1. Tirhkoh Johana’n eng nge ngaihtuah tûra min fuih a, engvângin nge?

TIRHKOH Johana chuan Jehova min hmangaihna nasa tak chu ngun taka ngaihtuah tûrin min fuih a. 1 Johana 3:1-ah: “Pain min hmangaihna chu a va nasa em!” tiin kan chhiar a ni. Jehova min hmangaihzia leh min hmangaihna a târ lan dân ngun taka kan chhût chuan amah kan hnaihin, kan hmangaih lehzual a ni.

2. Engvângin nge mi ṭhenkhat tân Pathianin a hmangaih tih hriatthiam a harsat?

² Mi ṭhenkhatin Pathianin a hmangaih theih dân an hre thiam lo chu a lungchhiatthlâk hle. Pathianin mite a ngaihsak lo niin an ngai a. Ani chu dânte siam a, a zâwm lote hrem ṭhîntu angah chauh an ngai pawh a ni thei. Zirtîrna dik lote avângin, mi ṭhenkhat chuan Pathian chu nunrâwng leh hmangaih theih loh niin an ngai hial a ni. Mi dangte erawh chuan Pathianin mi zawng zawngte chu eng thil pawh ti se, a hmangaih vek niin an ngai thung. Mahse, Bible i zirna chuan Jehova chungchânga thu dik hre tûrin a ṭanpui tawh che a. Hmangaihna chu a mize ropui ber a ni tih leh a Fapa chu nangmah tlan nân a pe tih i hria a ni. (Johana 3:16;  1 Johana 4:8) Chuti chung pawhin, i thiltawnte avângin Jehova’n a hmangaihzia che chu i tân hriatthiam a harsa mai thei a ni.

3. Engin nge Jehova min hmangaihna hre thiam tûra min ṭanpui?

³ Jehova’n min hmangaih tih hre thiam tûr chuan min siamtu a ni tih kan hriatthiam hmasak a ngai a. Ani chu nunna min petu a ni. (Sâm 100:3-5 chhiar rawh.) Chu chu Bible-in mihring hmasa ber “Pathian fa” tia a sawi chhan chu a ni. (Luka 3:38) Jehova chu “kan Pa vâna mi” tia ko tûrin Isua chuan min zirtîr a. (Matthaia 6:9) Chuvângin, Jehova chu kan Pa a ni a, pa ṭha takin a fate a hmangaih angin min hmangaih a ni.

4. (a) Jehova chu eng ang Pa nge a nih? (b) He thuziakah leh a dawta thuziakah eng nge kan sawiho vang?

⁴ Mi ṭhenkhat tân hmangaihna ngah tak anga an pate ngaihtuah chu a harsa a. An naupan laia an pate’n nunrâwng taka an enkawl avângin rilru na takin an awm pawh a ni thei. Pathian Jehova erawh chuan a fate chungah chutiang chu a ti ngai lo vang. Ani chu Pa kan neih theih azawnga ṭha ber a ni. (Sâm 27:10) Min hmangaih êm avângin kawng tam takin min enkawl a. Min hmangaih tih kan hriat poh leh kan hmangaih zual sauh vang. (Jakoba 4:8) He thuziakah hian, Jehova’n min hmangaihna a târ lan dân kawng li kan sawiho ang a. A dawta thuziakah, amah kan hmangaihna kan târ lan theih dân kawng li kan enho bawk ang.

5. Pathianin mi zawng zawngte hnênah eng nge a pêk?

⁵ Tirhkoh Paula chuan Grik ram, Atheni khuaa a awm laiin milim tam tak a hmu a, chûng pathiante chu an nunna petuah an ngai tih a hria a ni. Chuvângin, “Pathian, khawvêl leh a chhûnga thil zawng zawng siamtu” chanchin chu an hnênah a hrilh ta a. Pathian chu “engkim hnêna nunnate, thâwknate leh thil zawng zawngte petu” a ni tih leh “amah avângin kan nung, kan che, kan awm,” tih a hrilh a ni. (Tirhkohte 17:24, 25, 28) Jehova chuan hlim taka kan nun theih nân kan mamawh zawng zawng min pe a. Min hmangaih avânga min pêk thil ṭhenkhatte chu han ngaihtuah teh.

6. Jehova’n awmna tûrin eng ang leilung nge min pêk? (A thupui chunga milem en rawh.)

⁶ Entîr nân, Jehova chuan kan tân leilung mawi tak a buatsaih a. (Sâm 115:15, 16) Planet a siam zawng zawng zîngah leilung hi a danglam bîk niin a lang. Scientist-te chu vân boruakah zinin, planet tam tak an hmu chhuaka; mahse, mihringte nun theih nâna mamawh awm vekna planet dang an hmu lo. Jehova chuan nunna atâna kan mamawh apiang min pe mai ni lovin, hlim taka kan nun theih nân lei hi mawi tak, nuam tak, leh hmun him takah a siam bawk a ni. (Isaia 45:18) Kan Pa, Jehova’n awmna tûra leilung min pêk kan han ngaihtuah hian min hmangaihzia kan hre thei a ni.—Joba 38:4, 7; Sâm 8:3-5 chhiar rawh.

7. Jehova min siam dânin min hmangaih tak zet tih engtin nge a târ lan?

⁷ Jehova’n min hmangaihzia a lantîrna kawng dang leh chu amah entawn theihna neia min siam hi a ni. (Genesis 1:27) Chu mi awmzia chu min hmangaihna kan hre theiin, amah kan hmangaihna pawh kan lantîr thei bawk tihna a ni. Ani chuan hlimna dik tak min neihtîrtu chu a hria a. Naupangte chuan an nu leh pate’n an hmangaih tih an hriat hian an hlim hle ṭhîn a ni. Kan Pa, Jehova kan hnaih chuan kan hlim dâwn tih Isua sawi kha hre reng ang che. (Matthaia 5:3) Ani chuan ‘thil zawng zawng lâwmna tûrin’ min pe a. A thilphalin, min hmangaih hle tih a chiang a ni.—1 Timothea 6:17; Sâm 145:16.

8. Engvângin nge Jehova chu min zirtîr tûra kan duh?

⁸ Pate chuan an fate an hmangaih a, hruai sual emaw, bum emawa an awm chu an duh lo. Mahse, tûn laia nu leh pa tam tak chuan thil dik leh dik lo chungchânga Bible tehnate chu an pawm lo a ni. Chuvâng chuan an fate chu an kaihruai ṭha thei lo va, chu chuan hlim lohna leh rilru chiaina a thlen fo ṭhîn. (Thufingte 14:12) Jehova erawh chu “thutak Pathian” a nih avângin, a fate hnênah kaihhruaina ṭha ber a pe a. (Sâm 31:5) A chungchânga thu dik chu lâwm takin min zirtîr a. Amah chibai kan bûk dân tûr leh nun kawng ṭha ber chu min zirtîr bawk. (Sâm 43:3 chhiar rawh.) Chuti a nih chuan, min hmangaihzia lantîrtu eng thil nge Jehova’n min zirtîr?

9, 10. (a) Engvângin nge Jehova chuan a chanchin min hrilh? (b) A thiltum chungchâng eng nge min zirtîr?

⁹ A pawimawh ber chu Jehova’n a chanchin min hrilh hi a ni. Amah kan hriat a duh a. (Jakoba 4:8) Chuvângin a hming min hrilh a. Bible-ah a hming chu hming dang zawng aiin a chuang tam zâwk a ni. Jehova chuan eng ang Mi nge a nih min hrilh a. A thilsiamte kan han en hian, thiltithei leh fing tak a nihzia kan hria a ni. (Rom 1:20) Bible kan chhiar hunah pawh a dikzia leh min hmangaihzia kan hre thei a. Jehova mize duhawm takte kan hriat hian amah kan hnaih zual sawt a ni.

¹⁰ Jehova chuan a thiltumte min zirtîr bawk a. A chhûngkaw zînga mi kan ni tih min hrilh a. A chhûngkuaa mite inlungrual tak leh inrem taka kan thawhho theihna tûra kan laka a beiseite pawh min hrilhfiah bawk. Thil ṭha leh  ṭha lo chungchânga thu tlûkna insiam thei tûrin Pathianin min siam lo tih Bible chuan chiang takin a târ lang. (Jeremia 10:23) Jehova chuan kan tâna a ṭha ber chu a hria a. A thuneihna kan pawm a, a thu kan awih chauhvin remna leh nun lungawithlâk kan nei thei ang. Jehova’n min hmangaih avângin he thu pawimawh tak hi min hrilh a ni.

11. Hmangaihna ngah tak kan Pa chuan hma lam hun tûr eng nge min hrilh?

¹¹ Hmangaihna ngah tak pa chuan a fate hma lam hun tûr chu ngun takin a ngaihtuah a. Nun lungawithlâk tak an neih a duh a ni. Tûn laia mi a tam zâwkte chuan hma lam hun tûr an lungkham a, mi tam takte chuan kum hlun lo tûr thilte thawh nân nun an khawhral a ni. (Sâm 90:10) Kan Pa, Jehova chuan tûna nun lungawithlâk neih dân min zirtîr mai ni lovin, hma lam hun duhawm tak min tiam bawk avângin kan va lâwm êm!

12. Engtin nge Jehova’n Kaina leh Baruka ṭanpui a tum?

¹² Pathian Jehova’n Kaina chu thil ṭha lo tak a ti dâwn tih a hriat khân: “Engati nge i thin a ur? Engati nge i hmêl a lo dur tâk? Thil i tih ṭhat chuan lawm i hlawh dâwn lo vem ni?” tia zâwtin ṭanpui a tum a. (Genesis 4:6, 7) Kaina chuan Jehova ṭanpuina a hnâwl a, a tawrh phah ta a ni. (Genesis 4:11-13) Ṭum dangah, Baruka chu a rilru put hmang dik lovin a tihahin, a tichau tih Jehova’n a hria a. Chuvângin, Baruka chu a thil ngaihtuah a dik lo va, a inthlâk a ngai tih a hrilh a. Baruka chuan Jehova zilhna chu a pawm a, a nun a chhanhim a ni.—Jeremia 45:2-5.

13. Jehova chhiahhlawh rinawmte chuan harsatna an tawh aṭangin eng nge an zir?

¹³ Jehova chuan min hmangaih avângin min kaihruaiin, min thunun a. A ṭûl hunah min siam ṭha mai ni lovin, min zirtîr bawk. (Hebrai 12:6) Jehova’n mi ṭha zâwk ni tûra a zirtîr a chhiahhlawh rinawmte chanchin chu Bible-ah kan chhiar a. Entîr nân, Josefa, Mosia, leh Davida-te chuan hun harsa tak an paltlang a ni. Chûng hun chhûng chuan Jehova’n anni chu a awmpui tlat a. Mawhphurhna sâng zâwk a pêk khân, harsatna an tawh chhûnga an thil zirte chuan a ṭanpui a. Jehova’n a mite a ṭanpui dân leh a zirtîr dân Bible-a kan chhiarna chuan, min hmangaih tak zet tih min hriattîr a ni.—Thufingte 3:11, 12 chhiar rawh.

14. Thil engemaw kan tihsual hunah engtin nge Jehova’n min hmangaihna a lantîr?

¹⁴ Thil kan tihsual hunah pawh Jehova chuan min hmangaih zawm zêl a. A thununna kan zawm a, kan inlamlêt phawt chuan min ngaidam “nasa” dâwn si a. (Isaia 55:7) Chu mi awmzia chu eng nge? Davida’n Jehova ngaihdamna chungchângah: “Ani chuan i khawlohna zawng zawng a ngaihdam ṭhîn a; i natna zawng zawng a tidam ṭhîn a; boralna lak ata i nun chu a tlan ṭhîn a; ngilneihna leh lainatnate a khumtîr ṭhîn chia. Chhak leh thlang a inhlat ang hian, kan bawhchhiatnate chu kan hnên ata a dah sawn ta daih a,” tia a sawi chuan zahngaihnaa khat Pa kan neihzia a târ lang a ni. (Sâm 103:3, 4, 12) Jehova chuan kawng hrang hranga min thununin, min kaihruai a. I inthlâk danglam vat ṭhîn em? Jehova’n min thunun chhan chu min hmangaih vâng a ni tih hre reng ang che.—Sâm 30:5.

15. Jehova’n min hmangaihna a târ lan dân kawng dang chu eng nge ni?

¹⁵ Hmangaihna ngah tak pa chuan hlauhawm lakah a chhûngkuate a vênghim ṭhîn a. Chutiang chuan kan Pa, Jehova’n a ti a ni. Fakna hla phuahtu chuan Jehova chungchâng chu heti hian a sawi: “Ani chuan a mi thianghlimte nunna chu a vawng ṭha ṭhîn a; anni chu mi suaksualte kut ata a chhanhim ṭhîn,” tiin.  (Sâm 97:10) Hei hi han ngaihtuah teh: I mit chu i tâna a hlut avânga i vênghim vat ṭhîn angin, Jehova chuan a mite chu a tâna an hlut avângin a vênghim vat ṭhîn, tih hi.—Zakaria 2:8 chhiar rawh.

16, 17. Engtin nge Jehova’n hun kal tawhah leh tûn laiah a mite a vênhim?

¹⁶ Hun kal tawhah leh tûn laiah Jehova’n a mite a vênhim dân kawng khat chu a vântirhkoh hmangin a ni. (Sâm 91:11) Vântirhkoh pakhat chuan zan khatah Assuria sipai 185,000 a tihlum a, Pathian mite chu a chhanhim a ni. (2 Lalte 19:35) Kum zabi khatnaah khân vântirhkohte chuan Petera, Paula, leh mi dangte chu tânin aṭangin an chhanchhuak a. (Tirhkohte 5:18-20; 12:6-11) Tûn hnai mai khân, Africa ram pakhatah indona râpthlâk tak a thleng a. Insualna, thilrûkna, inpâwngsualna, leh inthahnate avângin ram chu buainain a khat zo a ni. Unaute zîngah thi awm lo mah se, tam tak chuan an thil neihte an chân vek a. Mahse, an vai chuan Jehova’n a hmangaih tih leh a enkawl tih an hria a. Nasa taka an tuar chung pawhin an hlim reng tho a ni. Headquarter aiawhtuin unaute a tlawh a, an chanchin a zawh chuan, “Engkim a ṭha vek e, Jehova chûngah kan lâwm hle!” tiin an chhâng a ni.

¹⁷ Zirtîr Stephena leh amah ang Jehova chhiahhlawh ṭhenkhatte chu an rinawm avângin tihhlum an ni a. Jehova chuan chutiang lak ata chu a vênghim reng lo. Mahse, Setana’n kawng hrang hranga bum a tumnate laka vaukhânin a mite chu a pâwl angin a vênghim a ni. (Ephesi 6:10-12) Chûng vaukhânnate chu Bible-ah leh Jehova inawpna pâwl tih chhuah thu leh hla chhuahahte kan hmu a. Entîr nân, Internet te, sum ngainatna te, nungchang ṭhat lohna te, tharum thawhna film te, lehkhabu te, leh games-te a hlauhawm theih dân kan zir a. Jehova chuan min hmangaihin, min vênhim a duh tih a chiang hle.

18. Jehova’n a hmangaihna che chu engtin nge i ngaih?

¹⁸ Mosia chuan Jehova rawng a bâwl chhûng kumte ngaihtuah lêtin Jehova’n a hmangaih tih a hre chiang a. “Aw, zîngah chuan i ngilneihnain min titlai ang che; kan dam chhûng zawng zawng hian kan hlima kan lâwm theihna tûrin,” tiin a sawi a ni. (Sâm 90:14) Jehova min hmangaihna hre thiam leh, dawng theia kan awm hi malsâwmna ropui ber a ni. Jehova hmangaih nih chu chawimawina ropui a va ni êm! “Ngai teh u, Pain min hmangaihna chu a va nasa êm!” tia sawitu tirhkoh Johana thusawi chu kan ṭâwmpui ve a ni.—1 Johana 3:1. (ws15-E 09/15)