1, 2. (a) Paradis-a eng thil nge i nghahhlelh ber? (A thupui chunga milem en rawh.) (b) Engin nge khawvêl tharah hlimna nasa ber min pe dâwn?

“CHATUANA nunna” chu kan nghâkhlel hle a. Tirhkoh Paula chuan chu chu “nunna taktak” tiin a ko a ni. (1 Timothea 6:12, 19 chhiar rawh.) A tam zâwkte tân chuan lei Paradis-a chatuana nunna a ni dâwn a. Tûk tin, hrisêl tak, hlim tak, leh lungâwi taka thawh ziah mai chu ngaihruat thiam pawh a harsa ang. (Isaia 35:5, 6) Mitthi tholehte pawh tiamin, i chhûngte leh ṭhiante nêna hun hmanho a nawm dân tûr chu han ngaihtuah teh. (Johana 5:28, 29; Tirhkohte 24:15) Thiamna tharte zir tûrin hun tam tak i nei ang a, i tuizâwng thiltihahte chuan i thiam chho lehzual ang. Entîr nân, science chungchâng i zir belh thei ang a. A nih loh leh, rimawi tum dân leh i chênna tûr in mawi tak sak dânte pawh i zir thei ang.

² Hêng thil ṭha zawng zawngte hi hlimpui hle mah ila, Jehova biakna chuan hlimna nasa ber min pe ang. Mi zawng zawngin Jehova hming thianghlim an zah hun leh Rorêltua an pawm hun a nawm dân tûr chu han ngaihtuah teh. (Matthaia 6:9, 10) Pathian tum ang ngeia leilung hi mi ṭha famkimte’n an luahkhat hmuh chu a phûrawm ngei ang. Zâwi zâwia kan ṭhat famkim chhoh ruala Jehova  nêna kan inlaichînna tihṭhat a awlsam telh telh dân tûr hi han ngaihtuah teh!—Sâm 73:28; Jakoba 4:8.

3. Eng atân nge tûnah kan inbuatsaih ang?

³ “Pathian nên erawh chuan engkim tih theih” a nih avângin, Jehova chuan hêng thil ropui takte hi a ti dâwn tih kan ring tlat a. (Matthaia 19:25, 26) Khawvêl thara chatuana nun kan duh chuan, tûn hi chatuan nun ‘vawn tlat’ hun a ni. Tâwpna chu a lo thleng thuai dâwn tih kan hria a, chuvângin, engtik hunah pawh lo thleng tûra kan beiseizia târ lang tûr zâwngin kan nung tûr a ni a. Khawvêl thara nung tûra inbuatsaih nân tûnah ngei hian kan tih theih apiang kan ti tûr a ni. Kan inbuatsaih theih dân chu i lo en ang u.

4. Engtin nge khawvêl thara nung tûrin tûnah kan inbuatsaih theih? Entîrna pe rawh.

⁴ Engtin nge khawvêl thara nung tûrin tûnah kan inbuatsaih theih? Ram danga pêm kan tum chuan, chu rama chêng tûra inbuatsaih nân thil ṭhenkhat kan ti ngei ang. Entîr nân, chu rama awmte ṭawng leh hnam dânte chu kan zir ṭan thei a. An ei leh inte pawh kan ei chhin thei ang. Chutiang bawkin, khawvêl thara awm tawh ang maia thil ti tûra theih tâwp chhuahin tûnah kan inbuatsaih thei a ni. Kan tih theih dân kawng ṭhenkhat chu i lo bih chiang ang u.

5, 6. Jehova inawpna pâwl pêk chhuah kaihhruaina zawm dân zirna chuan engtin nge khawvêl thara nung tûra kan inbuatsaihnaah min ṭanpui theih?

⁵ Setana chuan mite’n an duhzâwng eng pawh ti thei anga an inngaih chu a duh a. Mi tam tak chuan zalên taka awm a pawimawh a, Pathian thu âwih a ngai lo tih ngaih dân an nei a ni. Chu chuan eng nge a thlen? Hrehawm tawrhna leh hlim lohna hlîr a thlen a ni. (Jeremia 10:23) Mahse, Jehova chu Rorêltu hmangaihna nei tak a ni a. Chuvângin, mi zawng zawngin a thu an âwihna khawvêl thara nun chu a va nuam dâwn êm!

⁶ Khawvêl tharah chuan, leilung paradis mawi tak kan nihtîr bâkah, mithi tholehte kan zirtîr dâwn a, chu mi atân chuan Jehova inawpna pâwl kaihhruaina chu lâwm takin kan zui ngei ang. Jehova’n kan tân thawh tûr tam tak a nei a. Mahse, hruaitute’n kan thawh duh lohzâwng min thawhtîr ta se, engtin nge ni ang? Thu kan âwih ang em? Kan mawhphurhna chu a ṭha berin leh hlim takin kan hlen ang em? Khawvêl thara chatuana nung tûra inbuatsaih tûr chuan Jehova inawpna pâwl pêk chhuah kaihhruaina chu tûnah ngei hian kan zâwm tûr a ni.

7, 8. (a) Engvangin nge hruaitute thu kan âwih ang? (b) Kristian ṭhenkhat chuan eng ang inthlâkthlengna nge an tawh? (c) Khawvêl tharah hian eng nge kan buaipui tawh loh vang?

 ⁷ Khawvêl thara nung tûra inpeih kan duh chuan, lungâwi dân leh Jehova inawpna pâwl leh mi dangte nêna thawhho dân kan zir a ngai a. Entîr nân, mawhphurhna thar pêk kan nih hunah, lâwm takin kan pawm a, hlim tûr leh lungâwi tûrin theih tâwp kan chhuah a ni. Tûn aṭanga hruaitute thu âwih dân kan zir thiam chuan, khawvêl tharah pawh kan thawhpui thei dâwn a ni. (Hebrai 13:17 chhiar rawh.) Israel mite Ram Tiama an luh khân, an awmna tûr ṭheuh chu ruatsak an ni a. (Number 26:52-56; Josua 14:1, 2) Khawvêl tharah chuan khawiah nge awmna tûr hmun pêk kan nih dâwn kan hre lo. Mahse, mi dangte nêna thawhho dân kan zir tawh chuan, kan awmna apiangah Jehova duhzâwng chu hlim takin kan ti thei ang.

⁸ Pathian Khawvêl thar, Lalram rorêlna hnuaia rawngbâwl chu chawimawina a nih tûrzia han ngaihtuah teh! Chu mi avângin, Jehova inawpna pâwl nêna tûna thawhho chu kan duh a, kan hna eng pawh hlen kan duh a ni. Mahse, a châng chuan kan hna chu a inthlâk thei a. Entîr nân, United States Bethel-a rawngbâwltu ṭhenkhat chu thlawhhmaa rawngbâwl tûra tih an ni a. An kum upat dân leh an dinhmun dangte avângin bial kantu ṭhenkhat chu special pioneer thawk tûra tih an ni bawk. Anni chu an hna thar thawhah an hlim a, Jehova chuan mal a sâwm a ni. Keini pawh, a hnêna kan ṭawngṭai a, a rawngbâwlnaa theih tâwp kan chhuah bawk a, min pêk mawhphurhnaa lungâwina neih dân kan zir chuan kan hlim ang a, a malsâwmna kan dawng ang. (Thufingte 10:22 chhiar rawh.) Khawvêl tharah hian, awm châkna hmun bîk kan nei ang a; mahse, Jehova inawpna pâwl chuan hmun danga insawn tûrin min ti ta se engtin nge ni ang? Chutih hunah chuan, kan awmna leh kan hnathawhah hian kan buai tawh lo vang. Khawvêl thara kan awm avângin kan lâwm hle zâwk ang.—Nehemia 8:10.

9, 10. (a) Engvângin nge khawvêl tharah dawhtheihna kan mamawh mai theih? (b) Engtin nge tûnah dawhtheihna kan neihzia kan lantîr theih?

⁹ Khawvêl tharah chuan, dawhtheihna neih a ngaih châng a awm thei ang. Entîr nân, mi ṭhenkhat chu an chhûngte leh an ṭhiante an thawhleh avângin an hlim hle a. Mahse, kan hmangaihte thawhleh hun tûr chu kan la nghah a ngai mai thei a ni. Chutiang a thleng a nih chuan, mi dangte hlimpuiin kan dawhthei ang  em? (Rom 12:15) Tûn aṭanga Jehova thutiamte thlen famkimna dawhthei taka nghah dân kan zir chuan, chu mi hunah pawh kan dawhthei ngei ang.—Thuhriltu 7:8.

¹⁰ Bible thutak kan hriatthiam dân siam ṭhat a nih huna dawhtheihna lantîrin, khawvêl thar tân kan inbuatsaih thei bawk. Hêng hriatthiamna tharte hi kan zirin, kan hriatthiam chiah loh hunah dawhtheihna kan nei em? Kan neih chuan, khawvêl thara Jehova’n kaihhruaina thar min pêk hunah dawhtheihna lantîr chu a awlsam lehzual ang.—Thufingte 4:18; Johana 16:12.

11. Engvângin nge tûnah mi dangte ngaihdam dân kan zir ang a, chu chuan khawêl tharah engtin nge min ṭanpui ang?

¹¹ Khawvêl thar atâna kan inbuatsaih theih dân dang leh chu mite ngaihdam dân zir hi a ni. Krista Kum Sang Rorêl chhûngin, mi zawng zawng ṭha famkim tûrin hun engemaw chen a ngai dâwn a. (Tirhkohte 24:15) Chu mi hunah chuan hmangaihna neiin, kan inngaidam tawn ang em? Tûna mi dangte ngaihdam dân leh inlaichînna ṭha neih dân kan zir chuan, khawvêl tharah chutianga tih chu kan awlsam ang.—Kolossa 3:12-14 chhiar rawh.

12. Engvângin nge khawvêl thara nun atân tûn aṭanga kan inbuatsaih ang?

¹² Khawvêl tharah chuan, kan duhzâwngte chu kan nei thei lo emaw, neih theih nân kan nghah a ngai emaw mai thei a. Kan dinhmun tawn engah pawh kan lâwmin, kan lungâwi tûr a ni. Dik tak chuan, Jehova’n tûna min zirtîr miziate chu, chu mi hunah pawh kan mamawh ang. Chuvângin, chutiang miziate tûna lantîr dân zirna hmangin khawvêl thar chu kan tân a takzia leh chatuan nun atâna kan inbuatsaihzia chu kan lantîr a ni. (Hebrai 2:5; 11:1) Chu bâkah, Jehova thu âwihte awmna khawvêla awm kan duh tak zetzia kan lantîr tihna pawh a ni bawk ang.

13. Khawvêl tharah hian kan nunah eng nge kan dah pawimawh ber ang?

¹³ Khawvêl tharah chuan, hlimna atâna kan mamawh engkim kan nei tawh dâwn a. Mahse, kan hlimna ber chu Jehova nêna inlaichînna ṭha tak kan neih vâng a ni ang. (Matthaia 5:3) Jehova rawngbâwlnaah kan ṭûl reng ang a, kan hlim reng ang. (Sâm 37:4) Chuvângin, tûna kan nuna Jehova kan dah pawimawh ber hian khawvêl thara nung tûrin kan inbuatsaih tihna a ni.—Matthaia 6:19-21 chhiar rawh.

14. Ṭhalaite’n Jehova rawngbâwlnaah eng thiltumte nge an insiam theih?

¹⁴ Engtin nge Jehova rawngbâwlnaah tûn aia hlimna kan hmuh theih? Kawng khat chu thiltumte insiam hi a ni. Ṭhalai kan nih chuan, Jehova rawngbâwlnaa inhman chu ngun takin kan ngaihtuah thei a. Engvângin nge kan thu leh hla chhuahahte chuan hunbi kima rawngbâwlna chi hrang hrangte chu kan zir bing loh vang? Chûng zînga pakhat chu thiltumah i nei thei a ni. * (Footnote en rawh.) Kum tam tak chhûng Jehova rawng lo bâwl tawh tuemaw chu kâwm rawh. Jehova rawngbâwl nâna i nun i hman chuan zirtîrna hlu tak i dawng ang a. Chuta i thiltawnte chuan khawvêl thara Jehova rawng i bâwlnaah a ṭanpui ang che.

15. Jehova rawngbâwlnaah eng thiltum dangte nge kan insiam theih?

¹⁵ Jehova rawngbâwlnaah thiltum tam tak kan insiam thei a. Entîr nân, rawngbâwlnaah thiamna tharte zir kan tum thei a. A nih loh leh, Bible thu bulte hre thiam lehzual tûra zir leh nunpui chu kan tum thei a ni. Inkhâwmnaa thiam lehzuala lehkha chhiar te, thusawi leh chhânna pêk thiam lehzualte chu kan tum thei a ni. A pawimawh chu hei hi a ni: Jehova rawngbâwlnaa thiltum i insiam hian, chu chuan ṭhahnemngaihna  nei lehzual tûr leh khawvêl thara nun atâna inbuatsaih tûra a ṭanpui che hi.

16. Engvângin nge Jehova rawngbâwl chu nun kawng ṭha ber a nih?

¹⁶ Pathian khawvêl thar atâna kan inbuatsaih hian, thil ṭha engemaw tak kan chân em? Chân lo ve! Jehova rawngbâwl chu nun kawng ṭha ber a ni a. Mi dangte tihluihna vâng leh hrehawm nasa tak aṭanga dam khawchhuah duh vâng maia a rawngbâwl kan ni lo. Jehova nêna inlaichînna ṭha kan neih hian kan nun chu a ṭha lehzualin kan hlim lehzual bawk. Chutiang tûra siam kan ni a. Pathian hmangaihna leh a kaihhruaina dawn chu eng dang zawng aiin a ṭha zâwk a ni. (Sâm 63:1-3 chhiar rawh.) Thinlung taka Jehova biakna aṭanga neih theih hlimna chu kan nei ṭheuh va. Kum tam tak chhûng a rawng lo bâwl tawhte chuan, nun kawng ṭha ber a ni tih an sawi thei a ni.—Sâm 1:1-3; Isaia 58:13, 14.

17. Paradis-ah kan tuizâwng leh intihhlimnate chu eng anga pawimawh nge ni ang?

¹⁷ Paradis-ah chuan, kan hun ṭhenkhat chu kan tuizâwngte tih nân leh intihhlim nân kan hmang thei ang a. Tihah chuan, Jehova chu hlim duhna neia min siamtu a ni a, “thil nung zawng zawng châkna . . . tihrehsak” min tiam a ni. (Sâm 145:16; Thuhriltu 2:24) Intihhlim leh chawlhhahdam te kan mamawh a; mahse, Jehova nêna kan inlaichînna kan dah pawimawh ber hian chûng chu nuam kan ti lehzual a ni. Khawvêl tharah pawh chutiang bawk chu a ni ang. Chuvângin, ‘Ram zawn hmasak’ leh Jehova rawngbâwlna aṭanga kan dawn malsâwmnate ngaihtuah chu a finthlâk a ni.—Matthaia 6:33.

18. Engtin nge Paradis-a chatuana nung tûrin kan inbuatsaih tih kan lantîr theih?

¹⁸ Khawvêl tharah chuan, kan nun chu suangtuah phâk bâkin a ṭha dâwn a. Chuta nun kan duhzia chu tûn aṭanga “nunna taktak” atâna inbuatsaihna hmangin i lantîr ang u. Jehova’n kan lantîr atâna min zirtîr miziate chu neiin, chanchin ṭha ṭhahnemngai takin i hril ang u. Jehova biakna dah pawimawh berna aṭangin hlimna i hmu bawk ang u. Khawvêl tharah chuan a thutiam zawng zawng a thlen famkimtîr ngei ang tih kan ring tlat a ni. Chuvângin, khawvêl thara awm tawh ang maiin i nung ang u! (ws15-E 08/15)