1, 2. Engtin nge Jehova chuan amah hmangaih tûra min zirtîr?

PAIN a fate a zirtîr theih dân ṭha ber chu a entawn tûr siam aṭangin a ni a. A fate a hmangaihna a lantîr hian, anni chu hmangaih dân a zirtîr a ni. Kan Pa, Jehova hmangaihna aia nasain tumahin hmangaihna an lantîr ngai lo. Chuvângin, “amahin min hmangaih hmasak avângin” hmangaih dân kan zir a ni.—1 Johana 4:19.

² Eng kawngin nge Jehova’n ‘min hmangaih hmasa’ tih a lantîr? Bible chuan: “Mi sualte kan la nih laia Krista kan aia a thih avâng khân,” tiin a sawi a. (Rom 5:8) Hmangaihna ngah tak kan Pa, Jehova chuan sual leh thihna ata min chhan chhuak tûrin tlan nân a Fapa a pe a ni. Chu thilpêk hlu tak chuan, Jehova min hnaihtîr theiin, amah kan hmangaihna lantîr tûrin min ṭanpui a. Chutiang chuan nasa taka inpein, entawn tûr a siam a. Hmasialna nei lo leh thil phal taka mite hmangaih tûrin min zirtîr a ni.—1 Johana 4:10.

3, 4. Pathian kan hmangaih tih engtin nge kan lantîr?

³ Hmangaihna chu Jehova mize bulpui ber a ni a. Chuvângin, Isua’n: “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tûr a ni,” tih hi thupêk pawimawh ber nia a sawi chhan  pawh kan hre thiam thei a ni. (Marka 12:30) Jehova chuan kan ‘thinlung zawng zawnga’ amah hmangaih tûrin min duh a. Mi tuemaw, a nih loh leh thil engemaw kan hmangaih zâwk chuan a rilru a na dâwn a ni. Mahse, rilru maia amah kan hmangaihna a tâwk lo. Jehova chuan kan ‘rilru zawng zawng’ leh kan ‘chakna zawng zawnga’ amah kan hmangaih a beisei bawk. Chu mi awmzia chu Jehova kan hmangaihnaah kan thil ngaihtuah dân leh kan thiltih a tel tihna a ni.—Mika 6:8 chhiar rawh.

⁴ Chuvângin, Jehova chu kan nihna zawng zawng leh kan neih zawng zawngin kan hmangaih tûr a ni a. Kan nuna amah dah pawimawh berin, kan hmangaih tak zet tih kan lantîr a ni. Thuziak hmasaah khân, Jehova’n a fate chunga a hmangaihna ropui a târ lan dân kawng li kan sawiho tawh a. Tûnah chuan Jehova kan hmangaihna kan tihngheh theih dân leh kan lantîr theih dân i lo en ang u.

5. Jehova’n kan tâna thil a tih tawh zawng zawng kan ngaihtuah hian, eng nge tih kan duh?

⁵ Tuemaw hnên aṭanga thilpêk i dawn chuan i lâwmzia i lantîr ngei ang. Chu thilpêk chu i hlut avângin i hmang bawk a ni. Jakoba chuan: “Thilpêk ṭha leh thilpêk famkim zawng zawng chu chung lam aṭangin êngte Pa hnên ata, a lo chhuk ṭhîn a ni, amahah chuan danglamna leh herna hlim rêng rêng a awm thei lo,” tiin a ziak a. (Jakoba 1:17) Nunna neih nân leh hlim taka kan awm theih nâna kan mamawh zawng zawng min pêk avângin Jehova chungah kan lâwm tak zet a. Min hmangaihzia kan hria a, keini pawhin amah kan hmangaihna lantîr kan duh a ni. Chutiang chu i ni ve em?

6. Jehova malsâwmna dawn zêl an duh chuan Israelte’n eng nge an tih ngai?

⁶ Israelte khân Jehova hnên aṭangin thil ṭha tam tak an dawng a. Kum za tam tak chhûng chu a dânte hmangin a kaihruai a, nunna atâna an mamawh zawng zawng a pe bawk a ni. (Deuteronomy 4:7, 8) Tichuan, anni chuan chûng dânte chu zâwmin Jehova laka an lâwmna chu an lantîr thei a. Entîr nân, Jehova hnêna inthawina an hlan hunah, an rama “thlai thar hmasa ber” an pe tûr a ni. (Exodus 23:19) Israelte chuan Jehova thu zâwm a, an thil ṭha ber an pêk chuan ani chuan mal a sâwm zawm zêl dâwn tih an hria a ni.—Deuteronomy 8:7-11 chhiar rawh.

7. Engtin nge kan “sumin” Jehova kan hmangaihna kan lantîr theih?

⁷ Keini pawhin kan “sumin” Jehova kan hmangaihna kan lantîr thei a. (Thufingte 3:9) Amah chawimawi nân kan thil neihte hmangin chutiang chuan kan ti a ni. Entîr nân, kan awmna leh khawvêl pum kohhrana Lalram rawngbâwlna chhawmdâwl nân thawhlâwm kan thawh thei a. Kan nei tam emaw, tlêm emaw pawh ni se, Jehova kan hmangaihna lantîr nân kan thil neihte kan hmang ṭheuh thei a. (2 Korinth 8:12) Mahse, Jehova kan hmangaihna lantîr theih dân kawng dang pawh a la awm a ni.

8, 9. Jehova kan hmangaihzia kan lantîr theihna kawng dang chu eng nge ni? Mike-a leh a chhûngte chuan eng thil nge an tih?

⁸ Isua chuan Lalram dah pawimawh bera, ei tûr leh silh tûr lungkham lo tûrin min zirtîr a. Kan Pa chuan kan mamawhte pêk min tiam a ni. (Matthaia 6:31-33) Jehova kan ringin a thutiamte a hlen dâwn tih kan hria. Mi tuemaw i hmangaih tak zet chuan amah chu i ring a. Jehova kan rin zawh poh leh kan hmangaihzia kan lantîr lehzual a ni. (Sâm 143:8) Chuvângin, heti hian kan inzâwt thei ang: ‘Ruahmanna ka siam te, ka hun leh tha leh zung ka hman dânte chuan Jehova ka hmangaih tak zet tih a târ lang em? Ni tin hian,  ka mamawhte min pe tûrin Jehova ka rinchhan em?’

⁹ Mike-a leh a chhûngte chuan Jehova an rinchhan a. Mike-a chuan a naupan laiin ram danga thu hrilh a châk hle ṭhîn a. Nupui neia fa pahnih a neih hnuah pawh a la châk reng a. Mike-a leh a chhûngte chuan mamawh lehzualna hmuna rawngbâwltu unaute chanchin an han chhiar chuan an nun tihsamkhai an tum ta a ni. An in hralhin, hmun tê zâwkah an insawn a. Mike-a chuan in tihfaina lama a hnathawh chu a hma aiin a titlêm a, ram dang aṭanga Internet hmanga thawh zawm dân chu a hmu chhuak ta bawk a ni. Mike-a leh a chhûngte chu ram dangah an insawn theih phah a, chuta rawngbâwl chu nuam an ti hle a. Mike-a chuan, “Matthaia 6:33-a chhinchhiah Isua thusawi dikzia chu a tak ngeiin kan tawng!” tiin a sawi a ni.

10. Lal Davida angin Jehova chanchin kan hriatte chhût ngun chu engvângin nge a ṭhat?

¹⁰ Lal Davida chuan ṭumkhat chu heti hian a ziak a ni: “Vânte khian Pathian ropuizia chu a hriattîr a; boruak zau tak khian a kut chhuak chu a lantîr ṭhîn,” tiin. “LALPA dân chu a ṭha famkim a, nunna a siam ṭha ṭhîn: LALPA thuhriattîr chu a rinawm a, mi mâwl a tifing ṭhîn,” tiin a sawi belh a. Davida chuan Jehova dân fing leh thilsiam mawite ngun taka a chhût chuan Jehova a hnaihzual sawt a, a hmangaihna lantîr a duh a ni. Ani chuan: “Aw LALPA, ka lungpui leh mi tlantu, ka kâa thu chhuakte leh ka thinlunga ngaihtuahnate hi i mithmuhah lawm tlâk takin awm rawh se,” tiin a sawi a ni.—Sâm 19:1, 7, 14.

11. Engtin nge Jehova hriatna kan neih chu amah kan hmangaihna târ lan nân kan hman theih? (A thupui chunga milem en rawh.)

¹¹ Tûn laiah, Jehova chuan a chanchin tam tak, a thiltum, a thilsiam, leh a Thu min zirtîr a. Khawvêl chuan mite chu zirna sâng ûm tûrin a fuih a; mahse, chu chuan mite chu Pathian an hmangaihna a hlohtîr fo ṭhîn. Chumi nêna inkalh takin, Jehova chuan hriatna nei tûra min duh bâkah, finna pawh nei tûrin min ṭanpui bawk. Kan thil zirte chu kan tâna ṭha tûr leh mi dangte ṭanpui nâna hmang tûrin min duh a. (Thufingte 4:5-7) Entîr nân, mite hnêna “thutak” kan hrilh a, chhandam ni tûra kan ṭanpui a duh a ni. (1 Timothea 2:4) Jehova leh mite kan hmangaihna chu a tam thei ang berte hnêna Pathian Ram leh mihringte tâna Pathian thiltum ropui tak zirtîrin kan lantîr a ni.—Sâm 66:16, 17 chhiar rawh.

12. Unaunu pakhatin Jehova thilpêk chungchâng engtin nge a sawi?

¹² Naupangte pawhin Jehova thilpêk leh zirtîr zawng zawngte chu ngun takin an chhût  thei a. Shannon-i chuan a inkhâwmpui laia a awm dân chu a la hre reng a ni; chutih lai chuan kum 11 mi a ni a, a unaunu chu kum 10 mi a ni. “Pathian Ngaihsakna” District Inkhâwmpui chhûngin, Shannon-i leh a unaunu bâkah naupang zawng zawngte chu an ṭhutna tûr hmun bîk siamsak an ni a. Atîrah chuan, a zâm deuh a. Mahse, Questions Young People Ask—Answers That Work tih lehkhabu an han dawn tâk ṭheuhvah chuan a phûr ta hle a ni. Chu thilpêk ṭha tak chuan Jehova chunga a rilru put hmang engtin nge a nghawng? Heti hian a sawi a ni: “Jehova chu ka tân a takin, a mi mal takin min hmangaih tak zet tih ka hre ta a. Kan Pathian ropui, Jehova’n chutiang thilpêk mawi leh ṭha phal taka min pêk avâng chuan ka va lâwm tak êm!” tiin.

13, 14. Jehova’n min thunun hunah engtin nge kan chhân lêt ang, engvângin nge?

¹³ “LALPA chuan a hmangaihte chu a zilhhau ṭhîn a ni, pain fa a lâwm apiangte a zilhhau ṭhîn ang hian,” tiin Bible chuan min hrilh a. (Thufingte 3:12) Jehova thununna pawm a, a zirtîra kan awm chuan thil dik tih kan zir a, remna kan nei a ni. “Thununna rêng rêng hi tuar lai chuan lâwmawmin a lang lo va, lungchhiatthlâkin a lang zâwk ṭhîn.” (Hebrai 12:11) Chutiang chu ni mah se, Jehova’n min thunun hunah engtin nge kan chhân lêt ang? Jehova zilhna chu kan hnâwl ngai tûr a ni lo va, kan thu hriat chu kan pawm zâwng a nih loh pawhin lung nih loh nân kan hman phah reng tûr a ni lo bawk. Jehova kan hmangaih avângin a thu kan awihin a ṭûl angin kan insiam ṭha a ni.

¹⁴ Malakia hun lai khân Juda mi tam takte chuan Jehova thu an awih lo va. An inthawinain Jehova a tihlâwm loh pawhin pawi an ti lo. Chuvângin, Jehova’n zilhna khauh tak a pe ta a. (Malakia 1:12, 13 chhiar rawh.) Ani chuan vawi tam tak zilh mah se, an ngaithla duh lo a ni. Chuvângin, an hnênah: “In chungah ânchhia ka rawn thlentîr ang, . . . in malsâwmna dawnte chu ânchhia ka lawh ang,” tiin a hrilh a ni. (Malakia 2:1, 2) Jehova zilhnate kan ngaihthlâk duh loh emaw, pawimawh lo nia kan ngaih emaw chuan amah nêna kan inṭhianna kan hloh dâwn tih a chiang hle a ni.

15. Eng ang ngaihtuahna nge kan pumpelh ang?

¹⁵ Setana khawvêl chuan mite chu chapo tûr leh mahni hmasial tûrin a fuih a. Mi tam tak chuan thunun emaw, an tih tûr hrilh emaw chu an duh lo va. Ṭhenkhat chuan thurâwnte chu a ṭûl avâng chauhvin an ngaithla a ni. Chutiang chu kan ni tûr a ni lo. Bible chuan ‘khawvêl  dân anga awm lo’ tûrin min hrilh a. Jehova’n kan laka a beiseite kan hriatthiam a, amah tilâwmtu thil kan tih a ngai zâwk a ni. (Rom 12:2) A inawpna pâwl chu a hun taka zilhna min pe tûrin a hmang a. Entîr nân, mipat hmeichhiatpui ni lote laka kan awm dân tûr te, ṭhian thlan dân tûr te, leh chawlh hahdam nâna kan thil thlan dân tûrte min hriattîr a ni. Jehova thununnate chu lâwm taka kan pawm a, amah tilâwm tûra kan insiam ṭhat hian a kaihhruaina avânga kan lâwmna leh kan hmangaih tak zetna kan lantîr a ni.—Johana 14:31; Rom 6:17.

16, 17. (a) Thu tlûkna kan siam hmain engvângin nge Jehova ngaih dân hriat kan tum ang? (b) Israel mite chuan Jehova rinchhan aiin eng nge an tih?

¹⁶ Naupangte chuan ṭanpui tûr leh vênghim tûrin an nu leh pate an rinchhan ṭhîn a. Puitling tawhte pawhin an nu leh pate hnênah ṭanpuina an dîl thei bawk. Mahniin thu tlûkna siam thei mah se, an nu leh pate chuan thurâwn ṭha an pe theih tih an hria a. Kan Pa, Jehova chuan mahnia thu tlûkna kan siam a phal a ni. Mahse, amaha kan innghah tlat avâng leh kan hmangaih avângin a ṭanpuina kan dîl ziah a, thu tlûkna kan siam hmain a ngaih dân hre tûrin a theih apiang kan ti a ni. Jehova kan rinchhan chuan, thil dik ti tûra min ṭanpui tûrin a thlarau thianghlim min pe ang.—Philippi 2:13.

¹⁷ Samuela hun lai khân Israelte chuan Philistia mite nêna an indonaah an hneh lo va. An thiltih leh tûrah Jehova zâwt lovin: “Kan hnêna kan hmêlmate kut ata min chhandam tûrin Silo ata LALPA thuthlung bâwm chu i han la ang u,” an ti a. Chu an thu tlûkna siam chuan eng nge a rah chhuah? “An that nasa êm êm mai a, Israel-ho zînga sipai sîngthum an thi a ni. Tin, Pathian bâwm chu an lâksak a.” (1 Samuela 4:2-4, 10, 11) Israel mite chuan Pathian Bâwm an hnêna a awm chuan, Jehova’n a ṭanpui a, a vênhim an ring a ni. Mahse, Jehova ṭanpuina an dîl lo va, a ngaih dân hriat an tum bawk hek lo. Dik nia an hriat angin thil an ti ta zâwk a, nasa takin an tawrh phah ta a ni.—Thufingte 14:12 chhiar rawh.

18. Bible-in Jehova rinchhan chungchângah eng nge a zirtîr che?

¹⁸ Jehova hmangaih êm êm leh rinchhantu, fakna hla phuahtu chuan: “Pathian beisei rawh: a hmêla damna avângin, amah chu ka la fak dâwn si a. Aw ka Pathian, ka nunna ka chhûngah hian a kun reng a. Chuvângin . . . ka hre reng che a ni,” tiin a ziak a ni. (Sâm 42:5, 6) Chutiang chuan Jehova chu i ngai ve em? Amah chu hnaih niin i inhria em? I rinchhan em? Amah rinchhan lehzual dân pawh i zir thei a ni. Bible chuan heti hian min hrilh a ni: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che,” tiin.—Thufingte 3:5, 6.

19. Engtin nge Jehova chu i hmangaih tih i lantîr ang?

¹⁹ Jehova chuan min hmangaih hmasain, amah hmangaih dân min zirtîr a. Kan tâna thil a tih nasatzia leh min hmangaihzia chu i ngaihtuah reng ṭhîn ang u. Kan thinlung zawng zawng, thlarau zawng zawng, rilru zawng zawng, leh chakna zawng zawngin kan hmangaih tih i lantîr ang u.—Marka 12:30. (ws15-E 09/15)