1. Kan rawngbâwlnaah Matthaia 6:9-13-a chhinchhiah ṭawngṭaina hi engtin nge kan hman theih?

MI TAM tak chuan Lal Ṭawngṭaina chu a ziak en lovin an chham thei a. In tin kalnaah, in neitu tam takte hnênah Pathian Ram chu sawrkâr tak tak a ni a, chu chuan leiah inthlâkthlengna ropui tak a rawn thlen dâwn tih hre thiam tûra ṭanpui nân he ṭawngṭaina hi kan sawi lang fo a ni. A nih loh leh, ṭawngṭainaa dîlna hmasa ber chu Pathianin hming a nei a, chu chu tihthianghlim, a nih loh leh thil thianghlim anga cheibâwl tûr a nihzia lantîr nân kan hmang bawk.—Mt. 6:9.

2. Isua’n lal ṭawngṭaina chu kan ṭawngṭai apianga chham nawn fo tûra min pêk a ni lo tih engtin nge kan hriat?

² Lal Ṭawngṭaina hi Kristianna rama mi tam takte tih ṭhin dân angin, kan ṭawngṭai apianga a ngai ngaia chham nawn reng atâna Isua min pêk a ni em? Ni lo ve. He ṭawngṭai dân tûr a pêk hmain Isua chuan: “In ṭawngṭaiin . . . sawi nawn mai mai suh u,” tiin a sawi a. (Mt. 6:7) A hnu ṭum dangah, he ṭawngṭaina  tho hi a sawi nawn leh a; mahse, thu mal dang a hmang a ni. (Luke 11:1-4) Chutiang chuan, Isua’n kan thil dîl ngaite leh a pawimawh dân indawtte hre tûrin min ṭanpui a. Chuvângin, lal ṭawngṭaina, a nih loh leh entawn tûr ṭawngṭaina tia koh a ni chu a inhmeh hle.

3. Lal ṭawngṭaina kan bih chian rualin eng zawhnate nge kan ngaihtuah theih?

³ He thuziakah leh a dawta thuziakah hian, lal ṭawngṭainaa thute chu kan bih chiang ang. Chutianga kan tih lai chuan, heti hian inzâwt rawh, ‘He ṭawngṭaina hian ṭawngṭaina lama hma sâwn tûrin engtin nge min ṭanpui theih? A pawimawh lehzual chu, he ṭawngṭaina milin ka nung em?’ tiin.

4. “Kan Pa” tih ṭawngkam hian eng nge min hriatnawntîr a, lei lam beiseina nei Kristiante tân eng kawngin nge Jehova chu an tân “Pa” a nih?

⁴ “Ka Pa” ti lova, “kan Pa” tih ṭawngkam hian inhmangaih tawn tak “unauhote” zînga mi kan ni tih min hriatnawntîr a. (1 Pet. 2:17) Chu chu chanvo hlu a va ni tak êm! Vân lam nun beiseina neia Pathian fate anga hrin, hriak thih Kristiante chuan Jehova chu awmze kim neiin “kan Pa” tiin an ko va. (Rom 8:15-17) Leia chatuana nun beiseina nei Kristiante pawhin Jehova chu “kan Pa” tiin an ko bawk. Ani chu an Nunna Petu a ni a, betu dik zawng zawngte mamawh chu hmangaih takin a pe a ni. Hêng lei lam beiseina neite hi an ṭhat famkim a, fiahna hnuhnûng bera an rinawmna an lantîr hnuah awmze kim neiin Pathian fate an ni ang.—Rom 8:21; Thup. 20:7, 8.

5, 6. Nu leh pate chuan an fate hnênah eng thil ṭha nge an pêk theih a, naupangte chuan he thilpêk hi engtin nge an tih ang? (A thupui chunga milem en rawh.)

⁵ Nu leh pate’n an fate ṭawngṭai dân an zirtîr a, Jehova chu min ngaihsaktu kan Pa vâna mi anga thlîr tûra an ṭanpui hian, an fate hnênah thilpêk ṭha tak an pe tihna a ni. Tûna South Africa-a bial kantu thawk mêk unaupa chuan heti hian a sawi a: “Fanute kan neih nî aṭangin, ka zin bosan a nih loh phawt chuan zan tin anni chu ka ṭawngṭaipui ziah a. Kan fanute chuan chûng zan tina kan ṭawngṭainaa ka thu chhamte chu an hriat tawh loh thu an sawi a. Mahse, anni chuan boruak muanawm tak te, kan Pa Jehova nêna inbiakna a thianghlim dân te, leh rilru damna leh himna an neihte chu an la hre reng a ni. An theih veleh chuan, aw chhuaka ṭawngṭai tûrin ka fuih a, tichuan an ngaihtuahnate leh Jehova chunga an rilru veizâwngte chu ka lo hre thei ta a. Hei hi an thinlung hriat theihna hun remchâng ṭha tak a ni. Tichuan, an ṭawngṭaina chu awmze nei tak ni tûra an telh ngai lal ṭawngṭainaa thu pawimawhte ngilnei taka hrilhin ka zirtîr a ni,” tiin.

⁶ Unaupa fanute chuan thlarau lamah hma an sâwn chak viau pawh hi a mak lo ve. Tûnah anni chuan hlim takin pasal an nei tawh a, an pasalte nên hun bikimin rawng an bâwl a ni. Nu leh pate’n an fate hnêna thil an pêk theih azawnga ropui ber chu Jehova nêna inlaichînna ṭha tak nei tûra ṭanpuina hi a ni a. He inlaichînna hlu tak neih reng chu mi tinte mawhphurhna a ni ngei mai. Chutah chuan Pathian hming ngaina tûra zir leh zah taka cheibâwl a tel a ni.—Sâm 5:11, 12; 91:14.

7. Pathian mite chuan eng chavo hlu nge an neih a, chu chuan kan lakah eng nge a beisei?

⁷ Pathian hming kan hria chauh ni lovin, ‘ama hming kan pu’ thei hi chanvo hlu tak a ni a. (Tirh. 15:14; Is. 43:10) Kan Pa vâna mi hnênah chuan: “I hming tihthianghlim ni  rawh se,” tiin kan ngên a ni. Hetiang ngenna hian Jehova hnêna a hming ti hliau thei thiltih emaw, thusawi emaw pumpelh tûra a ṭanpuina dîl tûrin a chêttîr ang che. Kum zabi khatnaa an thu hrilh anga nung lo mi ṭhenkhatte ang nih chu kan duh lo va. Tirhkoh Paula’n an hnênah heti hian a ziak a ni: “Pathian hming chu nangmahni avângin Jentailte zîngah tihchhiatin a awm ta a nih hi,” tiin.—Rom 2:21-24.

8, 9. A hming tihthianghlimna ngaihsaktute chu Jehova’n mal a sâwm dân entîrna pe rawh.

⁸ Pathian hming tihthianghlim chu kan duh a. A pasalin a boralsan hnuah, Norway-a unaunu chu a fapa kum hnih mi nên chauh an awm a. Heti hian a sawi: “Chu chu ka nuna hun harsa ber a ni. Thu tlûkna fing lo tak, a nih loh leh ka rinawm lohna avânga Setana’n Jehova a sawichhiat loh nân, ngaihtuahna inbûk tâwk nei reng tûra chakna min pe tûrin Pathian hnênah nî tin, dâr kâr tin deuh thaw ka ṭawngṭai a ni. Jehova hming tihthianghlim ka duh a; chu bâkah, ka fapain Paradis-a a pa a hmu leh chu ka duh bawk a ni,” tiin.—Thuf. 27:11.

⁹ Chutiang mahni hma sial lo ṭawngṭaina chu Jehova’n a chhâng em? Chhâng e. He unaunu hian mi ngaihsak tak Kristian unaute a kawm ṭhinna aṭangin ṭanpuina a dawng a. Kum nga hnuah, kohhran upa pakhat nên an innei a. Tûnah a fapa chu kum 20 mi a ni a, baptisma a chang tawh a ni. Ani chuan: “Ka fapa enkawl puitlinna kawngah ka pasalin min ṭanpui avângin ka hlim tak zet a ni,” tiin a sawi.

10. Pathian hming tihthianghlim pumhlûm nân eng nge ngai?

¹⁰ Pathian hming tithianghlim tûr leh sawichhiatna zawng zawng laka fihlîm tûr chuan eng nge tih ngai? Chutiang thil a thlen theih nân, Jehova chuan duhrêng vânga a lalchungnunna hnâwltute chu a tihboral a ngai a. (Ezekiel 38:22, 23 chhiar rawh.) Mihringte chu zâwi zâwiin ṭhat famkimnaah hlân kai a ngai bawk. Finna nei thil siam zawng zawngte’n Jehova hming chu thil thianghlim anga zah taka an cheibâwl hun chu kan va nghâkhlel tak êm! A tâwpah chuan kan Pa vâna mi chu “engkima engkim” a ni tawh ang.—1 Kor. 15:28.

11, 12. Kum zabi 19 tâwpna lamah, Kristian dikte chuan eng nge an hriatthiam?

¹¹ Isua vâna a lâwn hmain, a tirhkohte chuan: “Lalpa, tûnah em ni Israelte hnênah ram i pêk leh dâwn?” tiin an zâwt a. Isua chhânna chuan Pathian Ramin ro a rêl hun chu an tân hriat a la hun lo tih a târ lang a ni. A zirtîrte hnênah chuan thu hrilh rawngbâwlna pawimawh tak an thawh a ngai tih a hrilh a ni. (Tirh. 1:6-8.) Amaherawhchu, Isua’n a hnungzuite chu Pathian Ram lo thlen hun chu beisei tlat tûrin a zirtîr a. Chuvângin, Kristiante chuan tirhkohte hun aṭang tawhin Pathian Ram lo thleng tûrin an lo dîl tawh a ni.

¹² Isua kuta awm Pathian Ramin vân aṭanga ro a rêl hun a hnaih chuan, Jehova chuan a mite chu thil lo thlen hun tûr hre thiam tûrin a ṭanpui a ni. Kum 1876 khân, Charles Taze Russell-a thuziak chu Bible Examiner magazine-ah tihchhuah a ni a. Chu thuziak chu, “Jentailte Nî: Engtikah Nge A Tâwp Ang?,” tih a ni a, chu chuan kum 1914 pawimawhna chu a târ lang a ni. Thuziak chuan Daniela hrilh lâwknaa “hun sarih” leh Isua sawi “Jentailte nî a kin” tih chu a thlun zawm a ni. *—Dan. 4:16; Lk. 21:24.

13. Kum 1914-ah eng nge thleng a, chu mi hnua khawvêla thilthlengte chuan eng nge a nemngheh?

 ¹³ Kum 1914 khân, Europe khawmuala ramte inkârah indona—a hnua khawvêl pum tuam chhuaktu—chu a thleng a. Kum 1918-a a tâwp chuan, ṭâm nasa tak a tla a; chutah, indona aia mite nun suat hnem zâwk hri lêng hlauhawm tak a thleng bawk. Chutiang chuan Isua’n leia hmuh theih lohva Lal anga a lo awm lehna hriltu “chhinchhiahna” a pêk chu a thleng famkim ṭan a ni. (Mt. 24:3-8; Lk 21:10, 11) Finfiahna tam tak chuan kum 1914-ah Lal Isua Krista hnênah ‘lallukhum pêk’ a ni tih a târ lang. Ani chu “hneh chung leh hneh zêl tûrin a chhuak ta a.” (Thup. 6:2) Setana leh a ramhuaite chu dovin vân a thianfai a, leiah a paihthla a ni. Chuta ṭang chuan, mihringte chuan he thâwk khum thu dikzia hi an hria a ni: “Lei leh tuifinriat chung a pik e! Diabola chuan hun tlêm tê chauh a nei tih a inhriat avânga thinur êm êma in hnêna a lo chhuk tâk avângin,” tih hi.—Thup. 12:7-12.

14. (a) Pathian Ram lo thleng tûra ṭawngṭai chu engvângin nge a la pawimawh reng? (b) Eng chavo nge kan neih?

¹⁴ Thu Puan 12:7-12-a chhinchhiah hrilh lâwkna chuan mihringte la ti hrehawm zêltu hun râpthlâk tak inṭanna leh Lalram pianna chu hun khata thleng a nih chhan a hrilhfiah a. Isua, Pathian Rama Lalber chuan a hmêlmate zîngah ro a rêl ṭan tawh a ni. A hnehna a zawh a, leia suahsualna awmte a tihtâwp vek hma loh zawng, Pathian Ram lo thleng tûrin kan ṭawngṭai zawm zêl ang. Chutih rual  chuan, “chhinchhiahna” hmêlhmang mak ropui ber thlen famkimnaah telin chûng kan ṭawngṭainate nêna inmil chuan kan nung tûr a ni. Isua’n heti hian a sawi lâwk a: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin.—Mt. 24:14.

15, 16. Pathian duhzâwng leiah tih ni tûra kan dîlna nêna inmilin engtin nge kan nun theih?

¹⁵ Kum 6,000 vêl kalta khân, Pathian duhzâwng chu leiah hian ṭha famkima tih a lo ni tawh a. Chuvângin, Jehova’n mihringte tân bul ṭanna ṭha tak a pêk hnuah “ṭha a ti êm êm” tih kan hmu a ni. (Gen. 1:31) Tichuan Setana chu a hel ta a, chu mi hun aṭang chuan mihring tlêm tê te chauhvin leiah hian Pathian duhzâwng an ti a. Tûn laia Pathian duhzâwng leia tih ni tûra ṭawngṭai mai lo va, an ṭawngṭaina mila nun tum tlat Thuhretu maktaduai riat lai an awmna huna kan nung chu chanvo hlu tak a ni a. Anni chuan an nun dân leh zirtîr siam rawngbâwlnaa ṭhahnem ngai taka telin, an ṭawngṭaina mila nun an tumzia an lantîr a ni.

¹⁶ Entîr nân, kum 1948-a baptisma chang Africa rama missionary anga rawngbâwl unaunu pakhat chuan: “Lal ṭawngṭainaa heti lai thu nêna inmilin, berâm ang mite chu a tlai luat hmaa Jehova an hriat theih nâna biak pawh ni tûrin ka ṭawngṭai ṭhîn a. Tu emaw hnêna thu ka hrilh dâwnin, a thinlung thleng tûra ka sawi theih nân finna ka dîl bawk. Berâm ang mi kan hmuh tawhte chungchângah chuan, ngaihsak tûra theih tâwp kan chhuahna chungah Jehova malsâwmna dîlin ka ṭawngṭai a ni,” tiin a sawi. Kum 80 mi he unaunu hian rawngbâwlna hlawhtling tak a neih a, mi dangte ṭanpuinain mi tam tak chu Jehova Thuhretu ni tûra a ṭanpui thei pawh chu a mak lo ve. Tar tawh chung pawha Pathian duhzâwng tihnaa leihbuaka awm ang maia inpe entawn tûr ṭha tam tak i ngaihtuah chhuak thei ang tih chu rinhlelh rual a ni lo.—Philippi 2:17 chhiar rawh.

17. A duhzâwng leiah tih ni tûra kan dîlna chhân a nih huna Jehova thil min la tihsak tûrte chu engtin nge i ngaih?

¹⁷ Pathian Ram hmêlmate lei ata tihboral an nih hma loh zawng, Pathian duhzâwng leia tih ni tûrin kan ṭawngṭai zawm zêl ang a. Tichuan, lei paradis-a mi maktaduai têlte an lo thawhleh hunah Pathian duhzâwng kim chang zâwka tih a ni tih kan hmu ang. Isua’n: “Hêng hi mak ti suh u, a hun a thleng dâwn ta, chutih hunah chuan [“hriatrengna,” NW] thlâna awm zawng zawngin [ka] aw an hria ang a, an chhuak vek ang,” tiin a sawi si a. (Joh. 5:28, 29) Kan hmangaih tak rawn tho lehte hmuak theia awm chu a va ropui dâwn tak êm! Pathianin kan “mit ata mittui zawng zawng a hrufai ang.” (Thup. 21:4) Mitthi tholeh a tam zâwkte chu Pathian Jehova leh a Fapa chungchânga thutak la hre lo, ‘mi fel lote’ an ni ang a. Tholehte hnêna Pathian duhzâwng leh a thiltumte hriattîr a, “chatuan nunna” dawng tlâk ni tûra anmahni ṭanpui chu chanvo hlu tak a ni ngei ang.—Tirh. 24:15; Joh. 17:3.

18. Mihringte mamawh ber chu eng nge ni?

¹⁸ Lei leh vâna remna chu Pathian Ram hmanga Jehova hming tihthianghlimnaah a innghat a. Chutiang chuan, lal ṭawngṭainaa dîlna hmasa ber pathumte kim chang taka chhânna chuan mihringte mamawh ber chu a phuhru tawh ang. Chu mi hun a lo thlen hma chuan, Isua lal ṭawngṭainaa dîlna dang pali-a sawi lan mamawh dang pawimawh tak kan nei a. Chûng chu a dawta thuziakah ngaihtuah a ni ang. (w15-E 06/15)