1. Eng hunah nge kan nun?

‘HUN khirh takah’ kan nung a. Kum 1914-a ‘ni hnuhnûng’ a inṭan aṭangin, khawvêl dinhmun chu a chhe telh telh a ni. (2 Timothea 3:1-5) Bible hrilh lâwkna chuan: “Mi sual leh tihdertute erawh chu . . . an sual zual deuh deuh vang,” tih a sawi avângin khawvêl chu a chhe zual deuh deuh dâwn tih kan chiang thei a ni.—2 Timothea 3:13.

2. Eng ang intihhlimna nge mi tam takin an hlimpui? (A thupui chunga milem en rawh.)

² Tûn laia mi tam takte chuan intihhlim nân tharum thawhna emaw, nungchang bawlhhlawhna emaw, a nih loh leh mitdawivaih leh dawi thiamna emawte chu an enin, an ti bawk ṭhîn a ni. Entîr nân, tharum thawhna leh nungchang bawlhhlawhna chu Internet-te, TV program-te, film-te, lehkhabute, leh magazine-te chuan pawm tlâk anga langin a siam ṭhîn a. Tûn hmaa mite mak tih nungchangte chu tûnah chuan mi tam takin an pawm tawh avângin hmun ṭhenkhatah chuan dân anga phal a ni hial tawh a. Mahse, chûng nungchang chu Jehova’n a pawm tihna a ni chuang lo.—Rom 1:28-32 chhiar rawh.

3. Pathian tehna mila nungte chungchâng chu mi tam takin engtin nge an ngaih?

 ³ Kum zabi khatnaah pawh, mite chuan intihhlimna atân tharum thawhna leh nungchang bawlhhlawhna thilte chu an en ṭhîn a. Mahse, Isua hnungzuite chuan Pathian tehna mila an nun avângin an en ve lo. Hei vâng hian anmahni hual vêltu mite chuan ‘mak an ti’ a ni. Eng nge a thlen? Mite chuan Kristiante chu an nuihzatin, an tiduhdah ta a ni. (1 Petera 4:4) Chutiang bawkin, tûn laiah pawh mi tam takte chuan Pathian tehna mila nungte chu mak an ti hle a. A nihna takah chuan, Bible chuan Isua Krista entawn tûr siam zuitute’n “tihduhdahnate an tuar bawk ang” tiin min vaukhân a ni.—2 Timothea 3:12.

4. Engvângin nge he khawvêl hi kan hmangaih loh vang?

⁴ Pathian duhzâwng tih kan duh chuan, ‘khawvêl leh khawvêla thil awmte’ chu kan hmangaih thei lo va. (1 Johana 2:15, 16 chhiar rawh.) Khawvêl hi Setana, “he khawvêl pathian” hian a thunun tlat a ni. Ani chuan mite bum nân sakhuate, sawrkârte, sumdâwnna pâwlte, leh chanchinbute chu a hmang a. (2 Korinth 4:4; 1 Johana 5:19) Khawvêl inthununtîr kan duh lo va, chuvângin, ṭhian sualte chu kan pumpelh tûr a ni. Bible chuan: “Bumin awm suh; ṭhian sualte chuan nungchang ṭha an tikhawlo ṭhîn,” tiin chiang takin min vaukhân si a.—1 Korinth 15:33.

5, 6. Tute nge kan kawm loh vang a, engvângin nge?

⁵ Jehova nêna kan inlaichînna ṭha vawng reng tûr chuan, thil sual titute kan kâwm tûr a ni lo. An zîngah chuan Jehova bia anga insawi a; mahse, a thu âwih lo mite pawh an tel a. Chutiang mite chuan sual pawi tak an tiha an inlamlêt duh loh chuan, anni chu kan kâwm tawh lo a ni.—Rom 16:17, 18.

⁶ A tlângpui thuin mite chuan an ṭhiante tihlâwm leh an zînga len chu an duh a. Chuvângin, Pathian thu âwih lote kan kawm chuan, an tih ang ti ve tûra thlêm kan ni thei a ni. Entîr nân, inngaih hmangte kan kawm chuan, anmahni ang kan lo ni thei a. Chutiang chu kan unau ṭhenkhat chungah a thleng a ni. Tin, inlamlêt duh lote chu hnawhchhuah an ni ṭhîn. (1 Korinth 5:11-13) Chûng mite chu an inlamlêt loh chuan, Petera sawi dinhmunah an ding thei a ni.—2 Petera 2:20-22 chhiar rawh.

7. Tute nge ṭhian ṭha atâna kan thlan ang?

⁷ Mi zawng zawng chunga ṭhat kan duh rualin, Pathian thu âwih lo mite chu ṭhian ṭhaah kan siam tûr a ni lo. Jehova Thuhretu nupui pasal nei lote tân Pathian tehna mila nung lo leh zah lote nêna khawsakho chu a âtthlâk hle ang. Chutiang bawkin, Jehova Thuhretu tân baptisma chang tawh Jehova chhiahhlawh rinawm ni lo tuemaw ngaihzâwn chu a dik lo vang. Pathian hmangaih lotute pawm nih ai chuan, Pathian pawm nih chu a pawimawh hle zâwk a ni. Pathian duhzâwng titute chauh chu ṭhian ṭhaah kan siam tûr a ni. Isua chuan: “Tupawh Pathian duhzâwng ti apiang chu, chu mite ngei chu ka unaute, ka farnute, ka nute an ni asin,” tiin a sawi.—Marka 3:35.

8. Engtin nge ṭhian sualte chuan hmân lai Israel mite chu a nghawng?

⁸ Ṭhian sual kawm chuan chhiatna an thlen ṭhîn. Entîr nân, Israelte chunga thilthleng hi han ngaihtuah teh. Ram Tiam an thlen hma khân, chuta awm mite chungchângah Jehova’n anni chu a vaukhân a. An hnênah: “An pathiante chu chibai i bûk tûr a ni lo va, an rawng i bâwl tûr a ni hek lo, an thiltih angte chu i ti ve tûr a ni hek lo: i tichimit vek tûr a ni a, an lungphunte chu i tikeh sawm vek zâwk tûr a ni. Tin, LALPA in Pathian rawng chu in bâwl tûr a ni,” tiin a sawi. (Exodous 23:24, 25) Mahse, Israel mi a tam zâwkte chuan Pathian  kaihhruaina chu zâwm lovin, a chungah an rinawm lo va. (Sâm 106:35-39) Eng nge a thlen? Jehova’n a hnuah Israel hnam chu a hnâwl a, an aiah Kristian kohhran chu a thlang ta a ni.—Matthaia 23:38; Tirhkohte 2:1-4.

9. Engvângin nge he khawvêla chanchin theh darhnate hi a hlauhawm theih?

⁹ He khawvêl chanchin theh darhna tam tak, TV program-te, website-te, leh lehkhabute hian Jehova nêna kan inlaichînna a tichhe thei a. Hêng thilte hi Jehova leh a thutiamte rinna nei tûra Kristiante ṭanpuitu atâna siam a ni lo. Chu aimahin, mite chu Setana khawvêl suaksual tak rinchhan tûrin a fuih zâwk a. Chuvângin, “khawvêl châknate” min neihtîr thei thil en te, chhiar te, leh ngaihthlâk te lakah kan fîmkhur tûr a ni.—Tita 2:12.

10. He khawvêl chanchin theh darhnate chungah eng nge thleng ang?

¹⁰ Rei lo têah, Setana khawvêl leh mi tichhe thei chanchin theh darhnate chu tihchhiat a ni ang. Bible chuan: “Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang,” tiin a sawi. (1 Johana 2:17) Chutiang bawkin, fakna hla phuahtu chu heti hian a zai a: “Thil ṭha lo titute chu tihboralin an awm dâwn si a,” tiin. Tichuan: “Thuhnuairawlhte erawh chuan ram hi an luah ang a: remna chênin an hmuingîl ang,” tiin a sawi zawm a ni. Chu chu engtia rei nge ni ang? “Mi felte chuan ram hi an luah ang a, a chhûngah hian kumkhuain an awm ang.”—Sâm 37:9, 11, 29.

11. Engtin nge Pathian chuan a chunga rinawm reng tûra min ṭanpui?

¹¹ Setana khawvêl ang lo takin, Jehova inawpna pâwl chuan chatuana nung thei tûrin min ṭanpui a. Isua chu Jehova hnênah: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin a ṭawngṭai a ni. (Johana 17:3) Jehova chuan a inawpna pâwl hmangin amah kan hriat theih nâna kan mamawh thil engkim min pe a. Entîr nân, Pathian rawngbâwl chhunzawm zêl thei tûra min ṭanpuitu atân magazine-te, brochure-te, lehkhabute, video-te, leh Web page-te tam tak kan nei a ni. A inawpna pâwl chuan khawvêl puma kohhran 1,10,000 aia tamah inkhâwmna a buatsaih reng bawk. Chutiang inkhâwmnate leh inkhâwmpuite aṭanga kan zirte chuan Jehova leh a thutiam kan rinna a tinghet lehzual a ni.—Hebrai 10:24, 25.

12. “Lalpaa awm mi” chauh nupui pasala nei tûra Bible thupêk chu hrilhfiah rawh.

¹² Kristian nupui pasal nei duhte tân ṭhian kawm tûr thlannaah fîmkhur hle a ngai a. Pathian Thu chuan: “Ring lo mite nên rual lo taka nghâwngkawl bât dûnin awm suh u; suahsualna leh felnain engnge inṭâwmna an neih? A nih loh leh thim leh êngin engnge inpâwlna an neih?” tiin min vaukhân a ni. (2 Korinth 6:14) Bible chuan Pathian chhiahhlawhte chu “Lalpaa awm mi,” inpumpêka baptisma chang tawh, Jehova tehna mila nungte chauh nupui pasala nei tûrin a hrilh a. (1 Korinth 7:39) Chutiang mi, Jehova hmangaihtu nupui pasala i neih chuan Pathian chunga rinawm reng tûra ṭanpuitu tûr che kawppui i nei tihna a ni ang.

13. Pathianin Israelte hnênah nupui pasal neih chungchângah eng thu nge a pêk?

¹³ Jehova chuan kan tâna ṭha ber tûr chu a hria a, “Lalpaa awm mi” chauh nupui pasala nei tûra a thupêk chu thil thar a ni lo. Entîr nân, a rawngbâwl lotute chungchânga Israelte hnêna Jehova thu hrilh hi han ngaihtuah teh. Mosia kaltlangin ani chuan: “Nupui pasalah in nei tûr a ni hek lo, in fanute chu an fapate in neihtîr tûr a ni lo va, an fanute chu in fapate in  neihtîr tûr a ni hek lo. In fapate, mi zui lai hi pathian dangte biakna lamah an hruai kawi mai ang a; tin, LALPA thin pawh chu in chungah a thawk ang a, a tiboral thuai mai ang che u,” tiin thu a pe a ni.—Deuteronomy 7:3, 4.

14, 15. Jehova thupêk a ngaihthah avângin Solomona chungah eng thil nge thleng?

¹⁴ Solomona chu Israel lal a nih hnu lâwkah, finna dîlin a ṭawngṭai a, Jehova’n a dîlna chu a chhânsak a ni. Chuvângin, Solomona chu rorêltu fing tak niin a hming a lo thang ta a. Dik takin, Solomona finna nasa tak chuan Seba lalnu rilru a hneh hle a, a hnênah: “An sawi ka lo hriat aiin i finzia leh i ṭhatzia a lo nasat hi,” tiin a hrilh hial a ni. (1 Lalte 10:7) Mahse, Solomona entîrna chuan, miin Pathian thupêk ngaihthah a, Jehova rawngbâwl lotu nupui pasala a neih chuan a chungah eng nge thleng thei tih min zirtîr a ni.—Thuhriltu 4:13.

¹⁵ Jehova’n mal a sâwm chung pawhin, Solomona chuan Pathian thupêk chiang tak chu a zâwm lo. Jehova rawngbâwltu ni lo “hnam dang hmeichhe tam tak” a hmangaih a, a tâwpah chuan nupui 700 leh hmei 300 lai a nei a ni. Eng nge a nghawng? A lo upat hnu chuan, a nupuite’n “pathian dangte lamah a thinlung an hruai kawisak a, . . . Solomona chuan LALPA mithmuhin thil sual a lo ti ta a.” (1 Lalte 11:1-6) Ṭhian sualte chuan a chungah nghawng a nei a, Jehova chungah a rinawm reng ta lo a ni. Hetiang thil hi Solomona chungah a thlen theih chuan, tute chungah pawh a thleng thei ang. Chuvângin, Jehova hmangaih lotu tuemaw nupui pasala neih chu a ngaih pawhin kan ngaihtuah duh lo!

16. Bible chuan ring lotu nupui pasala nei tawhte chungchângah eng thurâwn nge a pêk?

¹⁶ Tuemaw chu nupui pasal a neih hnuah  Jehova betu lo ni ta se, engtin nge ni ang? Bible chuan: “Nangni nupuite u, mahni pasalte thu thuin awm rawh u; chutichuan an zînga tupawhin thu chu âwih lo mah sela, thu lovin an nupuite chêtziaa hnehin an awm thei ang,” tiin a sawi a ni. (1 Petera 3:1) Hei hi Jehova betu ni lo nupui neite tân pawh a ni a. Pathian Thu chu a fiah a ni: Pasal ṭha emaw, nupui ṭha emaw ni la, inneihna atâna Pathian tehnate chu nunpui rawh. I kawppuiin a ṭha lamin i inthlâkthleng tih a hriat hunah, ani pawnin Jehova rawngbâwl chu a duh phah thei ang. Hei hi nupa tam takte’n an lo tawng tawh a ni.

17, 18. Tuilêta dam khawchhuak tûrin Nova chu engin nge ṭanpui a, kum zabi khatnaa Kristiante chu Jerusalem tihchhiatnaa dam khawchhuak tûrin engin nge ṭanpui?

¹⁷ Ṭhian sualte chuan Jehova thu âwih lo tûrin a thunun thei che a; mahse, ṭhian ṭhate erawh chuan a chunga rinawm tûrin an ṭanpui thei bawk che a ni. Nova chu kan tân entawn tûr ṭha a ni a. Ani chu ‘leia mihring sualzia a nasat lai’ leh ‘an rilru suangtuahzia rêng rêng chu sual hlîr’ a nih lai huna mi a ni. (Genesis 6:5) Mite an sual êm avângin Jehova chuan chu khawvêl suaksual chu tihboral a tum ta a. Mahse, Nova chu a danglam a. Bible chuan ani chu ‘Pathian nêna lêng dûn ṭhîn’ “mi fel” tiin a ko a ni.—Genesis 6:7-9.

¹⁸ Nova chuan Jehova hmangaih lotute chu a kâwm lo va. Amah leh a chhûngte chu lawng tukin an buai hle a, ani chu “felna thu hriltu,” a ni bawk a ni. (2 Petera 2:5) Nova, a nupui, a fapa pathumte, leh an nupuite chu ṭhian ṭha an ni a. Anni chu Pathian duhzâwng tiin an buai hle a; chuvângin, Tuilêtah an dam khawchhuak a ni. Kan zain an thlahte kan ni a, Nova leh a chhûngte chuan Jehova thu âwiha ṭhian sual an kawm loh avângin kan lâwm hle tûr a ni. Chutiang bawkin, kum zabi khatnaa Kristiante chuan Jehova hmangaih lotute chu an kâwm lo va. Jehova thu an âwih avângin, C.E. 70-a Jerusalem tihchhiat a nih khân an dam khawchhuak a ni.—Luka 21:20-22.

19. Jehova laka rinawm reng tûrin engin nge min ṭanpui ang?

¹⁹ Nova, a chhûngte, leh kum zabi khatnaa Kristiante ang bawkin, Jehova hmangaih lotute chu kan kâwm lo va. Kan unau rinawm maktaduai tam takte chu ṭhianah kan thlang thei a ni. Anni chuan tûn hun khirh tak chhûngin ‘rinnaa ding nghet’ tûrin min ṭanpui ang. (1 Korinth 16:13; Thufingte 13:20) He khawvêl suaksual tâwpnaa dam khawchhuak a, Jehova khawvêl thara nun a hlimawm dân tûr chu han ngaihtuah teh! Tûna ṭhian sualte pumpelh chu a va pawimawh tak êm! (ws15-E 08/15)