“Ka pa thih hnu lawk chuan ka pasal chuan hmeichhe dang kawp a neih thu min hrilh a. Chu mi hnu lawk chuan, hrilh lâwkna emaw, inthlahna emaw pawh awm lovin, a thawmhnawte lain kan fate pahnih nên min chhuahsan ta a ni,” tiin Janet-i chuan a sawi a. Hna erawh a hmu a; mahse, a hlawh chu an kham lo. Chutah, sum leh pai tân chauhva lungkham a ni tawh lo. Ani chuan: “Mawhphurhna thar ka neih zawng zawngte mahnia chinfel a ngaih avânga ka manganna chu a nasa hle. Nu leh pa dangte anga ka fate ka enkawl ṭhat theih loh avângin ka inthiam lo va. Tûnah ngei pawh hian, mite’n kei leh ka fate min thlîr dân tûr hi ka ngaihtuah buai a. Kan inneihna vênghim tûra ka tih tûr zawng zawng ti lo angin min ngai ang em le?” tiin a sawi.

Ṭawngṭaina chuan Janet-i chu a thlamuan a, Pathian nêna an inṭhianna chu a tinghet chho zêl a ni. “Zânah hian a harsa lehzual; thil engkim mai hi a reh ṭhup laiin ka lungkhamna a zual tulh tulh mai bawk si. Ṭawngṭaina leh Bible chhiarna chuan muhîl thei tûrin min ṭanpui a. Ka Bible châng duh deuh mai chu Philippi 4:6, 7-a: ‘Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u,’ tih hi a ni a. Zankhuain vawi tam tak ka ṭawngṭai a, Jehova thlamuanna ka dawng niin ka inhria,” tiin a sawi bawk.

Tlâng Chunga Isua Thusawia ṭawngṭaina chungchânga a thutiam: “In dîl hmain in Pa chuan engte nge in mamawh tih a hre reng si a,” tih hi lungkhamna engpawh atâna hman theih a ni a. (Matthaia 6:8) A hnêna kan dîl erawh a ngai a ni. Ṭawngṭaina hi ‘Pathian kan hnaih theih dân’ kawng pawimawh ber a ni a. Chutianga kan tih chuan a rah chhuah chu eng nge ni ta ang? ‘Pathianin a hnaih ang che.’—Jakoba 4:8.

Ni e, ṭawngṭaina chuan kan lungkhamnate sawi chhuah avânga min chhâwk mai bâkah thil dang pawh a ti thei a. “Ṭawngṭaina ngaithlatu” Pathian  Jehova chuan, rinna nêna amah zawngtu zawng zawngte tân thil a ti bawk a ni. (Sâm 65:2) Chuvângin, Isua chuan a hnungzuitute chu ‘beidawng lova ṭawngṭai tûrin’ a zirtîr a. (Luka 18:1) Pathian hnênah chuan kan rinna atân lâwmman min pe ang tih ring tlat chungin a kaihhruaina leh ṭanpuina kan dîl reng tûr a ni. Kan tâna thiltih a duhna leh a tihtheihna chu kan ringhlel ngai tûr a ni lo. Hetiang kawnga ‘bâng lova kan ṭawngṭaina’ hian rinna dik tak kan neihzia a târ lang.—1 Thessalonika 5:17.

Rinna chu eng nge a nih chiah? Rinnaah chuan Pathian hi mi tak tak nia “hriat” a tel a. (Johana 17:3) Chutiang hriatna nei tûr chuan Bible aṭangin Pathian ngaihtuahte hriat kan tum hmasa ber tûr a ni. Ani chuan min hmu ṭheuhvin, min ṭanpui a duh tih kan hria a. Mahse, rinna dik takah chuan Pathian chungchâng hriatna engemaw neih mai aia tam a tel a. Amah nêna kan inkârah zah thiam taka inṭhianna nghet tak a awm tihna pawh a ni bawk. Mihringte inṭhianna ang bawkin, chutiang inṭhianna chu zan khat thilthua neih theih a ni lo. A chanchin kan zir tam a, “a thil lâwmzâwng apiang” ka tih a, a ṭanpuina kan dâwn hian, kan rinna ‘a ṭhang chho zêl’ a ni. (2 Korinth 10:15; Johana 8:29) Chutiang rinna chuan Janet-i chu a lungkhamnate hneh tûrin a ṭanpui a ni.

Janet-i chuan: “Rinna nei tûra min ṭanpuitu ber chu kawng tinrênga Jehova ṭanpuina ka hmuhna hi a ni. Vawi tam tak chu mahnia hmachhawn theih loh tûr hleih neihna kan tâwk a. Mahse, nasa takin ka ṭawngṭaia, mahni pawha ka ngaihtuah chhuah theih loh tûr zâwngin, Jehova chuan chhan chhuahna kawng min siamsak ṭhîn. Lâwmthu ka sawi hian, ka tâna thil min tihsak nasat dân ka hre chhuak a. Ani chuan a hun dik takah leh a hun takah min ṭanpui ṭhîn. Chu bâkah, Kristian a hmei a pa ṭhian ṭha tam tak min pe a. Min ṭanpui an inpeih reng a, ka fate tân pawh entawn tûr ṭha tak an ni,” tiin a sawi. *

“Pathian Jehova’n Malakia 2:16-a: ‘Inmâk hi ka haw si a,’ a tih chhan ka hria. A thiam zâwk tân chuan inbumna nasa ber a ni si a. Ka pasalin min chhuahsanna chu kum tam tak a liam tawh a; mahse, ruak hle nia inhriatna ka la nei reng a ni. Chutiang hunah chuan, mi dang ṭanpui tûrin thil engemaw ka ti ṭhîn a, chu chuan kei pawh min ṭanpui ṭhîn a ni.” Mahni inkulh hranna pumpelh tûr tih Bible thu bul a zawm avângin, Jenet-i chuan a lungkhamna chu a tinêp thei a ni. *—Thufingte 18:1.

Janet-i chuan: “Min thlamuantu ber chu, Pathian chu ‘pa nei lote pa leh hmeithaite ngaihtuahtu a ni,’ tih ka hriatna hi a ni. Ani chuan ka pasal angin mi kalsan ngai lo vang,” tiin a sawi a. (Sâm 68:5) Janet-i chuan Pathian chuan ‘sualin’ min thlêm lo tih a hre chiang a. Chu mi nêna inkalh takin, ani chuan ‘ui lovin’ finna a pe a, kan lungkhamnate hmachhawn thei tûrin “thiltihtheihna” nasa tak min pe bawk a ni.—Jakoba 1:5, 13; 2 Korinth 4:7.

Mahse, dinhmun hlauhawma kan awm avânga kan lungkham a nih chuan engtin nge ni ang? (wp15-E 07/01)