1, 2. Isua’n mihringte a hmangaih hle tih a târ langna pakhat chu eng nge ni?

PATHIAN Fapa hmasa ber chu sawi fiah theih loh Jehova finna târ lanna hmasa ber a ni a. Ani chu finna anga sawi a Pa bula “mi themthiam” a ni. A Pain ‘vânte a tihngheh lai’ leh ‘leilung nghahchhan a ruat laia’ hlimna leh lungâwina a neih dân tûr ngaihtuah bâk chu tih theih dang kan nei lo. Amaherawhchu, chûng nunna nei lo thilte ngaihlu mah se, Pathian Fapa piang hmasa ber lâwmna chu “mihring fate chungah a ni.” (Thuf. 8:22-31) Ni e, Isua chuan mihring anga a rawn pian hma pawhin mihringte chu a lâwm, a nih loh leh a ngaina a ni.

² A hnuah chuan, a Pa chunga a rinawmna leh a hmangaihna bâkah, “mihring fate” a hmangaihna nasa tak târ lan nân, Pathian Fapa piang hmasa ber chuan inhuam taka mihring anga lo piangin, “amah leh amah a intitlâwm” a. Chutianga a tih chhan chu, ‘mi tam tak tlan nân’ a ni. (Phil. 2:5-8; Mt. 20:28) Mihringte chu a va hmangaih tak êm! Isua leia a awm laiin, Pathianin thilmak tih theihna a pe a, chu chu mite a hmangaihzia târ lan nân a hmang a ni. Chutiang chuan, Isua’n nakin lawka khawvêl puma a tih tûr thil ṭha takte a târ lang a ni.

3. Tûnah eng nge kan ngaihtuah ang?

 ³ Isua leia a lo kal avângin ‘Pathian Ram chanchin ṭha a hrilh’ theih phah bawk a. (Lk. 4:43) He Lalram hian a Pa hming a tithianghlimin, mihringte harsatna zawng zawng a chingfel hlen ang tih a hria a ni. Thu hrila a zin vahna kawng engkimah hian mihringte a ngaihtuah tak zetzia a lang pawh hi a mak lo ve. Engvângin nge chu chu kan ngaih pawimawh ang? Chuta ṭanga kan thil zir chuan nakin hun atâna inrin tâwkna leh beiseina min pêk dâwn avângin. Isua thilmak tihte zînga pali chu i lo ngaihtuah ang u.

4. Isua’n phâr pakhat a tawh dân sawi rawh.

⁴ Isua chuan rawng a bâwl nasa hle a, tûn hnaia a thawhna chu Galili vêlah a ni. Chuta khaw pakhatah chuan thil hmuh hrehawm tak a hmu a. (Mk. 1:39, 40) A hmaah chuan, natna râpawm tak, phâr natna vei chu a awm a. A natna a zual tawhzia chungchângah doctor Luka chuan “a taksa puma phâr” niin a sawi a ni. (Lk. 5:12, C.L. Re-edited) “Ani chuan Isua a lo hmu a, lei siin a bawkkhup a, ‘Lalpa, i duh chuan mi tithianghlim thei e,’ a ti a, a ngên chiam a.” Chu pa chuan Isua’n a tidam thei tih chu a ringhlel lo; mahse, a hriat ngai chu Isua’n a tidam duh ang em? tih hi a ni. Engtin nge Isua’n tih tak zeta a ngenna chu a chhân lêt ang? Hmêl pângngai pawh pu tawh lo he pa a han hmuh hian Isua’n eng nge a ngaihtuah? Isua chu hetiang natna veite khawngaih lo Pharisai mite ang a ni ang em? A dinhmunah ding ta la, eng nge i tih ang?

5. Phâr a tihdam khân, Isua chu “Ka duh e” ti tûrin engin nge chêttîr?

⁵ Mosia dânin a phût angin, he phâr vei pa hian: “Ka bawlhhlawh e, ka bawlhhlawh e!” tiin a au chhuak lo niin a lang. Isua’n chu chu a sawi chhuak lo. Chu aimah chuan, chu pa leh a mamawhte chu a ngaihtuah zâwk a ni. (Lev. 13:43-46) Isua thil ngaihtuah hre thei lo mah ila, a thinlunga awm chu kan hria a ni. Khawngaihnain Isua chu a chêttîr a, thil ropui tak a ti ta. A kut a phar chhuak a, phâr chu a dek a, thu neihna leh khawngaihna awin: “Ka duh e, lo thianghlim tawh ang che,” a ti a. Tichuan, “a phâr chu a lo reh ta nghâl a.” (Lk. 5:13) A nihna takah chuan, Krista chuan Jehova thiltihtheihna chu thilmak tih nân mai ni lovin, mite a hmangaihzia târ lan nân pawh a hmang a ni.—Lk. 5:17.

6. Isua thilmak tih chungchânga thil chhinchhiah tlâk chu eng nge ni a, chu chuan eng nge a târ lan?

⁶ Pathian thiltihtheihna chuan Isua Krista chu thilmak chi hrang tam tak tih theihna a pe a. Ani chuan phâr a tidam mai ni lovin, natna chi hrang hrang leh chak lohna tinrêng neite chu a tidam a ni. Pathian thâwk khum thu chuan: “Mipui chuan ṭawng thei lote chu lo ṭawnga piangsualte chu lo ṭhaa, kebaite chu kea kala, mitdelte chu hmu theia an hmuhin mak an ti hle a,” tiin min hrilh a ni. (Mt. 15:31) Tûn laiah doctor-te chuan dam lo an enkawlte taksa pêng thlâksak châng an nei a. Mahse, Isua erawh chuan an taksa pêngte thlâksak aiin, a tihdamsak zâwk mah a ni. Tin, zawi zawia tidam lovin, vawilehkhatah a tidam a; a châng phei chuan, khual khua aṭang pawhin a tidam a ni. (Joh. 4:46-54) Hêng entîrna mak takte hian eng nge a târ lan? Tûna vân Lal ṭhutthlênga ṭhu tawh Isua chuan chatuana tihdam theihna a nei mai a ni lo, tihdam châkna pawh a nei a ni. Isua’n mite a tihdam dân chuan khawvêl tharah: “Mi rethei leh pachhiate chu a khawngaih  ang,” tih Bible hrilh lâwkna a thleng famkim dâwn tih min rinnghehtîr a ni. (Sâm 72:13) Ni e, Isua chuan a châk ang takin dam lote chu a tidam tawh ang.

7, 8. Isua’n Bethesda dîla zeng pakhat a hmuh hmaa thilthlengte chu sawi rawh.

⁷ Galili rama phâr pakhat a tawh hnu thla rei lo têah Isua chuan Pathian Ram chanchin ṭha puang chhuak tûrin Galili ram aṭangin Judai ram lam a pan leh a. Isua thuchah ken leh a chêtzia chuan mi a sâng têl nun chu a khawih ngei ang. Ani chuan riangvaite hnêna chanchin ṭha hrilh te, salte hnêna chhuahna thu hrilh te, leh thinlung lungchhiate tuamsak te chu a duh tak zet tih a chiang hle.—Is. 61:1, 2; Lk. 4:18-21.

⁸ Nisan thla a lo thleng a. A Pa thupêk zâwmin, Isua chu Jerusalem-ah Kalhlên Kût hmang tûrin a kal a ni. He kût thianghlim hmang tûra mite an lo kal khâwm avângin khawpuiah mite chu an sa mur mur a. Biak in hmâr lamah chuan Bethesda tia hriat dîl a awm a, chutah chuan Isua’n zeng pakhat a tâwk a ni.

9, 10. (a) Bethesda dîlah chuan mite chu engvângin nge an kal khâwm? (b) Isua’n dîlah eng nge a tih a, hei hian eng nge min zirtîr? (A thupui chunga milem en rawh.)

⁹ Dam lo tam tak chu Bethesda-ah chuan an kal khâwm ṭhîn a. Engvânga lo kal khâwm nge an nih? A chhan hriat lohvin, tui a fâwn laia dam lo dîla a chhuk chuan mak tak maia tihdam ni tûrah an ngai a ni. Chuta boruak awm dân tûr chu han mitthla teh! Beidawnna te, manganna te, beisei bona te chu a nasa hle ngei ang tih rinhlelh rual a ni lo. Mahse, tîsa lama piansualna nei lo, Isua chu engvângin nge a va kal? Khawngaihnain a chêttîr avângin, ani chuan leia a dam chhûng aia rei na tawh chu pa chu a va pan a ni.—Johana 5:5-9 chhiar rawh.

¹⁰ Isua’n tihdam a duh leh duh loh a zawh laia dam lo beidawn hmêl tak mit meng tûr chu i mitthla thei em? Ani chuan a chhâng lêt nghâl a. Tihdam duh mah se, dîla dahtu tûr a neih loh avângin tihdam a nih theih dân tûr chu a hre lo a ni. Chutah, Isua chuan thil ni thei lo ti tûrin thu a pe a ni—a âwngphah la a, kal tûrin. Isua thusawi chu ringin, chu pa chuan a âwngphah a la a, a kal ta a ni. Isua’n khawvêl thara a tih tûr thlîr lâwkna phûrawm tak a va ni êm! He thil mak tihah hian, Isua khawngaihna chu kan hmu bawk a. Ani chuan ṭanpui ngaite a zawng chhuak a. Isua entîrna hian khawvêla thilthleng râpthlâk takte avânga lungngai kan thu hrilhna bial chhûnga mite zawng chhunzawm zêl tûrin min chêttîr tûr a ni.

11. Marka 5:25-34 chuan engtin nge dam lote chunga Isua khawngaihna chu a târ lan?

¹¹ Marka 5:25-34 chhiar rawh. Hmeichhe pakhat chu kum 12 chhûng zak takin a nung a. A dam lohna chuan Pathian a biakna pawh tiamin, a nun pumah nghawng a nei a ni. “Daktawr tam tak lakah nasa takin a tuar tawh a, a neih zawng zawng pawh a dekral zo tawh” chung pawhin, a zual zâwk mah a ni. Mahse, ni khat chu dam theih dân tûr kawng dang dapin, Isua kianga kal theih dân tûr a ngaihtuah a ni. Mipui zîngah chuan lûtin, Isua puan chu a va dek ta a. (Lev. 15:19, 25) Isua’n a hnên aṭangin thiltihtheihna a chhuak tih a hriat chuan, amah dektu chu a zâwt a. “Hlau leh khûr chungin a lo kal a, a hmaah a bawkkhup a, a hnênah thu dik takin a hrilh ta vek” a ni. A tidamtu  chu a Pa, Jehova a ni tih a hriat avângin, Isua chuan hmeichhia chu ngilnei taka cheibâwlin, heti hian a sawi a ni: “Ka fanu, i rinna hi i dampui a ni e, thlamuang takin kal la, i natna ata chu lo dam hlen tawh ang che,” tiin.

12. (a) Kan ngaihtuah tawhte aṭangin, Isua chu mi eng ang nge ni i tih ang? (b) Isua’n kan tân entawn tûr eng nge min hnutchhiah?

¹² Isua chuan ngil a va nei tak êm! A thinlungah hian dam lote tân hmun a awm tih kan hria a ni. Setana chuan hmangaih loh leh hlutna nei lo anga kan inngaih chu a duh a. Mahse, a thilmak tihte hmangin, Isua chuan keimahni leh kan harsatnate a ngaih pawimawhzia chiang takin a târ lang a ni. Lainatna ngah tak Lal leh Puithiam Lalber a va ni tak êm! (Heb. 4:15) Natna benvawn neite hrehawmna hriatthiampui chu a harsa thei a, abîk takin mi hrisêl tak kan nih chuan a harsa lehzual thei ang. Isua chu na ngai lo mah se, dam lote chu a hre thiam tih kan hre thei a ni. Isua entîrna chuan chutiang bawka theih tâwp chhuaha ti ve tûrin min chêttîr rawh se.—1 Pet. 3:8.

13. Lazara thawhlehna chuan Isua mizia eng nge a târ lan?

¹³ Mi dangte hrehawm tawrhna chuan Isua rilru chu a khawih hle a. A ṭhian Lazara thihnaa mi dangte tawrh dân chuan Isua chu nasa takin a nghawng a, a ‘rilrua rûmin’ a “lungngai” a ni. Lazara chu a kaitho lehnghâl thei tih a hre reng chung pawhin chutiang khawpin a tuar a ni. (Johana 11:33-36 chhiar rawh.) Isua chuan a rilru veizâwng nasa tak lan chhuahtîr chu a zahpui lo. Thlîrtute chuan Isua’n Lazara leh a chhûngte a tawrhpui dân chu an hmu thei a. Pathian pêk thiltihtheihna hmanga a ṭhian a kaihthawhna  chuan khawngaihna a neihzia a va târ lang tak êm!—Joh. 11:43, 44.

14, 15. (a) Jehova’n mihringte hrehawm tawrhna nuaibo a duh hle tih chu eng thilah nge a lan? (b) ‘Hriatrengna thlân’ tih ṭawngkam chu engvânga ngaihven awm nge ni?

¹⁴ Bible chuan Isua chu “[Siamtu] anpui ngei” niin a sawi a. (Heb. 1:3) Chuvângin, a thilmak tihna hmangin, Isua chuan amah leh a Pain dam lohna leh thihna sût lêt an duh tih a târ lang a ni. Chu an châkna chu Bible-a chhinchhiah thawhlehna tlêm têah a tâwp mai lo. Isua chuan: “A hun a thleng dâwn ta, chutih hunah chuan [“hriatrengna,” NW] thlâna awm zawng zawng . . . an chhuak vek ang,” tiin a sawi si a.—Joh. 5:28, 29.

¹⁵ Pathian thil hriatrengna nên a inkûngkaih avângin, Isua’n ‘hriatrengna thlân’ tih ṭawngkam a hmang hi a inâwm hle. Pathian Engkimtithei, lei leh vân Siamtu chuan an pianpui zia leh an zir chawp zia dangte pawh tiamin, kan hmangaih thi tawhte nihna engkim chu a hre vek thei a ni. (Is. 40:26) Chutah, min hre reng thei mai ni lovin, amah leh a Fapa chuan min hriat reng chu an duh a ni. Bible-a chhinchhiah Lazara thawhlehna leh mi dangte thawhlehna chuan khawvêl thara lei pumpuia thawhlehna thleng tûr chu a entîr lâwk a ni.

16. Rinawmna vawngtu tûn laia Kristian tam takte chuan eng chanvo hlu nge an neih ang?

¹⁶ Kan Kristian rinawmna kan vawng reng chuan, thilmak tih azawnga ropui ber chu kan hmu thei a ni—hrehawm nasa tak ata dam khawchhuah chu. Armageddon indona a tâwp hnu lawkah, thilmak tihna tam tak a thleng ang a, mihringte chu hrisêlna ṭha famkim pêk an ni ang. (Is. 33:24; 35:5, 6; Thup. 21:4) Mite’n tarmit te, tiang te, zak dona tiang te, wheelchair te, bengdâr te, leh thil dang dangte an paih bo hun tûr chu han mitthla teh. Chhan ṭha tak neiin, Jehova chuan Armageddon-a dam khawchhuakte hnênah hrisêlna ṭha tak a pe ang. Anni chuan hna thawh tûr an nei si a. Phûr takin Pathian thilthlâwnpêk kan leilung pum pui hi paradis-ah an siam dâwn a ni.—Sâm 115:16.

17, 18. (a) Isua thil mak tihtein a tum ber nia lang chu eng nge ni? (b) Pathian khawvêl thara lût tûrin engvângin nge ṭan i lâk ang?

¹⁷ Hun kal tawha Isua tihdamna chuan “mi pui tam tak” zînga telte chu a tiphûr a, natna zawng zawng laka tihdam an beiseina chu a tinghet bawk a ni. (Thup. 7:9) Chûng tihdamnate chuan a rilru veizâwng nasa tak leh Pathian Fapa piang hmasa berin mihringte a hmangaihna nasat dân chu a târ lang. (Joh. 10:11; 15:12, 13) Isua khawngaihna chuan Jehova’n a chhiahhlawlh tinte a ngaihtuahzia a târ lang a ni.—Joh. 5:19.

¹⁸ Mihringte chu an rûmin, hrehawm an tuar a, an thi mêk bawk a ni. (Rom 8:22) A thutiam anga tîsa lama tihdamna pumhlûm awmna tûr Pathian khawvêl thar chu kan mamawh a ni. Malakia 4:2 chuan tihdamte chu ‘bâwng note hrên lai thaukhawh ang’ maiin ṭhat famkim lohna phuarna ata chhuah an nih hun chuan an phûrin, an hlim hle dâwn tih rin nachhan tûr min pe a. Pathian chunga kan lâwmna thûk tak leh a thutiamte kan rinna ṭang kawp chuan khawvêl thara lût thei ngei tûra a ṭûl ang apiang ti tûrin min chêttîr hlawm rawh se. Leia a awm laia Isua thilmak tihte chuan Messia anga ro a rêl huna mihringte hrehawm tawrhna a tihreh hlen dân tûr a entîr lâwk tih hriat chu a va phûrawm tak êm! (w15-E 06/15)