1, 2. (a) Hun kal tawhah khân, khawi hmunah nge Jehova chhiahhlawhte chuan Jehova an biak? (b) Engtin nge Isua’n Jerusalema Jehova biak in chu a ngaih? (c) He thuziakah hian eng nge kan sawiho vang?

PATHIAN chhiahhlawhte chuan hmân lai aṭang tawhin Pathian biakna hmunte an lo nei ṭhîn a. Entîr nân, Abela chuan Jehova hnêna inthawina a hlan khân, maichâm pakhat a siam a rinawm hle. (Genesis 4:3, 4) Nova te, Abrahama te, Isaaka te, Jakoba leh Mosia te chuan maichâmte an siam ṭheuh a ni. (Genesis 8:20; 12:7; 26:25; 35:1; Exodus 17:15) Jehova chuan Israel mite chu biak bûk sa tûrin a hrilh a. (Exodus 25:8) A hnuah, biak in sa tûrin anni chu a hrilh a ni. (1 Lalte 8:27, 29) Pathian mite Babulon sal tânna aṭanga an kîr leh hnu chuan, inkhâwmna inahte an inhmukhâwm ṭhîn a. (Marka 6:2; Johana 18:20; Tirhkohte 15:21) Tin, Kristian hmasate chu inahte an inhmukhâwm ṭhîn bawk. (Tirhkohte 12:12; 1 Korinth 16:19) Tûn laiah, khawvêl puma Jehova mite chuan Kingdom Hall tia koh an biak in sâng tam takah inhmukhâwmin Jehova chungchâng an zîr a, amah chu chibai an bûk a ni.

² Isua chuan Jerusalema Jehova biak in chu a zah hle a. Biak in a hmangaihzia a zirtîrte’n an han hmuh chuan fakna hlaphuahtuin: “I ina ka ṭhahnemngaihnain mi ei zo va,” tia a sawi  hi an hre chhuak a ni. (Sâm 69:9; Johana 2:17) Jerusalema biak in hi “LALPA in” a ni a; tûn laia Kingdom Hall-te hi chutiang zâwngin “LALPA in” a ni ve lo. (2 Chronicles 5:13; 33:4) Mahse, kan biakna hmun a nih avângin kan zah hle tûr a ni. He thuziakah hian, Kingdom Hall-a kan awm dân tûr te, kan enkawl dân tûr te, leh sum leh paia kan ṭanpui theih dân te min hriattîrtu Bible thu bulte sawiho a ni ang. *—Footnote en rawh.

3-5. Kingdom Hall chu eng nge ni a, engtin nge kan inkhâwmna chu kan ngaih ang?

³ Kingdom Hall hi Jehova be tûra mite lo kal khâwmna hmun ber a ni a. Inkhâwmte hi Pathian thil min pêk a ni a, chûng chuan amah nêna kan inlaichînna tinghet tûrin min ṭanpui a ni. Kan inkhâwmnaah hian Pathian inawpna pâwl chuan fuihna thu leh kan mamawh kaihhruainate min pe a. Jehova leh Isua’n “Lalpa dawhkâna” chawlhkâr tin ei tûra min sâwm chu chawimawina a tling a ni. (1 Korinth 10:21) He sâwmna pawimawhzia hi kan theihnghilh ngai tûr a ni lo.

⁴ Jehova chuan amah be tûr leh infuih tawn tûra kan inkhâwm a duh thu chu chiang takin min hrilh a. (Hebrai 10:24, 25 chhiar rawh.) Jehova kan zah avângin loh theih loh thil a nih loh chuan inkhâwm kan pelh mai mai lo vang. Kan inkhâwm atâna inbuatsaih a, inkhâwmaa chhânnate pêk châkna kan neih hian kan inkhâwmte avânga kan lâwmzia kan târ lang tihna a ni.—Sâm 22:22.

⁵ Inkhâwmnaa kan awm dân leh kan Kingdom Hall enkâwl dân chuan Jehova kan zahzia a târ lang a ni. Kan nungchangin Kingdom Hall signboard-a târ chhuah ṭhin Jehova hming a chawimawi chu kan duh a ni.—1 Lalte 8:17 nên khaikhin rawh.

6. Mite chuan kan Kingdom Hall-te leh chuta inkhâwmte chungchângah eng nge an sawi? (A thupui chunga milem en rawh.)

⁶ Kan Kingdom Hall-te kan zah hian, chu chu mi dangte’n an hria a ni. Entîr nân, Turkey rama pa pakhat chuan: “Kingdom Hall fai tak leh ruahmanna fel ka hmuh chuan ka rilru a hneh hle a. Chuta mite chu felfai takin an inthuam a, hlim hmêl puin, min lo lâwm thiam a. Chu chuan ka rilru a khawih hle,” tiin a sawi. Chu pa chu inkhâwm zawng zawngah a tel ṭan a, tichuan, rei vak lovah baptisma a chang ta a ni. Indonesia rama khawpui pakhata unaute chuan an ṭhenawm khawvêng te, an khaw mi lian, leh thuneitu dangte chu an Kingdom Hall thar en tûrin an sâwm a. A in ṭhat dân te, a design te, leh a huan mawi takte chuan mi lian rilru chu a khawih hle a. “He biak in thianghlimna hian in rinna a târ lang a ni,” tiin a sawi a ni.

7, 8. Kingdom Hall-a kan awm hunah engtin nge Jehova zahna kan lantîr ang?

⁷ Jehova chu inkhâwm tûra min sâwmtu a ni a, kan lan dân leh awm dânte chu a ngaihsak a ni. Chuvângin, a âwm tâwkin kan awm a; kan fîrin kan tak rûn lo va, kan inthlahdah lutuk hek lo. Jehova chuan keimahni leh inkhâwma kan sâwmte chu Kingdom Hall-ah nuam tak leh hahdam taka an awm chu a duh ngei mai a. Mahse, eng kawng mahin kan inkhâwmte zah lohna lantîr chu kan duh lo. Chuvângin, inkhâwmnaah thuamhnaw chuar leh awm thawvenna ang chite chu kan ha lo va; inkhâwm laiin SMS thawn te, ṭawng te, leh thil ei leh in te chu kan pumpelh a ni. Nu leh pate chuan an fate chu Kingdom Hall-a  tlân lo tûr leh infiam lo tûrin an zirtîr tûr a ni bawk.—Thuhriltu 3:1.

⁸ Isua’n mite’n Pathian biak ina thil an zuar a hmuh khân, a thin a rim a, anni chu a hnawt chhuak a ni. (Johana 2:13-17) Kingdom Hall-ah hian Jehova kan bia a, a chanchin kan zir bawk a. Chuvângin, inkhâwmnaah chuan sumdâwnna lam thilte tih chu a dik lo vang.—Nehemia 13:7, 8 nên khaikhin rawh.

9, 10. (a) Engtin nge Jehova mite’n Kingdom Hall an sak a, eng nge a rah chhuah? (b) Engtin nge Jehova inawpna pâwl chuan Kingdom Hall sa ve thei lo kohhrante chu a ṭanpui?

⁹ Khawvêl puma Jehova mite chu Kingdom Hall saknaah an thawk rim hle a. Hlawh nei lovin design an siam a, a thar an sain, a hluite an chei thar a ni. Chuvâng chuan, kum kal ta 15 chhûng khân, khawvêl pumah Kingdom Hall ṭha tak tak 28,000 aia tam sak a ni a, nî tin hian Kingdom Hall 5 vêl sa ang kan ni.

¹⁰ Jehova inawpna pâwl chuan tlâwmngaite ruatin mamawhna hmun apianga Kingdom Hall sak nân thawhlâwmte a hmang a ni. A nei tamte chuan tlachhamte chu an ṭanpui thei tih Bible thu bul chu kan zâwm a. (2 Korinth 8:13-15 chhiar rawh.) Chu chuan eng rah nge a chhuah? Mahnia sa thei lo kohhrante tân Kingdom Hall tam tak saksak a ni.

11. Unau ṭhenkhatte chuan an Kingdom Hall thar chungchângah eng nge an sawi a, hei hian engtin nge a awmtîr che?

¹¹ Costa Rica rama unaute chuan heti hian an ziak a: “Kingdom Hall hmaa kan din hian mumangte pawh a ang hial! Rin harsa kan ti hle. Kan Kingdom Hall mawi tak chu ni riat chhûng leka sak zawh a ni ta! Chu chu Jehova malsâwmna te, a inawpna pâwl hmanga a ruahmanna te, leh unau duh takte ṭanpuina avânga tih theih a ni a. He biakna hmun hi Jehova min pêk thilpêk hlu tak a ni a, kan hlimpui hle,” tiin. Kan unaute’n an tâna Jehova thiltihsakte chunga lâwmthu an sawina hriat chuan min tihlim tak zet a ni. Chu bâkah, khawvêl puma unaute chuan mahni Kingdom Hall an nei ṭheuh thei chuan min tihlim bawk. Kingdom Hall sak zawh rualin Jehova chungchâng zir tûra mi tam tak an rawn inkhâwm avângin, he rawngbâwlna hi Jehova’n mal a sâwm tih a chiang hle.—Sâm 127:1.

12. Entin nge Kingdom Hall sakna kan ṭanpui theih?

¹² Engtin nge Kingdom Hall sakna chu i ṭanpui theih? Tlâwmngaia inpein i ṭanpui thei a. Tin, kan vai hian Kingdom Hall sakna atân sum leh pai kan thawh thei bawk. He hna thawhnaa theih tâwp kan chhuah hian pêk chhuahna aṭanga lo awm hlimna kan nei ang a, a aia pawimawh zâwk chu Jehova kan chawimawi hi a ni. Bible hun laia biak bûk sak nâna phal taka petu Pathian mite entawn tûr siam chu kan zui a ni.—Exodus 25:2; 2 Korinth 9:7.

13, 14. Kan Kingdom Hall chu thianghlim tak leh fel fai takin kan dah tûr a ni tih Bible aṭangin eng nge kan zir?

¹³ Pathian Jehova chu a thianghlimin, a ruahmanna a fel fai a. Chuvângin, kan Kingdom Hall chu thianghlim tak leh fel fai takin kan dah tûr a ni. (1 Korinth 14:33, 40 chhiar rawh.) Pathian Jehova anga thianghlim tûr chuan amah kan biaknaah te, kan ngaihtuahnaah te, leh kan thiltihahte chauh ni lovin, tîsa lamah pawh kan thianghlim tûr a ni.—Thu Puan 19:8.

¹⁴ Kan Kingdom Hall-te thianghlim tak leh fel fai taka kan dah hian kan inkhâwmnaa lo tel tûrin mite chu inchhuang takin kan sâwm thei a. Mite chuan khawvêl thar thianghlim tak chungchâng kan sawite chu a takin kan nunpui a ni tih an hria ang. Chu bâkah, he khawvêl hi paradis mawi taka la siamtu tûr Pathian thianghlim kan bia tih an hre bawk ang.—Isaia 6:1-3; Thu Puan 11:18.

15, 16. (a) Engvângin nge Kingdom Hall thianghlim taka dah reng chu thil awlsam a nih loh? Engvângin nge kan tihfai reng ang? (b) Engtin nge in Kingdom Hall tihfaina chu ruahman a nih a, eng chanvo hlu nge kan neih ṭheuh?

¹⁵ Mite chuan thianghlimna chungchângah ngaih dân chi hrang hrang an nei a. Engvângin nge? Chu chu an seilen dân a inan loh vâng a ni thei ang. Mi ṭhenkhat chu vaivut tamna hmun, a nih loh leh kawngpui bawlhhlawh leh diak awmna hmuna seilian an ni thei bawk. Mi dangte chuan tui leh tihthianghlimna hmanrua leh bâwlhlote an nei lo thung. Mahse, kan awmna hmuna mite’n thianghlimna chungchângah ngaih dân eng pawh nei se, kan Kingdom Hall chu thianghlim tak leh fel fai takin kan dah tûr a ni. Pathian Jehova kan biakna hmun a ni si a.—Deuteronomy. 23:14.

¹⁶ Kan Kingdom Hall chu a thianghlim thei ang bera dah kan duh chuan ruahmanna fel tak neih a ngai a. Upate chuan kohhran tân  hun duan an siam ang a, tihthianghlimna hmaruate leh bâwlhlote chu hman theih tûrin an kawl reng tûr a ni. Chu chu thawh ni ngei tûrin upate chuan ruahmanna fel tak an siam bawk ang. Inkhâwm bân apiang tihfai ngai ṭhenkhat awm mah se, thil dangte chu chutianga tihfai ngun a ngai lo va. Kan vai hian kan Kingdom Hall tihfai theihna chanvo hlu kan nei ṭheuh a ni.

17, 18. (a) Hmân laia Jehova mite’n biak in an enkawl dân aṭangin eng nge kan zir theih? (b) Engvângin nge kan Kingdom Hall enkawl ṭhat a ngaih?

¹⁷ A ṭûlna lai apiang siam ṭhain kan Kingdom Hall chu kan enkawl bawk a. Hmân laia Jehova chhiahhlawhte chuan chutiang bawkin an lo ti a ni. Entîr nân, Juda Lal Jehoasa lal chhûng khân, mite chuan biak in tân sum an thawh a. Lal chuan chu sum chu puithiamte hnênah biak in chhe lai apiang siam ṭhat nâna hmang tûrin a hrilh a ni. (2 Lalte 12:4, 5) A hnu kum 200 vêlah chuan Lal Josia pawhin biak in thawhlâwmte chu biak in siam ṭhat nân a hmang a ni.—2 Chronicles 34:9-11 chhiar rawh.

¹⁸ Ram ṭhenkhata Branch Committee-te chuan an rama inte emaw, hmanruate emaw chu ṭha taka enkawl a ni lo tih an hria a. Chu mi ramah chuan a enkawl dân hria an awm mang meuh lo a ni thei a. A nih loh leh a enkawlna tûr sum leh pai an nei tâwk lo pawh a ni thei ang. Mahse, kan Kingdom Hall chu a ṭûl huna thawm ṭhat a nih loh chuan, a hnawk ṭan ang a, mite’n an hmu ang. Chu bâkah, thu hrilhna ṭha a thlen lo vang. Chu aimah chuan kan zaa Kingdom Hall ṭha taka kan enkawl chuan Jehova kan chawimawiin unaute thawhlâwm kan khawhral lo a ni ang.

19. Jehova biakna hmun i zahzia târ lan nân eng nge i tih ang?

¹⁹ Kingdom Hall hi Pathian Jehova hnêna hlan tawh a ni a. Mi mal emaw, kohhran emaw ta bîk pawh a ni lo. He thuziaka kan sawiho angin, Bible thu bulte chuan Pathian biakna hmun chungchânga rilru put hmang dik tak nei tûrin min ṭanpui ang. Jehova kan zah avângin inkhâwmnate leh Kingdom Hall-te chungah zahna kan lantîr a. Kingdom Hall sak nân thawhlâwmte lâwm takin kan thawh a, theih tâwp chhuaha enkawlin kan vawngfai bawk. Isua ang bawkin, Jehova kan biakna hmun atân ṭhahnemngaihna leh zahna kan lantîr a ni.—Johana 2:17. (ws15-E 07/15)