thlenga tuar peih apiang chu, chu mi ngei chu chhandamin a awm ang,” tiin.—Mt. 10:22.

¹⁸ Engtin nge Setana chu kan do va, kan hneh theih ang? Isua’n a zirtîrte hnênah: “In chhelin in nun in chhandam ang,” tiin a hrilh a. (Lk. 21:19) Mihring tumahin chatuan chhiatna min thlen thei lo vang. Pathian nêna kan inṭhianna hlu tak chu kan phalna tel lo chuan tumahin an la bo thei lo. (Rom 8:38, 39) Jehova chhiahhlawhte thihna hial pawhin Setana chu hnehtu a nihtîr lo; Jehova chuan anni chu a kaitho leh dâwn si a! (Joh. 5:28, 29) Kawng leh lamah chuan Setana hmabâk tûr chu a thim hle a. Pathian ngaihsak lo he khawvêl hi tihboral a nih hnuah, Setana chu kum 1,000 chhûng leilâwtah khung a ni ang. (Thup. 20:1-3) Isua Kum Sâng Rorêlna tâwpah, mihring ṭha famkimte bum leh tûrin rei lo tê ‘a tânna ata chhuah leh’ a ni ang. Chu mi zawhah Diabola chu tihboral a ni ang. (Thup. 20:7-10) Setana chuan thiam loh chantîrna tûr rorêlna a hmachhawn ang a; mahse, chutiang chu i hmachhawn ve dâwn lo! Setana chu do la, rinnaah nghet tlat ang che. Setana chu i dovin, i hneh thei si a! (w15-E 05/15)