1, 2. (a) Jehova’n a mite a hmangaih tih chu engvângin nge i rin tlat theih? (b) Mihringte chu eng thil mamawh neia siam nge an nih?

Engvângin nge Jehova’n a mite a hmangaih tih chu kan rin tlat theih? Chu zawhna kan chhân hmain hêng entîrnate hi ngaihtuah ta ila: Taylene-i chu kum tam tak chhûng unaute chuan ngilnei takin an fuih ṭhîn a. Mahni laka inbeisei sâng lutuk lo tûrin an hrilh a ni. Ani chuan: “Jehova’n min hmangaih lo sela chuan, heti khawpin min fuih reng lo vang,” tiin a sawi. A pasalin a boralsan hnua fa pahnih enkawl seiliantu Brigitte-i chuan: “Setana khawvêla fate enkawl hi a harsa hle a, a bîk takin nu leh pa mal ṭante tân a harsa lehzual a ni. Mahse, Pathian Jehova chuan lungngaihna leh mittui kâra min kaihhruai a, ka tawrh theih bâk engmah min tawrhtîr loh avângin, min hmangaih a ni tih ka ring tlat a ni,” tiin a sawi. (1 Korinth 10:13) Sandra-i chu enkawl dam theih loh natna khirh tak a vei a. Inkhâwmpuiah, unaunu pakhatin ani chu a ngaihsak hle a. Sandra-i pasal chuan: “A mi malin kan hre lo va; mahse, min ngaihsakna chuan min tihlim hle. Unaute hnên aṭanga hmangaihna lantîrnate hian Pathian Jehova min hmangaihna a nasatzia min hriattîr a ni,” tiin a sawi.

 ² Jehova chuan mihringte chu hmangaihna lantîr ngai leh dawn ngaiin min siam a. Mahse, natna te, sum leh pai lama harsatna te, leh rawngbâwlnaa rah ṭha kan hmuh loh avângtein lunghnual mai chu a awl thei hle. Jehova’n min hmangaih tawh lo nia kan inhriat chuan, a tân kan hlu tih leh kan kiangah awmin kan kut dinglam chelhin min ṭanpui a ni tih kan hre reng tûr a ni. A chunga kan rinawm phawt chuan, englai mahin min theihnghilh ngai lo vang.—Isaia 41:13; 49:15.

3. Jehova min hmangaihna chu a dai ngai lo tih engin nge min rintîr lehzual thei?

³ Kan sawi tâk Thuhretute chuan hun harsa tak kârah pawh Pathianin a awmpui tih an ring tlat a. Chutiang bawkin, keini pawh min awmpui a ni tih kan ring thei a ni. (Sâm 118:6, 7) He thuziakah hian, Jehova min hmangaihzia târ langtu thilpêk pali kan sawiho vang. Chûngte chu (1) a thil siam te, (2) Bible te, (3) ṭawngṭaina te, leh (4) tlanna te hi a ni. Jehova thiltih ṭha takte ngaihtuahna chuan a hmangaihna dai ngai lo avânga lâwm lehzual tûrin min ṭanpui ang.—Sâm 77:11, 12 chhiar rawh.

4. Jehova thil siamte aṭangin eng nge kan zir?

⁴ Pathian Jehova thil siamte kan hmuh hian, min hmangaihna a nasatzia kan hre thei a. (Rom 1:20) Entîr nân, leilung chu kan nun theih nân chauh ni lovin thil tam tak kan tih theih nân a siam a ni. Nuam taka nun kan hman theih nân thil engkim min pe a. Kan nun theih nân ei tûr kan mamawh a; mahse, Jehova chuan ei tûr chi hrang hrang min pein ei leh in chu thil hlimawm tak a nihtîr a! (Thuhriltu 9:7) Unaunu Catherine-i chu thil siam a hmuhte avângin a hlim a, a bîk takin Canada rama ṭhâl laia a thil hmuhte avângin a hlim lehzual a ni. Ani chuan: “Engkim a hun taka an lo nun dân leh thlen dân—lei aṭanga rawn ṭo chhuak pangpâr te leh sava a hun taka pêm ṭhînte bâkah, ka choka tukverh pâwna sava chaw pêkna hmun rawn hre ṭhîn hummingbird sava tête—chu mak tak a ni. Kan hlimna tûr tam tak min pêk avângin Jehova chuan min hmangaih tih a chiang hle,” tiin a sawi a ni. Kan Pa chuan a thil siamte chu a ngaina hle a, keini pawhin nuamti taka kan chen chu a duh a ni.—Tirhkohte 14:16, 17.

5. Engtin nge Jehova hmangaihna chu mihringte a siam dânah a lan?

⁵ Jehova chuan hna awmze nei thawk thei tûr leh chu mi aṭanga lungâwina hmu thei tûrin min siam a. (Thuhriltu 2:24) Mihringte chu leilung luah khat tûr te, thlai chîng tûr te, leh sava te, sangha te leh thil nung zawng zawngte chunga thu neihna a pe a. (Genesis 1:26-28) Chu bâkah, amah kan entawn theih nân mize ṭha tak neiin min siam bawk.—Ephesi 5:1.

6. Engvângin nge Pathian Thu avânga kan lâwm ang?

⁶ Jehova chuan min hmangaihna a nasat avângin Bible min pe a. Chu chuan kan hriat ngai a chanchinte leh mihringte chunga a rilru put dânte min hrilh a ni. Entîr nân, a thu âwih lo fotu Israelte chunga a rilru put dân chu min hrilh a. Sâm 78:38 chuan: “Ani chu lainatnaa a khah avângin an khawlohna chu a ngaidam a, anni chu a tiboral lo. A ni, vawi tam tak a thinurna chu a la kîr a, a thinrimna chu nasa takin a chawk tho duh ṭhîn lo,” tiin a sawi. He Bible châng ngaihtuahna hian Pathian Jehova’n engtiang khawpin nge min hmangaih a, min ngaihsak tih hre thiam tûrin a ṭanpui ang che. Jehova’n min ngaihsak tak zet tih chu kan ring nghet thei a ni.—1 Petera 5:6, 7 chhiar rawh.

7. Engvângin nge Bible chu kan ngaihhlut ang?

⁷ Bible chu kan tân thil hlu tak a ni tûr a ni. Engvângin nge? Jehova’n Bible hmanga min biak pawh avângin. Nu leh pate leh fate inkâra  inbiak pawhna ṭha a awm hian, chu chuan an inhmangaihna leh an inrinna a tizual a ni. Jehova chu kan Pa min hmangaihtu a ni a. Amah chu hmu ngai lovin a aw pawh hre ngai lo mah ila, Bible hmangin min be pawh a tih theih a ni. A thu ngaihthlâk zêl chu a va pawimawh tak êm! (Isaia 30:20, 21) Bible kan chhiar hian, min kaihruaitu leh min vêngtu Jehova chu kan hriain kan ring ta ṭhîn a ni.—Sâm 19:7-11; Thufingte 1:33 chhiar rawh.

8, 9. Jehova’n eng nge kan hriat a duh? Bible-a târ lan entîrna pe rawh.

⁸ Jehova chuan a mi hmangaihna kan hriat chu a duh a, kan famkim lohna mai a en lo. Kan ṭhatna laite chu a zawng zâwk a ni. (2 Chronicles 16:9) Jehova’n Juda Lal Jehosaphata ṭhatna lai a hmuhsak dân i lo en ang u. Jehosaphata chuan Israel Lal Ahaba nêna Suria-ho chu Ramoth-gilead khuaa bei tûrin thu tlûkna ṭha lo tak a siam a. Zâwlnei der 400-te chuan Ahaba’n indona a hneh dâwn tiin thu dik lo sawi mah se, Jehova zâwlnei dik Mikaia erawh chuan Jehosaphata leh Ahaba hnênah chuan indonaa an tlâwm tûr thu a sawi a. Chutiang tak chuan an tlâwm ta a ni. Indonaah chuan Ahaba chu a thi a, Jehosaphata erawh chu a dam khawchhuak hrâm a ni. Indo zawh chuan, Jehosaphata chu a thil sual tihte avânga zilh tûrin Jehova chuan zâwlnei Jehua chu a tîr a. Chutichung pawhin: “Ṭhatna kawng  eng emaw zawng i la nei cheu a ni,” tiin a hrilh a ni.—2 Chronicles 18:4, 5, 18-22, 33, 34; 19:1-3.

⁹ A hma kum tam tak khân, Jehosaphata chuan lal fapate, Levi mite, leh puthiamte hnênah Judai ram khua zawng zawng fang chhuaka Jehova Dânte zirtîr tûrin a hrilh a. Chu chu a hlawhtling hle a, ram dang mite pawhin Jehova an lo hriat phah hial a ni. (2 Chronicles 17:3-10) A hnuah thu tlukna dik lo siam mah se, Jehova chuan tûn hmaa a thil ṭha tihte chu a theihnghilh lo va. Keini pawhin thil tihsual châng kan neih ṭhin avângin, he entîrna hian min thlamuan hle. Jehova rawngbâwlnaa theih tâwp kan chhuah chuan, ani chuan thil ṭha kan lo tih tawhte chu theihnghilh lovin, min hmangaih reng zâwk ang.

10, 11. (a) Ṭawngṭaina chu engvângin nge Jehova thilthlâwnpêk ṭha tak a nih? (b) Engtin nge Pathian chuan kan ṭawngṭaina a chhân theih? (A thupui chunga milem en rawh.)

¹⁰ Fate hmangaihtu pa ber chuan an thusawi ngaithla tûrin hun a pe ṭhîn a. Anmahni a ngaihsak hle avângin an vei zâwngte chu hriat a duh ṭhîn. Min hmangaihtu kan Pa Jehova pawh chutiang bawk chu a ni. Kan ṭawngṭainate chu a ngaithla a. Kan Pa biak theihna chanvo chu a hlu hle!

¹¹ Jehova hnênah englai pawhin kan ṭawngṭai thei a. Ani chu kan Ṭhian a ni a, kan ṭawngṭaina ngaithla tûrin a inpeih reng a ni. A hmaa kan sawi tâk Taylene-i chuan, “A hnênah eng pawh i sawi vek thei a ni,” tiin a sawi. Jehova hnêna kan ngaihtuahnate kan hrilh chuan, Bible te, kan thu leh hla chhuah te, leh unaute fuihna te hmangin min chhâng thei a. Tih tak zeta kan ngennate chu ngaithlain, tuman min hriat thiam loh hunah pawh ani chuan min hre thiam a ni. Kan ṭawngṭainate a chhânna chuan min hmangaihna a dai ngai lo tih a târ lang a ni.

12. Engvângin nge Bible-a chuang ṭawngṭainate chu kan zir ang? Entîrna pakhat pe rawh.

¹² Bible-a chuang ṭawngṭainate aṭangin thil pawimawh tak kan zir thei a. Chhûngkuaa Pathian biakna neih huna chûng ṭawngṭainate zir châng neih chu a ṭangkai ang. Hmân laia Pathian chhiahhlawhte tih tak zeta ṭawngṭaina kan ngaihtuah hian, kan ṭawngṭainain hma a sâwn ang. Entîr nân, nghapui kawchhûng aṭanga inngaitlâwm taka Jona ṭawngṭai dân kan zir thei a. (Jona 1:17–2:10) Biak in hlannaa tih tak zeta Solomona ṭawngṭaina kan ennawn thei bawk a. (1 Lalte 8:22-53) Isua zirtîr lal ṭawngṭaina pawh kan ngaihtuah thei bawk a ni. (Matthaia 6:9-13) A pawimawh ber chu, englai pawha ‘in duhnate Pathian hnêna hriattîr’ hi a ni a. Chutianga in tih chuan, “Pathian thlamuanna, rilru rêng rênga hriat sên loh khân, in thinlung leh in ngaihtuahnate chu . . . a vênsak ang che u.” Jehova hmangiahna dai ngai lo avânga kan lâwmna chu a pung chho zêl dâwn a ni.—Philippi 4:6, 7.

13. Tlanna avângin eng hun remchâng nge kan neih?

¹³ Jehova chuan “kan nun theihna tûrin” tlanna thilthlâwnpêk chu min pe a. (1 Johana 4:9) He Pathian hmangaihna nasa tak târ lanna chungchângah tirhkoh Paula chuan heti hian a ziak a ni: “A hun têin Krista chu mi sualte ai chuan a lo thi ta si. Mi fel aia thih miin a duh âwm lo hle si a, mi ṭha ai erawh chuan mi tu emaw tal chuan thih a ngam mial mahna. Nimahsela Pathian chuan a mi hmangaihna chu fak tlâkin a lantîr a, mi sualte kan la nih laia Krista kan aia a thih avâng khân,” tiin. (Rom 5:6-8) Tlanna chu Pathian hmangaihna târ lanna ropui ber a niin, mihringte tân amah hnaih theihna hun remchâng a pe a ni.

14, 15. Tlanna chuan (a) hriak thih Kristiante tân (b) lei lam beiseina neite tân eng awmzia nge a neih?

¹⁴ Kristian mi tlêm tê chuan Jehova hmangaihna  dai ngai lo chu kawng pawimawh takin an dawng a. (Johana 1:12, 13; 3:5-7) Pathian chuan anni chu thlarau thianghlimin hriak a thih a, Pathian fate an lo ni ta a. (Rom 8:15, 16) An zînga ṭhenkhat chu leiah an la awm a, chuti chu engvângin nge Paula’n anni chu “vân hmunahte ama hnênah min ṭhutîr ta” tia a sawi? (Ephesi 2:6) Jehova’n vâna chatuana nun beiseina a pêk vâng a ni.—Ephesi 1:13, 14; Kolossa 1:5.

¹⁵ Hriak thih ni lo mi dang zawng zawngte chu tlanna an rinzia an lantîr chuan Pathian ṭhian an ni thei a. Anni pawhin Pathian fate nih theihna leh lei paradis-a chatuana nun theihna chanvo an nei a ni. Tlanna chuan mi zawng zawngte chunga Jehova hmangaihna a târ lang a. (Johana 3:16) Pathian rawng rinawm taka kan bâwl chuan, khawvêl tharah nun ṭha ber min pe dâwn tih hriat chu a phûrawm hle! Chuvângin, Pathian hmangaihna dai ngai lo lantîrna ropui ber tlanna kan ngaihhlutzia i lantîr ang u.

16. Pathian hmangaihna ngaihtuahna chuan eng nge min tihtîr ang?

¹⁶ Jehova’n min hmangaihzia a lantîrnate chu kan chhiar sêng lo va. Lal Davida chuan: “Aw Pathian, i ngaihtuahnate chu ka tân a va hlu êm! A infin khâwm chu a va nasa êm! Chhiar dâwn ila, a tam lam chu ṭiau vaivut aiin a tam zâwk ang,” tiin fakna hla a sa a. (Sâm 139:17, 18) Min hmangaihna kawng tam takte ngaihtuahna chuan amah hmangaih lêt tûr leh kan thil neih ṭha berte pe tûrin min chettîr ang.

17, 18. Pathian kan hmangaihna lantîr theih dân kawng ṭhenkhat chu engte nge ni?

¹⁷ Jehova hnêna kan hmangaihna lantîr dân kawng tam tak a awm a. Entîr nân, Lalram chanchin ṭha mi dangte hnêna ṭhahnemngai taka kan hrilhna hmangin kan lantîr thei a ni. (Matthaia 24:14; 28:19, 20) Kan rinna fiahtu harsatnate rinawm taka tuar chhuakin kan lantîr thei bawk. (Sâm 84:11; Jakoba 1:2-5 chhiar rawh.) Kan hrehawm tawrhte chu nasa tak a nih pawhin, ani chuan a hmu a, a tâna kan hlut avângin min ṭanpui dâwn tih chu kan ring tlat thei a ni.—Sâm 56:8.

¹⁸ Jehova kan hmangaihna chuan a thil siam ropui takte ngaihtuah tûrin min chettîr a. Bible ṭha taka zirna hmangin Jehova kan hmangaihna leh a Thu kan ngainatna kan lantîr a ni. Amah kan hmangaihna leh kan inlaichînna tinghet tûrin a hnênah kan ṭawngṭai ziah a. A thilthlâwnpêk hlu tak tlanna ngaihtuahna chuan amah kan hmangaihna chu a tizual a ni. (1 Johana 2:1, 2) Hêngte hi Jehova hmangaihna dai ngai lo kan hlutzia kan lantîr theihna kawng tam takte zînga ṭhenkhat chauh a la ni. (ws15-E 08/15)