Kum tin hian, Bible leh Bible thu leh hla chhuah maktaduai tam tak kan chhu chhuakin, kan sem chhuak a. Khawvêl pumah branch office-te kan sa a, lehkha chhutna khâwl kan bun bawk a. Kohhran sîng tam taka mite chu Kingdom Hall tia koh, Pathian biakna in pângngai takah chuan an inhmu khâwm ṭhîn a ni. Chûng sênso zawng zawngte chu tuin nge tum?

Kan rawngbâwlna chu thawhlâwm hmang chauhva chhawmdâwl a ni a. (2 Korinth 9:7) Kum 1879 khân, he magazine chhuak a ṭum hnihna chuan: “‘Zion’s Watch Tower’ [chutih laia he magazine hming] hian, JEHOVA ṭanpuina a dawn kan ring a, chuvângin mihring ṭanpuina a dîl ngai lo vang a, a ngên ngai hek lo vang,” tiin a sawi a. Chutiang ngei chuan kan awm a ni.

Thawhlâwmte chu kan branch office-tea thawn a ni a, a nih loh leh Kingdom Hall-a thawhlâwm bâwmahte thlâk a ni. Mahse, sâwma pakhat kan pe ngai lo va, thawhlâwm kan khawn ngai hek lo, kan rawngbâwlna leh thu leh hla chhuahte atân a man kan la lo bawk. Thu hril tûr te, kohhrana zirtîr tûr te, leh Pathian biakna hmun saknaa ṭanpui tûr tein hlawh pêk kan ni lo. Isua chuan: “Athlâwnin in hmu a, athlâwnin pe ang che u,” a ti si a. (Matthaia 10:8) Kan branch office-a rawngbâwltu zawng zawng leh Jehova Thuhretu Governing Body member-te pawh tiamin kan world headquarter-a rawngbâwltute chuan hlawh an nei lo a ni.

Thawhlâwm sum leh paite chu leilung chhiatna tuartute chhawmdâwl nâna hman a ni bawk a. Kristian hmasate chuan harsatna tâwkte mamawh atân phal takin an thawh a ni. (Rom 15:26) Chutiang bawkin, keini pawhin harsatna tâwkte chu an in leh Pathian biakna hmun sak ṭhatnaahte kan ṭanpui a, ei tûr te, silhfên te, leh damdawi lama inenkawlnate kan pe bawk a ni. (wp15-E 09/01)