BIBLE THU BUL: “Tupawhin tu chungah pawh thupawi nei ang ula . . . inngaidam tawn ula; Lalpa chuan a ngaidam che u ang tak khân ngaidam ve rawh u.”—Kolossa 3:13.

Eng nge a awmzia? Bible-ah chuan, sual chu leiba nêna khaikhin a ni a, ngaihdamna chu leiba ngaihdam nêna khaikhin a ni thung. (Luka 11:4) Lehkhabu pakhat chuan Pathian Lehkha Thua Grik thu mal “ngaidam” tia lehlin awmzia chu “leiba ṭhîng lo va, bat raltîr” tihna a nih thu a sawi. Chuvâng chuan, kan chunga thiltisualtu kan ngaihdam hian, a hnên aṭanga beisei lêt engmah kan nei lo va. Ngaihdam kan inhuamna chu a thilsual tih kan pawmpui emaw, min tihnatna kan sawi nêp emaw tihna a ni lo. “Thupawi” tak anga a lan hunah pawh, huatna chu theihnghilh kan tum tihna a ni zâwk.

Tûn laiah a la ṭangkai em? Mihring ṭha famkim lo kan nih angin, thil kan tisual vek a. (Rom 3:23) Chuvângin, mite min ngaihdam a ngaih hun a awm dâwn avângin, mi dangte ngaihdam duhna kan neih chu a finthlâk a ni. Chu bâkah, ngaihdam kan tum zâwk hian, mahni ngei pawhin kan hlâwkpui bawk. Engtin nge chutiang chu a nih?

Thinurna leh huatna kan pai reng a, kan ngaihdam duh loh hian mahni kan intina a ni. A ṭha lo zâwnga thil ngaihtuahna chuan kan hlimna a rubo va, kan nun a thununin, min tihrehawm a. Natna khirh tak a thlentîr thei bawk a ni. Damdawi lam chanchin ziakna Journal of the American College of Cardiology chuan Dr. Yoichi Chida-a leh Professor of Psychology Andrew Steptoe-ate’n: “Thil hmuh chhuah thar ber chuan thinurna leh huatna pai reng chu lungnatna hlauhawm tak nên a inkûngkaih hnaih hle,” tia thu tâwp an siam chu a târ lang.

Ngaihdamna a hlâwknate hi han ngaihtuah teh. Mi dangte kan ngaihdam thlap hian, inlungrualna leh remna kan vawng a, chu chuan inlaichînna ṭha a awm zawmtîr a ni. Mi sual inlamlêtte ngaidam a, chutianga ti ve tûra min beiseitu, Pathian entawntute kan ni tih târ lan chu thil pawimawh ber a ni.—Marka 11:25; Ephesi 4:32; 5:1. (wp15-E 10/01)