Mitthite nung leh tûra ngaih chu thil âtthlâk tak a ni em? Tirkoh Paula chuan âtthlâkah a ngai lo. Pathian thâwk khuma awmin: “Tûn dam chhûng chauhva Krista chunga beiseina kan neih chuan mi zawng zawnga khawngaihthlâk ber kan lo ni ang. Nimahsela Krista chu mitthi zîng ata kaihthawhin a awm tak zet a ni, muhîlte thawh hmahruaitu a lo ni ta,” tiin a ziak a. (1 Korinth 15:19, 20) Paula chuan thawhlehna chu thil awm tak tak niin a hria a. Chu chu, Isua thawhlehna chuan a nemnghet a ni. * (Tirkohte 17:31) Chuvâng chuan a ni, Paula’n Isua chu “thawh hmahruaitu”—chatuana nun neia tholeh hmasa ber—tia a koh ni. Isua chu tholeh hmasa ber a nih chuan, mi dang pawh an la tholeh dâwn tihna a ni.

Thawhlehna a awm ngei a ni tih kan hriat chian theih chhan dang a awm a. Jehova chu thutak Pathian a ni a. Ani chu “Pathian, dâwt sawi thei lova” a ni. (Tita 1:1, 2) Jehova chuan dâwt a sawi ngai lova, engtikah mah a sawi lo vang. Ani chuan thawhleh beiseina min pe ang a, thawhlehna a thlentîr theih dân pawh a entîr hnuah, a thutiam chu dâwtah a chantîr leh dâwn em ni? Chu chu thil theih a ni lo!

Engvângin nge Jehova chuan thawhlehna ruahmanna chu a siam? A hmangaihna vâng a ni. Joba chuan: “Mi a thih chuan a nung leh ang em ni?” tiin a zâwt a. “Mi ko vang a, keiin ka chhâng ang che; i kut hnathawh i ngaina a ni,” tiin a sawi belh a ni. (Joba 14:14, 15) Joba chuan hmangaihtu a Pa vâna miin amah kaihthawh a châk hle tih a ring tlat a. A nih leh, he mi chungchângah hian Pathian chu a danglam tawh em? “Kei LALPA hi ka danglam ngai lo.” (Malakia 3:6, C.L. Re-edited)  Pathian chuan mitthite chu hrisêlna leh hlimna neia kaihthawh leh a la châk reng a ni. Chu chu, an fa duh tak an chân hnua nu leh pate duhthusâm thil a ni a. Mahse, an inan lohna chu Pathian chuan a duh ang taka tih nân thiltihtheihna a nei hi a ni.—Sâm 135:6.

Jehova chuan an hmangaih tak sûntute hnêna hlimna nasa tak pe tûrin a Fapa hnênah thiltihtheihna a pe ang. A nih leh, thawhlehna chungchânga Isua ngaih dân chu eng nge ni? Lazara a kaihthawh hmain, Lazara farnute leh an ṭhiante hrehawm tawrhna a hmuh chuan, Isua ngei pawh “a ṭap” a ni. (Johana 11:35) Ṭum dangah, Isua chuan Nain khuaa hmeithai, a fa neih chhun sûntu chu a tawk a. Isua chuan “hmeithai chu a hmuh veleh, a khawngaih êm êm a, ‘Ṭap suh,’ a ti a.” A fapa chu a kaitho nghâl a ni. (Luka 7:13) Chuvângin, Isua’n lungngaihna leh thihna chu pawi a ti hle tih kan hre thei a. Khawvêl puma lungngaihna chu hlimna nasa taka a chantîr hun chuan a va hlim dâwn êm!

Lungngaihna i nei em? Thihna chu chinfel theih loh buaina niin i ngai mai thei a. Mahse, chinfel dân a awm a—chu chu Pathianin a Fapa hmanga thawhlehna a buatsaih hi a ni. Pathianin chu chinfelna chu hmuhtîr che a duh tih hre reng ang che. Ani chuan i hmangaih tak lo tholehte hmuak tûrin a duh che a ni. Kan chatuan nakin hun tûr atâna ruahmanna siam tlâng a, inṭhenna a awm tawh loh hun tûr chu han ngaihtuah teh!

Thuziak hmasaa kan sawi tâk Lionel-a chuan: “A tâwpa tâwpah chuan, thawhlehna chungchâng chu ka zir ta a. A hmasa chuan, âwih harsa ka tiin min hrilhtute chu ka ring thei lo va. Mahse, Bible ka chîk a, a dik a ni tih ka hre ta! Ka pu hmuh leh hlân chu ka nghâkhlel hle,” tiin a sawi.

Hriat belh i duh ang em? Jehova Thuhretute chuan thawhlehna a lo thleng dâwn tih an rin ngheh chhan i Bible aṭang ngeia hmuhtîr che chu an duh a ni. * ▪ (wp15-E 08/01)