Thlahtu Joba chu “mi famkim, mi ngîl tak” anga sawi a ni a. (Joba 1:1) Lota chu “mi fel” tia koh a ni bawk a. (2 Petera 2:8) Tin, Davida chu Pathian mit hmuha “thil ṭha chauh” ti nia sawi a ni bawk. (1 Lalte 14:8) Mahse, Bible-a chuang an chanchin chu i lo bih chiang ang u. Chuta ṭang chuan (1) thil an tisual a, (2) an hnên aṭangin kan inzir thei bawk a, (3) mihring ṭha famkim lote’n Pathian an tilâwm thei tak zet tihte kan hria ang.

Joba chuan atâna fel lo tak nia lang harsatna tam tak a tâwk a. Ngaih dân dik lo a nei a, a rinna a vawn leh vawn loh chu Pathian tâna pawimawh lo niin thu tâwp a siam a ni. (Joba 9:20-22) A fel a ni tih a inhriat êm avângin, mi dangte ngaihah chuan Pathian aia fel zâwka inpuang a ang hle.—Joba 32:1, 2; 35:1, 2.

Lota chuan thu tlûkna awlsam tak tûr nia lang chu a siam hreh hle a. Sodom leh Gomorra-a chêng mite nungchang bawlhhlawhna chuan a timangang hle a, an thiltihte chuan ‘a rilru fel tak  chu a tina’ hle bawk. (2 Petera 2:8) Pathian chuan he khawpui suaksual takte hi tihchhiat a tum tih a puang a, Lota chu a chhûngte nêna dam khawchhuah theihna hun remchâng a pe a ni. Mi mangang tak Lota chu kal chhuak hmasa ber tûrah i ngai mai thei. Mahse, he hun pawimawh takah hian ani chu a muang hle. Amah leh a chhûngte chhan chhuak tûra tirh vântirhkohte chuan an kuta chelhin khawpui pâwn hmun himah an kai chhuak a ni.—Genesis 19:15, 16.

Davida chuan ṭum khat chu insûm theihna tlachhamin mi nu a mutpui a. A thiltih sual thup a tumna lamah, chu nu pasal chu a that a, chu chu a râpthlâk hle. (2 Samuela, bung 11) Bible chuan Davida thiltihin “LALPA a tilungni lo” tih a sawi.—2 Samuela 11:27.

Joba te, Lota te, leh Davida te chuan thil an tisual vek a, a ṭhen phei chu a râpthlâk hle. Mahse, anni chuan thinlung zawng zawngin thu âwih taka Pathian rawngbâwl châkna an nei tih kan hmu ang. Pawi an tihzia lantîr leh an kawng thlâk ngaite thlâk chu an inhuam a. Chuvângin, Pathianin anni chu a duhsak a, Bible chuan an nun kawng zawng zawng enin mi rinawm tiin a ko a ni.

Mihring ṭha famkim lo kan nih avângin, thil sual tih kan pumpelh thei lo va. (Rom 3:23) Mahse, thil sual kan ti a nih chuan, pawi kan tihzia lantîrin, siam ṭha tûrin kan tih theihte kan tih a ngai a ni.

Engtin nge Joba te, Lota te, leh Davida te chuan an thiltih sual chu siam ṭhat an tum? A nihna takah chuan Joba chu mi rinawm tak a ni a. Pathianin thil a chhûtpui hnuah chuan, a ngaihtuahna ṭha lo chu siam ṭhain, a thu lo sawi tawhah thupha a chawi a ni. (Joba 42:6) Lota’n Sodom  leh Gomorra mite nungchang bawlhhlawh tak a thlîr dân chu Pathian tehna nên a inmil hle a. Rei lo te chhûng hmanhmawhna rilru a tlachham chu a buaina a ni. A tâwpah chuan ânchhe dawng khua chu chhuahsanin, Pathian rorêlna chu a pumpelh a. Thuâwih takin, a chhuahsan khaw lamah hawi pawh a hawikîr lo. Davida chuan Pathian dân bawhchhiain sual pawi tak ti mah se, a thinlung chhûngril aṭangin a inchhîr tak zet tih târ langin, Pathian zahngaihna a ngên a ni.—Sâm 51.

Hêng mite chunga Pathian thlîr dân duhawm tak hi mi ṭha famkim lote chunga beiseina inâwm tâwk a neih nên a inmil a. Pathian chuan ‘kan taksa siam dân hi a hria a, vaivut mai kan ni tih a hria’ a ni. (Sâm 103:14) Chuti chu, Pathianin thil sual tih kan pumpelh vek thei lo tih a hriat si chuan, kan lakah eng nge a beisei tâk?

Davida’n a fapa Solomona a zilhna chuan Pathian kan tihlâwm theih dân pawimawh tak min hriattîr a. ‘Nang ka fapa Solomon, i pa Pathian hi hria la, thinlung ṭha famkimin a rawng bâwl ang che.’ (1 Chronicles 28:9) Thinlung ṭha famkim chu eng nge ni? Chu chu Pathian hmangaihtu thinlung, a duhzâwng leh a thilphûtte zawm tum tlattu thinlung hi a ni a. Chu chu sualna nei lo thinlung a ni lo va, thu âwih taka Pathian rawng bâwl châkna leh insiam ṭhat huam reng thinlung hi a ni. Pathian an hmangaihna leh a thu an âwihna avângin Joba chu “mi famkim,” Lota chu “mi fel,” Davida chu ‘thil ṭha chauh titu’ anga chhinchhiah an ni a. Thil an tisual chung pawhin Pathian an tilâwm thei a ni.

Chuvângin, kan rilruah kan duh loh ngaihtuahna ṭha lo a lo lût emaw, kan zahpui tûr thu kan sawi palh emaw, a nih loh leh a hnua a dik lo tih kan hriatchhuah thilte kan ti palh emaw a nih chuan, kan sawiho tâk entîrnate aṭangin chakna i nei ang u. Tûn hunah hian ṭhat famkim chu kan theih phâk bâk a ni tih Pathianin a hria a. Mahse, amah hmangaih tûr leh a thu âwih tum tlat tûrin min beisei a. He mi chungchângah thinlung ṭha famkim kan nei a nih chuan, Pathian kan tilâwm thei tih kan ring nghet tlat thei a ni. (wp15-E 07/01)