Bible chuan khawvêl tâwpnaah chuan tihboralna a awm dâwn tih min hrilh a ni: “Hrehawm nasa tak a awm dâwn si a; chutianga nasa rêng rêng chu leilung pian tirh ata tûn thlengin a la awm ngai lo va, . . . Tin, chûng nite chu tihtawi ni suh sela mihring rêng rêng damin an chhuak lo vang,” tiin. (Matthaia 24:21, 22) Mahse, Pathianin mi tam tak an dam khawchhuak dâwn tih min tiam a ni: “Khawvêl hi . . . a boral mêk a ni, . . . Pathian duhzâwng titu erawh chu kumkhuain a awm reng ang,” tiin.—1 Johana 2:17.

He khawvêl boral mêk ata dam khawchhuak a, ‘kumkhuaa awm reng’ i duh chuan eng nge i tih ang? Thilte inchhêk khâwl ṭeuhvin, tisa lama inbuatsaihna dangte i nei tûr a ni em? Ni lo ve. Bible chuan thil danga inbuatsaih zâwk tûrin min fuih a ni: “Chûng thilte chu chutianga boral vek tûr a ni tih in hriat avângin Pathian ni lo thlen hun tûr chu beisei leh ṭhahnemngai taka duhin, awm dân thianghlim leh Pathian ngaihsak kawngah chuan mi eng ang nge in nih tûr le?” tiin. (2 Petera 3:10-12) Boral tûr “chûng thilte” tihah chuan, he khawvêl chhe tawh taka rorêltute leh Pathian rorêlna aia khawvêl rorêlna thlangtute zawng zawng an tel tih a chhehvêl thute chuan a târ lang a ni. Khawvêl thila inchhêk khâwlna chuan chu boralna lakah chuan min chhanchhuak dâwn lo tih a chiang hle.

Dik takin, dam khawchhuak tûr chuan Pathian Jehova hnêna inpumpêkin, a lâwm zâwng awm dân leh thiltih chu kan zir a ngai a. (Zephania 2:3) Tûn laiah hun pawimawh takah kan nung a ni tih chhinchhiahnate ngaihsak lo mipuite zui ai chuan, ‘Jehova nî lo thlen hun tûr chu beisei leh ṭhahnemngai taka kan duh’ a ngai a ni. Jehova Thuhretute chuan lo thleng tûr khawvêl tâwpna nîa i dam khawchhuah theih dân tûr chu Bible aṭangin an hmuhtîr thei ang che. (wp15-E 05/01)