1. (a) Galili dîla thlipui tleh laiin Petera chungah eng thil nge thleng? (A thupui chunga milem en rawh.) (b) Engvânga pil dâwn ta mai nge a nih?

ZAN khat chu thlipui tleh laiin thirhkoh Petera leh zirtîr ṭhenkhatte chuan Galili Dîl kân an tum a, theih tâwp chhuahin lawng an kar a ni. Tui chunga Isua kea kal chu an hmu ta phut mai a. Petera chuan ani chu auvin, a hnên lam pana tui chunga kal ve a dîl a. Isua’n kal tûra a hrilh chuan, lawng aṭanga chhuakin, Isua lam a pan a. Mahse, a hnu lawkah, Petera chu a pil dâwn ta mai a ni. Engvângin nge? Ani chuan thlipui leh tuifâwn a en avângin, a hlau ta a ni. Ṭanpuina dîlin a au chhuak a, Isua chuan ban nghâlin, “Nang rin tlêm, engah nge i rinhlelh le?” a ti a ni.—Matthaia 14:24-32.

2. Eng nge kan ngaihtuah ang?

² Rinna chungchângah Petera thiltawn aṭanga kan zir theih thil pathum: (1) Jehova’n a ṭanpui thei tih Petera’n a rin nghâl dân, (2) rinna a hloh chhan, leh (3) rinna nei lêt tûra ṭanpuitute chu i lo ngaihtuah ang u. Chûng thil pathumte ngun taka chhûtna chuan  ‘rinnaa kan din ngheh’ theih dân hmu thiam tûrin min ṭanpui ang.—1 Korinth 16:13.

3. Engvângin nge Petera chu lawng aṭanga a chhuah a, chutiang nêna inang thil chu eng nge kan tih?

³ Petera chu a rinna a chak hle. Engvângin nge chutianga kan sawi theih? Isua’n a koh lai khân, Petera chu lawng aṭanga chhuakin tui chungah a kal nghâl a. Ani chuan Pathianin Isua hnêna thiltihtheihna a pêk ang bawk a pêk ve a ring a. Chutiang bawkin, Isua’n amah zui tûra min sâwm hian Jehova hnêna inpein, baptisma kan chang a ni. Engvângin nge? Jehova leh Isua kan ring a, min ṭanpui dâwn tih kan rin bawk vâng a ni.—Johana 14:1; 1 Petera 2:21 chhiar rawh.

4, 5. Engvângin nge rinna chu thil hlu tak a nih?

⁴ Rinna chu thil hlu tak a ni a. Petera rinna chuan mihring ngaiha thil theih loh anga lang, tui chungah a kaltîr thei a ni. Rinna chuan thil theih loh anga langte pawh ti thei tûrin min ṭanpui thei bawk. (Matthaia 21:21, 22) Kan zînga ṭhenkhatte chuan rilru put hmang leh miziate kan thlâk nasat êm avângin min lo hre tawh ṭhînte pawhin min hai hial a. Jehova kan hmangaihna avâng leh min ṭanpuina avângin chutiang chuan kan inthlâkthleng a ni. (Kolossa 3:5-10 chhiar rawh.) Rinna chuan Jehova hnêna inpumpêk tûrin min chêttîr a, a ṭanpuina tel lo va kan nih theih ngai loh tûr a ṭhian kan lo ni thei ta a ni.—Ephesi 2:8.

⁵ Kan rinna chuan min tichak a. Entîr nân, kan hmêlma thiltithei tak Diabola beihna do tûrin min ṭanpui a ni. (Ephesi 6:16) Jehova kan rin chhan avângin buaina kan tawh hunah pawh kan lungngaih lutuk a ngai lo bawk. Jehova chuan amah kan rin a, a Ram kan zawn hmasak phawt chuan kan mamawhte min pe dâwn tih min tiam a. (Matthaia 6:30-34) Chu bâkah, kan rinna avângin chatuana nunna thilpêk duhawm tak min pe bawk ang.—Johana 3:16.

6, 7. (a) Petera tihlautu thli leh tuifâwn chu eng nên nge kan khaikhin theih? (b) Engvângin nge rinna kan hloh thei tih kan hriat a ngaih?

⁶ Petera chu Galili Dîl chunga a han kal chuan, a hlau ṭan ta a. Engvângin nge? Thlipui leh tuifâwn vâng a ni. Chu chu tûn laia Kristiante hmachhawn harsatna leh thlêmna tam tak nên khaikhin theih a ni a. Chûng harsatnate chu nasa hle mah se, Jehova ṭanpuina nên chakna kan nei thei a ni. Mahse, Petera chunga thil thleng kha hre reng rawh. Thli leh tuifâwnin a nuai avânga pil a ni lo va. Chu ai mahin, Bible chuan: “Thli tleh chu a hmuhin a hlau va,” tiin a sawi zâwk a ni. (Matthaia 14:30) Isua ni lovin, thlipui thiltihtheihna lama a rilru a pêntîr vâng a ni. Tichuan, a rinna chu a chak lo ṭan ta a. Chutiang bawkin, kan harsatnate kan ngaihtuah hian Jehova’n min ṭanpui ang tih rinhlelhna kan nei ṭan thei a ni.

⁷ Kan rinna kan hloh thei tih kan hre tûr a ni. Engvângin nge? Bible chuan rinna hlohna chu “sual keimahnia bet tlat,” tiin a sawi a. (Hebrai 12:1) Petera ang bawkin, thil ṭha lo lama kan rilru kan pêntîr chuan awlsam takin kan rinna a chau thei a. A nih chuan engtin nge kan rinna chu dinhmun hlauhawmah a awm tih kan hriat theih ang? A hnuaia zawhnate chuan mahni inbih chiang tûrin min ṭanpui ang.

8. Engtin nge Pathian thutiam kan rinna chu tûn hma anga a ngheh loh theih?

⁸ Pathian thutiam ka rinna chu tûn hma angin a la nghet em? Entîr nân, Pathian chuan Setana khawvêl tihboral a tiam a. Mahse, a khawvêlin a pêk intihhlimna chi hrang tam takte tihbuaiin kan awm em? Chutiang a nih chuan, tâwpna a hnai tih kan ringhlel ṭan thei a. (Habakuka 2:3) Entîrna dang han ngaihtuah teh. Jehova chuan tlanna min pein, kan  thiltih sualte ngaihdam min tiam a ni. Mahse, tûn hmaa kan thil tihsualte kan ngaihtuah reng chuan, Jehova’n min ngaidam tak zet dâwn tih rinhlelhna kan nei ṭan thei a. (Tirhkohte 3:19) Chuvângin, Pathian rawngbâwlnaah hlimna kan hloh thei a, mi dangte hnênah thu kan hril tawh lo pawh a ni thei a ni.

9. Kan tuizâwngte kan ngaihtuah zâwk chuan eng thil nge thleng thei?

⁹ Jehova rawngbâwlnaah theih tâwp ka la chhuah reng em? Jehova tâna kan thawhrimna chuan hma lam huna kan beiseite ngaihtuah tlat tûrin min ṭanpui a. Mahse, kan tuizâwngte kan ngaihtuah zâwk chuan eng thil nge thleng thei? Entîr nân, Jehova rawng min bâwl tamtîr thei lo, hlawh ṭha tak hmuh theihna hna chu thawh kan duh mai thei a. Chu chuan kan rinna a tichau thei a, “inthlahdah” phah nâna hmangin, Jehova rawngbâwlnaah theih tâwp kan chhuah lo pawh a ni thei a ni.—Hebrai 6:10-12.

10. Engtin nge mi dangte kan ngaihdam hunah Jehova chunga rinna kan târ lan?

¹⁰ Ngaihdam harsa ka ti em? Mi dangte’n min tih thinrim emaw, kan rilru an tihnat emaw hunah an chungah kan thinurin, kan be duh lo em? Chutiang a nih chuan, mahni chauh kan inngaihtuah tihna a ni thei a. Mi dangte kan ngaihdam hian Jehova kan ring tihna a ni. Engtin nge chu chu a nih theih? Mi tuemawin kan chungah thil a tihsual chuan, kan lakah bat a nei a. Jehova chunga thil kan tihsual chuan, a lakah bat kan nei tihna a ni thung. (Luka 11:4) Chuvângin, mi dangte kan ngaihdam hian, Jehova kan ring tihna a ni. Ani chuan kan rilru put hmang chu mal a sâwm kan ring a, a malsâwmna chu mi tuemawin min rulh lêtna aiin a hlu zâwk a ni. Isua zirtîrte chuan mi dangte ngaidam tûrin rinna neih a ngai tih an hria a. Isua’n an chunga vawi tam tak thil tisualtute ngaidam tûra a hrilh khân, anni chuan “Kan rin tiphui deuh vang che,” tiin an ngên a ni.—Luka 17:1-5.

11. Engvângin nge zilhna kan dawn aṭanga kan inzir loh theih?

¹¹ Zilhna pêk ka nih hunah ka thin a ur em? Zilhna min petu thil tihsual leh tlin lohnate en aiin, zilhna aṭanga inzir dân kawng zawng zâwk rawh. (Thufingte 19:20) Jehova thil ngaihtuah anga ngaihtuah lehzual theihna hun remchâng chu hmaih suh!

12. Miin kohhrana kaihruaitute a sawisêl fo chuan eng thil dik lo nge awm?

¹² Kohhrana kaihruaitute chu ka sawisêl em? Israel mite’n enthlatu sâwmte rawn thlen chanchin ṭha lo chauh an ngaihtuah khân, Mosia leh Arona chungah an phunnawi a. Tichuan, Jehova’n Mosia chu: “Hêng mipuite hian . . . eng chen nge mi rin loh dâwn?” tiin a zâwt a ni. (Number 14:2-4, 11) Ni e, Jehova chuan a mi ruat Mosia leh Arona an sawisêl avângin amah an ring lo tih a hria a. Chutiang bawkin, Jehova’n tûn laia a mite kaihruai tûra a mi hmante kan sawisêl fo chuan kan rinna a chau tih a lang thei a ni.

13. Engvângin nge kan rinna a chak lo tih kan hriat pawha kan lunghnual mai loh vang?

¹³ Hêng zawhnate kan ngaihtuah hnu hian, i rinna a chak lo tih i hriat pawhin lunghnual mai suh. Tirhkoh Petera meuh pawhin hlauhna a neiin, a ringhlel ṭan tih hre reng ang che. Isua’n a tirhkoh zawng zawngte chu ‘an rinna a tlêm’ avângin zilh châng a nei ṭhîn a. (Matthaia 16:8) Mahse, Petera hnên aṭangin thil pawimawh tak kan zir thei a ni. Rinhlelhna a neih ṭan a, tuia a pil hnua a thil tih chu lo chhinchhiah rawh.

14, 15. (a) A pil ṭan khân Petera’n eng nge a tih? (b) Engtin nge Isua chu kan “ngaihtuah” tlat theih?

¹⁴ A pil ṭan khân Petera’n eng nge a tih? Tuihleuh thiam tak a nih avângin, lawng lama hleuh kîr leh chu a tum thei a. (Johana 21:7) Mahse, engvângin nge chutianga a tih loh?  Mahni inrinchhan lovin, Isua a rinchhan zâwk a, a ṭanpuina chu a pawm ta a ni. Kan rinna a chau tih kan hriat chuan Petera entawn tûr siam chu kan entawn tûr a ni. Engtin nge kan entawn theih?

¹⁵ Petera’n ṭanpuitu atân Isua a pan angin, Isua chu kan “ngaihtuah” tlat tûr a ni. (Hebrai 12:1-3 chhiar rawh.) Mahse, ani chu Petera angin kan hmu ve thei lo. Chutiang a nih si chuan, engtin nge Isua chu kan “ngaihtuah” tlat theih ang? A zirtîrna leh a thiltihte zirin, amah kan entawn tlat thei a ni. Chutianga kan tih hunah chuan kan rinna tihchak nân kan mamawh ṭanpuina kan hmu ang. Isua kan entawn theih dân kawng ṭhenkhat i lo ngaihtuah ang u.

16. Engtin nge Bible chuan kan rinna tichak tûra min ṭanpui theih?

¹⁶ Bible i rinna tinghet rawh. Isua chuan Bible hi Pathian Thu a ni tih leh chu chuan thurâwn ṭha ber min pe tih a ring tlat a. (Johana 17:17) Isua entawn tûr chuan nî tin Bible kan chhiar a, kan zir a, kan thil zirte kan chhût ngun a ngai a. Zawhna kan neih theihte chhânna chu kan zawng bawk tûr a ni. Entîr nân, ni hnuhnûngah kan awm tih i ring tak zet em? Tâwpna a hnai tawh tih i rinna tihngheh nân ni hnuhnûngah kan awm tih finfiahtu Bible hrilh lâwknate chu zir ang che. Hma lam huna Pathian thutiamte i rinna chu tihngheh zual i duh em? Chutiang a nih chuan, Bible hrilh lâwkna thleng famkim tawhte chu zir ang che. Bible chu tûn laiah hian a la ṭangkai reng tih i pawm tak zet em? Bible ṭanpuina avânga an nun a ṭha zâwnga thlâkthlengtu unaute chanchin i chhiar thei a ni. * (Footnote en rawh.)—1 Thessalonika 2:13.

17. Engvângin nge Isua’n fiahna nasa tak chu a tuar chhuah theih a, engtin nge amah chu i entawn theih?

¹⁷ Jehova tiam malsâwmna chu ngaihtuah tlat rawh. Isua chuan a hma lam huna  malsâwmna chu a ngaihtuah a, chu chuan fiahna nasa ber pawh tuar chhuak tûrin a ṭanpui a ni. (Hebrai 12:2) Khawvêlin a pêk theih thilte chuan a tibuai ngai lo. (Matthaia 4:8-10) Engtin nge Isua entawn tûr siam chu kan zui theih ang? Jehova thutiam ropui takte chu chhût ngun ang che. Khawvêl thara awm angah han inmitthla teh. Paradise-a i thil tih tûrte chu ziak chhuak ang che. A nih loh leh, tho lehte zînga i kawm duhte hming leh i thil hrilh duhte chu ziak chhuak ang che. Isua angin, chu thilte chu mi nâwlpuite tân mai ni lovin, a mi mal taka Pathian tiam che angin ngai rawh.

18. Engtin nge ṭawngṭaina chuan i rinna tichak tûra a ṭanpui theih che?

¹⁸ Rinna chak lehzual nei tûrin ṭawngṭai rawh. Isua chuan a zirtîrte chu Jehova hnênah thlarau thianghlim dîl tûrin a hrilh a. (Luka 11:9, 13) Thlarau thianghlim i dîl rualin rinna chak lehzual nei tûrin dîl ang che. Chu chu thlarau rah pêng pakhat a ni. Ṭawngṭainaah chuan dîl bîk nei ang che. Entîr nân, min dangte ngaihdam harsa i tih chuan, i rinna tichak tûr leh mi dangte ngaidam thei tûrin Jehova ṭanpuina dîl rawh.

19. Engtin nge ṭhian ṭhate kan thlan theih?

¹⁹ Rinna chak nei ṭhiante thlang rawh. Isua chuan ṭhian ṭhate chu fîmkhur takin a thlang a. A ṭhian ṭha, tirhkohte chu an rinawmin, a thu an âwih a ni. (Johana 15:14, 15 chhiar rawh.) Isua entawnin, fîmkhur takin ṭhiante thlang rawh. Anni chu Isua thuâwih a, rinna chak tak nei an ni tûr a ni. Ṭhian dik takte chu zilhna pêk, a nih loh leh dawn a ngaih hunah pawh thu dik tak an inhrilh tawn tûr a ni.—Thufingte 27:9.

20. Mi dangte chu an rinna tichak tûra kan ṭanpui hunah eng hlâwkna nge kan dawn ang?

²⁰ Mi dangte chu an rinna tichakin ṭanpui rawh. Isua chuan a zirtîrte chu a thusawi leh a thiltihin an rinna a tichak a. (Marka 11:20-24) Isua entawn tûr siam chu kan zâwm tûr a ni. Chutianga kan tih chuan, kan rinna leh mi dangte rinna kan tichak ang. (Thufingte 11:25) Engtin nge i thu hrilhna biala mite i ṭanpui theih? Mi dangte hnêna Bible i zirtîr hunah, Pathian a awm a, min ngaihsak tih leh Bible chu Pathian Thu a ni tihte sawi uar ang che. Engtin nge unaute chu an rinna chak tûra i ṭanpui theih? Tuemawin kohhrana hruaitute a sawisêl lai i hmuh chuan a mah chu pumpelh nghâl mai suh. Rinna a neih lêt theih nân thiam takin ṭanpui ang che. (Juda 22, 23) School kal lai i nih a, in zirtîrtuin chanchhâwnna chungchâng a sawi chuan huaisen takin thilsiama i rinna chu hrilh rawh. In zirtîrtu leh i school kalpuite chhân lêt dân chu mak i ti hle thei a ni.

21. Jehova’n eng nge min tiam ṭheuh?

²¹ Jehova leh Isua chuan Petera chu a rinhlelhna leh hlauhna hneh thei tûrin an ṭanpui a. A hnuah, Petera chu mi dangte tâna rinna chungchângah entawn tûr ṭha tak a lo ni ta a ni. Chutiang bawkin, Jehova chuan rinnaa ding nghet tûrin min ṭanpui ṭheuh va. (1 Petera 5:9, 10 chhiar rawh.) Rinna nghet tak nei tûr chuan kan thawhrim a ngai a, chutianga kan thawhrim chuan Jehova’n mal min sâwm dâwn a ni. (ws15-E 09/15)