1, 2. Thuthlung Hluia “ke nghahchhan” tih ṭawngkam hian eng nge a kawh theih?

PATHIAN JEHOVA chuan: “Vân ka ṭhutphah a ni a, lei ka ke nghahchhan a ni,” a ti a. (Isaia 66:1) Pathianin: “Ka ke rahna hmun chu ka tiropui ang,” a tih khân a “ke nghahchhan” chungchâng a sawi a ni. (Isaia 60:13) Engtin nge a ke nghahchhan chu a tihropui, a nih loh leh a tihmawi? A ke nghahchhan, leia awmte tân eng awmzia nge a neih?

² Thuthlung Hluia “ke nghahchhan” tih ṭawngkam hi hmân lai Israel rama biak in sawi nân pawha hman a ni a. (1 Chronicles 28:2; Sâm 132:7) Chu chu biakna dik hmunpui a nih avângin Jehova tân a mawi hle a. Leia Jehova chawimawi nâna hman a ni bawk.

3. Tûn laia biakna dik hmunpui chu eng nge ni a, chu chu engtikah nge a awm ṭan?

³ Tûn laia biakna dik hmunpui chu eng nge ni? Hmân laia Jerusalem biak in ang lo takin, tûn laiah chuan eng in sak mah hi biakna dik hmunpui a ni lo. Thlarau lam biak in a ni a, chu chuan in dang zawng zawng ai pawhin Jehova a chawimawi nasa zâwk a ni. Thlarau lam biak in chu eng nge ni? Chu chu mihringte a ṭhian  nihtîr a, amah biaktîr theitu Pathian ruahmanna siam hi a ni. He ruahmanna hi Isua tlanna vâng chauhva awm a ni a. Chu ruahmanna chu C.E. 29-a Isua’n baptisma a chan a, Jehova thlarau lam biak ina Puithiam Lal ni tûra hriak thih a nih khân a awm ṭan a ni.—Hebrai 9:11, 12.

4, 5. (a) Sâm 99 sawi angin Jehova betu dikte chuan eng nge tih an duh? (b) Eng zawhna nge kan inzawh ang?

⁴ Biakna dik atâna Pathian ruahmanna avângin kan lâwm hle a. Chu kan lâwmna chu Jehova hming leh tlanna thil pêk ropui tak chungchâng mi dangte hnêna hrilhin kan târ lang a ni. Kristian dik maktaduai riat chuangte’n nî tin Pathian Jehova an fak avângin kan phûr hle! Sakhaw tam taka awmte chuan an thih hnua vâna Pathian fak tûr nia ngaih dân dik lo an neih laiin, Jehova mite chuan tûn la laa he leia amah fak a pawimawhzia chu an hria a ni.

⁵ Jehova kan fak hian, Sâm 99:1-3, 5-a târ lan Pathian chhiahhlawh rinawmte chu kan entawn tihna a ni. (Chhiar rawh.) Mosia, Arona, leh Samuela ang mi rinawmte chuan tûn hmaa biakna dik tâna Pathian ruahmanna chu an lo thlâwp tlat a. (Sâm 99:6, 7) Tûn laiah, hriak thihte chuan vâna Isua nêna puithiam anga rawng an bâwl hmain, leia thlarau lam biak inah Jehova rawng rinawm takin an bâwl a ni. “Berâm dang” maktaduai tam takte chuan anni chu rinawm takin an ṭanpui a. (Johana 10:16) He pâwl hnih hian inpumkhatin Jehova an bia a ni. Mahse, mi mala kan inzawh tûr chu, ‘Biakna dik tâna Jehova ruahmanna chu ka thlâwp tak zet em?’ tih hi a ni.

6, 7. Kristian kohhran hmasaah eng harsatna nge lo chhuak a, kum 1919-ah eng nge thleng?

⁶ Kristian kohhran din a nihna kum 100 pawh a ral hmain, sawi lâwk angin kalpênna chu a lo awm ṭan a. (Tirhkohte 20:28-30; 2 Thessalonika 2:3, 4) Chu mi hnuah chuan, Pathian betu dikte chu hriat hran an harsa telh telh a. Kum za tam tak a liam hnuah, Jehova chuan A thlarau lam biak ina rawngbâwltu dik takte chu tute nge an nih târ lang tûrin Isua a hmang a ni.

⁷ Kum 1919 a lo thlen chuan, Pathian pawm tlâka a biak ina rawngbâwltute chu fiah taka hriat theih an lo ni a. Anni chuan Jehova  pawm tlâk an nih lehzual theih nân insiam remna an nei a ni. (Isaia 4:2, 3; Malakia 3:1-4) Chuvângin, kum za tam tak kaltaa tirhkoh Paula inlârna hmuh chu a thleng famkim ṭan a ni.

8, 9. Paula’n inlârnaa a hmuh “paradis” chu eng nge ni?

⁸ Paula inlârna hmuh chu 2 Korinth 12:1-4-ah târ lan a ni a. (Chhiar rawh.) Chu inlârnaah chuan, Jehova’n Paula chu nakin huna thil lo thleng tûr engemaw a hmuhtîr a ni. Paula hmuh “paradis” chu eng nge ni? A hmasain, leia lo thleng mai tawh tûr Paradis tak tak a kâwk thei a. (Luka 23:43) A pahnihnaah chuan, khawvêl thara awm tûr thlarau lam paradis ṭha famkim a kâwk thei bawk a. A pathumnaah chuan, vâna “Pathian paradis-a” dinhmun ropui tak a kâwk thei a ni.—Thu Puan 2:7.

⁹ Mahse, engvângin nge Paula chuan “thusawi hleih theih loh, mihring sawi thian lohte chu a hria” tih a sawi? Inlârnaa a hmuh thil ropuite chu hrilhfiahna hun a la thlen hrih loh vâng a ni. Mahse, tûn laiah Jehova chuan a mite’n malsâwmna an dawnte mi dang hnêna kan hrilh chu a phal ta!

10. Engvângin nge thlarau lam paradis leh thlarau lam biak in chu a inan loh?

¹⁰ Thlarau lam paradis chungchâng kan sawi fo va; mahse, chu chu eng nge ni? Pathianin a mite hnêna a pêk inremna dinhmun ṭha bîk tak a ni a. Chuvângin, thlarau lam paradis leh thlarau lam biak in chu a inang lo. Thlarau lam biak in chu biakna dik tâna Pathian ruahmanna siam hi a ni a. Thlarau lam paradis chuan Pathian pawm hlawhte leh a thlarau lam biak ina amah betute a kâwk a ni.—Malakia 3:18.

11. Tûn lai hian eng chanvo hlu nge kan neih?

¹¹ Kum 1919 aṭangin Jehova chuan mihring ṭha famkim lote chu thlarau lam paradis an siam te, an thuam ngheh te, leh an tihpunte a phal tih hriat chu a phûrawm hle. He hna ropui takah hian i tel ve em? He leia Jehova chawimawina thlen tûra amah thawhpui theihna chanvo chu i ngaihlu em?

12. Isaia 60:17 hi a thleng famkim tih engtin nge kan hriat? (A thupui chunga milem en rawh.)

¹² Zâwlnei Isaia chuan Pathian inawpna pâwl lei lam pêngah hian inthlâkthlengna ropui tak leh insiamremna tam tak a awm tûr thu a sawi lâwk a. (Isaia 60:17 chhiar rawh.) Hêng inthlâkthlengna chungchâng hi ṭhalaite, a nih loh leh Kristian mi tharte chuan an chhiar emaw, an hria emaw chauh a ni thei. Mahse, chûng insiamremna ropui takte mahni ngeia tawngtu unau tam tak an awm! Chûng chhiahhlawh rinawmte chuan Pathianin kan Lal, Isua chu A inawpna pâwl kaihruai tûrin a hmang tih an ring nghet tlat a ni. Hêng unau duhawm takte thiltawn kan ngaihthlâk hian, Jehova kan rinna leh kan rinchhanna chu a nghet sauh vang.

13. Sâm 48:12-14 sawi angin eng nge kan tih ngai?

¹³ Kristian dik zawng zawngte chuan Jehova inawpna pâwl chungchâng chu mi dangte hnênah an hrilh tûr a ni a. Setana khawvêl suaksuala kan awm chung pawha remna leh inlungrualna kan nei chu thil mak a va ni êm! Jehova inawpna pâwl chungchâng leh thlarau lam paradis chungchâng chu “ṭhangthar lo awm lehte” hnênah hlim takin kan hrilh tûr a ni!—Sâm 48:12-14 chhiar rawh.

14, 15. Kum 1970 hnuah eng insiamremnate nge kan neih a, chûng chu inawpna pâwlin engtin nge a hlâwkpui?

¹⁴ Kan kohhrana kum upa lam tam takte chuan Jehova inawpna pâwl lei lam pêng timawi zualtu insiam remna tam tak an tâwk a. Anni chuan upahovin kohhran an kaihhruai hmaa mi pakhatin a kaihhruai lai te, Branch Committee-in ram a kaihhuai hmaa mi pakhatin a kaihhruai lai te, a nih loh leh Jehova  Thuhretute Governing Body-in khawvêl pum rawngbâwlna a kaihhruai hmaa Watch Tower Society president-in a kaihhruai laite chu an hre pha a ni. Chutih lai chuan, hêng unaupate hian ṭanpuitu rinawm takte an nei chung pawhin, kohhranah te, branch office-ah te, leh world headquarter-ahte chuan mi pakhat chauhvin thu tlûkna a siam ṭhîn a. Kum 1970 hnuah, thu tlûkna siam tûrte chu mi pakhat kova nghah aiin, upate’n a huhova an siam theihna tûrin insiamremnate neih a ni.

¹⁵ Hêng insiamremnate hi engvângin nge inawpna pâwl chuan a hlâwkpui? Bible hriatthiamna ṭha zâwk ṭanchhana siam a nih avângin. Thu tlûkna siam ngai zawng zawngte mi pakhat kova nghat lovin, inawpna pâwl chuan kohhran upa zawng zawng, a nih loh leh Jehova min pêk ‘mihringte hnêna a thilpêkte’ mize ṭha neih chu a hlâwkpui a ni.—Ephesi 4:8; Thufingte 24:6.

16, 17. Tûn hnaia eng insiamremnate’n nge i rilru khawih a, engvângin nge?

¹⁶ Tûn hnai maia kan thu leh hla chhuaha insiamremna neih ṭhenkhat chu han ngaihtuah teh. Kan rawngbâwlnaah chuan thu leh hla chhuah ṭangkai tak leh mi hîp thei takte sem chu nuam kan ti hle a. Chanchin ṭha hrilh nâna tûn lai thiamna tharte kan hman dân pawh hi han ngaihtuah teh. Entîr nân, jw.org website hmangin mi tam takte chuan an mamawh ṭanpuina an hmu thei a. Hêng insiamremna zawng zawng aṭang hian, Jehova’n mite a ngaihvenzia leh a hmangaihzia kan hmu a ni.

¹⁷ Chhûngkuaa Pathian biakna emaw, mi mala inzirna emaw kan neih theihna tûra kan inkhâwmte siamrem a ni pawh chu kan ngaihlu hle a. Tin, kan assembly leh inkhâwmpuite siamremna chu kan ngaihlu bawk. Hêngte hi kum tinin a ṭha zual sauh niin a lang! Bible school tam tak aṭanga zirtîrna kan dawnte  avângin kan lâwm hle bawk a ni. Hêng insiamremna zawng zawng aṭang hian, Jehova’n a inawpna pâwl a kaihruai tih leh thlarau lam paradis chu mawi lehzualin a siam chhunzawm zêl tih a chiang hle!

18, 19. Engtin nge thlarau lam paradis mawi lehzual tûra siamnaah kan ṭanpui theih?

¹⁸ Jehova chuan kan thlarau lam paradis mawi lehzual tûra siamnaa ṭanpui theihna chanvo hlu min pe a. Mahse, engtin nge mawi lehzual tûra kan siam theih? Ṭhahnemngai taka Lalram chanchin ṭha hrilhna leh zirtîr siamna hmangin. Mi tuemaw Pathian chhiahhlawh ni tûra kan ṭanpui apiangin, thlarau lam paradis ṭhangchho tûrin kan ṭanpui tihna a ni.—Isaia 26:15; 54:2.

¹⁹ Kristian mize ṭhate nei chho tûra theih tâwp kan chhuah hian thlarau lam paradis mawina kan belhchhah tihna a ni bawk a. Hei hian mi dangte tân thlarau lam paradis chu a tiduhawm lehzual a ni. A tlângpui thuin, inawpna pâwl lama mite hîp a, Jehova leh Isua lama hîptu chu Bible kan hriatna mai ni lovin, kan nungchang leh chêtze thianghlim hi a ni.

20. Thufingte 14:35 sawi angin, eng nge tih kan duh ang?

²⁰ Tûn laia kan thlarau lam paradis mawi tak an hmuh hian Jehova leh Isua chu an lâwm hle ang. Tûna thlarau lam paradis mawi lehzual tûra siamnaa kan neih hlimna hi lei paradis tak tak ni tûra kan siam huna kan neih tûr hlimna tem lâwkna mai a ni a. Thufingte 14:35 thu: “Lal duhsakna chu fing taka titu chhiahhlawh chungah a awm,” tih hi kan hre reng tûr a ni. Thlarau lam paradis mawina belhchhah tûra kan thawhrim lai hian fing takin thil i ti zawm zêl ang u! (ws15-E 07/15)