1. Khawvêlin nungchang thianghlimna chu eng angin nge a thlîr?

NUNGCHANG bawlhhlawhna khawvêlah kan awm a. Entîr nân, mi tam tak chuan mawngkawhurna leh inneihna awm lova mipat hmeichhiatna hman chu thil pângngai tak angin an thlîr a. Film te, lehkhabu te, hla te, leh thil fakmawinate chu nungchang bawlhhlawhnain a khat a ni. (Sâm 12:8) Nungchang bawlhhlawhna chu khawvêl puma a hluar êm avângin, ‘Thianghlim taka nun chu thil theih a ni tak zet em le?’ tiin i ngaihtuah mai thei. A chhânna chu, Jehova ṭanpuinain Kristian dikte chuan nungchang thinghlimna an vawng reng thei a ni, tih hi a ni.—1 Thessalonika 4:3-5 chhiar rawh.

2, 3. (a) Châkna bawlhhlawhte do chu engvânga pawimawh nge ni? (b) He thuziakah hian eng nge kan sawiho vang?

² Mahse, a hmasa berin, thianghlim taka nung tûr chuan nungchang bawlhhlawh châkna kan do a ngai tih kan hre tûr a ni. Nghakuaia sachahin sangha a hîp angin, nungchang bawlhhlawhna ngaihtuahna leh hman châkna chuan—hnâwl nghâl a  nih loh chuan—Kristian pakhat chu a thlêm thei a ni. Chûng chu kan tîsa ṭha famkim lo tân thil duhawm tak lo niin, nungchang bawlhhlawhna lamah min hruai thei a. A hnuah, sual tûra thlêmna a nasat avângin, châkna dik lote chuan no a rawn pai thei a. Chutah tak chuan, hun remchâng a lo inher chhuah hunah Jehova chhiahhlawh pawhin nungchang bawlhhlawhna thil a ti thei a ni. Ni e, “châkna chuan . . . sual a hring ṭhîn” a ni—Jakoba 1:14, 15 chhiar rawh.

³ Châkna sual rei lo te chhûng neihnain sual pawi tak tihna a thlen theih dân chuan ngaihtuahna a ti tam hle. Mahse, châkna bawlhhlawh zung kan kaihtîr loh chuan, nungchang bawlhhlawhnaa inhnamhnawih emaw, chu miin a nghawng ṭha lote kan tawrh emaw a ngai lo tih hriat chu a va thlamuanthlâk tak êm! (Gal. 5:16) Châkna bawlhhlawh donaa min ṭanpui theitu tûr thil pathum: Jehova nêna kan inlaichînna te, a Thu aṭanga fuihna te, leh Kristian mi puitlingte ṭanpuina te hi i lo ngaihtuah ang u.

4. Jehova hnaih chu engvângin nge a pawimawh?

⁴ “Pathian hnaih” duhtute hnêna Bible thurâwn chu: “In kutte silfai rawh u, . . . in thinlung tithianghlim rawh u,” tih a ni a. (Jak. 4:8) Jehova nêna kan inlaichînna kan ngaihhlut hian, kan ngaihtuahna pawh tiamin kan nun dân zawng zawngah amah tihlâwm kan tum a ni. Thil thianghlim, thil ṭha, leh thil fak tlâk te kan rilrua vawng rengin, “thinlung thianghlim” neih chu kan duh a. (Sâm 24:3, 4; 51:6; Phil. 4:8) Dik takin, Jehova chuan kan ṭhat famkim lohna avângin ngaihhnathiamna min nei a. Ani chuan châkna bawlhhlawlh kan duh thei tih a hre bawk. Mahse, ngaihtuahna ṭha lote theih tâwp chhuaha do aia kan tih puitlin hian, Jehova a lungngai tih kan hria. (Gen. 6:5, 6) He thil ngaihtuahna hian kan ngaihtuahna vawn thianghlim reng tum lehzual tûrin min chêttîr a ni.

5, 6. Engtin nge ṭawngṭaina chuan châkna bawlhhlawhte do tûrin min ṭanpui theih?

⁵ Jehova kan rinchhan pumhlûmzia lantîr theih dân kawng pawimawh tak pakhat chu ngaihtuahna bawlhhlawhte do thei tûra ṭawngṭai hi a ni a. Jehova hnaih tûra kan ṭawngṭai hian, ani pawhin min hnaih a ni. A thlarau thianghlim chu phal takin min pe a, chutiang chuan nungchang bawlhhlawhna do va, nungchang thianghlim vawng reng tûrin min ṭanpui a ni. Chuvângin, Pathian hnênah chuan kan thinlung ngaihtuahnate a lâwmzâwng nihtîr kan duhna chu i hriattîr ang u. (Sâm 19:14) Keimahniah “suahsualna kawng”—châkna leh ngaihtuahna bawlhhlawh rêng rêng—eng pawh a awm leh awm loh kan hriat theihna tûra min fiah tûrin inngaitlâwm takin kan ngên em? (Sâm 139:23, 24) Thlêmna kan tawh huna rinawm reng tûra min ṭanpui tûrin a hnênah kan dîl ṭhîn em?—Mt. 6:13.

⁶ Enkawl seilen kan nih dân emaw, tûn hmaa kan nungchangte emaw chuan Jehova duh lohzâwngte tih duhna min neihtîr mai thei a. Chuti chung pawhin, Jehova chuan pawm tlâka a rawng bâwl chhunzawm zêl tûra insiam ṭhat ngai apiangte insiam ṭha tûrin min ṭanpui thei a ni. Lal Davida chuan chu chu a hria a. Bath-sebi a chêtsualpui hnuah, Jehova hnênah: “Keimahah hian thinlung thianghlim tak siam la; ka kawchhûngah hian thlarau dik tak siam thar leh ang che,” tiin a ngên a ni. (Sâm 51:10, 12) Nungchang ṭha lo chu kan tîsa ṭha famkim lo tân châkawm tak a ni thei a; mahse, Jehova’n thlarau tihnuam tak, a thu âwih duhna nei tûrin min chawk tho thei a ni. Sual châkna chuan zung kaih thûkin, kan ngaihtuahna thianghlimte chu dîp ral mah se, Jehova chuan a thupêkte zâwm tûr leh nunpui thei tûrin min kaihruai thei a. Kan ngaihtuahna ṭha  lote thunun tûrin min ṭanpui thei bawk a ni.—Sâm 119:133.

7. Engtin nge Pathian Thu chuan ngaihtuahna bawlhhlawhte laka min vên theih?

⁷ Jehova chuan ṭanpui dîla kan ṭawngṭaina chu a Thu, Bible hmangin min chhâng thei a. Pathian Thu-a chuang finna chu “atîrin a thianghlim” a ni. (Jak. 3:17) Nî tina Bible chhiar leh chhût ngunna chuan nungchang bawlhhlawh ngaihtuahna do tûrin kan rilru a vêng thei a. (Sâm 19:7, 11; 119:9, 11) Chu bâkah, Bible-ah chuan châkna thianghlim lote pumpelh tûra min ṭanpui thei entîrnate leh zilhna thute a chuang bawk.

8, 9. (a) Engvângin nge tlangvâl pakhat chuan nawhchizuar nên mipat hmeichhiatna an hman? (b) Thufingte bung 7-a kan hmuh vaukhânna entîrna hi tûn laiah engtin nge kan hman ṭangkai theih?

⁸ Thufingte 5:8-ah chuan: “I kawng chu [hmeichhe ṭha lo] hnên ata sawn daih la, a kawngkâ va hnaih suh,” tiin kan chhiar a. He zilhna ngaihsak loh a hlauhawmna chu Thufingte bung 7-ah târ lan a ni a, chutah chuan nawhchizuar in bula kal tlangvâl chungchâng kan chhiar a ni. Zân a lo ni a. Kawtthlêrah chuan tlangvâl chu tîsa châkna chawk tho thei tûr zâwnga inthuam, chu hmeichhia chuan a rawn pan a. Ani chu a man a, a fâwp a. Ṭawngkama a thlêmna chuan, tlangvâl tân do theih  loh tûr khawpa nasa châkna a chawk tho a ni. Ani chu nungchang blawhhlawhnaah a inhmang ta a. Chu tlangvâl chu nungchang bawlhhlawhnaa inhmang tûra kal chhuak a nih hmêl lo va. Thiltawn a la nei lovin, remhriatna a tlachham mai a ni. Chutichung pawhin, a thiltih sawhkhâwk râpthlâk tak chu a tawrh a ngai ta. Atîrah chu hmeichhia chu hnaih lo sela chuan a tân a ṭha hle tûr!—Thuf. 7:6-27.

⁹ Châkna sualte min neihtîr thei dinhmun hlauhawm taka awmin, chutiang rem hriatna kan tlâkchhamzia lantîr châng kan nei thei em? Entîr nân, cable TV pe chhuaktute chuan zan rehah film ṭha vak lote an chhuah mai thei a. A channel chu zawn ber pawh awm lovin thlâk kual ta ṭhîn ila engtin nge ni ang? A nih loh leh, tum nei lovin Internet link-te kan enkual mai mai emaw, saruak lem leh thuziakte en tûr, a nih loh leh mipat hmeichhiatna thil dang tihsak tûra sâwmnate chuanna chat room-te kan en emaw thei a ni. Chutiang dinhmunah chuan keimahnia châkna sual min neihtîr thei leh nungchang thianghlim vawng tûra kan invênna tichhe thei thilte kan tâwk thei ang em?

10. Inchhaiderna chu engvângin nge a hlauhawm? (A thupui chunga milem en rawh.)

¹⁰ Bible chuan mipat hmeichhiatpui ni lote cheibâwl dân tûr min pein min ṭanpui a. (1 Timothea 5:2 chhiar rawh.) Chu zilhna chuan inchhaiderna a phal lo tih a chiang hle. Mi ṭhenkhat chuan taksa chêt vêl dân te, zaizir dân te, leh inngaih melh angte chu a taka thiltih a tel loh avângin thil hlauhawmah an ngai lo va. Mahse, inchhaiderna, a nih loh leh chu mi chhân lêtna chuan ngaihtuahna bawlhhlawh a chawk tho theiin, chu chuan mipat hmeichhiatna lama thil sual tihna a thlen thei a. A thleng tawh ngai a—a thleng nawn leh thei a ni.

11. Josefa chuan entawn tûr ṭha eng nge a siam?

¹¹ He mi chungchângah hian Josefa chuan fing takin thil a ti a. A pu, Potiphara nupuiin a thlêm khân, a lo hnâwl a. Mahse, a pu nupui chu a beidawng mai lo. Nî tin amah nêna awm dûn tûrin a sâwm ṭhîn a. (Gen. 39:7, 8, 10) Bible lama mi thiam pakhat sawi dânin, Potiphara nupui chuan hetianga sawi ang tluk a ni: “[Josefa’n] hma a lâk beisei tak chunga ‘Rei lo te chhûng chu kan pahnih chauhvin i awm dûn ang,’” tia sawi ang mai a ni. Mahse, Josefa chuan a thlêmna chhân lêt loh emaw, lo dawh mai mai loh emaw chu a tum tlat a. A thlêmna chu hnâwlin, a chhaider lêt lo va, chutiang chuan a thinlungah châkna sualin zung kaih lo tûrin a vêng a ni. Mutpui tûra a tihluih chuan, Josefa’n chêt a la vat a. “A silhfên chu a kutah chuan a tlânsan a, a chhuak ta daih” a ni.—Gen. 39:12.

12. Kan thil hmuhin kan thinlung a nghawng thei tih engtin eng kan hriat?

¹² Bible chuan kan thil hmuhin kan thinlung a hruai pênna hlauhawm lakah pawh min vaukhân bawk a. Mit lên vêlna chuan mipat hmeichhiat hman châkna a tichhuak theiin, a tizual thei a ni. Isua’n heti hian a vaukhân a: “Tupawh ngaih châka hmeichhe melh apiang chu, a thinlungah a uirê tawh reng a ni tih ka hrilh a che u,” tiin. (Mt. 5:28) Lal Davida chunga thilthleng kha hre chhuak leh ang che. “In chung aṭang chuan hmeichhe pakhat inbual lai hi a han hmu a.” (2 Sam. 11:2) A mit la sawnin, a ngaihtuahna hmun dangah a pe lo va. Chu chuan mi dang nupui chu a awhtîr a, tichuan uirêna a thlen ta a ni.

13. Engvângin nge ‘kan mit atân thuthlung kan siam’ a ngaih a, chutah chuan eng nge tel?

¹³ Nungchang bawlhhlawhna lam ngaihtuahna do tûr chuan, mi rinawm Joba anga ‘kan mit atân thuthlung kan siam’ a ngai a. (Job. 31:1, 7, 9) Kan mitte thunun kan tum tlat tûr a ni a, mi dangte chu nungchang bawlhhlawhna hmanpui duhna nên kan en tûr a ni lo. Chutah chuan mipat hmeichhiatna hman châkna chawk tho thei computer screen-a thil lo lang te, khawlaia lem târ te, magazine kâwm  te, a nih loh leh thil dangte laka kan mit lâk sawn pawh a tel a ni.

14. Nungchang thianghlimna vawng reng tûra zilhna chu engtin nge kan hlâwkpui theih?

¹⁴ Kan târ lan tâkte zîngah hian chak lohna lai i nei a ni tih i hriat chuan hma la vat rawh. Pathian Thu-a zilhna chuangte inhuam taka zawmna chuan thil sual tih pumpelh tûr leh nungchang thianghlimna vawng reng tûrin min ṭanpui thei a ni.—Jakoba 1:21-25 chhiar rawh.

15. Châkna bawlhhawlh do harsa kan tih chuan, ṭanpuina zawn chu engvângin nge a pawimawh?

¹⁵ Mipat hmeichhiatna hmanna sual do harsa kan tih chuan, ṭanpuitu dang awm theite chu Kristian unaute hi an ni a, anni chu kan pan thei a ni. Chutiang mi mal buaina chungchâng mi dangte sawipui chu a awlsam lo ngei mai. Mahse, huaisen taka Kristian puitling pakhat inendiktîrna chuan châkna sual nei reng chunga inthiam chawpna lakah min vêng thei ang. (Thuf. 18:1; Heb. 3:12, 13) Thlarau lama puitling Kristian hnêna kan chak lohnate sawina chuan mahnia kan inhmuh theih lohna laite hmu thiam tûrin min ṭanpui thei a. Hei hian Jehova hmangaihnaa invawng ṭha reng tûra insiamrem ngai apiangte insiamrem tûrin min ṭanpui thei a ni.

16, 17. (a) Engtin nge upate chuan châkna bawlhhlawh do harsa tite chu an ṭanpui theih? Entîrna pe rawh. (b) Engvângin nge saruak lem leh thuziak entute chuan ṭanpuina an zawn vat chu a ṭhat?

¹⁶ Kristian upate chu min ṭanpui tûrin an tling bîk a. (Jakoba 5:13-15 chhiar rawh.) Brazil rama ṭhalai mipa pakhat chuan kum tam tak chhûng chu châkna sualte harsa takin a do va. Heti hian a sawi a ni: “Ka ngaihtuahnate chuan Jehova a tilâwm lo tih ka hria a; mahse, ka awm dân mi dangte hrilh chu zahthlâk ka ti hle,” tiin. Vânneihthlâk takin, mite ngaihsak tak kohhran upa pakhatin ṭanpuina zawng tûrin a fuih a ni. Chu tlangvâl chuan: “Upate’n ka chunga ngil an neih dân hi mak ka ti a, ka phu aia nasain, ngilneihna leh hriatthiamna an nei a ni. Ka harsatnate chu ṭha takin min ngaihthlâksak a. Jehova’n min hmangaih tih Bible hmangin min hrilh nawn a; tichuan, min ṭawngṭaisak bawk. Chu chuan Bible aṭanga zilhna min pêkte pawm chu a ti awlsam sawt a ni,” tiin a sawi. Thlarau lama hma a sâwn hnu, kum tam takah: “Tûnah chuan kan phûrritte hi mahni chauhva phurh aiin, ṭanpuina zawn a pawimawhzia ka hre ta,” tiin a sawi a ni.

¹⁷ Châkna ṭha lo kan neih chhan chu saruak lem leh thuziakte en ṭhinna thil chîn bawlhhlawh neih vâng a nih chuan ṭapuina zawn chu a pawimawh hle. Ṭanpuina zawn vat a nih loh chuan, sual chu a nasa chhovin, châkna bawlhhlawh chuan ‘no a pai ang a, sual a hring’ ang; chu chuan, mi dangte a tinâ ang a, Jehova hming a tichhe bawk ang. Jehova tihlâwm duhna leh Kristian kohhrana awm reng duhna chuan a chhiahhlawh tam takte chu hmangaih taka ṭanpuina pêkte dawng tûrin a chêttîr a ni.—Jak. 1:15; Sâm 141:5; Heb. 12:5, 6.

18. Eng nge tih kan tum tlat ang?

¹⁸ Nungchang lama Setana khawvêl a tlâk hniam telh telh laiin, a chhiahhlawh inpe takte’n theih tâwp chhuaha ngaihtuahna thianghlim neih leh nungchang lama a tehna sâng takte zawm an tum a hmuh hian, Jehova chuan min va chhuang dâwn tak êm! Chutianga min chhuan theih nân, kan vaiin Jehova hnaih tumin, a Thu leh Kristian kohhran hmanga a pêk kahhruaina chu pawm i tum tlat ang u. Nungchang thianghlimna vawn rengna chuan tûna lungâwina leh rilrua thlamuanna min pe a. (Sâm 119:5, 6) Nakina Setana tihboral a nih hnuah, a thununna ṭha lo laka thenfai tawh khawvêlah chuan chatuana nun theihna chanvo kan nei ang. (w15-E 06/15)