Fa pahnih nei Paul-a chuan: “Kan rama sum hlutna a tlâk hniam thut chuan ei tûr man a to chhovin a vâng chho hle a. Ei tûr lei tûrin dârkâr engemaw zât kan intlâr a; mahse, kan chan ve hun a lo thlen hmain ei tûrte chu a zo tawh ṭhîn a. Mite chu ei tûr an neih loh avângin an chêr chhe hle a, ṭhenkhat chu kawngahte nikhaw hre lovin an tlu a. Mihring mamawh bul puite man chu maktaduai aṭanga tlûklehdingâwn thlengin a kaisâng chho va. A tâwpah, pawisate chuan hlutna rêng a nei tawh lo va. Bank-a ka pawisa neih te, ka insurance te, leh ka pension te chu eng atân mah a ni tawh lo,” tiin a sawi.

Paul-a chuan an chhûngkaw dam khawchhuah nân “finna . . . dik tak” a hman a ngai tih a hria a. (Thufingte 3:21) “Electric contrator ka ni a; mahse, hlawh pângngai aia tlêm pawhin ka hna hmuh apiang chu ka thawk a. Mi ṭhenkhat chuan hlawh atân ei tûr te a nih loh leh, in chhûngkhura thil hmante chu min pe a. Sahbawn tlang pali min pêk chuan pahnih chu hmangin, a dang pahnih chu ka hralh a. Chutiang chuan a tâwpah ar tê 40 ka rawn nei chho va. An puitlin hun chuan ka hralh a, artê dang 300 ka lei leh a. A hnuah, ar 50 chu pound 110 (50 kg) vaimim dip bag hnih nên ka thleng a. Chu vaimim dip bag hnih chuan ka chhûngkua leh chhûngkaw dang engemaw zât chu hun rei tak chhûng ka châwm a ni,” tiin a sawi.

Paul-a chuan mite tih theih zînga ṭha ber chu Pathian rinchhan hi a ni tih a hre bawk a. Pathian thupêk anga thil kan tih hian ani’n min ṭanpui a ni. Nun atâna thil mamawhte chungchângah Isua chuan: “Tuilairap angin . . . awm suh u . . . chûng chu in mamawh tih in Pain a hre reng si a,” tiin a sawi a ni.—Luka 12:29-31.

Pathian hmêlma ropui ber Setana chuan khawvêla mi tam zâwkte chu an nuna tîsa lam thilte ringawt lungkham tûra a bum thei chu a lungchhiatthlâk hle. Mite chuan an mamawh tak takte leh mamawh nia an inhriat thilte chu a lutukin an lungkham a, an mamawh tak tak loh thilte neih chu an tum tlat a. Chuvângin, mi tam tak chuan leiba an nei a, “pûktu chu a pûktîrtu chhiahhlawh a ni” tih thu  dikzia chu a harsa zâwngin an zir a ni.—Thufingte 22:7.

Mi ṭhenkhat chuan thu tlûkna ṭha lo takte an siam a. Paul-a chuan: “Mi tam tak chuan an chhûngte leh an ṭhian ṭhate chu ‘dinhmun ṭha zâwk’ ûmin ram pâwnah an chhuahsan a. Mi ṭhenkhat chuan dân ang taka an kal loh avângin, hna an hmu thei lo va. Police-te man hlauh avângin an biru a, kawngahte hian an riak ṭhîn a ni. Anni chuan Pathian ṭanpui theihna hun remchâng an pe lo a ni. Mahse, Pathian ṭanpuinain sum leh pai lama kan harsatna tawh chu chhûngkuaa hmachhawn kan tum tlat a ni,” tiin a sawi.

Paul-a chuan: “Isua thusawi: ‘Atûk atân lungkham suh u, atûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni,’ tiin a sawi a. Chuvângin, ka nî tin ṭawngṭainaah chuan Pathianin kan dam khawchhuah theihna tûr khawp ‘vawiina kan ei khawp chaw’ min pe tûrin ka dîl ṭhîn. Isua min tiam ang ngeiin, ani chuan min ṭanpui a ni. Kan duh berte chu kan nei vek reng thei ṭhîn lo. Ṭum khat chu, an thil zawrh hre lovin ei tûr lei tûrin ka va intlâr ringawt a. A hma ka va thlen chuan, yogurt (dhoi) a lo ni a. Chu chu ka thil duhzâwng a ni lo. Mahse, ei mi a ni miau si a, chu mi zân chuan yogurt chu kan ei ta a. Chu mi hun chhûng zawng chuan ka chhûngte nên rîlṭâmin mut hmun kan pan ngai loh avângin, Pathian chungah ka lâwm tak zet a ni,” tiin a sawi zawm a ni. *

“Tûnah chuan ziaawm lam kan pan tawh a. Mahse, kan thiltawn aṭangin lungkhamna tihreh dân ṭha ber chu Pathian rinchhan hi a ni tih kan hria. Jehova * chuan a duhzâwng tih kan tum tlat chuan min ṭanpui zêl ang. Fakna hla phuahtuin Sâm 34:8-a: ‘Aw, LALPA ṭhatzia chu tem chhin teh rêng u: amaha rinna nghat mi chu a eng a thâwl e,’ tia a sawi hi thu dik tak a ni tih kan hre ta. Chuvângin, sum leh pai lama harsatna tawh leh chu kan hlau tawh lo.

“Tûnah chuan mihringte dam khawchhuah nâna mamawh chu hna emaw, pawisa emaw a ni lo va, chaw a ni tih kan hre thiam ta. ‘Leiah, tlâng chungahte hian, buh tam tak a awm ang a,’ tih Pathian thutiam thlen famkim hun tûr chu kan nghâkhlel hle a. Chu mi a lo thlen hma chuan, ‘ei tûr leh silh tûr neiin chûngah chuan kan lungâwi ang.’ ‘In rilru putzia chu tangka ngainatna tel lo ni rawh se; in thil neih chhun chungahte chuan lungâwi rawh u, amah ngeiin, “Engtikah mah ka thlahthlam tawp lo vang chia, kal pawh ka kalsan tawp lo vang che,” a ti si a. Chutichuan huai takin, ‘Lalpa chu mi ṭanpuitu a ni, ka hlau lo vang,’ tih Bible thu aṭang hian chakna kan hmu thei a ni.” *

Paul-a leh a chhûngte tih anga Pathian nêna lêng dûn tûr chuan rinna dik tak neih a ngai a. (Genesis 6:9) Tûnah sum leh pai lama harsatna nasa tak kan tâwk mêk emaw, kan la tâwk dâwn emaw pawh ni se, rinna leh finna kawnga Paul-a entawn tûr siam chuan zir tûr pawimawh tak min pe a ni.

Mahse, lungkhamna kan neih chhan chu chhûngkaw harsatna vâng ni ta se, engtin nge ni ang? (wp15-E 07/01)